ЧАԜА НӘФРʹӘТИЙЕ ЖЬ ДЬЛЕ ХԜӘ ДӘРХЬН?

2 | Һʹәйфе Һьлнәдә

Һинкьрьна Кʹьтеба Пироз:

«Жь бәр хьрабийева хьрабийе ль тʹӧ кәси нәкьн. . . . Чьԛас жь дәст ԝә те, тʹәви һʹәму мәрьва әʹдьлайийеда бьн. Һʹәйфе һьлнәдьн, . . . чьмки ньвисар ә: ‹Һʹәйфһьлдан дәсте мьн ә, әзе һʹәйфе һьлиньм, Хӧдан дьбежә›» (РʹОМАЙИ 12:17-19).

Әв Чь Те Һʹәсабе:

Һәрге кәсәк дьле мә дешинә, һәмьки әм һерс дькʹәвьн, ле Хԝәде нахԝазә ԝәки әм һʹәйфе һьлдьн. Дәԝсе әԝ дьхԝазә ԝәки әм сәбьр кьн, чьмки соз дьдә кӧ зутьрәке ԝе һʹәму нәһәԛийа бьдә һьлдане (Зәбур 37:7, 10).

Әԝ Һинкьрьн Ча Дькарә Али Тә Бькә:

Чахе мәрьве гӧнәкʹар һʹәйфе һьлдьдә, әԝ дьһа зедә нәфрʹәтийе пешда тинә. Һәрге кәсәки тӧ дайи хәйдандьне, кʹине нәжо. Һәстед хԝә контрол бькә у хԝәгьрти бә. Щарна дькарә һеса бә чʹәʹве хԝә сәр һьнә дәрәща дади (Мәтʹәлок 19:11). Ле щарна жи дьбәкә дьһа баш бә дәрһәԛа дәрәще әʹлами һʹӧкӧмәте бьки. Мәсәлә, һәрге кәсәк тә тʹалан кә у зийане бьдә тә, тӧ дькари дәрһәԛа ве йәке әʹлами полиса йан жи һʹӧкӧмәтед дьн бьки.

Мәрьве кӧ һʹәйфе һьлдьдә, зийане дьдә хԝә

Тӧ чь дькари бьки, һәрге проблема тә бь әʹдьлайи сафи набә? Йан жи, дьбәкә тә ида һәр тьшт кьр, сәва кӧ проблеме бь әʹдьлайе сафи ки, ле диса жи әв сафи нәбу. Һʹәйфе һьлнәдә, чьмки әв йәк дькарә дәрәще дьһа хьраб кә. Ԝе баш бә нәфрʹәтийе жь дьле хԝә дәрхи. Тӧ дькари баԝәр би, ԝәки Хԝәде ԝе бь щурʹе дьһа баш әве проблеме сафи кә. Хԝә бьсперә Хԝәде у әԝ ԝе рʹийа тә рʹаст кә (Зәбур 37:3-5).

Сәрһати—АДРЕАН

Мьн Карьбу Тәйах кьм у Һʹәйфе Һьлнәдьм

Щаһьлтийеда дьле Адреан бь нәфрʹәтийе тʹьжә бу, у чахе кәсәк зийан дьда ԝи, әԝи һʹәйф һьлдьда. Әԝ дьбежә: «Гәләк щара мьн у ԛачаха пе ԛьрма һәв гӧлә дькьрьн. Чәнд щара ӧса дьбу кӧ әз кʹучада нивкӧшти хунеда дьһиштьм, у һьндьк дьма әз бьмьрама».

Чахе Адреан 16 сали бу, әԝи һинбуна Кʹьтеба Пироз дәстпекьр. Әԝ дьбежә: «Чахе мьн бәрдәԝам дькьр Кʹьтеба Пироз һин бьм, мьн фәʹм кьр кӧ гәрәке хәйсәте хԝә бьгӧһезьм». Әԝи гәрәке нәфрʹәти жь дьле хԝә дәрхьста у зӧлми нәкьра. Илаһи гьлийе жь Рʹомайи 12:17-19 гәләк сәр ԝи һʹӧкӧм бун, кʹидәре кӧ те готьне, ԝәки һʹәйфе һьлнәдьн. Адреан зедә дькә: «Мьн фәʹм кьр кӧ Йаһоԝа ԝе ԝәʹдәда нәһәԛийе бьдә һьлдане, демәк ԝи чахи у бь ԝи щурʹәйи, чаԝа кӧ әԝ дьхԝазә. Һеди-һеди мьн хәйсәте хԝәйи зӧлм тʹәрьканд».

Еварәке кʹомәкә щаһьла, кʹижан кӧ ԛачах бун у бәре дьжмьнед Адреан бун, һʹьщуми сәр ԝи кьрьн. Мәзьне ве кʹоме кьрә ԛужини: «Дә хԝә хьлаз кә!» Адреан дьбежә: «Мьн гәләк хԝәст щаба ԝи бьдьм у һʹәйфе һьлдьм». Ле дәԝса кӧ һʹәйфе һьлдә, әԝи кьн Йаһоԝарʹа дӧа кьр у жь ԝана рʹәви.

Адреан бәрдәԝам дькә: «Рʹожа дьн әз ньшкева рʹасти мәзьне ве кʹома ԛачаха һатьм, ле ижар әԝ тʹәне бу. Һерса мьн рʹабу у мьн хԝәст щаба ԝи бьдьм, ле диса жи мьн лавайа Йаһоԝа кьр кӧ али мьн бькә хԝә бьгьрьм. Әз гәләк әʹщебмайи мам, чахе әԝ незики мьн бу у гот: ‹Бьбахшинә сәва ԛәԝьмандьна дӧһӧ. Бь рʹасти бежьм, әз дьхԝазьм мина тә бьм. Әз жи дьхԝазьм Кʹьтеба Пироз һин бьм›. Әз чьԛас ша бум, кӧ пешда мьн карьбу һерса хԝә зәфт кьм! Бь сайа ве ԛәԝьмандьне әԝи жи хԝәст Кʹьтеба Пироз һин бә. Мьн у ԝи тʹәвайи дәстпекьр тʹәви Шәʹдед Йаһоԝа Кʹьтеба Пироз һин бьн».