Кани бона «Бәрнама Щьвине, Бьжин у Хьзмәт кьн»
4-10 АДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | РʹОМАЙИ 12-14
«Чь Те Һʹәсабе Һʹьзкьрьна Мәсиһийа»
(Рʹомайи 12:10) Һ′ьзкьрьнеда чаԝа хушк-бьра сәр һәв шәԝат бьн, ԛәдьркьрьнеда жь һәвдӧ дәрбазтьр бьн.
it-1 55
Һәвгьредан
Һʹьзкьрьна Мәсиһийа (бь зьмане Йунани филаделфийа, чь кӧ рʹастә рʹаст те һʹәсабе, «һәвгьредана незик тʹәви бьра»), гәрәке һʹәму нәфәред щьвата Мәсиһийа ча бежи һәвва гьредә (Рʹм. 12:10; Ибр. 13:1; ӧса жи бьньһерʹә 1 Пт. 3:8.) Демәк һәләԛәтийа һәр кәса щьватеда, гәрәке ӧса ԛайим, незик у дьлован бә, ча малбәтеда. Рʹаст ә әндәмед щьвате ида һʹьзкьрьна бьрати һьндава һәвда дьдьнә кʹьфше, ле диса жи, жь ԝана те хԝәстьне ԝәки һе зеде һʹьзкьрьне бьдьнә кʹьфше (1 Тʹс. 4:9, 10).
Хәбәра Йунани филосторгос те һʹәсабе «һәстед назьк» у те готьне сәр бәндә, щәм кʹижани кӧ һәләԛәтийа незик тʹәви йе дьн һәйә. Дӧ кʹокед ԝе хәбере һәнә. Йәк жь ԝан стерго, гәләк щар те хәбьтандьне кӧ бьдьнә кʹьфше һәләԛәтийа тәбийәти нава нәфәред мале. Паԝлосе шанди Мәсиһийа һелан дькьр әве хәйсәте нав хԝәда пешда биньн (Рʹм. 12:10). Паԝлос ӧса жи дьгот, ԝәки рʹожед ахьрийеда мәрьве бьбьнә «дьлсар, берʹәʹм» (бь Йунани асторгой) у мәрьвед ӧса ԝе һежайи мьрьне бьн (2 Тим. 3:3; Рʹм. 1:31, 32).
(Рʹомайи 12:17-19) Жь бәр хьрабийева хьрабийе ль т′ӧ кәси нәкьн. Чь ль бәр ч′ә′ве һ′әму мәрьва ԛәнщ ә, ԝе бькьн. 18 Чьԛас жь дәст ԝә те, т′әви һ′әму мәрьва ә′дьлайийеда бьн. 19 Һ′әйфе һьлнәдьн, дәлално, ле щи бьдьнә һерса Хԝәде, чьмки ньвисар ә: «Һ′әйфһьлдан дәсте мьн ә, әзе һ′әйфе һьлиньм, Хӧдан дьбежә».
ԝ09 15/10 8 ¶3
«Т′әви Һ′әму Мәрьва Ә′дьлайийеда бьн»
3 Бьхунә Рʹомайи 12:17. Паԝлос шьровәкьр кӧ чахе әм рʹасти мьԛабьлибуне тен, әм гәрәке жь бәр хьрабийева хьрабийе ль т′ӧ кәси нәкьн. Әве ширәте хут фәрз ә һьнге биньн сери, чахе малбәт алийе религийайеда пʹара вәкьрийә. Мәсиһи хԝә дур дьгьрә жь ԝе йәке, кӧ бь гьли йан кьред хԝәйә нәбаш, щаба ԝи бьдә кʹи кӧ дьле ԝи ешанд. Чахе бәндә жь бәр хьрабийе, хьрабийе дькә, тʹӧ ԛәнщи жь ве йәке найе. Алийе дьнва ньһерʹандьна ӧса тʹәне дькарә дәрәще һе хьраб кә.
ԝ07 1/7 24-25 ¶12-13
«Жь Бәр Хьрабийева Хьрабийе ль т′ӧ Кәси Нәкьн»
12 Паԝлос дьбежә кӧ чаԝа хԝә кʹьфш кьн тʹәви баԝәра у бебаԝәра: «Жь бәр хьрабийева хьрабийе ль т′ӧ кәси нәкьн». Әв ширәтәкә логики йә, у Паԝлос зедә дькә ԝәки, «жь хәраб нәфрʹәт бькьн, ИМ». Гәло чаԝа мәрьв дькарә бежә ԝәки әв хьрабийе нәфрʹәт дькә, чахе әԝ хԝәха жь бәр хьрабийева хьрабийе дькә? Һәрге бәндә ӧса дькә әв нькарә бежә ԝәки һʹьзкьрьна бе дӧрʹути йә. Паше Паԝлос дьбежә: «Чь ль бәр ч′ә′ве һ′әму мәрьва ԛәнщ ә, ԝе бькьн» (Рʹомайи 12:9, 17). Ча әм дькарьн ԝан гьлийа бьдьнә хәбате?
13 Пешийа ԝе йәке, нәма хԝәда Корьнтʹийарʹа, Паԝлос ньвиси дәрһәԛа пәйкʹәтьна кʹижан кӧ рʹасти шандийа һатьбу. Әԝи гот: «Әм жь дьнйайерʹа, жь мьлйак′әт у мьрованрʹа бун тʹәмашә. . . . Гава кӧ чʹери мә те кьрьн, әм дӧайе хере дькьн; гава тәнгаһи ль мә те кьрьн, әм сәбьр дькьн. Гава кӧ бӧхтʹан ль мә те кьрьн, әм бь нәрми дьпәйивьн» (1 Корьнтʹи 4:9-13, ИМ). Анәгори ԝе йәке, иро мәрьв дина хԝә дьдьн Мәсиһийед рʹаст. Чахе мәрьвед дәр-дора мә дьвиньн, кӧ әм бь ԛәнщийе хԝә кʹьфш дькьн һьндава ԝан, кʹи кӧ һьндава мәда нәрʹаст ә, әв дькарә баш сәр ԝана һʹӧкӧм кә у әԝана ԝе бь һазьрбун гӧһ бьдьнә мьзгинийа хере (1 Пәтрус 2:12).
(Рʹомайи 12:20, 21) Ле бәле әв жи һәйә: «Һәгәр дьжмьне тә бьр′чи йә, нен бьде у һәгәр т′и йә, аве бьде, чьмки тӧ бь ве йәке пьриске егьр сәр сәре ԝи т′оп дьки». 21 Нәһелә хьраби сәр тә к′әвә, ле бь ԛәнщийе тӧ сәр хьрабийе к′әвә.
ԝ12 15/11 29 ¶13
Һазьр бьн Һәв Бьбахшиньн
Дьԛәԝьмә щарна тӧ дьфькьри кӧ дькари али кәсәки бьки, кʹижан кӧ дьле тә ешандийә, ԝәки әԝ нормед Мәсиһти фәʹм бькә. Паԝлосе шанди ньвиси: «‹Гава мә р′әзил дькьн, әм дӧа ль ԝан дькьн, гава мә дьзериньн, әм сәбьр дькьн, гава наве мәр′а дьлизьн, әм ль бәр ԝан дадьхьн›; Нәһелә хьраби сәр тә к′әвә, ле бь ԛәнщийе тӧ сәр хьрабийе к′әвә» (Рʹм. 12:20, 21). Бь дьлрʹәмийа хԝә һун дькарьн дьле ԝи мәрьви нәрм кьн, кʹижан кӧ дьле ԝә ешандийә, у али ԝи бькьн ԝәки хәйсәтед ԝийи баш пешда бен. Чахе тӧ һьндава ԝи мәрьви фәʹмкʹарийа хԝә дьди кʹьфше, дьлрʹәми у ԛәнщийа хԝә, ӧса тӧ дькари али ԝи бьки ԝәки рʹастийа Кʹьтеба Пироз пебьһʹәсә. Чь жи һәбә щаба ԝәйи нәрм, ԝе мәщале бьдә ԝи мәрьви ԝәки сәр кьред ԝә бьфькьрә (1 Пт. 2:12; 3:16).
Хьзна Кʹьтеба Пироз Бьгәрʹьн
(Рʹомайи 12:1) «Аԝа әз һиви жь ԝә дькьм хушк-бьрано, бона ԝе дьлшәԝатийа Хԝәде, ԛальбе хԝә дийари Хԝәде кьн, чаԝа ԛӧрбанәкә сахә дӧрӧфкьри, ль ԝи ԛәбул, йа кӧ һ′әбандьна ԝәйә р′ӧһ′ани йә».
Ча Бьжберьн Ԝәʹдәдәрбазкьрьна Керһати?
5 Һәр тьшт чь кӧ әм дь жийина хԝәда дькьн гьредайи йә тʹәви хьзмәта мә Йаһоԝарʹа. Паԝлос дь нәʹма хԝәда Рʹомайарʹа гьлийе бь фькьред кʹур дьда хәбате, сәва кӧ рʹасти һьше Мәсиһийада рʹьнд рʹуне. Әԝи әԝана һелан дькьр: «Ԛальбе хԝә тәсмили Хԝәде кьн чаԝа ԛӧрбанәкә сах, пироз ль Хԝәде ԛәбул, йе кӧ һәйә ԛӧльхкьрьна мәйә пирозә фькьранди» (Рʹомайи 12:1, ДТ). Хәбәра ԛальб те һʹәсабе һьш, дьл у ԛәԝата мәрийа. Әв һәр тьшт әм дьдьнә хәбате сәва Хԝәдер′а хьзмәт кьн (Марԛос 12:30). Паԝлос хьзмәта бь дьл у щан бәрамбәри ԛӧрбане кьр. Ль гора ԛануна Муса, Хԝәде инк′ар дькьр ԛӧрбана бь ԛӧсур (Ԛануна Кʹаһинтийе 22:18-20). Хԝәде ԝе ԛӧрбана рʹӧһʹани йа Мәсиһийа жи инкʹар кә, һәрге әв бь ԛьсур бә. Ле гәло әв йәк ча дькарә бьԛәԝьмә?
6 Паԝлос Мәсиһийед Рʹомайарʹа ӧса ньвиси: «Нә жи әндәмед бәдәна хԝә . . . пʹешкʹеши гӧнәһ бькьн». Әԝи сәрда жи зедә кьр: «Кьрьнед бәдәне бь Рʹӧһʹ бькӧжьн» (Рʹомайи 6:12-14; 8:13, ИМ). Һьнә ԝәʹдә шунда әԝи дь нәʹма хԝәда һьнә мәсәлед «кьрьнед бәдәне» анин. Дәрһәԛа гӧнәкʹара, әԝи ньвиси: «Дәве ԝана тʹьжи ньфьрʹ у тәʹли йә, ньге ԝанә хунретьнерʹа дьләзинә», «тьрса Хԝәде ль бәр ч′ә′ва ԛәт тӧнә» (Рʹомайи 3:13-18). Мәсиһи дькарә бәдәна хԝә бьһәрʹьминә, һәрге бь әндәмед бәдәна хԝә, йан бь пʹаред бәдәна хԝә тьштед гӧнәкьрьнейә ӧса бькә. Мәсәлә, чахе Мәсиһи занә кӧ гәрәке порнографийе, синәмед бь зӧлмийе тʹьжә нәньһерʹә, ле йәкә әԝ дьньһерʹә, бь ԝе йәке әԝ аԝа готи чʹәʹве хԝә дьдә гӧнә. Паши ве йәке әԝ дь хьзмәтеда чь жи бькә, Хԝәде ԛӧрбана ԝи һʹәсаб накә пироз у ԛәбул накә (Ԛануна Дӧщари 15:21; 1 Пәтрус 1:14-16; 2 Пәтрус 3:11). Бь рʹасти ԝәʹдәдәрбазкьрьна нәщайиз ԝе зийанәкә мәзьн ԝирʹа бинә!
(Рʹомайи 13:1) «Һәр мәрьвәк бьра гӧр′а ԝан һ′ӧкӧмәтийада бә, кӧ сәр ԝир′а нә, чьмки т′ӧ һ′ӧкӧмәти бейи дәстура Хԝәде т′ӧнә у әԝе кӧ һәнә жи, жь Хԝәдеда нә».
ԝ08 15/6 31 ¶4
Фькьред Сәрәкә жь Нәʹма Рʹомайарʹа
13:1: Чь те һʹәсабе кӧ һʹӧкӧмәти «жь Хԝәдеда нә»? Әԝана һʹӧкӧмәтийе дькьн, чьмки Хԝәде изьн дайә ԝан у әм дькарьн бежьн ԝәки Хԝәде дәрһәԛа сәрԝертийа ԝан пʹехәмбәрти кьрьбу. Әв йәк ә′шкәрә дькә пʹехәмбәртийа Кʹьтеба Пироз дәрһәԛа һьнә сәрԝера.
Хԝәндьна Кʹьтеба Пироз
(Рʹомайи 13:1-14) Һәр мәрьвәк бьра гӧр′а ԝан һ′ӧкӧмәтийада бә, кӧ сәр ԝир′а нә, чьмки т′ӧ һ′ӧкӧмәти бейи дәстура Хԝәде т′ӧнә у әԝе кӧ һәнә жи, жь Хԝәдеда нә. 2 Аԝа к′и кӧ бәр һ′ӧкӧмәтийе р′адьбә, әԝ бәр ә′мьре Хԝәде р′адьбә у әԝе кӧ р′адьбьн, диԝана Хԝәде сәр хԝәда тиньн. 3 Чьмки сәрдар йед ԛәнщийе дькьн натьрсиньн, ле йед хьрабийе. Тӧ дьхԝази жь һ′ӧкӧмәте нәтьрси? Хԝә ль ԛәнщийе бьгьрә, те бьби ширьне ԝе. 4 Чьмки әԝ хьзмәтк′аре Хԝәде йә бона ԛәнщийед тә. Ле һәгәр хԝә ль хьрабийе бьгьри, же бьтьрсә, чьмки ԝи бадиһәԝа шур гьренәдайә. Әԝ хьзмәтк′аре Хԝәде йә, кӧ һерса ԝи сәр ԝанда бьр′ежә, к′ижанед кӧ хьрабийе дькьн. 5 Ләма әм гәрәке гӧра һ′ӧкӧмәтада бьн, нә т′әне ԝәки әм ль бәр һерсе нәк′әвьн, ле бәле ԝәки исафа мә жи дьле мә р′ьһ′әт бьһелә. 6 Бона ве йәке жи һун хәрщ жи дьдьн, чьмки әԝ хӧламед Хԝәде нә, борщдаред хәрщстандьне нә. 7 Аԝа к′ер′а чь дьк′әвә, ль ԝан вәгәр′иньн, к′ер′а хәрщ дьк′әвә, хәрщ бьдьне, к′ер′а сәләф дьк′әвьн, сәләфа бьдьне, жь к′е гәрәке бьтьрсьн, бьтьрсьн, к′ер′а ԛәдьр дьк′әвә, ԛәдьре ԝи бьгьрьн. 8 Т′ӧ тьштида дәйндаре т′ӧ кәси нәминьн, пештьри ль һәв һ′ьзкьрьне, чьмки к′и кӧ һәвале хԝә һ′ьз дькә, т′әмамийа Ԛануне дьԛәдинә. 9 Әв т′әмийед кӧ һәнә: «Зьнийе нәкә, нәкӧжә, нәдьзә, дьлһавьжийе нәкә» у һәр чь т′әмийед кӧ һәнә, дьк′әвьнә нава ве готьне: «Һәвале хԝә ԝәкә хԝә һ′ьз бькә». 10 Һ′ьзкьрьн хьрабийе ль һәвале хԝә накә. Аԝа һ′ьзкьрьн сәре Ԛануне дьгьрә. 11 Ве йәке бькьн, чьмки һун заньн әв чь зәман ә. Ньһа иди ԝәхт ә әм жь хәԝе һ′ьшйар бьн, чьмки ньһа хьлазбун һе незики мә йә, нә кӧ һьнге гава мә баԝәр кьр. 12 Шәв гәләк чуйә, сьбәһ незик буйә, аԝа кьред тә′ристанийе әм жь хԝә дур хьн у ч′әкед р′онайийе сәр хԝәва кьн. 13 Ӧса бьжин чаԝа р′онайа р′оже, бе куч′ьксантийе, сәрхԝәшийе, бенамусийе, һ′әрамийе, шәр′удийе у һ′әвсудийе. 14 Ле Хӧдан Иса Мәсиһ ль хԝә бькьн мәрт′ал у гӧһ нәдьнә ԝан хԝәстьнед бьнйат′а хԝәйә мәрьвайи.
11-17 АДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | РʹОМАЙИ 15-16
«Жь Йаһоԝа Сәбьр у Бәрдьли Бьхԝазә»
(Рʹомайи 15:4) Ле чь кӧ пешда к′ьтебада һатә ньвисаре, бона һинбуна мә һатә ньвисаре, ԝәки әм бь сәбьре у ԝан готьнед ньвисарада кӧ бине дьдьнә бәр мә, хԝәйигӧман бьн.
«Т′әви йед Дьгьрин Бьгьрин»
11 Хенщи ве сәрһатийа дәрһәԛа Иса кӧ әԝи Лазар сах кьр, Хәбәра Хԝәдеда диса гәләк рʹез һәнә кӧ бәрдьлийе дьдьнә мә. Бешьк, «чь кӧ пешда кʹьтебада һатә ньвисаре, бона һинбуна мә һатә ньвисаре, ԝәки әм бь сәбьре у ԝан готьнед ньвисарада кӧ бине дьдьнә бәр мә», хԝәйиһеви бьн (Рʹом. 15:4). Һәрге ԝә мәрьве хԝәйи незик ӧнда кьрийә, әԝ рʹез кӧ жере тенә дайине, дькарьн дьле ԝә гәрм кьн:
▪ «Хӧдан незики дьлшкәстийа йә у мәрьм-бәләнгаза дьдәбьрине» (Зәб. 34:18, 19).
▪ «Дәма дәрд-кӧл дьле мьнда зедә дьбьн, барьстанийед тә . . . [Йаһоԝа] нәфса мьн ша дькьн» (Зәб. 94:19).
▪ «Бьра Хӧдане мә Иса Мәсиһ бь хԝә у Баве мә Хԝәде йе кӧ жь мә һʹьз кьрийә у бь к′әрәме һана һәрһәйи у һевийа ԛәнщ дайә мә, бәр дьле ԝәда бе у ԝә . . . ԛайим бькә» (2 Тʹеслн. 2:16, 17, ИМ).
(Рʹомайи 15:5) Дә бьра Хԝәде . . . бина ль бәр һәр кәси бьдә ԝә, кӧ һун һьндава һәвда сәр нетәке бьн, ԝәкә нәхш-тʹәрзе Мәсиһ Иса,
ԝ16.04 14 ¶5
«У Сәбьр жи, бьра бь Думька Дьреж бә»
5 Жь Йаһоԝа ԛәԝате һиви кьн. Йаһоԝа «Хԝәдейе сәбьре» у бәрдьлийе йә (Рʹом. 15:5). Тʹәне әԝ бь тʹәмами фәʹм дькә проблемед мә. Әԝ ӧса жи фәʹм дькә кӧ ча дәрәщед мә, емосйед мә, у ԛьсуртийа мә сәр мә һʹӧкӧм дьбьн. Ләма т′әк әԝ ә кʹижан дькарә сәбьре бьдә мә. Кʹьтеба Пироз дьбежә: «Әԝ дахԝаза йед кӧ же дьтьрсьн тинә щиһ, фәрйада [һәвар-газийа] ԝан дьбьһизә у ԝан рьзгар [хьлаз] дькә» (Зәб. 145:19, ИМ). Ле чахе әм бона сәбьре Хԝәдерʹа дӧа дькьн, әԝ ча щаба дӧайед мә дьдә?
(Рʹомайи 15:13) Ищар бьла Хԝәдайе һевийе, дь баԝәрийеда дьле ԝә бь һʹәму шаһи у аштийе тʹьжә бькә, да кӧ бь һеза Рʹӧһʹе Пироз һевийа ԝә зедә бьбә.
ԝ14 15/6 14 ¶11
«Хӧдан Хԝәдейе Хԝә Һ′ьз Бькә»
11 Йаһоԝа һевийе дьдә мә, чь кӧ шабун у әʹдьлайе дьле мәда тʹьжә дькә (Рʹом. 15:13). Һевийа кӧ Хԝәде дьдә мә, али мә дькә чәтьнайада тәйах кьн. Әԝед кӧ бь рʹӧһʹ кʹьфшкьринә, избат дькьн, кӧ һ′әта мьрьна хԝә амьн дьминьн, бь сайа чь жи «к′офийа жийине» дьстиньн (Әʹнт. 2:10). Әԝед һевийа кʹижана кӧ һәйә ль сәр әʹрде бьжин у амьнийа хԝә хԝәй дькьн, ԝе кʹәрәмед һәрһәйи бьстиньн дь Щьнәта создайида (Лԛ. 23:43). Занәбуна ве йәке чаԝа ль сәр мә һʹӧкӧм дькә? Дьле мә бь шабун у әʹдьлайе тʹьжә дьбә, ӧса жи һʹьзкьрьна мә һьндава Әʹфьрандаре мә дьһа пешда те, чьмки «һәр дайина ԛәнщ у һәр п′ешк′еша к′амьл» жь ԝи йә (Аԛб. 1:17).
Хьзна Кʹьтеба Пироз Бьгәрʹьн
(Рʹомайи 15:27) Әԝ ԛайл бун у дәйндаре ԝан ьн жи. Чьмки нәщьһуйа алийе р′ӧһ′анида к′омәк жь щьһуйа стандьн, гәрәке әԝ жи алийе һәбука дьнеда к′омәке бьдьнә ԝан.
ԝ89 1/12 24 ¶3
«Бьщер′ьбиньм, к′а Һун Һ′ьзкьрьнеда Чьԛас Ширһ′әлал ьн»
Бьред ԝани Нәщьһу гәрәке һелан буна кӧ али Щьһуйа бькьрана, кʹижан кӧ тәнгасийеда бун. Чьмки Нәщьһу ча бежи «дәйндаре» Мәсиһийед Оршәлиме бун. Һәрге бь гьлийе майин бежьн, һәма жь Оршәлиме бона Нәщьһуйа мьзгинийа хере һатә бәлакьрьне. Паԝлос гот: «Нәщьһуйа алийе р′ӧһ′анида к′омәк жь щьһуйа стандьн, гәрәке әԝ жи алийе һәбука дьнеда к′омәке бьдьнә ԝан» (Рʹомайи 15:27).
(Рʹомайи 16:25) Ньһа шькьр жь ԝир′а, йе кӧ дькарә ԝә баԝәрийеда бьшьдинә, ԝәкә ԝе Мьзгинийа кӧ әз бона Иса Мәсиһ даннасин дькьм, ԝәкә ашкәрәбуна ԝе сӧр′а кӧ һе дәԝред бәрейә бьһӧрида вәшарти мабу
it-1 858 ¶5
Пешдаготьн
Мәсиһ демәк Иса, Зӧрʹәта создайи бу, бь сайа кʹижани кӧ һʹәму мәрьвед рʹаст ԝе бенә кʹәрәмкьрьне (Гл. 3:8, 14). Щара пешийе дәрһәԛа «зӧрʹәт» һатьбу готьне дь Еденеда паши мьԛабьлибуне, ле һе пешийа буйина Һабил (Дсп. 3:15). Ле 4 000 сал шунда, «ашкәрәбуна ԝе сӧрʹа» Хԝәде әʹйан бу, һатә кʹьфше ԝәки әв зӧрʹәта создайи ԝе Мәсиһ бә. Әв сӧрʹ нава гәләк салада вәшарти бу (Рʹм. 16:25-27; Әф. 1:8-10; 3:4-11).
Хԝәндьна Кʹьтеба Пироз
(Рʹомайи 15:1-16) Әм кӧ баԝәрийеда ԛәԝат ьн, гәрәке бьк′әвьнә бьн баре сьста, нә кӧ әм ль хԝә хԝәш бен. 2 Бьра жь мә һәр кәс алийе ԛәнщийеда ль һәвале хԝә хԝәш бе, кӧ баԝәрийеда бьшьдә. 3 Чьмки Мәсиһ жи нә кӧ ль хԝә хԝәш һат, ле чаԝа ньвисар ә: «Әԝ ԛаред кӧ ль тә дькьн, ль мьн дькьн». 4 Ле чь кӧ пешда к′ьтебада һатә ньвисаре, бона һинбуна мә һатә ньвисаре, ԝәки әм бь сәбьре у ԝан готьнед ньвисарада кӧ бине дьдьнә бәр мә, хԝәйигӧман бьн. 5 Дә бьра Хԝәдейе сәбьре у бина ль бәр һәр кәси бьдә ԝә, кӧ һун һьндава һәвда сәр нетәке бьн, ԝәкә нәхш-т′әрзе Мәсиһ Иса, 6 кӧ әм бь дьл у зарәки шькьрийе бьдьнә Хԝәде у Баве Хӧдане хԝә Иса Мәсиһ. 7 Бона ве йәке бона шькьрийа Хԝәде һәвдӧ ԛәбул кьн, чаԝа Мәсиһ әм ԛәбул кьрьн. 8 Чьмки әз ԝәр′а дьбежьм, кӧ Мәсиһ бу хьзмәтк′аре щьһуйа, бона амьнийа Хԝәде ә′йан кә, ԝәки әԝ созе кал-бавар′а һатийә дайине, мак кә, 9 у нәщьһу бона р′ә′ма ԝи шькьрийе бьдьнә Хԝәде. Чаԝа ньвисар ә: «Бона ве йәке әзе нав нәщьһуйада пәсьне тә бьдьм у әшԛи наве тә бьстьрем». 10 У диса дьбежә: «Гәли нәщьһуйа, ша бьн т′әви мьләте ԝи!» 11 У диса дьбежә: «Шькьрийе бьдьнә Хӧдан гәли нәщьһуйа у пәсьне ԝи бьдьн, һ′әму щьмә′тно». 12 Ишайа жи дьбежә: «Тамарәкә Йеша ԝе дәре, бьбә мире нәщьһуйа у нәщьһу ԝе гӧмана хԝә бьдьнә сәр ԝи». 13 Бьра Хԝәдейе гӧмане дьле ԝә бь шабуне у ә′дьлайийева бьк′ьмк′ьминә, бона ԝе баԝәрийа ԝә, ԝәки гӧмана ԝә бь ԛәԝата Р′ӧһ′е Пироз зедә бә. 14 Әз хԝәха ԝәда гӧман ьм хушк-бьрайед мьн, кӧ һун ԛәнщийада манә у занәбунева жи дагьрти нә, дькарьн һәвдӧ ширәт кьн. 15 Ле аликива мьн тӧрӧш кьр ԝәр′а ньвиси, кӧ ԝан тьшта бькьмә бира ԝә, бона ԝе к′әрәма кӧ жь Хԝәдеда мьнр′а һатийә дайине, 16 ԝәки әз нава нәщьһуйада бьбьмә бәрдәстийе Мәсиһ Иса. Әз нава Мьзгинидайина Хԝәдеда мина к′аһинәки хьзмәтк′арийе дькьм, кӧ һ′әдибуна нәщьһуйа ԛәбул бә, бь Р′ӧһ′е Пироз бӧһӧрти-жьбарә бә.
18-24 АДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 1 КОРЬНТʹИ 1-3
«Тӧ Тьштед Физики Дьһа Ԛимәт Дьки йан Рʹӧһʹани?»
(1 Корьнтʹи 2:14) Ле мәрьве нәхԝәйи-Р′ӧһ′ ԝан тьштед Р′ӧһ′е Хԝәде ԛәбул накә, бь йа ԝи әв йәкана беһ′ьши нә у нькарә жи фә′м бькә, чьмки һ′але ԝан тьшта бь р′ӧһ′ани тенә ә′нәнәкьрьне.
ԝ18.02 19 ¶4-5
Чь те Һʹәсабе Бьбьн Мәрьве Рʹӧһʹани?
4 Пешийе ԝәрә әм шеԝьр кьн дәрһәԛа мәрьве нәрʹӧһʹани. Иро дьнйайеда фькьр у ньһерʹандьна гәләка т′әне сәр тьштед бәдәни йә. Паԝлос дәрһәԛа ве йәке гот кӧ «рʹӧһʹе кӧ ньһа . . . нава ԝан мәрьвада йа хԝә дькә, йед кӧ нә гӧрʹа Хԝәдеда нә» (Әфәс. 2:2). Әв рʹӧһʹ һәчʹи зәʹф мәрьва һелан дькә кӧ пәй гәләка һәрʹьн, демәк чʹәʹв бьдьнә ԝан. Әԝана тʹәне дәрһәԛа хԝәстьнед хԝә дьфькьрьн. Ләма жи әԝана ԝан тьшта дькьн кʹижан кӧ әԝана һʹәсаб дькьн рʹаст ә, у принсипед Хԝәде пьшт гӧһе хԝәва давежьн. Әԝе нәхԝәйи рʹӧһʹ, демәк йе кӧ пәй хԝәстьнед бәдәне дькʹәвә, гәләк дькʹәвә һәʹйра наве хԝә, һәбуке, йан жи бона ԝи изьна ԝийә шәхси йа лапә фәрз ә.
5 Диса ча те кʹьфше кӧ мәрьв нәрʹӧһʹани йә? Мәрьвед кӧ дькʹәвьнә бәр байе «кьред бьнйата инсен», мәрьвнә нәрʹӧһʹани нә (Галт. 5:19-21). Паԝлос нәʹма хԝәйә пешьнда Корьнтʹийарʹа, бәса хәйсәт-һӧнӧред дьн дькә, кʹижан кӧ мәрьве бь һьш-аԛьле бәдәни дьдә кʹьфше. Мәсәлә, әԝи гот кӧ мәрьвед ԝи щурʹәйи ортʹа мәрьва хьраб дькьн, дәʹԝ-доза пешда тиньн, һәврькʹийе дькьн, һәвдӧ дьдьнә диԝане, бешекьр ьн һьндава ԝан йед кӧ рʹебәрийе дьдьнә ԝан, у пәй хԝарьн-вәхԝарьне дькʹәвьн. Чахе мәрьве бәдәни дькʹәвә щерʹьбандьне, әԝ нькарә хԝә рʹаст бьдә кьфше, сьст дьбә у дькʹәвә тʹәльке (Мәтʹлк. 7:21, 22). Щьһуда дәрһәԛа мәрьвед ԝи щурʹәйи һәла һе жи гот, ԝәки «рʹӧһʹе пироз» бал ԝан тʹӧнә (Щьһуд. 18, 19).
(1 Корьнтʹи 2:15, 16) Ле йе хԝәйи-Р′ӧһ′е Хԝәде һәр тьшти ә′нәнә дькә, ле бәле хԝәха жь кәсәки найе ә′нәнәкьрьне. 16 Чаԝа ньвисар ә: «К′е нет-фькьра Хӧдан пе һ′әсийа, кӧ ширәтәке бьдә ԝи?» Ле нет-фькьра Мәсиһ сәре мәда йә.
ԝ18.02 19 ¶6
Чь те Һʹәсабе Бьбьн Мәрьве Рʹӧһʹани?
6 Ле мәрьве рʹӧһʹани кʹе йә? Мәрьве рʹӧһʹани һәр гав дәрһәԛа һәләԛәтийа хԝә тʹәви Хԝәде дьфькьрә. Мәрьвед ӧса дьхԝазьн «чәв бьдьнә Хԝәде» (Әфәс. 5:1). Әв те һʹәсабе кӧ әԝана дьхԝазьн мина Йаһоԝа бьфькьрьн у сәр тьшта пе чʹәʹве ԝи бьньһерʹьн. Хԝәде бона ԝан реали йә. Әԝана һʹәму тьштада принсипед Йаһоԝа һьлдьдьн һʹәсаб (Зәб. 119:33; 143:10). Мәрьвед бь һьш-аԛьле рʹӧһʹани сәр хԝә дьхәбьтьн, ԝәки бәре рʹӧһʹе пироз бьдьнә кʹьфше, нә кӧ бькʹәвьнә пәй хԝәстьнед бәдәне (Галт. 5:22, 23). Сәва фәʹм кьн кӧ чь те һʹәсабе мәрьве рʹӧһʹани, ԝәрә мәсәләкә ӧса биньн: Мәрьве кӧ бь һьш-аԛьле хԝә педа дькʹәвә бизнесе у ве йәкеда пешда дьчә, ԝи нав дькьн ча бизнесмен. Ле әԝе кӧ һʹьш-аԛьле ԝан сәр тьштед рʹӧһʹани йә, дькарьн ԝи нав кьн ча мәрьве рʹӧһʹани. Бәле, мәрьве кӧ гәләк ԛимәт дькә тьштед рʹӧһʹани, әԝ мәрьве рʹӧһʹани йә.
ԝ18.02 22 ¶15
Чь те Һʹәсабе Бьбьн Мәрьве Рʹӧһʹани?
15 Ча әм дькарьн чʹәʹв бьдьнә Мәсиһ? Кʹьтеба Пирозда 1 Корьнтʹи 2:16-да те готьне, ԝәки нет-фькьра Мәсиһ гәрәке сәре мәда бә. Ле Рʹомайи 15:5-да те готьне ԝәки әм гәрәке «сәр нетәке бьн, ԝәкә нәхш-т′әрзе Мәсиһ Иса». Демәк, сәва кӧ әм бьбьнә ԝәк Иса, әм гәрәке бьзаньбьн кӧ нет-фькьред ԝи чь бун у әԝ ча дьфькьри, у дәрһәԛа хәйсәт-һӧнӧред ԝи жи пебьһʹәсьн. Паше әм гәрәке пʹегәһа ԝида һәрʹьн. Иса һьш-аԛьле хԝә дабу сәр һәләԛәтийа хԝә тʹәви Хԝәде. Ләма жи һәрге әм бьбьнә мина Иса, әме һе зәʹф чʹәʹв бьдьнә Йаһоԝа. Жь ве йәке те кьфше, ԝәки чьԛас фәрз ә әм һин бьн мина Иса бьфькьрьн.
Хьзна Кʹьтеба Пироз Бьгәрʹьн
(1 Корьнтʹи 1:20) К′анед сәрԝахт? К′анед занә? К′анед аԛьлмәндед ве дьнйайе? Нә сәрԝахтийа ве дьнйайе Хԝәде кьрә беһ′ьши?
it-2 1193 ¶1
Сәрԝахти
Әва дьнйа тʹәви аԝа готи сәрԝахтийа хԝә, инкʹар кьр пʹешкʹеша Хԝәде, кʹижан кӧ әԝи бь сайа Мәсиһ дабу. У дьԛәԝьмә сәрԝеред дьнйайе дькарьбун бь сәрԝахти сәрԝертийе бькьн, ле диса жи Хӧдан Иса сәр стуна щәфайе мьх кьрьн (1 Кр. 1:18; 2:7, 8). Ле Хԝәде сәрԝахтийа хԝә нәдайә дьнйайе, сәва кӧ әв ԝәк «беһʹьши» бе һʹәсабе. Бь рʹасти чахе әва дьнйа пʹешкʹеша Хԝәде бәр тʹӧ тьшти һʹәсаб нәкьр, әԝана хԝәха шәрми ман (1 Кр. 1:19-28). Паԝлос кьрә бира Мәсиһийед Корьнтʹе ԝәки «сәрԝахтийа ве дьнйайе Хԝәде кьрә беһ′ьши» (1 Кр. 2:6, 13). Әԝи ӧса жи Мәсиһийед Колосерʹа дьгот, ԝәки әԝана хԝә дур бьгьрьн жь «сәрԝахтийа дәрәԝә п′уч′ [бь Йунани философиас, чь кӧ рʹаст ә рʹаст те һʹәсабе «һʹьзкьрьна һьндава сәрԝахти»] у жь әʹдәт-сьхьред ве дьнйайе (Кл. 2:8) һьмбәри рʹезед 20-23 бькә.
(1 Корьнтʹи 2:3-5) Әз хԝәха һ′аләки сьстда, бь хоф у тьрс нава ԝәда бум. 4 У готьн у һинкьрьна мьн, нә кӧ бь хәбәред сәрԝахтийа мәрьвайийә зархԝәшийе бу, ле бь избатийа ԛәԝата Р′ӧһ′е Пироз бу. 5 Әв йәк аһа бу, ԝәки баԝәрийа ԝә бь сәрԝахтийа мәрьвайе нибә, ле бь ԛәԝата Хԝәде бә.
ԝ08 15/7 27 ¶6
Фькьред Сәрәкә Нәʹма Корьнтʹийарʹа
2:3-5. Паԝлос дь Корьнтʹеда шәʹдәти дьда, чь кӧ мәйдана философийа у һинкьрьнед Йунани бу. Дьԛәԝьмә Паԝлос һʹәвәки бәрхԝәдькʹәт һәла әԝе бькарьбә дина гӧһдаред хԝә бькʹьшинә бәрбь мьзгинийе. Ле чь жи һәбу, әԝ нәһишт ԝәки сьстбун у кемасийед ԝи, рʹийа ԝи бьгьрьн сәва кӧ бинә сери шьхӧле кӧ Хԝәде дабу дәсте ԝи. Анәгори ԝе йәке, әм гәрәке нәһельн ԝәки һьнә дәрәщед жийина мә, рʹийа мә бьгьрьн кӧ әм мьзгинийа хере дәрһәԛа Пʹадшатийа Хԝәде бәла кьн. Әм дькарьн баԝәр бьн кӧ мина дәрәща Паԝлосда, Йаһоԝа ԝе али мә жи бькә.
Хԝәндьна Кʹьтеба Пироз
(1 Корьнтʹи 1:1-17) Жь Паԝлосе кӧ бь ә′мьре Хԝәде шандитийа Мәсиһ Исар′а газикьри, т′әви Состенисе бьра, 2 щьвина Хԝәдейә Корьнт′ер′а, бӧһӧрти-жьбарәбуйийед йәктийа Мәсиһ Исада, йед пирозбунер′а газикьри, т′әви ԝан һ′әмуйед кӧ һәр дәра гази наве Хӧдане мә Иса Мәсиһ дькьн, әԝ Хӧдане ԝан у мә йә. 3 Дә бьра к′әрәм у ә′дьлайийа Хԝәдейе Баве мә у Хӧдан Иса Мәсиһ ль ԝә бә. 4 Әз һәр гав бона ԝә шькьрийе дьдьмә Хԝәдейе хԝә, бона ԝе к′әрәма ԝи, йа кӧ бь сайа Мәсиһ Иса ԝәр′а һатийә дайине. 5 Бәле һун бь йәктийа ԝи һәр тьштида дәԝләти бун, һәр хәбәрдане у һәр занәбунеда. 6 Һинкьрьна дәрһәԛа Мәсиһда нава ԝәда һ′име хԝә ӧса гьртийә, 7 кӧ һун кемасийа т′ӧ п′ешк′еше нак′ьшиньн, гава һивийа хӧйабуна Хӧдане мә Иса Мәсиһ ьн. 8 Әԝе ԝә һ′әта хьлазийе һ′имгьрти хԝәй кә, кӧ һун Р′ожа һатьна Хӧдане мә Иса Мәсиһ беләк′ә бьн. 9 Амьн ә әԝ Хԝәдейе кӧ гази ԝә кьр, ԝәки һун т′әви Кӧр′е ԝи Иса Мәсиһе Хӧдане мә бьн. 10 Дә әз иди һиви жь ԝә дькьм хушк-бьрано, бь наве Хӧдане мә Иса Мәсиһ, бьра готьна ԝә һ′әмуйа йәк бә у дӧтирәти нава ԝәда т′ӧнә бьн, ле һ′әму жи бь һәвр′а бьн у сәр нет-мәрәмәки бьн. 11 Чьмки мьн сальхе ԝә жь мала Хьлойе һьлда хушк-бьрано, кӧ нава ԝәда дә′ԝ-доз һәнә. 12 Аԝа готи дьхԝазьм бежьм, ԝәки нава ԝәда йәк дьбежә: «Әз п′ара Паԝлос ьм», йәк дьбежә: «Әз п′ара Аполо мә», йәк жи дьбежә: «Әз п′ара Пәтрус ьм» у йәки дьн жи дьбежә: «Әз п′ара Мәсиһ ьм». 13 Чьма Мәсиһ п′арәвәбуйи йә? Чьма Паԝлос бона ԝә хач буйә? Йан бь наве Паԝлос һун пе аве һатьнә ньхӧмандьне? 14 Әз жь Хԝәде р′ази мә, кӧ мьн жь ԝә т′ӧ кәс нәньхӧманд, пештьри Кьриспо у Гайос. 15 Ньһа т′ӧ кәс нькарә бежә, кӧ һун бь наве мьн һатьнә ньхӧмандьне. 16 (Р′аст ә мьн мала Стәйфан жи ньхӧманд. Ле ԝәки майин найе бира мьн, кӧ мьн йәки дьн ньхӧмандьбә.) 17 Чьмки Мәсиһ әз ньхӧмандьнер′а нәшандьм, ле Мьзгинидайинер′а у әз ве йәке надьмә зора хәбәрдана зьмен, кӧ нәбә ԛәԝата хаче Мәсиһ бәр тьштәки нәйе һ′әсабе.
25-31 АДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 1 КОРЬНТʹИ 4-6
«Һьнәк Һәвиртьрʹшк Тʹәмамийа Шкәве Һьлтинә»
(1 Корьнтʹи 5:1, 2) Дәнг һәйә кӧ нава ԝәда бенамуси жи һәйә у әԝ жи бенамусикә ӧса, ԝәки нава п′утп′арьстада жи т′ӧнә, кӧ йәк дәст давежә демар′ийа хԝә. 2 У һун жь к′ӧбарийе һ′ьр′ бунә! Нә гәрәке ԝә шин бькьра у йе хԝәйе ви кьри жь нава хԝә дәрхьста?
(1 Корьнтʹи 5:5-8) ԝи мәрьви бьдьнә дәсте Мирещьн, кӧ ԛальбе ԝи ӧнда бә у р′ӧһ′е ԝи хьлаз бә Р′ожа Хӧданда. 6 Нә ԛәнщ ә кӧ һун фьр′наԛ дьбьн! Гәло һун ньзаньн кӧ һьнәк һәвиртьр′шк т′әмамийа шкәве һьлтинә? 7 Ви һәвиртьр′шке кәвьн жь хԝә дур хьн, кӧ һун бьбьнә һәвире нуйи бе һәвиртьр′шк, чаԝа һун ӧса нә жи. Чьмки бәрхе мәйи Щәжьна Дәрбазбуне, аԝа готи Мәсиһ бона мә һатә сәржекьрьне. 8 Дә әм ве щәжьне дәрбаз кьн, нә кӧ бь һәвиртьр′шке кәвьни нәһәԛийе у хьрабийе, ле бь нане бе һәвиртьр′шк, бь нане һ′әлалийе у р′астийе.
(1 Корьнтʹи 5:13) Чи мьнр′а йә әз диԝана йед жь щьвине дәр бькьм? Хԝәде ԝе диԝана ԝан бькә. Ле диԝана йед щьвинеда дәстед ԝәда йә. Аԝа чаԝа ньвисар ә: «Йе хьраб жь нава хԝә дәрхьн».
it-2 230
Һәвиртьрʹшк
Паԝлосе шанди зьмане симболик да хәбате, чахе Мәсиһийед Корьнтʹерʹа дьньвиси дәрһәԛа ԝе йәке, кӧ мәрьве бәнамус жь щьвате дәрхьн. Әԝи гот: «Нә ԛәнщ ә кӧ һун фьр′наԛ дьбьн! Гәло һун ньзаньн кӧ һьнәк һәвиртьр′шк т′әмамийа шкәве һьлтинә? Ви һәвиртьр′шке кәвьн жь хԝә дур хьн, кӧ һун бьбьнә һәвире нуйи бе һәвиртьр′шк, чаԝа һун ӧса нә жи. Чьмки бәрхе мәйи Щәжьна Дәрбазбуне, аԝа готи Мәсиһ бона мә һатә сәржекьрьне». Паше әԝи зәлал кьр, ԝәки бь хәбәра «һәвиртьрʹшк» әԝ чь дьхԝазә бежә: «Дә әм ве щәжьне дәрбаз кьн, нә кӧ бь һәвиртьр′шке кәвьни нәһәԛийе у хьрабийе, ле бь нане бе һәвиртьр′шк, бь нане һ′әлалийе у р′астийе» (1 Кр. 5:6-8). Анәгори ԝе йәке ча һьнә «һәвиртьрʹшк» тʹәмамйа һәвир тьрʹш дькә, ӧса жи һәләԛәтийа незик тʹәви мәрьве бенамус дькарә сәр йед дьнена хьраб һʹӧкӧм кә. Һәмьки һәрге әԝ дь щьватеда бьминә, әԝе тʹәмамийа щьват бәр чʹәʹве Йаһоԝа һʹәрʹам кә. Ләма жи Мәсиһийед щьвата Корьнтʹе гәрәке бь ләз әве «һәвиртьрʹшке» жь хԝә дурхьстана анәгори ԝе йәке ча Исраелийаʹра изьн тʹӧнә бу ԝәки ԝәʹде щәжьне һәрвиртьрʹшк мала хԝәда хԝәй кьн.
it-2 869-870
Шәйтʹан
Чь те һʹәсабе ԝәки бәндә тʹәсмили Шәйтʹан кьн, кӧ ԛальбе ԝи ӧнда бә?
Паԝлосе шанди Мәсиһийед Корьнтʹерʹа ньвиси, ԝәки чь бькьн тʹәви ԝи мәрьви, кʹижан кӧ бенамуси кьр тʹәви жьна баве хԝә. Паԝлос гот ԝәки «ԝи мәрьви бьдьнә дәсте Мирещьн, кӧ ԛальбе ԝи ӧнда бә» (1 Кр. 5:5). Демәк әв дьһатә һʹәсабе кӧ әԝи мәрьви гәрәке жь щьвате дәрхьстана, у тʹӧ һәләԛәти тʹәв ԝи хԝәй нәкьрана (1 Кр. 5:13). Чахе әви бәндәйи тʹәсмили Шәйтʹан дькьрьн, демәк әв жь щьвате дәрдьхьстьн у тʹәсмили ве дьнйайе дькьрьн, хԝәде у сәрԝере кʹижани кӧ Шәйтʹан ә. Анәгори һьнәк һәвиртьрʹшке дь һәвирʹда, әв мәрьв бьбу ԝәк «ԛальб» дь щьватеда, ләма жи чахе әԝ жь щьвате дәрдьхьстьн, щьват ча бежи әв ԛальб нава хԝәда ӧнда дькьр (1 Кр. 5:6, 7). Мина ве йәке Паԝлос тʹәсмили Шәйтʹан кьр Һумәнайо у Скәндәр, чьмки ԝана инкʹар кьр баԝәри у исафа тʹәмьз, жь бо чь жи баԝәрийа ԝан һурдәхԝәши бу (1 Тим. 1:20).
(1 Корьнтʹи 5:9-11) Мьн ԝәр′а нә′меда ньвисибу, кӧ т′әви ԛава нәбьн. 10 Нә кӧ готьна мьн дәрһәԛа ԛава, тьмак′ара, т′аланкьр йан п′утп′арьстед ве дьнеда бу. Һәгәр ӧса буйа, гәрәке һун лап жь дьне дәрк′әтана. 11 Ле бәле мьн ԝәр′а ньвиси, кӧ һун т′әви ԝи нәбьн, йе кӧ наве хԝәденасийе сәр ә, ле ԛав ә, тьма йә, п′утп′арьст ә, бӧхданбеж ә, сәрхԝәш ә, йан жи т′аланкьр ә. Т′әви йе ӧса һ′әта нен жи нәхԝьн!
lv 207, әʹламәтийа зедә
Әм Гәрәке Чаԝа бьн, Һьндава Ԝи Мәрьви йе кӧ жь Щьвате Дәрхьстьнә?
Әм гәрәке чаԝа бьн, һьндава ԝи мәрьви йе кӧ жь щьвате дәрхьстьнә? Кʹьтеба Пироз дьбежә: «Һун тәви ԝи нәбьн, йе кӧ навә хԝәденасийе сәр ә, ле ԛав ә, тʹьма йә, пʹутпарьст ә, бӧхданбеж ә, сәрхԝәш ә, йан жи тʹаланкьр ә. Тʹәви йе ӧса һәта нен жи нәхԝьн!» (1 Корьнтʹи 5:11). Дәрһәԛа ԝи мәрьви кӧ «нава һинкьрьна Мәсиһда наминә», әм гьлийе ӧса дьхуньн: «Һун ԝи ԛәбул нәкьнә малед хԝә у сьлаве нәдьнә ԝи. Чьмки ки сьлаве бьдә ԝи, әԝ тʹәви кьред ԝийә хьраб дьбә» (2 Йуһʹәнна 9-11). Әм хәбәр надьн тʹәви мәрьвед кӧ щьвате дәрхьстьнә, нә дәрһәԛа пьрсед рʹӧһʹани, нә жи дәрһәԛа тьштед дьн. Дь «Бьрща Ԛәрәԝьлийеда», йа сала 1981, 15 Илоне ль сәр рʹупʹела 25, һатийә готьне: «Һәрге тӧ кәсәки сьлав ки жи, әв дькарә бьбә гава пешьн, ԝәки дәстпеки тʹәви ԝи бькәви хәбәрдане йан жи һәвалтийе бьки. Гәло һежа йә ԝәки әм гава пешьн дайньн, ԝәки незики ԝи мәрьви бьн кӧ жь щьвате дәрхьстьнә?»
▸ Сәре 3, абзаса 19
Хьзна Кʹьтеба Пироз Бьгәрʹьн
(1 Корьнтʹи 4:9) Чьмки әз дьбежьм ԛәй Хԝәде әм шанди кьрьнен һәри кем, ԝәк ен кӧ жь бо кӧштьна ль бәр һʹәмуйан, һатьнә пешанин. Чьмки әм жь дьнйайерʹа, жь мьлйакәт у мьрованрʹа бун тʹәмашә.
ԝ09 15/5 24 ¶16
Мәләк, «р′ӧһ′ед бәрдәсти нә»
16 Мәсиһийед кӧ рʹасти щерʹьбандьна тен, бона мәләка дьбьнә тʹәмашә (1 Кр. 4:9). Мәләк бь шабунәкә мәзьн дина хԝә дьдьн амьнийа мә у кьред мәйи ԛәнщ, һьм жи әԝана дина хԝә дьдьн ԝан мәрийа, кʹижан кӧ гӧнед хԝә тʹобә дькьн (Лԛ. 15:10). Мәләк дина хԝә дьдан кьред һьнә кʹӧлфәтед ԝәʹде бәре, кʹижан кӧ дьхԝәстьн дьле Хԝәде ша кьн. Кʹьтеба Пироз нишан дькә, ԝәки «бона ве йәке гәрәке к′ӧлфәт сәргьредайи бә, чаԝа нишана бьн һ′ӧкӧмда, бона мьлйак′әтед кӧ дьбиньн» (1 Кр. 11:3, 10). Бәле, мәләк гәләк дьлша дьбьн, гава дьбиньн кʹӧлфәтед кӧ Хԝәдерʹа хьзмәт дькьн у ӧса жи әԝана дина хԝә дьдьн һʹәму хьзмәткʹаред Хԝәде, кʹижан кӧ гӧһдарийа хԝә һьндава Хԝәде у сәрԝертийа щьватеда дьдьнә кʹьфше. Гӧһдарийа ви щурʹәйи мәсәләки баш ә бона лавед Хԝәдейи әʹзмани.
(1 Корьнтʹи 6:3) Чьма һун ньзаньн кӧ әме диԝана мьлйак′әта жи бькьн? Иди к′ӧ дьминә диԝана пьрсед ве дьнйайе нәкьн?
it-2 211
Ԛанун
Мәләк Гӧһдарийа Ԛануне Дькьн. Һьмбәри мәрийа, мәләк щийе бьльнд дьгьрьн, ле диса жи әԝана гӧрʹа ԛанун у фәрманед Хԝәдеда ньн (Ибр. 1:7, 14; Зб. 104:4). Йаһоԝа һәла һе дьжмьне хԝәрʹа, демәк Шәйтʹанрʹа дәстур нәда, ԝәки әԝ жь синоре дәркʹәвә (Иб. 1:12; 2:6). Мьхайиле сәрәке мьлйак′әта, да кʹьфше ԝәки әԝ ԛәбул дькә у ԛәдьре һʹӧкӧмәтийа Йаһоԝа дьгьрә, ча Һакьме Һәри Бьльнд. Әв рʹьнд һатә кʹьфше гава Иса готә Шәйтʹан: «Бьра Хӧдан ль тә һьле!» (Щһд. 9; бәрамбәри Зәк. 3:2 бькә). Йаһоԝа Хԝәде һʹәму мәләк кьрә бьн рʹебәрийа Иса Мәсиһ (Ибр. 1:6; 1 Пт. 3:22; Мт. 13:41; 25:31; Флп. 2:9-11). Ләма бь фәрмана Иса, мәләк-ԛасьд һатьбу шандьне щәм Йуһʹәнна (Әʹнт. 1:1). Хенщи ԝе йәке, чаԝа Паԝлосе шанди 1 Корьнтʹи 6:3-да гот, тʹәне бьред Исайи рʹӧһʹани дькарьн диԝане бькьн. Демәк әԝана ԝе һьнге диԝане бькьн, гава рʹӧһʹед зӧлм ԝе бенә кʹӧтакьрьне.
Хԝәндьна Кʹьтеба Пироз
(1 Корьнтʹи 6:1-14) Гәло әва к′аре кьрьне йә, гава йәк жь ԝә, нава ԝи у бьре ԝида дә′ԝ-доз пешда те, тӧрӧш дькә ль бәр нәп′ака ԝе йәке дьдә сафикьрьне, нә кӧ ль бәр щьмә′та Хԝәде? 2 Чьма һун ньзаньн кӧ щьмә′та Хԝәде ԝе диԝана дьне бькә? У һәгәр бь дәсте ԝә ԝе диԝана дьнйайе бе кьрьне, гәло һун нькарьн ван пьрсед сьвьк жи сафи кьн? 3 Чьма һун ньзаньн кӧ әме диԝана мьлйак′әта жи бькьн? Иди к′ӧ дьминә диԝана пьрсед ве дьнйайе нәкьн? 4 Аԝа һәгәр нава ԝәда пьрсед ве дьнейә сафикьрьне һәбьн, һун чаԝа дькарьн һ′акьмтийе бьдьнә дәсте йед ӧса, кӧ жь алийе щьвинеда нә т′ӧ тьшт ьн? 5 Әз аһа дьбежьм, кӧ һун шәрм бькьн! Гәло нава ԝәда йәки сәрԝахт т′ӧнә, кӧ бькарьбә нава бьрада сәрәдәрийе бькә? 6 Ле бьра бьрер′а дьк′әвә дә′ԝ-дозе, әԝ жи ль бәр нәбаԝәра! 7 Ԝә р′асти ве йәкеда лап дайә дәр, кӧ һун һәвр′а дьк′әвьнә дәргәһ-диԝана. Гәло һе ԛәнщ нинә, кӧ һун бенә нәһәԛкьрьне? Гәло һе ԛәнщ нинә, кӧ һун бенә шеландьне? 8 Ле һун нәһәԛийе дькьн у дьшелиньн, әԝ жи хушк-бьра! 9 Чьма һун ньзаньн кӧ йед нәһәԛ ԝе П′адшатийа Хԝәде ԝар нәбьн? Нәхапьн! Нә бенамус, нә п′утп′арьст, нә зьнек′ар, нә ԛӧндә, нә к′онә, 10 нә дьз, нә тьмак′ар, нә сәрхԝәш, нә бӧхданбеж, нә жи т′аланкьр П′адшатийа Хԝәде ԝе ԝар нәбә. 11 У жь ԝә һьнәк ӧса бун. Ле һун жь гӧна һатьнә шуштьне, һун һатьнә бӧһӧрти-жьбарәкьрьне, һун р′аст һатьнә һ′әсабе бь наве Хӧдан Иса Мәсиһ у бь Р′ӧһ′е Хԝәдейе мә. 12 Дьбежьн: «Һәр тьшт мьнр′а ә′дәт ә», бәле, ле һәр тьшт нә к′ар ә. «Һәр тьшт мьнр′а ә′дәт ә», ле т′ӧ тьшт гәрәке һ′ӧкӧми сәр мьн нәкә 13 Дьбежьн: «Хԝарьн бона зьк ә, зьк жи бона хԝарьне йә», ле Хԝәде һәр дӧйа жи ԝе ӧнда кә. Ле бәдән нә бона ԛавийе йә, ле бона хьзмәтк′арийа Хӧдан ә у Хӧдан жи бона бәдәне хәм дькә. 14 У Хԝәдейе кӧ Хӧдан жь мьрьне р′акьр, ԝе мә жи жь мьрьне р′акә бь ԛәԝата хԝә.