Һун Чь Дькарьн Бькьн ԝәки Дьнйа Тʹәзәда Бьжин

Жь готаред пешийа ве әм пеһʹәсийан, ԝәки зутьрәке Хԝәде ԝе ԛьрʹа инсанәта нәгӧһдар у берʹәʹм бинә. Ӧса жи һʹәму чәтьнайи ԝе бенә һьлдане. Гәло чьрʹа әм дькарьн дӧдьли нәбьн, ԝәки әв һʹәму тьшт ԝе әʹсә бенә сери? Чьмки Хәбәра Хԝәде, демәк Кʹьтеба Пироз әве йәке соз дьдә:

«Дьнйайе жи дәрбаз бә» (1 ЙУҺʹӘННА 2:17).

Бешьк ԝе һәбьн мәрьвед ӧса, йед кӧ ԝе хьлаз бьн, чьмки Кʹьтеба Пироз соз дьдә:

«Әԝе кӧ әʹмьре Хԝәде дьԛәдинә ԝе һʹәта-һʹәтайе бьминә».

Ча те кʹьфше мәрьв дькарьн хьлаз бьн, һәрге ԛьрара Хԝәде бьԛәдиньн. Сәва кӧ ԛьрара Хԝәде пебьһʹәсьн, йа пешьн лазьм ә ԝи нас бькьн.

ХԜӘДЕ «НАС КЬН» ԜӘКИ ХЬЛАЗ БЬН

Шькьл: 1. Бәрдәстийа дохдьр нәхԝәшханеда, ԝәстийайи у ԛьдумкʹәти сәр әʹрде рʹуньштийә. 2. Әԝ кафеда һеса дьбә у дьвинә ча һәвалхәбатчийа ԝе бь бәшәра хԝәш журнале дьхунә. 3. Һәвалхәбатчийа ԝе рʹезәк жь Кʹьтеба Пироз жерʹа дьхунә у карта jw.org жерʹа дьдә.

Иса гот: «Әв ә жийина һʹәта-һʹәтайе, ԝәки әԝ тә нас кьн, чаԝа Хԝәдейе рʹасти бешьрики-беһәвал» (Йуһʹәнна 17:3). Сәва кӧ әм ԝәʹде кʹӧтакьрьна ве дьнйа зӧлм хьлаз бьн, лазьм ә Хԝәде нас бькьн. Әв йәк те һʹәсабе нә кӧ тʹәне бьзаньбьн кӧ Хԝәде һәйә йан жи һьнә избаткьрьна дәрһәԛа ԝи бьзаньбьн, ле дьһа зәʹф тьшт. Әм гәрәке бьбьнә достед ԝи. Һәрге әм дьхԝазьн һәвалтийа мә тʹәви кәсәки ԛәԝи бә, лазьм ә бона һәвале хԝә ԝәʹдә вәԛәтиньн. Һәма бь ԝи щурʹәйи әме бькарьбьн бьбьнә достед Хԝәде. Дина хԝә бьдьнә һьнә рʹастийед сәрәкә жь Кʹьтеба Пироз, йед кӧ ԝе али мә бькьн бьбьнә достед Хԝәде у достийа хԝә тʹәви ԝи ԛәԝи кьн.

Рʹастийед кӧ Әм жь Кʹьтеба Пироз Педьһʹәсьн

Әм педьһʹәсьн, ԝәки ԛьрара Хԝәде әԝ ә кӧ әм Щьнәтеда бьжин.

Әԝи мәрьвед пешьн, демәк Адәм у Һеԝа әʹфьранд у щийе гәләк бәдәԝ, бахче Еденеда щиԝар кьр. Әԝана кʹамьл бун у Хԝәде һәр тьшт бона жийина бәхтәԝар, да ԝан. Жийина ԝан гәрәке һʹәта-һʹәтайе буйа. Һʹәта кӧ ԝана тʹәви Хԝәде дости бькьра, әԝана ԝе нәмьрана. Ле ԝана сафи кьр гӧрʹа Хԝәде нәкьн у тʹәмийа ԝийә һеса тʹәрʹьбандьн.

Әм педьһʹәсьн, ԝәки чьма әм дьчәрчьрьн.

Мәрьве пешьн, Адәм, гӧрʹа Хԝәде нәкьр у бь ԝе йәке мәщала жийина һәрһәйи, ча бона хԝә ӧса жи бона зӧрʹәта хԝә, ӧнда кьр. Кʹьтеба Пироз шьровәдькә: «Аԝа чаԝа бь мәрьвәки гӧнә кʹәтә дьне у жь гӧнә жи мьрьн һат, ӧса жи мьрьн сәр һʹәму мәрьва бәла бу, чьмки һʹәмуйа жи гӧнә кьр» (Рʹомайи 5:12). Чаԝа нәхԝәши жь де-бава дәрбази сәр зарʹа дьбә, һәма ӧса жи Адәм гӧнә дәрбази сәр зӧрʹәта хԝә кьр, ләма жи әм кал-пир дьбьн у дьмьрьн.

Әм педьһʹәсьн, ԝәки Хԝәде чь ида кьрийә сәва кӧ али мә бькә.

Кʹьтеба Пироз дьбежә: «Чьмки Хԝәде ӧса дьнйа һʹьз кьр, кӧ Кӧрʹе хԝәйи тайе тʹәне бәрва да, ԝәки һәр кәсе кӧ ԝи баԝәр бькә ӧнда нәбә, ле жийина ԝийә һʹәта-һʹәтайе һәбә» (Йуһʹәнна 3:16). Хԝәде Иса шандә сәр әʹрде сәва кӧ әԝ әʹмьре хԝә бона мә бәрва бьдә. Дәрһәԛа әв кьре Хԝәдейә бь һʹьзкьрьн, мерәки Һьнди, йе кӧ 86 сали йә ӧса дьбежә: «Әв йәк мьнрʹа әʹйан дькә, кӧ һʹьзкьрьна Йаһоԝаa һьндава мьнда чьԛас мәзьн ә. Һʹьзкьрьна ԝи һевийа жийина һʹәта-һʹәтайе дьдә мьн».

Әм педьһʹәсьн, ԝәки чаԝа әм дькарьн рʹазибуна хԝә Хԝәдерʹа бьдьнә кʹьфше.

Кʹьтеба Пирозда те готьне, кӧ һәгәр әм тʹәмийед Хԝәде бьԛәдиньн бь ԝе йәке әме рʹазибуна хԝә бьдьнә кʹьфше бона һәр тьшти чь кӧ әԝи сәва мә кьрийә (1 Йуһʹәнна 2:3). Йаһоԝа Хԝәде бь һʹьзкьрьне мәрʹа нишан дькә, ԝәки әм гәрәке чь бькьн, сәва кӧ ида ньһа жь жийине шабуне бьстиньн (Ишайа 48:17, 18). Хԝәде нахԝазә, ԝәки әм бьчәрчьрьн. Һәрге әм тʹәмийед ԝи биньн сери, әԝ соз дьдә кӧ әме нә кӧ тʹәне ньһа бь жийина бәхтәԝар бьжин, ле ӧса жи ԝе мәщала мә һәбә һʹәта-һʹәтайе бьжин.

ҺӘР РʹОЖ ХӘБӘРА ХԜӘДЕ, ДЕМӘК КʹЬТЕБА ПИРОЗ, БЬХУНӘ

Бәрдәстийа дохдьр ԝәʹде һесабуне Кʹьтеба Пироз дьхунә у әʹзмана дьньһерʹә. — Һуне бькарьбьн жь кʹӧтакьрьна ве дьнйайе хьлаз бьн, һәрге дӧада аликʹарийе жь Хԝәде бьхԝазьн у ԛьрара ԝи бьԛәдиньн

Әм һәр рʹож хԝарьне дьхԝьн, сәва кӧ бьжин. Ле Иса гот: «Инсан тʹәне бь нен нажи, ле бь һәр хәбәра кӧ жь дәве Хԝәде дәрдькʹәвә» (Мәтта 4:4).

Иро әм хәбәред Йаһоԝа сәр рʹупʹелед Кʹьтеба Пироз дьхуньн. Чьԛас зедә тӧ ве кʹьтеба бӧһӧрти леколин бьки, һаԛас зедә тӧйе пебьһʹәси дәрһәԛа һәләԛәтийа инсанәте тʹәви Хԝәде ԝәʹде бәре, ньһа у ахьрийе.

ГАЗИ ХԜӘДЕ БЬКӘ, СӘВА КӦ АЛИКʹАРИЙЕ БЬСТИНИ

Һәрге тӧ дьхԝази ԛьрара Хԝәде бьԛәдини ле тәрʹа зор ә тʹәрка ԝан тьшта бьди, чь кӧ Хԝәде нәфрʹәт дькә, ԝи чахи тӧ чь дькари бьки? Һәрге тӧ рʹьнд Хԝәде нас бьки, әв йәк ԝе бь щурʹе мәхсус али тә бькә.

Ԝәрен әм дина хԝә бьдьнә мәсәла кʹӧлфәтәке, әм ԝе нав кьн Сакура, йа кӧ бь әʹмьрәки бенамус дьжит. Чахе әԝе һинбуна Кʹьтеба Пироз дәстпекьр, әԝ пеһʹәсийа, ԝәки Хԝәде дьбежә: «Жь ԛавийе бьрʹәвьн!» (1 Корьнтʹи 6:18). Сакурайе жь Хԝәде лава дькьр, ԝәки ԛәԝате бьде кӧ тʹәрка кьред хԝәйә хьраб бьдә. Ле диса жи жерʹа лазьм бу кӧ тʹәви һәстед хԝә шәрʹ бькә у щерʹьбандьнада ԛәԝи бьсәкьнә. Әԝ дьбежә: «Чахе фькьред хьраб дьһатьнә һʹьше мьн, мьн бь һʹәлали дьле хԝә Йаһоԝарʹа вәдькьр. Мьн заньбу, ԝәки бь ԛәԝата хԝә әзе нькарьбьм сәркʹәвьм. Мьн ԛәԝата дӧакьрьне сәр хԝә тʹәхмин кьр у әԝе йәке мьн дьһа незики Йаһоԝа кьр». Мина Сакурайе бь милйона мәрьв дәстпедькьн Хԝәде нас бькьн. Хԝәде ԛәԝате дьдә ԝан, сәва кӧ әʹмьре хԝәда гӧһастьна бькьн у ӧса бьжин чаԝа кӧ ԝи хԝәш те (Филипи 4:13).

Чьԛас зедә һун Хԝәде нас бькьн һаԛас незик Хԝәде жи ԝе ԝә нас бькә у һуне бьбьнә достед ԝийә дәлал (Галати 4:9; Зәбур 25:14). Ԝи чахи һуне бькарьбьн хьлаз бьн у дьнйа тʹәзәда, кӧ Хԝәде соз дьдә, һәрһәйи бьжин. Ле дьнйа тʹәзә ԝе чь щурʹәйи бә? Готара дьнда әме щаба ԝе пьрсе бьстиньн.

a Йаһоԝа наве Хԝәде йә, кʹижан кӧ дь Кʹьтеба Пирозда ньвисар ә.