Кани бона «Бәрнама Щьвине, Бьжин у Хьзмәт кьн»
6-12 ТИРМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ДӘРКʹӘТЬН 6-7
«Те Ньһа Бьбини, кӧ Әзе Чь Сәре Фьрәԝьн Бькьм»
(Дәркʹәтьн 6:1) Хӧдан готә Муса: «Те ньһа бьбини, кӧ әзе чь сәре Фьрәԝьн бькьм. Ԝе ԝан бь дәсте зор бәрʹдә у ԝе ԝан бь дәсте зор жь ԝәлате хԝә дәрхә».
(Дәркʹәтьн 6:6, 7) Аԝа бежә зарʹед Исраел: ‹Әз Хӧдан ьм! Әзе ԝә жь бьн баред мьсьрийайә гьран дәрхьм у ԝә жь хӧламтийа ԝан аза кьм, пе зәнда бәрбьрʹи ԝә дьрежкьри у диԝанед гьран хьлаз кьм. 7 У әзе ԝә бькьмә щьмәʹта хԝә у бьбьмә Хԝәдейе ԝә. У һьнге һуне бьзаньбьн кӧ Хӧдан Хԝәдейе ԝә әз ьм, йе кӧ һун жь бьн баред мьсьрийайә гьран дәрхьстьн.
it-2 436 ¶3
Муса
Исраелийа хԝә щурʹә-щурʹә дьданә кʹьфше. Мәсәлә, пешийе ԝана Муса баԝәр кьр, ле паше чахе Фьрәԝьн щәфе ԝан гьран кьр, ԝана дәстпекьр сәр Муса бькьнә кӧтә-кӧт. Жь бо ве йәке Муса бь дьлтәнгийе ль Йаһоԝа кьрә һәԝар-гази (Дркʹ. 4:29-31; 5:19-23). Һьнге Йе Һәри Жорьн ԝи ԛәԝи кьр у готе кӧ ԝе ԛьрара хԝә бинә сери, кʹижан кӧ Бьраһим, Исһаԛ у Аԛуб һивийе бун. Йаһоԝа дьхԝәст щьмәʹта Исраеле аза кьра у әԝ бькьра щьмәʹтәкә мәзьн әʹрде создайида, бь чь жи ԝе мәʹна наве Йаһоԝа бь тʹәмами әʹйан буйа (Дркʹ. 6:1-8). Диса жи Исраелийа гӧрʹа Муса нәдькьрьн. Ле паши бәла нәһа, ԝана хԝә ԛәԝи ль Муса гьрт у һазьр бун тʹәви ԝи шьхӧлкʹарийе бькьн. Ләма жи ида паши бәла дәһа, Муса карьбу бь тʹәрбәти рʹебәрийе щьмәʹте бькә у ԝана жь Мьсьре дәрхә (Дркʹ. 13:18).
(Дәркʹәтьн 7:4, 5) Фьрәԝьне гӧһдарийа ԝә нәкә. У әзе дәсте хԝә дайньмә ль сәр Мьсьре у рʹәфед хԝә, щьмәʹта хԝә, зарʹед Исраел пе диԝанед мәзьн жь ԝәлате Мьсьре дәрхьм. 5 У һьнге мьсьрийе бьзаньбьн кӧ әз Хӧдан ьм, гава әз дәсте хԝә дьрежи ль сәр Мьсьре кьм у зарʹед Исраел жь нав ԝан дәрхьм».
it-2 436 ¶1-2
Муса
Бәр Фьрәԝьн сәкьнинә. Муса у Һарун роләкә мӧһим листьн ‹шәрʹе хӧданада›. Бь сайа дӧ сербазед сәрәкә, наве кʹижана кӧ Йанис у Йамбрис бун (2 Тим. 3:8), Фьрәԝьн гази һʹәму хӧданед Мьсьре дькьр, ԝәки избат кә, кӧ әԝана жь Йаһоԝа ԛәԝаттьр ьн. Кʹәрәмәта пешьн, кʹижан кӧ Һарун бь рʹебәрийа Муса бәр Фьрәԝьн кьр, да кʹьфше ԝәки Йаһоԝа жь хӧданед Мьсьре ԛәԝаттьр ә. Ле йәкә Фьрәԝьн сәр йа хԝә сәкьни бу (Дркʹ. 7:8-13). Ԝәʹдә шунда паши бәла сьсийа, сербаз жи мәщбур бун ԛәбул кьн, кӧ «әва тʹьлийа Хԝәде йә». Хенщи ԝе йәке паши бәлакә дьн, демәк кӧле пʹьзька, сербаза зийанәкә ӧса мәзьн стандьн, ԝәки нькарьбун бенә бәр Фьрәԝьн у мьԛабьли Муса дәрен (Дркʹ. 8:16-19; 9:10-12).
Бәла дьле һьнәка нәрм дькә, ле дьле һьнәка жи һʹьшк дькә. Муса у Һарун, бунә әʹламчийе һәр Дәһә Бәла, кʹижан кӧ ль гора гьлийе ԝан дьԛәԝьмин. Әве йәке избат дькьр, ԝәки Йаһоԝа Муса шандьбу. Наве Йаһоԝа Мьсьреда әʹйан бу у гьшка дәрһәԛа ԝи хәбәр дьдан. Әве йәке дьле Исраелийа у дьле һьнә Мьсьрийа нәрм кьр, ле дьле Фьрәԝьн у пьштгьред ԝи һʹьшк кьр (Дркʹ. 9:16; 11:10; 12:29-39). Мьсьрийа рʹьнд заньбун, ԝәки әв һʹәму тьшт те сәре ԝан, чьмки Йаһоԝа диԝана хӧданед ԝан дькә. Паши нәһә бәла, Муса Мьсьреда бу «мәрьвәки гәләки хԝәйиԛәдьр», чаԝа бәр чʹәʹве хӧламед Фьрәԝьн, ӧса жи бәр чʹәʹве щьмәʹте (Дркʹ. 11:3).
Хьзна Кʹьтеба Пироз Бьгәрʹьн
(Дәркʹәтьн 6:3) Әз чаԝа Хԝәдейе Һәри Зор, Бьраһим, Исһаԛ у Аԛубва хӧйа бумә, ле бь наве хԝә Хӧдан ԝанва хӧйа нәбумә.
it-1 78 ¶3-4
Һьмзор
Чахе Йаһоԝа дәрһәԛа буйина Исһаԛ соз да Бьраһим, һьнге әԝи сәр хԝә гот «Хԝәдайе Һьмзор» (Ел Шад дай). Бьраһим гәрәке баԝәр кьра, ԝәки ԛәԝата Хԝәде дьгьһиже, кӧ ԝи созе хԝә бинә сери. Ԝәʹдә шунда Йаһоԝа әв сәрнаве хԝә дьда хәбате, чахе соз дьда кӧ ԝе Исһаԛ у Аԛуб, чаԝа хԝәйиԝаре пәймана тʹәви Бьраһим, кʹәрәм кә (Дсп. 17:1; 28:3; 35:11; 48:3).
Ль гора ве йәке, ԝәʹдә шунда Йаһоԝа готә Муса: «Әз чаԝа Хԝәдейе Һәри Зор [бе Ел Шад дай], Бьраһим, Исһаԛ у Аԛубва хӧйа бумә, ле бь наве хԝә Хӧдан ԝанва хӧйа нәбумә» (Дркʹ. 6:3). Әв йәк нәдьһатә һʹәсабе, ԝәки әван мәрьва навә Йаһоԝа ньзаньбун, чьмки һьм ԝана һьм жи һьнә мәрьвед кӧ пешийа ԝан дьжитьн, гәләк щар әв нав дьданә хәбате (Дсп. 4:1, 26; 14:22; 27:27; 28:16). Бь рʹасти кʹьтеба Дәстпебунда, кʹидәре кӧ дәрһәԛа бавәʹшира те готьне, хәбәра «Һьмзор» тʹәне 6 щара һатийә ньвисаре, ле текста Ибранийә орижиналеда наве Йаһоԝа 172 щара ньвисар ә. Рʹаст ә, әван бавәʹшира рʹьнд заньбун ԝәки әв сәрнав «Һьмзор», лайиԛи Хԝәде йә, ле диса жи мәщала ԝан тʹӧнә бу, ԝәки мәʹна наве Хԝәде Йаһоԝа, рʹаст фәʹм бькьн. Ль гора ве йәке, фәрһәнгәкеда «The Illustrated Bible Dictionary» (Пʹара 1, рʹупʹ. 572) ӧса һатийә готьне: «Хәԝн-хәйала, кӧ пешийа ԝе йәке бавәʹширарʹа һатьбу дайине, дәрһәԛа ԝан соза бу, кʹижан кӧ ахьрийе гәрәке бьһатана сери. У әв дьһатә һʹәсабе, ԝәки әԝана гәрәке дӧдьли нәбуна, кӧ Хԝәде (ел), йане Йаһԝәһ, дькарә (шаддай) ве йәке бинә сери. Ле әв хәйала кӧ бәр тʹуме агьр һатьбу дайине, даһа гьринг у шәхси бу, чьмки ԛәԝата Хԝәде әʹйан дькьр у ӧса жи дьда кʹьфше, ԝәки Хԝәде ԝе тʹьме тʹәви бавәʹшира бә. Демәк наве Йаһԝәһ ԝан һʹәму тьштава гьредайи бу» (Нәшьркʹар Ж.Д. Дуглас, 1980).
(Дәркʹәтьн 7:1) Хӧдан готә Муса: «Һәла бьньһерʹә, әз тә дькьмә мина Хԝәде бона Фьрәԝьн, бьре тә Һарун жи ԝе бьбә пʹехәмбәре тә.
it-2 435 ¶5
Муса
Хԝә паш дьхьст, ле Хԝәде әԝ рʹәт нәкьр. Муса хԝә жь тʹәмийа Йаһоԝа паш хьст у гот кӧ әԝ зьманда гьран ә. Бәле, әԝ һатьбу гӧһастьне у ида әԝ Муса нибу, кʹижани кӧ 40 сал пешда дәстпекьр хԝәсәрихԝә щьмәʹта Исраеле аза кә. Ле ньһа әԝ лавайа Йаһоԝа дькә, кӧ ԝи жь ве тʹәмийе аза кә. Рʹаст ә һерса Йаһоԝа рʹабу, ле диса жи Йаһоԝа ԝи рʹәт нәкьр. Дәԝсе Йаһоԝа, бьре Муса Һарун ԝирʹа ча аликʹарчи кʹьфш кьр. Ӧса Муса ча ԝәкʹиле Хԝәде бу, йане бона Һарун «Хӧдан» бу, кʹижани кӧ дәԝса Муса хәбәр дьда. Пашԝәхтийе Хԝәде рʹебәри дьда Муса, әԝи жи әв йәк дәрбази Һарун дькьр. Һарун жи әв һʹәму рʹебәри әʹлами рʹуспийед Исраеле у Фьрәԝьн дькьр (кʹижан кӧ сәрԝерти дькьр паши Фьрәԝьне кӧ 40 сал пешда Муса ле рʹәви) (Дркʹ. 2:23; 4:10-17). Ԝәʹдә шунда Йаһоԝа сәр Һарун гот «пʹехәмбәре» Муса, чьмки әԝи бь наве Муса хәбәр дьда, анәгори ве йәке ча Муса жь Хԝәде хәбәр дьда у кʹар дькьр. Хенщи ве йәке, Йаһоԝа гот, кӧ Муса ԝе бьбә «Хԝәде бона Фьрәԝьн», демәк сәр Фьрәԝьн һʹӧкӧмти бькьра. Ләма жи Муса гәрәке сәрԝере Мьсьре нәтьрсийа (Дркʹ. 7:1, 2).
Хԝәндьна Кʹьтеба Пироз
(Дәркʹәтьн 6:1-15) Хӧдан готә Муса: «Те ньһа бьбини, кӧ әзе чь сәре Фьрәԝьн бькьм. Ԝе ԝан бь дәсте зор бәрʹдә у ԝе ԝан бь дәсте зор жь ԝәлате хԝә дәрхә». 2 Хԝәде тʹәв Муса хәбәр да у готә ԝи: «Әз Хӧдан ьм. 3 Әз чаԝа Хԝәдейе Һәри Зор, Бьраһим, Исһаԛ у Аԛубва хӧйа бумә, ле бь наве хԝә Хӧдан ԝанва хӧйа нәбумә. 4 Мьн тʹәви ԝан пәймана хԝә гьреда, кӧ ԝәлате Кәнане бьдьмә ԝан, ԝәлате ԝани хәрибийе, ԝе дәра кӧ фьрари дәрбаз кьрьн. 5 Мьн заринийа зарʹед Исраел бьһист кӧ мьсьрийа әԝ кьрьнә хӧлам у мьн пәймана хԝә бир ани. 6 Аԝа бежә зарʹед Исраел: ‹Әз Хӧдан ьм! Әзе ԝә жь бьн баред мьсьрийайә гьран дәрхьм у ԝә жь хӧламтийа ԝан аза кьм, пе зәнда бәрбьрʹи ԝә дьрежкьри у диԝанед гьран хьлаз кьм. 7 У әзе ԝә бькьмә щьмәʹта хԝә у бьбьмә Хԝәдейе ԝә. У һьнге һуне бьзаньбьн кӧ Хӧдан Хԝәдейе ԝә әз ьм, йе кӧ һун жь бьн баред мьсьрийайә гьран дәрхьстьн. 8 У әзе ԝә бьбьмә ԝи ԝәлати, бона кʹижани мьн сонд хԝар кӧ бьдьмә Бьраһим, Исһаԛ, Аԛуб, әзе ԝи чаԝа ԝар бьдьмә ԝә. Әз Хӧдан ьм›». 9 Муса әв йәк зарʹед Исраелрʹа гот, ле ԝан жь дьлтәнгийе у жь дәст шьхӧлед гьран гӧһдарийа Муса нәкьрьн. 10 Хӧдан тʹәв Муса хәбәр да у готе: 11 «Һәрʹә щәм Фьрәԝьне пʹадше Мьсьре бежә кӧ зарʹед Исраел жь ԝәлате хԝә бәрʹдә». 12 Һьнге Муса ль бәр Хӧдан хәбәр да у готе: «Ва йә, зарʹ ед Исраел гӧһдарийа мьн накьн, иди кʹӧ ма кӧ Фьрәԝьн гӧһдарийа мьн бькә? Әз жи зьменда гьран ьм». 13 У Хӧдан бона зарʹед Исраел у Фьрәԝьне пʹадше Мьсьре тʹәви Муса у Һарун хәбәрда у әʹмьри сәр ԝан кьр кӧ зарʹед Исраел жь Мьсьре дәрхьн. 14 Пешийед малбәтед ԝан әв ьн. Кӧрʹед Рʹубен, ньхӧрийе Исраел, әв ьн: Һәнох, Паллу, Һәсрун у Кʹарми. Әв ьн малбәтед Рʹубен. 15 Кӧрʹед Шьмһʹун әв ьн: Йәмуел, Йамин, Оһад, Йахин, Соһар у кӧрʹе кʹӧлфәта кәнани Шаԝул. Әв ьн малбәтед Шьмһʹун.
13-19 ТИРМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ДӘРКʹӘТЬН 8-9
«Фьрәԝьне Бабах бе Һʹәмде Хԝә, Ԛьрара Хԝәде Тинә Сери»
(Дәркʹәтьн 8:15) Ле гава Фьрәԝьн дина хԝә дайе кӧ рʹьһʹәти кʹәте, дьле хԝә кьрә кәвьр у гӧрʹа ԝан нәкьр, чаԝа кӧ Хӧдан готьбу.
it-2 1040-1041
Сәрһʹьшки
Нава тʹәрихийа инсанәтеда, Йаһоԝа сәбьр дькьр ԝан мәрьва у щьмәʹта, йед кӧ һежайи мьрьне бун у мәщал дьда ԝан, ԝәки бьжин (Дсп. 15:16; 2 Пт. 3:9). Әв сәбьра Хԝәде баш һʹӧкӧм дьбу сәр һьнә мәрийа, әԝана дьһатьнә гӧһастьне у рʹәʹма ԝи дьстандьн (Йеш. 2:8-14; 6:22, 23; 9:3-15), ле йед дьн мьԛабьли Йаһоԝа у щьмәʹта ԝи дәрдькʹәтьн у дьһа сәрт дьбун (Ԛн.Дщ. 2:30-33; Йеш. 11:19, 20). Дәрһәԛа Йаһоԝа те готьне, ԝәки әԝ дьһелә кӧ мәрьв бьбьнә сәрһʹьшк у дьле ԝан бьбә кәвьр, чьмки Әԝ рʹийа мәрийа нагьрә, чахе әԝана сәрһʹьшкийе дькьн. Ахьрийе чахе Йаһоԝа йед сәрһʹьшк щәза дькә, ԛәԝата Ԝи әшкәрә дьбә у бь ве йәке наве ԝи те һӧрмәткьрьне (Бәрамбәри һәв кә тʹәви Дркʹ. 4:21; Йн. 12:40; Рʹм. 9:14-18).
(Дәркʹәтьн 8:18, 19) Сербаза жи бь сербазийед хԝә кьрьн кӧ кʹәрмеша дәрхьн, ле нькарьбун. У аԝа ль сәр мәрьва у һʹәйԝен кʹәрмеш бун. 19 Сербаза готә Фьрәԝьн: «Әва тʹьлийа Хԝәде йә». Ле дьле Фьрәԝьн бу кәвьр у гӧрʹа ԝан нәкьр, чаԝа кӧ Хӧдан готьбу.
(Дәркʹәтьн 9:15-17) Һәгәр мьн дәсте хԝә дьреж кьра у бь нәхԝәшийа һʹал ль тә у щьмәʹта тә хьста, те сәр дьне бьһатайи ӧндакьрьне. 16 Ле бона ве йәке мьн тӧ хԝәйкьри, ԝәки ԛәԝата хԝә нишани тә бькьм у ль сәр тʹәмамийа дьнйайе наве мьн бе готьне. 17 Тӧ һе мьԛабьли щьмәʹта мьн дьсәкьни кӧ ԝе бәрʹнәди?
it-2 1181 ¶3-5
Зӧлми
Йаһоԝа Хԝәде һьнә дәрәща ӧса дьдә хәбате, кӧ мәрьвед зӧлм нә жи фәʹм дькьн чаԝа хԝәха жи ԛьрара Ԝи тиньн сери. Рʹаст ә, мәрьвед зӧлм мьԛабьли Хԝәде дәртен, ле Йаһоԝа дькарә шьхӧлед ԝан һаԛас синор кә, чьԛас кӧ лазьм ә, сәва кӧ хьзмәткʹаред ԝи бькарьбьн беԛьсуртйа хԝә хԝәй кьн. Хенщи ԝе йәке, Йаһоԝа дькарә ӧса бькә, ԝәки кьред мәрьвед зӧлм, һәԛийа Ԝи әʹйан кьн (Рʹм. 3:3-5, 23-26; 8:35-39; Зб. 76:10). Әԝ фькьр ӧса жи ньвисар ә Мәтʹәлок 16:4-да: «Һәр тьшт Хӧдан бь мәрәм кьрийә, нәпʹак жи бона рʹожа охьрме гьран».
Әԝ йәк тʹәви Фьрәԝьн жи ԛәԝьми, чахе Йаһоԝа бь сайа Муса у Һарун дәʹԝа кьр, ԝәки Исраелийа жь дилтийе аза кә. Нә кӧ Йаһоԝа ӧса кьр, ԝәки Фьрәԝьн бьбә йәки зӧлм, ле Йаһоԝа һишт әԝ бьжи у дәрәщәкә ӧса чекьр кӧ зӧлмйа Фьрәԝьн әʹйан бу. Әԝ кьред Фьрәԝьн нишан кьрьн, ԝәки әԝ һежайи мьрьне йә. Мәʹнийа ԝе йәке кӧ чьма Йаһоԝа һишт ԝәки Фьрәԝьн бьжи, те кʹьфше жь Дәркʹәтьн 9:16: «Ле бона ве йәке мьн тӧ хԝәйкьри, ԝәки ԛәԝата хԝә нишани тә бькьм у ль сәр тʹәмамийа дьнйайе наве мьн бе готьне».
Дәһә бәлайед кӧ һатьнә сәр Мьсьре у ԛьркьрьна Фьрәԝьн тʹәви ордийа ԝи Бәʹра Сорда, избат дькьрьн ԝәки Йаһоԝа чьԛас ԛәԝат ә (Дркʹ. 7:14–12:30; Зб. 78:43-51; 136:15). Ԝәʹдә шунда, щьмәʹтед дәр-дор диса дәрһәԛа наве Хԝәде хәбәр дьдан, у ӧса наве Хԝәде сәр тʹәмамийа дьнйайе бәла бу (Йеш. 2:10, 11; 1 См. 4:8). Һәрге Йаһоԝа дәрберʹа Фьрәԝьн бькӧшта, һьнге ԝе әʹйан нәбуйа кӧ әԝ чьԛас ԛәԝат ә.
Хьзна Кʹьтеба Пироз Бьгәрʹьн
(Дәркʹәтьн 8:21) Ле һәгәр тӧ щьмәʹта мьн бәрʹнәди, аԝа әзе ль сәр тә, ль сәр хӧламед тә, ль сәр щьмәʹта тә у ль сәр малед тә пʹәрʹанийа меш-моза бьшиньм у малед мьсьрийа бь пʹәрʹанийа меш-мозава ԝе тʹьжи бьн, ӧса жи сәр ԝи әʹрде кӧ әԝ дьминьн.
it-1 878
Кʹәрмеш
Әм нькарьн бежьн кӧ әԝ хәбәра Ибрани, кʹижан кӧ һатийә ԝәлгәрʹандьне ча кʹәрмеш, бь рʹасти кʹижан кʹезьк дьһатә һʹәсабе. Хәбәра «аров» бәла чарада те готьне. Әв бәла йа пешьн бу жь ԝан бәла, йед кӧ һʹӧкӧм нәдьбун сәр Исраелийед кӧ әʹрде Гошәнеда дьжитьн (Дркʹ. 8:21, 22, 24, 29, 31; Зб. 78:45; 105:31). Хәбәра «аров» һьнә ԝәлгәрʹандьнада ӧса те ньвисаре: «кʹәрмеш» (JB, NW, Ro), «меш» (Yg), «кʹезьк» (AS, KJ, RS), «мьхмьхк» (AT), у «меш-моз» (LXX).
Һьнә щурʹед ԝан кʹәрмеша чʹәрʹме мәрьва у һʹәйԝана ԛӧл дькьн у хуна ԝан вәдьхԝьн. Әԝана һьм жи бәдәна мәрийа у һʹәйԝанада һека датиньн, бәдәна ԝанда дьжин у зийане дьдьнә ԝан. Кʹәрмешед ԝи щурʹәйи һʹәчʹи зәʹф щийед гәрм дьжин. Чахе кʹәрмеш һатьнә сәр Мьсьре, ԝана зийанәкә мәзьн да Мьсьрийа у һʹәйԝанед ԝан. Әԝан кʹәрмеша гәләкарʹа мьрьн жи анин.
(Дәркʹәтьн 8:25-27) Фьрәԝьн гази Муса у Һарун кьр, гот: «Һәрʹьн ви ԝәлатида Хԝәдейе хԝәрʹа ԛӧрбане бьдьн». 26 Ле Муса готе: «Нә щайиз ә кӧ әм ве йәке бькьн, чьмки әԝ ԛӧрбана кӧ әме Хӧдан Хԝәдейе хԝәрʹа бьдьн, әв йәк мьсьрийарʹа һʹәрами йә. Һәгәр әм бь ԝе ԛӧрбандайина кӧ бона мьсьрийа һʹәрам ә, рʹабьн ль бәр чʹәʹве ԝан бьдьн, гәло әԝе мә нәдьнә ль бәр кәвьра? 27 Әме рʹийа се рʹожа һәрʹьнә бәрʹийе у Хӧдан Хԝәде хԝәрʹа ԛӧрбане бьдьн, чаԝа кӧ әԝ мәрʹа бежә».
ԝ04 15/3 25 ¶9
Фькьред Сәрәкә жь Кʹьтеба Дәркʹәтьн
8:26, 27: Чьма Муса гот, ԝәки ԛӧрбанед Исраелийа «бона мьсьрийа һʹәрам ә»? Гәләк һʹәйԝан бона Мьсьрийа пироз дьһатьнә һʹәсабе. Әв ԛӧрбан, Фьрәԝьнрʹа дьда кʹьфше фәрзбуна дәʹԝакьрьна Муса, кӧ Исраелийа бәрʹдә. Демәк Исраели гәрәке аза буна, ԝәки Йаһоԝарʹа ԛӧрбан бьдана.
Хԝәндьна Кʹьтеба Пироз
(Дәркʹәтьн 8:1-19) Хӧдан готә Муса: «Һәрʹә щәм Фьрәԝьн у бежә ԝи: ‹Хӧдан аһа дьбежә: Щьмәʹта мьн бәрʹдә кӧ хӧламтийа мьн бькә. 2 Ле һәгәр тӧ нәхԝәзи бәрʹди, ва йә әзе пе бәԛа тʹәмамийа тʹопрахед тә хьм. 3 Чʹәме бәԛава бькʹьмкʹьмә у әԝе рʹабьн бькʹәвьнә мала тә, ода тәйә рʹазане, ньвина тә, малед хӧламед тә, нава щьмәʹта тә, тәндуред тә у шкәва тәйә һәвир. 4 У бәԛе рʹабьнә ль сәр тә, ль сәр щьмәʹта тә у ль сәр һʹәму хӧламед тә›». 5 Һьнге Хӧдан готә Муса: «Бежә Һарун: ‹Дәсте хԝә шьвдарева дьрежи ль сәр чʹәма, щәԝа у гола кә у ль сәр ԝәлате Мьсьре, бәԛа дәрхә›». 6 У Һарун дәсте хԝә дьрежи ль сәр авед Мьсьре кьр. Бәԛ дәркʹәтьн у ԝәлате Мьсьре ньхамтьн. 7 Сербаза жи бь сербазийа хԝә ӧса кьрьн у ль сәр ԝәлате Мьсьре бәԛ дәрхьстьн. 8 Фьрәԝьн гази Муса у Һарун кьр у гот: «Рʹәща жь Хӧдан бькьн, кӧ бәԛа жь мьн у жь щьмәʹта мьн дур хә у әзе щьмәʹте бәрʹдьм кӧ Хӧданрʹа ԛӧрбане бьдьн». 9 Һьнге Муса готә Фьрәԝьн: «Тӧ хԝәха мьнрʹа ԝәʹдә кʹьфш кә, әз кʹәнге бона тә, бона хӧламед тә у бона щьмәʹта тә рʹәща бькьм, кӧ бәԛ жь тә у жь малед тә ӧнда бьн, тʹәне әԝе чʹемда бьминьн». 10 У әԝи гот: «Сьбе». Муса гот: «Бьра ԝәкә готьна тә бә! Кӧ тӧ бьзаньби, йәки мина Хӧдан Хԝәдейе мә тʹӧнә. 11 Бәԛе жь тә, жь малед тә, жь хӧламед тә у жь щьмәʹта тә ԝе дур кʹәвьн, тʹәне чʹемда ԝе бьминьн». 12 Муса у Һарун жь щәм Фьрәԝьн дәркʹәтьн у Муса бона ԝан бәԛа, кʹижан кӧ Хӧдан анибунә сәр Фьрәԝьн гази Хӧдан кьр. 13 Хӧдан ԝәкә готьна Муса кьр, у бәԛед малада, һʹәԝшада у кʹәԝшәнада һʹьшк бун. 14 Әԝ кʹом-кʹом тʹоп кьрьн у бин кʹәтә ԝәлет. 15 Ле гава Фьрәԝьн дина хԝә дайе кӧ рʹьһʹәти кʹәте, дьле хԝә кьрә кәвьр у гӧрʹа ԝан нәкьр, чаԝа кӧ Хӧдан готьбу. 16 Һьнге Хӧдан готә Муса: «Бежә Һарун: ‹Бьра шьвдара хԝә дьреж кә тʹоза әʹрде хә, кӧ әԝ ль сәр тʹәмамийа ԝәлате Мьсьре бьбә кʹәрмеш›». 17 У ӧса кьрьн. Һарун дәсте хԝә шьвдара хԝәва дьреж кьр, тʹоза әʹрде хьст у кʹәрмеш ль сәр мәрьва у һʹәйԝен рʹабун. Ль сәр тʹәмамийа ԝәлате Мьсьре һʹәму тʹоза әʹрде бу кʹәрмеш. 18 Сербаза жи бь сербазийед хԝә кьрьн кӧ кʹәрмеша дәрхьн, ле нькарьбун. У аԝа ль сәр мәрьва у һʹәйԝен кʹәрмеш бун. 19 Сербаза готә Фьрәԝьн: «Әва тʹьлийа Хԝәде йә». Ле дьле Фьрәԝьн бу кәвьр у гӧрʹа ԝан нәкьр, чаԝа кӧ Хӧдан готьбу.
20-26 ТИРМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ДӘРКʹӘТЬН 10-11
«Муса у Һарун Мерхасийе Дьдьнә Кʹьфше»
(Дәркʹәтьн 10:3-6) Муса у Һарун чунә щәм Фьрәԝьн у готьнә ԝи: «Хӧдан Хԝәдейе ибранийа аһа дьбежә: ‹Һʹәта кʹәнге те нәхԝази бәр мьн хԝә бьшкени? Щьмәʹта мьн бәрʹдә кӧ хӧламтийа мьн бькә. 4 Ле һәгәр тӧ нәхԝәзи щьмәʹта мьн бәрʹди, ва йә әзе сьбе кӧлийа бьшиньмә ль сәр тʹопраха тә, 5 әԝе рʹуйе әʹрде ӧса бьгьрьн, кӧ әʹрде иди нәйе кʹьфше чь жи пәй тәйрокерʹа бона ԝә майә ԝе бьхԝьн у ӧса жи һʹәму даред әʹрде ԝәда йә шинбуйи ԝе бьхԝьн. 6 Әԝе малед тә, мале хӧламед тә у малед һʹәму мьсьрийа тʹьжи бьн, ԝәки нә бавед тә, нә жи баве бавед тә жь рʹожа рʹубари дьне кʹәтьнә һʹәта ньһа тьште ӧса нәдитьнә›». У пьшта хԝә дайе жь щәм Фьрәԝьн дәркʹәт.
ԝ09 15/7 20 ¶6
Мина Иса бь Мерхаси Мьзгинийе Бәла кьн
6 Бьфькьрьн дәрһәԛа мерхасийа Муса, чахе әԝи тʹәви Фьрәԝьн хәбәр дьда. Фьрәԝьн һʹәсаб дькьрьн ча хӧдан, демәк кӧрʹе хӧдане тәʹве, наве кʹижани кӧ Ра бу. Дьԛәԝьмә әԝи мина Фьрәԝьнед дьн әв пут дьһʹәбанд, йе кӧ ԝи әʹйан дькьр, демәк хԝәха хԝә дьһʹәбанд. Гьлийе Фьрәԝьн ԛанун бун; һʹӧкӧмтийа ԝи синоркьри нибу. Фьрәԝьн йәки сәрт у хԝәсәрихԝә бу. Әԝи гьлийе тʹӧ кәси һьлнәдьда һʹәсаб. Бьдьнә бәр чʹәʹве хԝә, ԝәки Муса, шьване мьлук, чәнд щара дьһатә бәр мәрьвәки ӧса. У тʹӧ кәс һивийа ԝи нибу у нә жи ԝирʹа ша бу. Гәло Муса чь әʹлами ԝан дькьр? Муса дәрһәԛа бәла әʹлами ԝан дькьр, йед кӧ зийанәкә мәзьн ԝе бьдана Мьсьре. Ле Муса жь Фьрәԝьн чь дәʹԝа дькьр? Әԝи дәʹԝа дькьр, ԝәки Фьрәԝьн чәнд милийон дилед хԝә бәрʹдә! Бь рʹасти жи Мусарʹа мерхаси лазьм бу! (Жм. 12:3; Ибр. 11:27)
(Дәркʹәтьн 10:24-26) Һьнге Фьрәԝьн гази Муса кьр у готе: «Һәрʹьн Хӧдан бьһʹәбиньн, ле тʹәне бьра пәз у дәԝаред ԝә бьминьн, жьн-зарʹед ԝә жи бьра тʹәв ԝә бен». 25 Муса гот: «Гәрәке тӧ ԛӧрбан у дийарийед тʹәвайишәԝате жи бьди дәсте мә, кӧ әм бьдьнә Хӧдан Хԝәдейе хԝә. 26 Әме һʹәйԝанед хԝә жи тʹәв хԝә бьбьн, ԛәт сьмәк жи гәрә нәминә, чьмки бона Хӧдан Хԝәдейе хԝәрʹа хӧламти кьрьне, әм гәрәке жь ԝан һьлдьн. Һʹәта әм нәчьнә ԝьр, әм ньзаньн әме бь чь Хӧданрʹа хӧламтийе бькьн».
(Дәркʹәтьн 10:28) У Фьрәԝьн готә Муса: «Жь щәм мьн һәрʹә! Һаш хԝә һәбә кӧ щарәкә дьн рʹуйе мьн рʹуйе тә нәкʹәвә, чьмки ԝе рʹожа кӧ рʹуйе мьн рʹуйе тә кʹәвә, те бьмьри».
(Дәркʹәтьн 11:4-8) Муса готә Фьрәԝьн: «Хӧдан аһа дьбежә: ‹Незикийа ниве шәве әзе нава Мьсьрерʹа дәрбаз бьм. 5 Ԝәлате Мьсьреда һәр ньхӧрийе бьмьрә, жь ньхӧрийе Фьрәԝьни кӧ сәр тʹәхт рʹуньштийә, һʹәта ньхӧрийе щарийа кӧ сәр дәстерʹә у ӧса жи һәр ньхӧрийе һʹәйԝен. 6 У ԝе зариникә кʹур бькʹәвә тʹәмамийа ԝәлате Мьсьре, кӧ тьште ӧса нә ԛәԝьмийә у нә жи ԝе бьԛәԝьмә. 7 Ле һьндава зарʹед Исраелда, жь мәрьва гьрти һʹәта һʹәйԝен, сәке жи зьмане хԝә нәльпьтинә. Һьнге һуне бьзаньбьн, кӧ Хӧдан ль нав Мьсьре у Исраелда фьрԛийе датинә. 8 У әв һʹәму хӧламед тә ԝе бәржер бенә щәм мьн, бәр мьн табьн у бежьн: «Тӧ у тʹәмамийа щьмәʹта кӧ пәй тә те дәркʹәвә». Пәй ве йәкерʹа әзе дәркʹәвьм›». У Муса гәләки һерс жь щәм Фьрәԝьн дәркʹәт.
it-2 436 ¶4
Муса
Мерхаси у Баԝәри бәр Фьрәԝьн. Муса у Һарун бь сайа Йаһоԝа у рʹӧһʹе ԝийи пироз, карьбун тʹәмийа Ԝи биньн сери. Һьнге Фьрәԝьн сәрԝере лапи гьринг бу. Дә бьдьнә бәр чʹәʹве хԝә, ԛәсьра ԝи чьԛас бәдәԝ бу. Фьрәԝьне бабах сәр тʹәхте Пʹадшатийе рʹуньштийә, у ԝи һʹәсаб дькьрьн ча хӧдан. Дор-бәре ԝи ширәткʹар, нобәдар, сәрәскәр у хӧламед ԝи сәкьнинә. Ӧса жи ԝедәре һәбун сәрԝеред религийе, кʹочʹәк у сербаз, кʹижан кӧ нәйаред Муса бун. Әԝ һʹәму мәрьв паши Фьрәԝьн гәләк гьринг дьһатьнә һʹәсабе. Әв һʹәму тьшт бона ве йәке бу, кӧ чаԝа Фьрәԝьн ӧса жи хӧданед Мьсьре, һӧрмәт-рʹумәт бьн. Муса у Һарун гәрәке гәләк щар бьһатана щәм Фьрәԝьн, дьле кʹижани кӧ һәр щар дьһа сәрт дьбу у әԝи нәдьхԝәст Ибранийед дил аза кә. Фьрәԝьн әв дил һʹәсаб дькьрьн ча һәбука хԝә. Чахе Муса у Һарун дәрһәԛа бәла һʹәйшта әʹлам дькьн, бәри ԝан дьдьн, ле паши бәла нәһа әԝана данә тьрсандьне, кӧ һәрге диса бенә щәм Фьрәԝьн, ԝе бенә кӧштьне (Дркʹ. 10:11, 28).
Хьзна Кʹьтеба Пироз Бьгәрʹьн
(Дәркʹәтьн 10:1, 2) Һьнге Хӧдан готә Муса: «Һәрʹә щәм Фьрәԝьн, чьмки мьн дьле ԝи у дьле хӧламед ԝи кьрә кәвьр, ԝәки ван нишанед хԝә нав ԝанда бькьм 2 у ԝәки тӧ зарʹе хԝәрʹа у зарʹед зарʹе хԝәрʹа гьли ки, кӧ мьн пе кьред хԝә мьсьри чаԝа кьрьн пекʹәни у чь нишан мьн кьрьн, кӧ һун бьзаньбьн әз Хӧдан ьм».
ԝ95 1/9 11 ¶11
Шәʹдед кӧ Мьԛабьли Хӧдане Ԛәлп Дәркʹәтьн
11 Һʹәта кӧ Исраели Мьсьреда бун, Йаһоԝа Муса шандә щәм Фьрәԝьн у готе: «Һәрʹә щәм Фьрәԝьн, чьмки мьн дьле ԝи у дьле хӧламед ԝи кьрә кәвьр, ԝәки ван нишанед хԝә нав ԝанда бькьм у ԝәки тӧ зарʹе хԝәрʹа у зарʹед зарʹе хԝәрʹа гьли ки, кӧ мьн пе кьред хԝә мьсьри чаԝа кьрьн пекʹәни у чь нишан мьн кьрьн, кӧ һун бьзаньбьн әз Хӧдан ьм» (Дәркʹәтьн 10:1, 2). Исраелийед гӧһдар гәрәке зарʹед хԝәрʹа дәрһәԛа кʹәрәмәтед Йаһоԝа гьли кьрана. Зарʹед ԝан жи гәрәке зарʹед хԝәрʹа гьли кьрана. Ӧса һәр ньсьл дәрһәԛа ве йәке педьһʹәсийа. Ви щурʹәйи кьред Йаһоԝа нәдьһатьн биркьрьне. Анәгори ве йәке, иро жи де-бав щабдар ьн, ԝәки дәрһәԛа Йаһоԝа зарʹед хԝәрʹа гьли кьн (Ԛануна Дӧщари 6:4-7; Мәтʹәлок 22:6).
(Дәркʹәтьн 11:7) Ле һьндава зарʹед Исраелда, жь мәрьва гьрти һʹәта һʹәйԝен, сәке жи зьмане хԝә нәльпьтинә. Һьнге һуне бьзаньбьн, кӧ Хӧдан ль нав Мьсьре у Исраелда фьрԛийе датинә.
it-1 783 ¶5
Дәркʹәтьна жь Мьсьре
Йаһоԝа бь кʹәрәмәти ԛәԝата хԝә әʹйан кьр, ӧса әԝи наве хԝә бьльнд кьр у щьмәʹта Исраеле аза кьр. Чахе әԝана жь Мьсьре дәркʹәтьн у жь Бәʹра Сор дәрбази алийе Рʹоһьлате бун, әԝана бехофийеда бун. Һьнге Муса у һʹәму мера дәстпекьрьн кʹьламе бьстьрен. Ле Мәрйәма пʹехәмбәр, дәф гьртә дәсте хԝә у һʹәму кʹӧлфәт жи дәф дәстада бь рʹәԛасе ль пәй ԝе дәркʹәтьн (Дркʹ. 15:1, 20, 21). Щьмәʹта Исраеле бь тʹәмами жь дьжмьне хԝә аза бу. Чахе әԝана жь Мьсьрье дәрдькʹәтьн, Хԝәде ԝана хԝәй дькьр, ԝәки тʹӧ тәрәԝьл у мәрьв нькарьбә зийане бьдә ԝан; һʹәта кучʹька жи дәве хԝә сәр ԝан вәнәкьрьн (Дркʹ. 11:7). Рʹаст ә, кʹьтеба Дәркʹәтьнда найе готьне, кӧ тʹәви ордийа Мьсьре Фьрәԝьн жи мьр, ле Зәбур 136:15-да зәлал те готьне, ԝәки Йаһоԝа «Фьрәԝьн, ордийа ԝива авитә Бәʹра Сор».
Хԝәндьна Кʹьтеба Пироз
(Дәркʹәтьн 10:1-15) Һьнге Хӧдан готә Муса: «Һәрʹә щәм Фьрәԝьн, чьмки мьн дьле ԝи у дьле хӧламед ԝи кьрә кәвьр, ԝәки ван нишанед хԝә нав ԝанда бькьм 2 у ԝәки тӧ зарʹе хԝәрʹа у зарʹед зарʹе хԝәрʹа гьли ки, кӧ мьн пе кьред хԝә мьсьри чаԝа кьрьн пекʹәни у чь нишан мьн кьрьн, кӧ һун бьзаньбьн әз Хӧдан ьм». 3 Муса у Һарун чунә щәм Фьрәԝьн у готьнә ԝи: «Хӧдан Хԝәдейе ибранийа аһа дьбежә: ‹Һʹәта кʹәнге те нәхԝази бәр мьн хԝә бьшкени? Щьмәʹта мьн бәрʹдә кӧ хӧламтийа мьн бькә. 4 Ле һәгәр тӧ нәхԝәзи щьмәʹта мьн бәрʹди, ва йә әзе сьбе кӧлийа бьшиньмә ль сәр тʹопраха тә, 5 әԝе рʹуйе әʹрде ӧса бьгьрьн, кӧ әʹрде иди нәйе кʹьфше чь жи пәй тәйрокерʹа бона ԝә майә ԝе бьхԝьн у ӧса жи һʹәму даред әʹрде ԝәда йә шинбуйи ԝе бьхԝьн. 6 Әԝе малед тә, мале хӧламед тә у малед һʹәму мьсьрийа тʹьжи бьн, ԝәки нә бавед тә, нә жи баве бавед тә жь рʹожа рʹубари дьне кʹәтьнә һʹәта ньһа тьште ӧса нәдитьнә›». У пьшта хԝә дайе жь щәм Фьрәԝьн дәркʹәт. 7 Хӧламед Фьрәԝьн готьнә ԝи: «Һʹәта кʹәнге әве бьбә бәла сәре мә, ван меред ԝан бәрʹдә бьра Хӧдан Хԝәдейе хԝәрʹа хӧламтийе бькьн. Гәло тӧ һе набини кӧ Мьсьр ԝеран бу?» 8 Муса у Һарун вәгәрʹандьнә щәм Фьрәԝьн у әԝи готә ԝан: «Һәрʹьн Хӧдан Хԝәдейе хԝәрʹа хӧламтийе бькьн. Ле кʹи у кʹе ԝе һәрʹьн?» 9 Муса готе: «Әме бь бьчʹук у мәзьнед хԝәва һәрʹьн, кӧрʹ у ԛизед хԝәва, пәз у дәԝаред хԝәва һәрʹьн, чьмки бона мә щәжьна Хӧдан ә». 10 Фьрәԝьн готә ԝан: «Һәгәр әз дәстура ԝә у жьн-зарʹед ԝә бьдьм бьра Хӧдан тʹәви ԝә бә. Ле ве йәке бьзаньбьн кӧ дьле ԝә ԛәлп ә. 11 На, хер! Һун мер тʹәне һәрʹьн хӧламтийе Хӧданрʹа бькьн, нә ԝә әԝ йәк дьхԝәст?» У бәри ԝан дан жь щәм Фьрәԝьн дәрхьстьн. 12 Хӧдан готә Муса: «Дәсте хԝә дьрежи сәр ԝәлате Мьсьре кә, бьра кӧли рʹабьнә ль сәр ԝәлате Мьсьре у һʹәму гиһайе әʹрде, чь кӧ пәй тәйрокерʹа майә бьхԝьн». 13 Муса шьвдара хԝә дьрежи сәр ԝәлате Мьсьре кьр у Хӧдан тʹәмамийа ԝе рʹоже у тʹәмамийа ԝе шәве, байе рʹоһьлате рʹакьр. Сәре сьбәһе байе рʹоһьлате кӧли анин. 14 У кӧлийа тʹәмамийа ԝәлате Мьсьре гьрт у ль сәр тʹәмамийа тʹопраха Мьсьре беһʹәсаб данин, ӧса кӧ нә бәри ве йәке һаԛас кӧли һәбунә у нә жи пәй верʹа. 15 Кӧлийа тʹәмамийа рʹуйе әʹрде гьрт у ԝәлат бу тәʹри, һʹәму шинайа әʹрде у бәред дарайә кӧ пәй тәйрокерʹа мабун хԝарьн. Тʹәмамийа ԝәлате Мьсьреда тʹӧ тьште шин ль сәр дара у кʹола нә ма.
27 ТИРМӘҺЕ-2 ТʹӘБАХЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ДӘРКʹӘТЬН 12
«Щәжьна Дәрбазбуне бона Мәсиһийа Гәләк Фәрз ә»
(Дәркʹәтьн 12:5-7) Бәрхе ԝә бьра беԛӧсур нер у йәксали бә, жь пез йан жи жь бьзьна һьлдьн. 6 Ԝи хԝәй кьн һʹәта чардәһе ве мәһе, паше тʹәмамийа щьвина мьхӧлԛәта Исраел, чахе рʹо дьчә ава ԝе сәржекә. 7 Бьра жь ԝе хуне һьлдьн, һәр дӧ рәхдәрийа у дәрәзунга дәре ԝе мале хьн, кʹидәре ԝе ԝи бәрхи бьхԝьн.
ԝ07 1/1 20 ¶4
«Те Тʹәне Ша би»
4 Иса 14 Нисане, сала 33 Д.М.-да, мьр. Исраеледа 14 Нисане рʹожа шайе бу, чьмки ве рʹоже ԝана Щәжьна Дәрбазбуне дәрбаз дькьр. Һәр сал ве рʹоже, малбәтед Исраели шив дәрбаз дькьрьн, сәр кʹижане ԝана гоште бәрхе беԛьсур дьхԝар. Ви щурʹәйи ԝана дьани бира хԝә, ԝәки хуна бәрх чьԛас фәрз бу. Гава 14 Нисане сала 1513 Б.Д.М.-да мәләк һʹәму ньхӧрийед Мьсьрийа кӧшт, һьнге һʹәму ньхӧрийед Исраели бь сайа хуна бәрх һатьнә хьлазкьрьне (Дәркʹәтьн 12:1-14). Бәрха Щәжьна Дәрбазбуне бьбу симбола Иса, дәрһәԛа кʹижани кӧ Паԝлос гот: «Бәрхе мәйи Щәжьна Дәрбазбуне, аԝа готи Мәсиһ бона мә һатә сәржекьрьне» (1 Корьнтʹи 5:7). Мина хуна бәрхе Щәжьна Дәрбазбуне, хуна Исайә рʹети жи мәщале дьдә гәләк мәрийа кӧ хьлаз бьн (Йуһʹәнна 3:16, 36).
(Дәркʹәтьн 12:12, 13) Ԝе шәве әзе нава ԝәлате Мьсьрерʹа дәрбаз бьм у һәр ньхӧрийе ԝәлате Мьсьре хьм, жь мерьв гьрти һʹәта һʹәйԝен. Әзе диԝана һʹәму хԝәдейед Мьсьре бькьм. Әз Хӧдан ьм. 13 Хуне бона ԝә бьбә нишан ль сәр малед кʹидәре һун дьминьн. Гава әз ԝәлате Мьсьре хьм у ԝе хуне бьбиньм, һьнге әзе сәр ԝәрʹа дәрбаз бьм у бәлайе сәр ԝәда нәйе кӧ ԝә ӧнда кә.
it-2 583 ¶6
Щәжьна Дәрбазбуне
Һьнә тьшт кӧ Щәжьна Дәрбазбунева гьредайи бун, симбола ԝан пʹехәмбәртийа бун, йед кӧ сәр Иса һатьнә сери. Мәсәлә, Мьсьреда чахе Исраелийа хуна бәрх рәхдәри дьхьстьн, ӧса ԝана ньхӧрийед хԝә жь мьрьне хьлаз дькьр. Паԝлос гот, ԝәки Мәсиһийед бь рʹӧһʹ кʹьфшкьри, әв һәйә щьвина ньхӧрийа (Ибр. 12:23), у Мәсиһ бь сайа хуна хԝә ԝана аза кьр (1 Тʹс. 1:10; Әф. 1:7). Изьн тʹӧнә бу, ԝәки һәстуйе бәрхе Щәжьна Дәрбазбуне, бьшкеньн. Һатьбу пʹехәмбәртикьрьне, кӧ тʹӧ һʹәстуйе Иса ԝе нәйе шкенандьне у әв йәк ԝәʹде мьрьна ԝи һатә сери (Зб. 34:20; Йн. 19:36). Ӧса, әԝ Щәжьна Дәрбазбуне кӧ Исраелийа нава ԛьрʹнада дәрбаз дькьрьн, бьбу пʹара Ԛануне у симбола ԝан тьшта кӧ гәрәке бьԛәԝьмийана у Иса Мәсиһ әʹйан буйа ча «Бәрхе Хԝәде» (Ибр. 10:1; Йн. 1:29).
(Дәркʹәтьн 12:24-27) У ве йәке чаԝа ԛанун, бона хԝә у зарʹед хԝә һʹәта-һʹәтайе хԝәйкьн. 25 Гава һун һәрʹьнә ԝи ԝәлате кӧ Хӧдане бьдә ԝә, чаԝа кӧ әԝи ԝәрʹа соз дайә, ве дәрәще бькьн. 26 Ле гава зарʹед ԝә жь ԝә бьпьрсьн: ‹Әв чь дәрәщәйә кӧ һун дәрбаз дькьн?› 27 һьнге бежьн: ‹Әва ԛӧрбана Дәрбазбуна Хӧдан ә кӧ Мьсьреда ль сәр малед зарʹед Исраелрʹа дәрбаз бу, мьсьрийа хьст у малед мә хьлаз кьрьн›». Щьмәʹт дәвәрʹуйа чу у һʹәбанд.
ԝ13 15/12 20 ¶13-14
«Әԝ Ԝәрʹа Бьбә Рʹожәкә Биранине»
13 Һʹәму тьштед кӧ Щәжьна Дәрбазбунева гьредайи бун, жь ньсьләки һʹәта ньсьла дьн, бав гәрәке кӧрʹед хԝәрʹа гьли кьрана. Йәк жь ԝан тьшта әԝ бу, ԝәки ԛәԝата Йаһоԝа дьгьһиже кӧ хьзмәткʹаред хԝә бьпарезә. Ӧса зарʹ педьһʹәсийан, кӧ Йаһоԝа Хԝәдайе реали йә, кʹижан кӧ бона щьмәʹта хԝә хәм дькә у һазьр ә ԝана хԝәй кә. Йаһоԝа әв йәк һьнге избат кьр, гава ньхӧрийед Исраелийа жь мьрьне хԝәй кьр, чахе ԛьра ньхӧрийед Мьсьрийа ани.
14 Де-бав кӧ Мәсиһи нә, борщдар ниньн һәр сал зарʹед хԝәрʹа мәʹна Щәжьна Дәрбазбуне шьровәкьн. Ле әԝана гәрәке зарʹед хԝәрʹа шьровәкьн, ԝәки Хԝәде щьмәʹта хԝә дьпарезә. Хенщи ԝе йәке зарʹ гәрәке тʹәхмин кьн баԝәрийа де-бавед хԝә, кӧ Йаһоԝа һʹәта ньһа жи щьмәʹта хԝә дьпарезә (Зб. 27:11; Иш. 12:2). Гәло һун ԛәԝате дьдьнә хәбате кӧ ԝан тьшта нә кӧ сәрт, ле бь һʹәԝас зарʹед хԝә һин кьн? Бьхәбьтьн кӧ ԝан һʹәму тьшта ӧса зарʹед хԝә һин кьн, ԝәки али ԝан бькьн кӧ рʹӧһʹанида пешда һәрʹьн.
Хьзна Кʹьтеба Пироз Бьгәрʹьн
(Дәркʹәтьн 12:12) Ԝе шәве әзе нава ԝәлате Мьсьрерʹа дәрбаз бьм у һәр ньхӧрийе ԝәлате Мьсьре хьм, жь мерьв гьрти һʹәта һʹәйԝен. Әзе диԝана һʹәму хԝәдейед Мьсьре бькьм. Әз Хӧдан ьм.
it-2 582 ¶2
Щәжьна Дәрбазбуне
Бь сайа Дәһә Бәла, Йаһоԝа диԝана хӧданед Мьсьре кьр, илаһи ԝәʹде бәла дәһа чахе ньхӧри мьрьн (Дркʹ. 12:12). Пәз бона хӧдане ԝани Рʹа пироз дьһатә һʹәсабе. Ләма жи чахе Исраелийа хуна бәрх рәхдәрийед хԝә хьстьн, әв йәк бәр чʹәʹве Мьсьрийа беһӧрмәткьрьна хӧдане ԝан бу. Га жи дьһатә һʹәсабе пироз, ләма жи чахе гайе ньхӧри дьмьрьн, әв йәк беһӧрмәткьрьна хӧдане ԝани Осирис бу. Ле Фьрәԝьн дьһатә һʹәсабе кӧрʹе хӧдан Ра, ләма жи чахе ньхӧрийе Фьрәԝьн мьр, әшкәрә һатә кʹьфше ԝәки хӧдан Ра у хԝәха Фьрәԝьн жи беԛәԝат ьн.
(Дәркʹәтьн 12:14-16) Бьра әԝ ԝәрʹа бьбә рʹожәкә биранине, ԝе бона Хӧдан хԝәй кьн, бьра әва щәжьна нава ньсьлед ԝәда бьбә әʹрф-әʹдәте һʹәта-һʹәтайе. 15 Һʹәфт рʹожа нане шкәва бьхԝьн. Һәма рʹожа пешьнда һәвиртьрʹшк жь мала хԝә дәрхьн, чьмки жь рʹожа пешьнда һʹәта рʹожа һʹәфта кʹе кӧ тьштед һәвиртьрʹшккьри бьхԝә, ԝе жь нав Исраел бе рʹаԛәтандьне. 16 Бьра рʹожа пешьн ԝәрʹа бьбә щьвина пироз у рʹожа һʹәфта жи щьвина пироз. Ԝан рʹожада тʹӧ шьхӧл нәйе кьрьне, пештьри хԝарьнед хԝә кӧ һәр кәс хԝәрʹа дькарә һазьр кә.
it-1 504 ¶1
Щьвинед Пироз
Әв «щьвинед пироз» бь ве йәке щӧдә дьбун, кӧ ԝәʹде ԝан щьвина щьмәʹте гәрәке тʹӧ шьхӧл нәкьра. Мәсәлә, Йаһоԝа дәрһәԛа рʹожа пешьн у һʹәфта йа Щәжьна Нане Шкәва, ԝәʹде кʹижани «щьвинед пироз» дәрбаз дьбун, гот: «Ԝан рʹожада тʹӧ шьхӧл нәйе кьрьне, пештьри хԝарьнед хԝә кӧ һәр кәс хԝәрʹа дькарә һазьр кә» (Дркʹ. 12:15, 16). Хенщи ԝе йәке ԝәʹде «щьвинед пироз», кʹаһина ԛӧрбан Йаһоԝарʹа дьанин (Ԛн.Кʹһ. 23:37, 38), у әве йәке ԛануна дәрһәԛа шьхӧлед һәр рʹожи нәдьтʹәрʹьбанд. Ԝәʹде «щьвинед пироз» ԝәʹде бәталбуне нибу, ле жь ве йәке щьмәʹте алийе рʹӧһʹанида кʹарәкә мәзьн дьстанд. Һәр рʹожа Шәмийе мәрьв дьщьвийан, ԝәки тʹәвайи Хԝәде бьһʹәбиньн у һин бьн. Сәр ԝан щьвина Хәбәра Хԝәде дьһатә хԝәндьне у шьровәкьрьне. Ԝәʹдә шунда әв йәк ида кʹьништада дькьрьн (Кʹр.Шн. 15:21). Демәк рʹожа Шәмийе у рʹожед щьвинед пирозә дьн, щьмәʹте тʹӧ шьхӧл нәдькьр, ле әв ԝәʹдә бона ԝе йәке дьданә хәбате, ԝәки дӧа бькьн у ӧса жи дәрһәԛа Хԝәде у ԛьраред ԝи бьфькьрьн (Бьньһерʹә ЩЬВИН).
Хԝәндьна Кʹьтеба Пироз
(Дәркʹәтьн 12:1-20) Хӧдан ԝәлате Мьсьреда тʹәв Муса у Һарун хәбәр да у гот: 2 «Әва мәһа ль нава мәһада ԝәрʹа бьбә йа пешьн, әԝ ль нава мәһед саледа ԝәрʹа бьбә йа пешьн. 3 Һʹәму щьвина Исраелрʹа хәбәр дьн у бежьн: ‹Дәһе ве мәһе, бьра һәр мәрьвәк бона мала хԝә бәрхәки һьлдә, сәре һәр мале бәрхәк. 4 Ле һәгәр нәфәре маләке һьндьк бьн, ԝе нькарьбьн бәрхәки бьхԝьн, бьра тʹәви ԝи щинаре незики мала хԝә бьбә йәк, ԝи бәрхи һьлдә бавежә сәр һʹәсабе нәфәра, кʹа һәр кәсе чьԛаси бькарьбә бьхԝә. 5 Бәрхе ԝә бьра беԛӧсур нер у йәксали бә, жь пез йан жи жь бьзьна һьлдьн. 6 Ԝи хԝәй кьн һʹәта чардәһе ве мәһе, паше тʹәмамийа щьвина мьхӧлԛәта Исраел, чахе рʹо дьчә ава ԝе сәржекә. 7 Бьра жь ԝе хуне һьлдьн, һәр дӧ рәхдәрийа у дәрәзунга дәре ԝе мале хьн, кʹидәре ԝе ԝи бәрхи бьхԝьн. 8 Бьра ԝе шәве гоште ԝи бьхԝьн, әԝи сәр егьр бьпежьн, пе нане шкәва у пʹьнщарʹа тәʹл бьхԝьн. 9 Жь ԝи гошти, хав йан аведа кʹәланди нәхԝьн, ле сәр егьр пьжанди бә, тʹәви сәр пʹе у дьл һʹьнава. 10 Һʹәта сәре сьбәһе жь ԝи тьштәки нәһельн, ле чь жи бьминә һʹәта сьбәһе сәр егьр бьшәԝьтиньн. 11 Бь ви аԝайи ԝи бьхԝьн, бьра пьште ԝә гьредайи бьн чарьхед ԝә ньгед ԝәда бьн у шьв жи дәсте ԝәда бьн, һун ԝи зу бьхԝьн. Әԝ Дәрбазбуна Хӧдан ә. 12 Ԝе шәве әзе нава ԝәлате Мьсьрерʹа дәрбаз бьм у һәр ньхӧрийе ԝәлате Мьсьре хьм, жь мерьв гьрти һʹәта һʹәйԝен. Әзе диԝана һʹәму хԝәдейед Мьсьре бькьм. Әз Хӧдан ьм. 13 Хуне бона ԝә бьбә нишан ль сәр малед кʹидәре һун дьминьн. Гава әз ԝәлате Мьсьре хьм у ԝе хуне бьбиньм, һьнге әзе сәр ԝәрʹа дәрбаз бьм у бәлайе сәр ԝәда нәйе кӧ ԝә ӧнда кә. 14 Бьра әԝ ԝәрʹа бьбә рʹожәкә биранине, ԝе бона Хӧдан хԝәй кьн, бьра әва щәжьна нава ньсьлед ԝәда бьбә әʹрф-әʹдәте һʹәта-һʹәтайе. 15 Һʹәфт рʹожа нане шкәва бьхԝьн. Һәма рʹожа пешьнда һәвиртьрʹшк жь мала хԝә дәрхьн, чьмки жь рʹожа пешьнда һʹәта рʹожа һʹәфта кʹе кӧ тьштед һәвиртьрʹшккьри бьхԝә, ԝе жь нав Исраел бе рʹаԛәтандьне. 16 Бьра рʹожа пешьн ԝәрʹа бьбә щьвина пироз у рʹожа һʹәфта жи щьвина пироз. Ԝан рʹожада тʹӧ шьхӧл нәйе кьрьне, пештьри хԝарьнед хԝә кӧ һәр кәс хԝәрʹа дькарә һазьр кә. 17 Щәжьна Нане Шкәва хԝәйи кьн, чьмки һәма ԝе рʹожеда мьн рʹәфед ԝә жь ԝәлате Мьсьре дәрхьстьн, ӧса кӧ әве рʹоже ль нав ньсьлед хԝәда хԝәйи кьн, чаԝа әʹрф-әʹдәте һʹәта-һʹәтайе. 18 Жь рʹожа чардәһе мәһа пешьн евареда, һун гәрәке нане шкәва бьхԝьн һʹәта евара рʹожа бист йәке ԝе мәһе. 19 Һʹәфт рʹожа һәвиртьрʹшк малед ԝәда тʹӧнә бә, чьмки ки кӧ тьштед һәвиртьрʹшккьри бьхԝә, ԝе жь нав щьвина Исраел бе рʹаԛәтандьне, һәгәр хәриб бә йан бьнәли бә. 20 Тьштәки һәвиртьрʹшккьри нәхԝьн. Ԝан һʹәму щийада кʹидәре кӧ һун дьминьн нане шкәва бьхԝьн›».