Йаһоԝа Гьлийе Ԝә «Амин» Ԛимәт Дькә

ЙАҺОԜА һʹәбандьна мә ԛимәт дькә. Әԝ дина хԝә дьдә хьзмәткʹаред хԝә у гӧһ дьдә ԝан. Тʹӧ тьштәки бьчʹук жи, чь кӧ әм бона пәсьндайина ԝи дькьн, әԝ пьшт гӧһе хԝәва навежә (Малх. 3:16). Бьдьнә һʹәсабе хԝә, хәбәра «амин» кӧ әм беһʹәсаб гәләк щар дьбежьн, Йаһоԝа һәла һе әви гьлийе бьчʹук жи дьшекьринә. Ле чьрʹа? Сәва щаба ве пьрсе пебьһʹәсьн, ԝәрә бьньһерʹьн кӧ әԝ гьли чь те һʹәсабе у Кʹьтеба Пирозда әԝ ча те хәбьтандьне.

ԜЕ «ҺʹӘМУ МЬЛӘТ БЕЖӘ: ‹АМИН›»

Хәбәра «амин» те һʹәсабе «бьра ӧса бә» йан жи «рʹаст ә». Әԝ гьли жь кʹока хәбәра Ибрани һатийә, кʹижан кӧ те һʹәсабе «амьн бьн» йан жи «бь итʹбар бьн». Щара әв гьли дьданә хәбате ԝәʹде диԝане. Ӧса жи чахе кәсәки сонд дьхԝар, паше дьгот «амин», сәва кӧ избат кә, ԝәки гьлийед ԝи рʹаст ьн у сонда ԝи чь ахьрийе жи жерʹа бинә, әԝ ԛәбул дькә (Жьмар 5:22). Чахе әԝи бәр щьмәʹте әԝ гьли дьгот, ида һе зедә мәщбур бу хԝәйе созе хԝә бә (Нәһәм. 5:13).

Кʹьтеба Ԛануна Дӧщарида гьли «амин» бь щурʹе мәхсус те хәбьтандьне. Паши ве йәке чахе Исраели кʹәтьнә Әʹрде Создайи, әԝана ортʹа Чʹийайе Әбал у Чʹийайе Гәризимеда тʹоп бун, сәва Ԛануне бьбьһен. Ле әԝана ԝедәре бун нә тʹәне бона ве йәке кӧ бьбьһен, ле ӧса жи сәва әʹлам кьн, ԝәки Ԛануне ԛәбул дькьн. Ԝана әԝ йәк да кʹьфше чахе готьн «Амин!», гава һатә хԝәндьне кӧ кʹе гӧрʹа Ԛануне нәкә ԝе чь ахьрийе бьстинә (Ԛан. Дщр. 27:15-26). Бьдьнә бәр чʹәʹве хԝә, дәнге бь һʹәзара мера, жьна у зарʹа кӧ бь дәнге бьльнд щаба хԝә дан! (Йешу 8:30-35). Бешьк, ԝана ԝе тʹӧ щар бир нәкьрана гьлийед кӧ ве рʹоже һатьнә готьне. У әԝ Исраели хԝәйе гьлийе хԝә бун, чьмки Кʹьтеба Пироз дьбежә: «Исраел, тʹәмамийа жийана Йешуда у ль пәй Йешу, һʹәта кӧ сәрокед каләпиред дьжин у йед кӧ бь һәр тьштед кӧ Хӧдан бона Исраел чекьрийә дьзаньн, ԛультийе [хьзмәткʹарийе] жь Хӧданрʹа кьрьн» (Йешу 24:31).

Иса жи хәбәра «амин» дьда хәбате, ле бь щурʹе мәхсус, сәва бьдә кʹьфше кӧ гьлийед ԝи рʹаст ьн. Иса гьли «амин» (сәр Кӧрманщи әԝ һатийә ԝәлгәрʹандьне «рʹаст»), нә кӧ паши гьлийед хԝә дьгот, сәва бьдә кʹьфше кӧ әԝ рʹаст ьн, ле дәстпека гьлийед хԝәда. Щара әԝи әԝ хәбәр дьԝәкʹьланд, у дьгот «амин, амин» (Мәт. 5:18; Йуһʹн. 1:51). Ԝи щурʹәйи әԝи гӧһдарванед хԝә дьда баԝәркьрьне, ԝәки гьлийед ԝи сәд сәләфи рʹаст ьн. Әԝи бедӧдьлибун дьгот, чьмки тʹәне ԝирʹа һʹӧкӧм һатә дайине, ԝәки һʹәму созед Хԝәде әԝ бинә сери (2 Корн. 1:20; Әʹйан. 3:14).

«ТʹӘМАМИЙА ЩЬМӘʹТЕ ГОТ ‹АМИН› У ПӘСЬН ДА ЙАҺОԜА»

Исраелийа хәбәра «амин» һьнге жи дьданә хәбате, чахе пәсьн дьданә Йаһоԝа у жерʹа дӧа дькьрьн (Нәһәм. 8:6; Зәб. 41:13). Чахе ԝана паши дӧа әԝ хәбәр дьготьн, ԝана дьда кʹьфше, ԝәки ԝан гьлийарʹа ԛайил ьн. Ԝи щурʹәйи һʹәмушкед кӧ ԝедәре бун, һʹәбандьнеда дьбунә йәк. Мәсәлә, чахе Даԝьд Пʹадша Сьндоԛа Йаһоԝа ани Оршәлиме, һьнге жи ӧса ԛәԝьми. Ԝәʹде ве щәжьне, әԝи бь дьл у щан кʹьламти дӧа кьр, кӧ 1 Дирок 16:8-36-да ньвисар ә. Гьлийед ԝийи дьлсах ӧса сәр щьмәʹте һʹӧкӧм бун, ԝәки «тʹәмамийа щьмәʹте гот ‹Амин› у пәсьн да Йаһоԝа», ДТʹ. Бәле, бь ве йәке жи шабуна ԝан зедә бу, кӧ ԝана тʹәвайи Йаһоԝа дьһʹәбандьн.

Мәсиһийед ԛьрʹна йәке жи хәбәра «амин» дьданә хәбате чахе пәсьн дьданә Йаһоԝа. Ньвискʹаред Кʹьтеба Пироз нәʹмед хԝәда гәләк щар әԝ хәбәр дьданә хәбате (Рʹом. 1:25; 16:27; 1 Пәт. 4:11). Кʹьтеба Әʹйантида ньвисар ә ԝәки һәла һе әʹфьринед сәр әʹзмана жи пәсьна дьдьнә Йаһоԝа бь ԝан гьлийа: «Амин, Һалелуйа!» (Әʹйан. 19:1, 4). Мәсиһийед бәре жи чахе щьвинада дӧа дькьрьн, хьлазийеда дьготьн «амин» (1 Корн. 14:16). Ле ԝана әԝ гьли беһʹәмде хԝә нәдьгот.

ЧЬРʹА ГЬЛИЙЕ ԜӘ «АМИН» ԚИМӘТ Ә

Мә шеԝьр кьр кӧ әԝ гьли жь кʹидәре те, у мә фәʹм кьр ԝәки чьрʹа әв гьли «амин», кӧ хьлазийа дӧада те готьне, фәрз ә. Чахе әм дӧайед хԝәда әви гьли дьбежьн, әм дьдьнә кʹьфше, ԝәки чь кӧ мә гот, бона мә фәрз ә. У чахе әм щьватеда бь дәнге бьльнд йан жи дьле хԝәда дьбежьн «амин», әм дьдьнә кʹьфше ԝәки ԛайил ьн ԝан гьлийарʹа. Дина хԝә бьдьне, диса чьрʹа әԝ гьли фәрз ә.

Чахе кәсәк дӧа дькә, әм рʹьнд гӧһ дьдьне, чьмки әԝ жи дькʹәвә нава һʹәбандьна мә. Әм ԝәʹде дӧа дьдьнә кʹьфше, кӧ Йаһоԝа дьһʹәбиньн нә тʹәне бь ве йәке кӧ чь дьбежьн, ле ӧса жи ча хԝә дьдьнә кʹьфше. Чахе әм ньһерʹандьна рʹаст хԝәй дькьн сәр дӧа у рʹьнд гӧһ дьдьн, әм бь дьле хԝәйи сах дьбежьн «амин».

Әм чаԝа хьзмәткʹаред Хԝәде дьбьнә йәк. Дӧайед щьватеда али мә дькьн, ԝәки рʹьнд гӧһдар бьн (Кʹар. Шанд. 1:14; 12:5). Чахе әм тʹәвайи әԝи гьли дьбежьн, әм тʹәви хушк-бьра һе дьбьнә йәк. Фьрԛи тʹӧнә әм бь дәнге бьльнд дьбежьн йан дьле хԝәда, йәкә чахе әм тʹәвайи әԝи гьли дьбежьн, әԝ йәк һе зедә Йаһоԝа һелан дькә, ԝәки хԝәстьна мә дӧада бинә сери.

Хушк чахе щьвате пе тʹеле дьбьһе, ԝәʹде дӧа сәре хԝә бәржер дькә — Гьлийе мә «амин» пәсьна дьдә Йаһоԝа

Әм пәсьна дьдьнә Йаһоԝа. Йаһоԝа дина хԝә дьдә һәла һе тьштед бьчʹук жи, кӧ әм бона ԝи дькьн (Луԛа 21:2, 3). Әԝ нет у дьле мә дьвинә. Һәла һе жи чахе әм пе тʹеле щьвате дьбьһен, әм гәрәке дӧдьли нәбьн, ԝәки Йаһоԝа пьшт гӧһе хԝәва навежә, гава әм бь мьлукти дьбежьн «амин». Чахе әм дьбежьн «амин», әм тʹәви щьвате пәсьна дьдьнә Йаһоԝа.

Гьлийе мә «амин» дьбәкә те кʹьфше һаԛас ԛимәт нинә, ле бь рʹасти әԝ гәләк фәрз ә. Әнсиклопедийакә Кʹьтеба Пирозда те готьне, кӧ хьзмәткʹаред Хԝәде «һәма тʹәне бь сайа ве хәбәре жи» дькарьн нишан кьн «баԝәри, ԛәбулкьрьн у һевийа хԝәйә мәзьн, кӧ дьле ԝанда һәйә». Бьра һәр щар гьлийе мә «амин», пәсьна бьдә Йаһоԝа (Зәб. 19:14).

ГӘЛО ҺӘР ГАВ ЛАЗЬМ Ә БЕЖЬН «АМИН»?

«Амин» хәбәрәкә ӧса нинә кӧ сьвьк сәр бьньһерʹьн. Ле һәрге кәсәк дӧада тьштәки нәрʹаст бежә, гәло әм гәрәке хԝә бьгьрьн у нәбежьн «амин»? На, әм дькарьн бежьн. Нә Йаһоԝа занә, ԝәки әм гьшк жи щара зьманда шашийа бәрʹдьдьн, ле әԝ дина хԝә надә сәр ԝан шашийа. Ләма жи дәԝса гӧһе хԝә бьдьне кӧ һәр гьлик ча те готьне, дина хԝә бьдьнә сәр фькьра, у ӧса дьбәкә һуне бьхԝазьн бежьн «амин».

Алики дьнва жи, әм навежьн «амин», нә бь дәнге бьльнд нә жи дьле хԝәда, гава мәрьве нәбаԝәр дӧа дькә. Ле дәрәщед ӧсада әм гәрәке чь бькьн? Мәсәлә, дьбәкә әм чунә сәр ԛәԝьмандьнәке, у кәсәки нәбаԝәр гәрәке дӧа бькә. Йан жи дьбәкә әм чунә малбәтәкә ӧса, кʹидәре малхе мале кӧ нәбаԝәр ә, сафи дькә ԝәки тʹәви нәфәред хԝә дӧа бькә. Һьнге әм гәрәке чь бькьн?

Һәрге әм кʹәтьнә дәрәщед ԝи щурʹәйи, әм дькарьн хԝә кәрʹ кьн, ле бь ԛәдьр бьн. Әм гәрәке нәвежьн «амин», нә жи гәрәке дәсте һәв бьгьрьн ԝәʹде дӧа, чьмки әԝана дькарьн бьфькьрьн, кӧ әм жи тʹәви дӧайе ԝан ьн. Дьбәкә әм бьхԝазьн дьле хԝәда хԝәха хԝәрʹа дӧа бькьн, ле бь дәнге бьльнд гәрәке нәвежьн «амин», ԝәки әԝ мәрьв нәфькьрьн, кӧ әм бона дӧайе ԝан дьбежьн «амин». Һәрге мәрьв ԝәʹде дӧакьрьне рʹадьбьн сәр пʹийа, әм гәрәке хԝәха сафи кьн рʹабьн йан на. Рʹабун йан жи сәре хԝә бәржеркьрьн, һʹәбандьн найе һʹәсабе. Әԝ ида Мәсиһива гьредайи йә, ԝәки сафи кә фьлан дәрәщеда чь бькә, у тʹӧ кәс гәрәке бона сафикьрьна ԝи, ԝи сущдар нәкә.

Әԝ дәрәщед жоре һе зедә нишан дькьн, кӧ чьрʹа гьлийе мә «амин» бона Йаһоԝа фәрз ә.