Дӧа Бькә, ԝәки Ԛәбулкьрьна Хԝәде Бьстини

Хԝәде пʹешкʹешәкә мәхсус дайә мәрьва. Демәк мәрьв дькарьн тʹәви Хԝәде хәбәр дьн у бь дӧа дьле хԝә ԝирʹа вәкьн. Даԝьд пʹехәмбәр дӧайед хԝәда готә Хԝәде: «Тӧ кӧ дӧа дьбьһейи, һәр мәрьве бәрбь Тә бе» (Зәбур 65:2). Ле гәло, әм чаԝа гәрәке дӧа бькьн, кӧ Хԝәде гӧһ бьдә мә у мә кʹәрәм бькә?

БЬ ДЬЛ У МЬЛУКТИ ДӦА БЬКӘ

Һун бь дӧайед хԝә дькарьн «[Хԝәдерʹа] дьле хԝә вәкьн» (Зәбур 62:8). Хԝәдайе Һьмзор дӧайед жь дьл ԛимәт дькә.

НАВЕ ХԜӘДЕЙӘ ШӘХСИ БЬДӘ ХӘБАТЕ

Сәрнавед Хԝәде гәләк ьн, ле тʹәне навәки ԝи һәйә. «Әз ХӦДАН ьм [Йаһоԝа, ДТʹ], наве мьн әԝ ә» (Ишайа 42:8). Ньвисаред Пирозда наве Йаһоԝа ԝәкә 7 000 щара һатийә ньвисаре. Гәләк пʹехәмбәра наве Хԝәдейә шәхси дӧайед хԝәда дьданә хәбате. Мәсәлә, Бьраһим пʹехәмбәр гава дӧа дькьр, наве Хԝәде һьлдьда (Дәстпебун 18:30). Әм жи чахе дӧа дькьн, гәрәке наве Хԝәдейә шәхси, демәк Йаһоԝа, бьдьнә хәбате.

СӘР ЗЬМАНЕ ХԜӘЙИ ДЕ ДӦА БЬКӘ

Фьрԛи тʹӧнә әм сәр чь зьмани хәбәр дьдьн, Хԝәде фькьр у һәстед мә фәʹм дькә. Хәбәра ԝи мә дьдә баԝәркьрьне, ԝәки «Хԝәде рʹасти жи фьрԛийе накә нава мьләта. Ле жь нав һәр мьләтида, йе кӧ жь ԝи хоф дькә у рʹастийе дькә ль ԝи ԛәбул ә» (Кʹаред Шандийа 10:34, 35).

Сәва кӧ ԛәбулкьрьна Хԝәде бьстиньн, әм гәрәке нә тʹәне дӧа бькьн, ле һе зедә тьшт бькьн. Готаред дьнда әме һе зедә дәрһәԛа ве йәке шеԝьр кьн.