Пʹадшатийа Хԝәде Ида Сәрԝертийе Дькә!

1. Һʹале дьнйайе чь избат дькә?

ГАВА тӧ һʹале дьнйайе дьвини, тӧ баԝәр дьки кӧ рʹожәке, һәр тьшт ԝе баш бә? Малбәтада чьԛас дьчә һʹьзкьрьн ӧнда дьбә у сар дьбә. Нав тʹәмамийа дьнйайе, зӧлми у зордари зедә дьбә, у гәләк мәрьв һерс ьн у тʹәне хԝә һʹьз дькьн. Гәләк мәрьв ида итʹбарийа хԝә кәсед хԝәйиһʹӧкӧм найньн. Ле әв йәк кӧ һʹале дьнйайе һаԛас хьраб ә, дькарә баԝәрийа тә дьһа ԛәԝи кә, кӧ һәр тьшт ԝе баш бә. Гәло чьрʹа? Чьмки Кʹьтеба Пироз бәреда готьбу кӧ «рʹожед ахьрийеда» мәрьв ԝе ӧса бьн (2 Тимотʹейо 3:1-5). Пекһатьна ве пʹехәмбәртийе, кʹижан кӧ тʹӧ кәс нькарә инкʹар кә, әшкәрә избат дькә кӧ Иса Мәсиһ буйә Пʹадше Пʹадшатийа Хԝәде, у әԝи ида дәстпекьрийә сәр әʹзмана һʹӧкӧм бькә. Дәрһәԛа Пʹадшатийе, гәләк пʹехәмбәртийед дьн жи һатьбун готьне. Ньһа, әме чәнд пʹехәмбәртийед дьн шеԝьр кьн, йед кӧ ван салед пашԝәхтийе тенә сери.

2. Ве готареда әме чь шеԝьр кьн, у чьрʹа? (Шькьле рʹуйе журнале шьровәкә.)

² Ве готареда, әме дина хԝә бьдьнә (1) ве пʹехәмбәртийе кӧ мә һин дькә, ԝәки Пʹадшатийа Хԝәде кʹәнге дәстпекьр сәрԝертийе бькә, (2) пʹехәмбәртийед кӧ мә һин дькьн, ԝәки кʹәнге Иса Мәсиһ сәр әʹзмана буйә Пʹадше Пʹадшатийа Хԝәде у (3) пʹехәмбәртийед кӧ нишан дькьн, ԝәки зутьрәке чь ԝе бе сәре дьжмьнед Пʹадшатийа Хԝәде. Әме бьвиньн кӧ әԝ пʹехәмбәрти мина пʹаред шькьләки, дьбьнә шькьләкә тʹам у зәлал, кʹижан кӧ нишан дькә ԝәки хьлази зутьрәке ԝе бе, чаԝа Йаһоԝа соз дайә.

ЧА ТЕДӘРХЬН КӦ КʹӘНГЕ ПʹАДШАТИЙА ХԜӘДЕ ДӘСТПЕКЬР СӘРԜЕРТИЙЕ БЬКӘ?

3. Данийел 7:13, 14 дәрһәԛа Пʹадше Пʹадшатийа Хԝәде чь дьбежә?

³ Чаԝа кӧ кʹьтеба Данийел 7:13, 14-да һатьбу пʹехәмбәртикьрьне, Иса сәрԝере һәри баш ә, чьмки Пʹадшатийа ԝи ԝе тʹӧ щар нәкʹәвә дәсте кәсәки дьн. Мәрьвед жь һʹәму мьләта ԝе ԝирʹа хьзмәт бькьн. Рʹезед дьн йед жь кʹьтеба Данийел жи пʹехәмбәрти кьрьбун, ԝәки Иса Мәсиһ ԝе паши ‹һʹәфт дәма› Пʹадшатийе бьстинә. Гәло әм дькарьн тедәрхьн кӧ Иса кʹәнге бу Пʹадша?

4. Шьровәкә кӧ Данийел 4:10-17 чаԝа али мә дькә, ԝәки әм һʹәсаб кьн, кӧ кʹижан сале Иса Мәсиһ бу Пʹадша. (Спартьне жи бьньһерʹә.)

⁴ Данийел 4:10-17 бьхунә, ИМ. «Һʹәфт дәм» те һʹәсабе 2 520 сал. Әв дәм сала 607 Б.Д.М.-да дәстпебу. Ве сале, Бабилонийа бажаре Оршәлиме ԝеран кьрьн, у пʹадше хьлазийе жь тʹәхте Йаһоԝа һатә рʹакьрьне. «Һʹәфт дәм» сала 1914 Д.М.-да хьлаз бун. Ве сале, Йаһоԝа Иса Мәсиһ кьрә Пʹадше Пʹадшатийа хԝә, кʹижанирʹа кӧ бь ԛануни тʹәхте Пʹадшатийе дькʹәтb (Һәзәԛел 21:25-27).

5. Пʹехәмбәртийа дәрһәԛа ‹һʹәфт дәма› чь кʹаре мәрʹа тинә?

⁵ Гәло әм жь ве пʹехәмбәртийе чь кʹаре дьстиньн? Пекһатьна пʹехәмбәртийа дәрһәԛа ‹һʹәфт дәма› баԝәрийа мә дьһа ԛәԝи дькә, кӧ Йаһоԝа созед хԝә ԝәхтда тинә сери. Чаԝа кӧ әԝи бона сазкьрьна Пʹадшатийа хԝә ԝәʹдә кʹьфш кьрьбу, Әԝе пʹехәмбәртийед дьн жи ль гора ԝәʹде кʹьфшкьри бинә сери. Бәле, рʹожа Йаһоԝа ԝе дәрәнги нәкʹәвә! (Һәбаԛуԛ 2:3)

ӘМ ЖЬ КʹӦ ЗАНЬН КӦ ИСА МӘСИҺ НЬҺА ПʹАДША ЙӘ?

6. (а) Әм жь кʹӧ заньн ԝәки Иса ньһа сәр әʹзмана сәрԝертийе дькә? (б) Пʹехәмбәртийа жь Әʹйанти 6:2-8 ве йәке чаԝа избат дькә?

⁶ Незики хьлазийа хьзмәтийа хԝә сәр әʹрде, Иса шагьртед хԝәрʹа зәлал кьр, кӧ мәрьв ԝе чаԝа фәʹм бькьн, ԝәки әԝи сәр әʹзмана дәстпекьрийә һʹӧкӧм бькә. Мәсәлә, әԝи гот кӧ шәрʹ, хәла у әʹрдһʹәж ԝе һәбьн. Әԝи ӧса жи гот кӧ «щи-щийа» нәхԝәши ԝе һәбьн. Пандәмийа COVID-19 йәк жь ван нәхԝәшийа йә. Әԝ һʹәму ԛәԝьмандьн пʹаред «нишана» ве йәке нә, кӧ Иса Мәсиһ сәрԝертийе дькә (Мәтта 24:3, 7; Луԛа 21:7, 10, 11). Паши чуйина Иса Мәсиһ сәр әʹзмана, 60 сали зедәтьр шунда, әԝи Йуһʹәннайе шандирʹа диса гот кӧ әв тьшт ԝе бьԛәԝьмьн (Әʹйанти 6:2-8 бьхунә). Жь ԝәхта кӧ Иса Мәсиһ сала 1914 бу Пʹадша, готьнед ԝи бь рʹасти жи һатьнә сери.

7. Паши ве йәке кӧ Иса бу Пʹадша, һʹале дьнйайе чьрʹа дьһа хьраб бу?

⁷ Паши ве йәке кӧ Иса бу Пʹадша, һʹале дьнйайе чьма дьһа хьраб бу? Ль гора Әʹйанти 6:2, паши кӧ Иса дәстпекьр сәрԝертийе бькә, әԝи пешийе мьԛабьли Мире-щьна у щьнед ԝи шәрʹ кьр. Кʹьтеба Әʹйанти сәре 12 нишан дькә, ԝәки Мире-щьна ви шәрʹида да дәр у тʹәви щьна һат авитьне сәр әʹрде. Ахьрийа ве йәке чь бу? Кʹьтеба Пироз ӧса дьбежә: «Ԝәй ль әʹрде у ль бәʹре, чьмки Мирещьн жорда сәр ԝәда һатә авитьне» (Әʹйанти 12:7-12).

8. Гава әм пекһатьна пʹехәмбәртийед дәрһәԛа Пʹадшатийе пе чʹәʹве хԝә дьвиньн, әв йәк сәр мә чаԝа һʹӧкӧм дькә?

⁸ Гәло әм жь ве пʹехәмбәртийе чь кʹаре дьстиньн? Һьм һʹале дьнйайе һьм жи хәйсәт-һʹӧнӧред мәрьва, нишан дькьн кӧ Иса бь рʹасти жи буйә Пʹадша. Ләма жи, гава әм дьвиньн кӧ инсанед ль дәр-дора мә чьԛас хԝәһʹьз у һерс ьн, әм бь зедәйи бәрхԝә накʹәвьн, чьмки әм фәʹм дькьн кӧ кьред ԝан избат дькьн, ԝәки Пʹадшати ида һʹӧкӧм дькә! (Зәбур 37:1) Чьԛас әм незики Һармәгәдоне дьбьн, һаԛас һʹале дьнйайе ԝе дьһа хьраб бә (Марԛос 13:8; 2 Тимотʹейо 3:13). Гәло әм шекьрдар ниньн, ԝәки Баве мәйи дьлован мәрʹа зәлал дькә кӧ сәбәбе ван тьшта чь йә?

ЧЬ ԜЕ БЕ СӘРЕ ДЬЖМЬНЕД ПʹАДШАТИЙА ХԜӘДЕ?

9. Пʹехәмбәртийа жь Данийел 2:28, 31-35 дәрһәԛа империйа һʹәмдьнйайе йа хьлазийе чь дьбежә, у әв империйа кʹәнге пешда һат?

⁹ Данийел 2:28, 31-35 бьхунә, ИМ. Иро, әв пʹехәмбәрти жи бәр чʹәʹве мә тенә сери. Хәԝна Нәбукәднәсәр нишан кьрьбу кӧ рʹожед ахьрийеда, демәк паши дәстпека сәрԝертийа Мәсиһ, чь ԝе бьԛәԝьмә. Ԝе дәме, империйа һʹәмдьнйайе, йа кӧ бь симболик пʹийед «жь һʹәсьн у жь гьле» йә, гәрәке хӧйа буйа. Әв империйа һʹәмдьнйайе йа хьлазийе йә, у әԝ дьжмьне Иса Мәсиһ йә. Ԝәʹде Шәрʹе Һʹәмдьнйайе йа I, гава Британйа у Дәԝләтед Йәкбуйи йед Америкайе, бунә йәк, әв империйа һʹәмдьнйайе хӧйа бу, демәк Англо-Америка. Хәԝна Нәбукәднәсәр дина мә дькʹьшинә сәр дӧ тьшта дәрһәԛа ве империйайе, чь кӧ ле жь пʹадшатийед пешийа ве щӧдә дькә.

10. (а) Пʹехәмбәртийа Данийел дәрһәԛа империйа Англо-Америка чаԝа иро әшкәрә те кʹьфше? (б) Әм чьда гәрәке фәсал бьн? (Чаргошә «Фәсал бьн!» бьньһерʹә.)

¹⁰ Фьрԛийа пешьн әв ә кӧ йәктийа Британйа у Америкайе нә кӧ бь металәкә жь зерʹ йан зив ә, ле бь тʹәвльһәвийа һʹәсьн у гьле йә. Гьл, демәк һʹәрʹийа сор бь симболик те һʹәсабе щьмәʹт (Данийел 2:43). Иро әшкәрә йә, кӧ һʹӧкӧме щьмәʹте чаԝа рʹийа ве империйа һʹәмдьнйайе дьгьрә у щар-щара изьне надә кӧ әԝ хԝәстьна хԝә бинә сери. Әԝ рʹьнд те кʹьфше ԝәʹде һьлбьжартьнед политики, кампанйайед бона мафед бажарвана у протестед мәзьн кӧ щьмәʹт пешда тинә.

11. Ча хӧйабуна империйа һʹәмдьнйайе, демәк Англо-Америка, баԝәрийа мә ԛәԝи дькә кӧ әм рʹожед ахьрийеда дьжин?

¹¹ Йа дӧда, империйа Англо-Америкайе бь симболик пʹийед һʹәйкәл ьн. Демәк, ль гора Кʹьтеба Пироз, әв империйа һʹәмдьнйайе йа хьлазийе йә. Паши ве сәрԝертийе, ида тʹӧ сәрԝерти ԝе щийе ве нәгьрә. Дәԝсе, әԝе шәрʹе Һармәгәдонеда тʹәви һʹәму сәрԝертийед дьнйайе, жь алийе Пʹадшатийа Хԝәдева бе ԝеранкьрьнеc (Әʹйанти 16:13, 14, 16; 19:19, 20).

12. Пʹехәмбәртийа Данийел чь избаткьрьнед дьн жи нишан дькә, йед кӧ баԝәрийа мә дьһа ԛәԝи дькьн?

¹² Гәло әм жь ве пʹехәмбәртийе чь кʹаре дьстиньн? Пʹехәмбәртийа Данийел избаткьрьнед дьн жи нишан дькә, кӧ әм ньһа рʹожед ахьрийеда дьжин. Зедәтьри 2 500 сал пешда, Данийел готьбу кӧ паши Бабилоне, ԝе чар империйед дьн сәр хьзмәткʹаред Хԝәде һʹӧкӧм бькьн. Ӧса жи, әԝи нишан кьрьбу кӧ империйа Англо-Америкайе ԝе сәрԝертийа пашьн бә. Әв йәк баԝәрийа мә дьһа ԛәԝи дькә, кӧ дәмәкә незикда Пʹадшатийа Хԝәде ԝе һʹәму сәрԝертийед дьнйайе бь тʹәмами кʹокева рʹакә у хԝәха сәр дьнйайе пʹадшатийе бькә (Данийел 2:44).

13. «Пʹадше һʹәйшта» у «дәһ пʹадша», йед кӧ Әʹйанти 17:9-12 бәʹса ԝан дькә, бь симболик чь тенә һʹәсабе, у әв пʹехәмбәрти ча һатә сери?

¹³ Әʹйанти 17:9-12 бьхунә. Паши Шәрʹе Һʹәмдьнйайе йа I, пʹехәмбәртийа дьн дәрһәԛа рʹожед ахьрийе һатә сери. Сәрԝеред дьнйайе дьхԝәстьн тьштәки ӧса бькьн кӧ шәрʹ ида тʹӧнә бьн у әʹдьлайи бә. Ләма жи мәһа Чьләйе, сала 1920, ԝана тʹәшкиләта Лига Мьләта саз кьр. Ле мәһа Щотмәһе, сала 1945, тʹәшкиләта Мьләтед Йәкбуйи дәԝса ԝе һатә сазкьрьне. Әв тʹәшкиләт ль гора Кʹьтеба Пироз те навкьрьне «пʹадше һʹәйшта», ле әԝ хԝәха империйа һʹәмдьнйайе нинә. Әԝ ԛәԝата хԝә жь сәрԝертийед политики дьстинә, йед кӧ пьштгьрийа ԝе дькьн. Кʹьтеба Пироз бь зьманәки симболик, ԝана ча «дәһ пʹадша» нав дькә.

14-15. (а) Әʹйанти 17:3-5 дәрһәԛа «Бабилона мәзьн» чь дьбежә? (б) Динед ԛәлп иро чь һʹалида ньн?

¹⁴ Әʹйанти 17:3-5 бьхунә. Йуһʹәннайе шанди жь бина бәр Хԝәде, хәԝнхәйаледа ԛавәк дит бь наве «Бабилона мәзьн», йа кӧ бь симболик империйа һʹәмдьнйайе йа религийа ԛәлп те һʹәсабе. Гәло әв хәԝн-хәйал чь әʹйан дькә? Религийед ԛәлп жь бәрева тʹәви империйед политикийә һʹәмдьнйайе һәвкʹарийе дькьн у пьштгьрийа ԝан дькьн. Ле дәмәкә незикда, Йаһоԝа ԝе бькә дьле сәрԝеред политики «кӧ хԝәстьна ԝи бькьн». Ахьрийа ве йәке ԝе чь бә? Сәрԝеред политики, демәк «дәһ пʹадша», ԝе һʹьщуми сәр тʹәшкиләтед религийа ԛәлп бькьн у ԝана ԛьрʹ кьн (Әʹйанти 17:1, 2, 16, 17).

¹⁵ Әм жь кʹӧ заньн ԝәки зутьрәке «Бабилона мәзьн» ԝе бе ԛьрʹкьрьне? Бона щаба ве пьрсе, бинә бира хԝә кӧ бәре бажаре Бабилоне чаԝа бь ава Чʹәме Фәрате дьһатә парастьне. Кʹьтеба Әʹйанти жи мьләтед кӧ иро пьштгьрийа «Бабилона мәзьн» дькьн, бәрамбәр дькә тʹәви «авед» кӧ ле дьпарезьн (Әʹйанти 17:15). Ле кʹьтеба Әʹйанти дьбежә кӧ әв ав ԝе ‹бьчʹькә›. Әв йәк те һʹәсабе кӧ гәләк мәрьв ԝе тʹәрка динед ԛәлп бьдьн (Әʹйанти 16:12). Әв пʹехәмбәрти иро те сери. Гәләк мәрьв пьшта хԝә дьдьнә религийед ԛәлп у мәщалед дьн дьгәрʹьн ԝәки проблемед хԝә сафи кьн.

16. Әм чь кʹаре дьстиньн жь фәʹмкьрьна пʹехәмбәртийед дәрһәԛа әʹйанбуна Мьләтед Йәкбуйи у ԛьрʹкьрьна «Бабилона мәзьн»?

¹⁶ Гәло әм жь ван пʹехәмбәртийа чь кʹаре дьстиньн? Әʹйанбуна тʹәшкиләта Мьләтед Йәкбуйи у сьстбуна религийа ԛәлп жи избат дькьн кӧ әм рʹожед ахьрийеда дьжин. Рʹаст ә «Бабилона мәзьн» чьԛас дьчә пьштгьрийа мәрьва ӧнда дькә у сьст дьбә, ле чаԝа Кʹьтеба Пироз дьбежә, әԝе бь щурʹәки дьн бе кʹӧтакьрьне. Ча мә дит, Йаһоԝа ԝе бькә дьле ‹дәһ пʹадша›, демәк дьле сәрԝеред политики, йед кӧ пьштгьрийа Мьләтед Йәкбуйи дькьн, ԝәки әԝана «хԝәстьна ԝи бькьн», демәк ԛьрʹа «Бабилона мәзьн» биньн. Һьнге дьне әʹлам ԝе әʹщебмайи бьминәd (Әʹйанти 18:8-10). Ԛьрʹкьрьна «Бабилона мәзьн» ԝе дьне бьһʹәжинә у дьбәкә бьбә сәбәба гәләк тәнгасийа, ле хьзмәткʹаред Хԝәде ԝе ша бьн, чьмки әв дьжмьне Хԝәде ԝе ида тʹӧнә бә у дәмәкә незикда әме жь ве дьнйа хьраб бенә хьлазкьрьне! (Луԛа 21:28)

АХЬРИЙЕ НӘТЬРСӘ

17-18. (а) Әм чаԝа дькарьн баԝәрийа хԝә дьһа ԛәԝи кьн? (б) Готара дьнда, әме чь шеԝьр кьн?

¹⁷ Данийел пʹехәмбәрти кьрьбу кӧ занәбуна рʹаст ԝе зедә бә. Бь рʹасти жи ӧса йә! Әм пʹехәмбәртийед дәрһәԛа рʹожед мә ида фәʹм дькьн (Данийел 12:4, 9, 10). Чахе әм дьвиньн, ԝәки готьнед Кʹьтеба Пироз чаԝа тенә сери, гәло әм Йаһоԝарʹа у Хәбәра ԝирʹа фьрнаԛ набьн? (Ишайа 46:10; 55:11) Сәва кӧ баԝәрийа тә һе ԛәԝи бә, бәрдәԝам кә Ньвисаред Пироз леколин бькә у али кәсед дьн бькә ԝәки әԝана жи бьбьн достед Хԝәде. Йаһоԝа ԝе һʹәму кәсед кӧ хԝә дьсперьн ԝи бьпарезә у тʹьме ԝе әʹдьлайе бьдә ԝан (Ишайа 26:3).

¹⁸ Готара дьнда, әме дина хԝә бьдьне кӧ Кʹьтеба Пироз дәрһәԛа щьвата Мәсиһитийә рʹожед ахьрийеда чь пʹехәмбәрти кьрьбу. Әме бьвиньн кӧ чаԝа әԝ пʹехәмбәрти бь пʹехәмбәртийед дәрһәԛа рʹожед ахьрийева гьредайи нә. Ӧса жи, әме дина хԝә бьдьн һьнә избаткьрьна, кӧ Пʹадше мә Иса Мәсиһ рʹебәрийа шагьртед хԝәйи амьн дькә.