Чаԝа Дӧа Дькарә Али Тә Бькә

Памела гьран нәхԝәш кʹәт. Әԝ жь бо кʹансәре гәләк дьчәрчьри у аликʹарийа дохдьра хԝәст. Һәмьки әԝе Хԝәдерʹа жи дӧа дькьр, ԝәки ԛәԝате бьде кӧ бәр ве чәтьнайе тәйах кә. Гәло дӧа али ԝе кьр?

Памела дьбежә: «Чахе мьн аликʹарийа медисинайе дьстанд, мьн хԝә гәләк хьраб тʹәхмин дькьр. Ле гава мьн Йаһоԝа Хԝәдерʹа дӧа дькьр, мьн рʹьһʹәтийа дьл дьстанд, у фькьред мьн зәлал дьбун. Һʹәта ньһа әз жь бо нәхԝәшийа хԝә гәләк еше дькʹьшиньм, ле диса жи дӧа али мьн дькә ньһерʹандьна позитив хԝәйи кьм. Гава мәрьв жь мьн дьпьрсьн, кӧ әз чаԝа ньм, әз дьбежьм: ‹Нәбаш ьм, ле йәкә шабуна хԝә ӧнда накьм!›»

Һәмьки әʹсәйи нинә әм һивийе бьн, һʹәта кӧ тьштәк бе сәре мә, паше дәстпекьн дӧа бькьн. Һәр кәс жь мә рʹасти чәтьнайа те, фьрԛи тʹӧнә чәтьнайед мәзьн йан йед бьчʹук, ләма жи әм һʹәԝще аликʹарийе нә. Ле дӧа дькарә али мә бькә?

Кʹьтеба Пироз дьбежә: «Тӧ баре хԝә жь Хӧданрʹа бьһелә, Әԝе тә ль сәр льнган бьһелә. Әԝ тʹӧщар наһелә, кӧ йе рʹаст бькʹәвә» (Зәбур 55:22). Әв гьли чьԛас хԝәш ьн у бәрдьлийе дьдьн! Демәк дӧа чаԝа дькарә али тә бькә? Гава тӧ Хԝәдерʹа рʹаст дӧа дьки, әԝ ԝе әʹсәйи али тә бькә ԝе йәкеда, чьда тӧ һʹәԝщә йи, кӧ бькарьби бәр чәтьнайед хԝә тәйах ки. (Бьньһерʹә чаргошә «Дӧа Чь Кʹаре Дькарә Тәрʹа Бинә»).

Дӧа Чь Кʹаре Дькарә Тәрʹа Бинә

Рʹьһʹәтийа дьл

«Бьра бь дӧа-дьрозга, рʹазибунева тʹәвайи, Хԝәдева әʹйан бә. У әʹдьлайийа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред ԝә йәктийа Мәсиһ Исада хԝәй кә» (Филипи 4:6, 7). Чахе тӧ дәрде дьле хԝә Хԝәдерʹа дьбежи, әԝ ԝе али тә бькә рʹьһʹәтийа дьл хԝәй ки у нава чәтьнайада жи бь билани хԝә кʹьфш ки.

Биланийа жь Хԝәде

«Һәгәр сәрԝахтийа йәки жь ԝә тʹера ԝи накә, бьра һиви жь Хԝәде бькә у ԝе жь ԝирʹа бе дайине. Әԝ бь мәрʹдани дьдә һʹәмуйа у тʹӧ кәси беԛәдьр накә» (Аԛуб 1:5). Гава әм рʹасти тәнгасийа тен, мәрʹа чәтьн ә сафикьрьнед баш бькьн. Һәрге тӧ биланийе жь Хԝәде бьхԝази, әԝ ԝе гәләк принсипед керһати жь Кʹьтеба Пироз бинә бира тә, кʹижан кӧ али тә бькьн.

Ԛәԝат у бәрдьли

«Әз һәр тьшти бь сайа ԝи дькарьм, йе кӧ ԛәԝате дьдә мьн» (Филипи 4:13). Йаһоԝа Хԝәдайе Һьмзор дькарә ԛәԝате бьдә тә, кӧ бькарьби бәр чәтьнайа тәйах ки, у әԝ ԝе пьштгьрийа тә бькә (Ишайа 40:29). Кʹьтеба Пирозда сәр Йаһоԝа ӧса жи те готьне «Хԝәдейе һʹәму бәрдьлийе». Әԝ дькарә «нава һʹәму тәʹли-тәнгийада» бәрдьле мәда бе (2 Корьнтʹи 1:3, 4).

ХԜӘДЕРʹА ДӦА БЬКӘ!

Йаһоԝа тә надә зоре, кӧ ԝирʹа дӧа бьки. Ле әԝ бь һʹьзкьрьн тә тʹәглиф дькә, кӧ әве йәке бьки (Йерәмйа 29:11, 12). Бәре дьбәк тә тʹәхмин дькьр, ԝәки Хԝәде щаба дӧайед тә надә. Чь жи һәбә дьлтәнг нәбә у һевийа хԝә ӧнда нәкә. Де-бавед кӧ зарʹа хԝә һʹьз дькьн, щарна һәма ԝе дәме у ви щурʹәйи чаԝа к зарʹ дьхԝазә, али ԝи накьн. Һьлбәт, де-бав сафикьрьна дьһа баш заньн. Зәлал ә, ԝәки де-бавед һʹьзкьри кʹара зарʹа хԝә дьхԝазьн у аликʹарийе дьдьн.

Йаһоԝа Хԝәде мина бавәки һʹьзкьри йә, кʹижан кӧ дьхԝазә али тә жи бькә. Һәрге тӧ һьлди һʹәсаб ԝан рʹебәрийа, йед кӧ мә жь Кʹьтеба Пироз шеԝьр кьр, у бьхәбьти кӧ жийина хԝәда бьди хәбате, Хԝәде ԝе щаба дӧайед тә бь щурʹе лапи баш бьдә! (Зәбур 34:15; Мәтта 7:7-11)