Пьштгьрийа Сәрԝере Мә Иса Мәсиһ Бькә

1. Хԝәстьна Йаһоԝа чь йә?

ХԜӘСТЬНА Хԝәдайе мә әв ә, ԝәки мьзгинийа Пʹадшатийе сәр тʹәмамийа дьнйайе бе бәлакьрьне (Марԛос 13:10; 1 Тимотʹейо 2:3, 4). Әв йәк шьхӧле Йаһоԝа йә у әԝи щабдарийа ви шьхӧли дайә дәсте Кӧрʹе хԝәйи дәлал. Әм дькарьн баԝәр бьн, кӧ бьн рʹебәрийа Исайә баш, шьхӧле бәлакьрьна мьзгинийе ԝе пешийа хьлазийа ве дьнйа зӧльм, бе сәкьнандьне (Мәтта 24:14).

2. Ве готареда әме дәрһәԛа чь шеԝьр кьн?

² Ве готареда әме бьвиньн, кӧ Иса ча «хӧламе амьн у сәрԝахт» дьдә хәбате, ԝәки хԝарьна рʹӧһʹани бьдә мә у рʹебәрийа шьхӧле бәлакьрьна мьзгинийе бькә. Әв йәк бь рʹасти жи шьхӧләки мәзьн ә! (Мәтта 24:45) Ӧса жи әме бьвиньн кӧ әм чаԝа дькарьн пьштгьрийа Иса у хӧламе амьн бькьн.

ИСА РʹЕБӘРИЙА ШЬХӦЛЕ БӘЛАКЬРЬНА МЬЗГИНИЙЕ ДЬКӘ

3. Чь һʹӧкӧм Исарʹа һатийә дайине?

³ Әм жь кʹӧ заньн кӧ Иса рʹебәрийа шьхӧле бәлакьрьна мьзгинийе дькә? Ԝәхтәкә кьн пешийа кӧ Иса чу әʹзмана, әԝ сәр чʹийаки Щәлиле рʹасти чәнд шагьртед хԝә һат. Әԝи ԝанрʹа гот: «Һʹәму һʹӧкӧме әʹрд у әʹзмен мьнрʹа һатә дайине». Дина хԝә бьдьн паши ве йәке әԝи чь гот: «Ньһа һәрʹьн һʹәму мьләта һин кьн» (Мәтта 28:18, 19). Жь ван рʹеза әм зәлал фәʹм дькьн, кӧ Исарʹа һʹӧкӧм һатийә дайине, ԝәки рʹебәрийа шьхӧле бәлакьрьна мьзгинийе бькә.

4. Әм чьма дькарьн баԝәр бьн, кӧ Иса иро жи рʹебәрийа шьхӧле бәлакьрьна мьзгинийе дькә?

⁴ Иса готьбу кӧ шьхӧле бәлакьрьна мьзгинийе у һазьркьрьна шагьрта ԝе нава һʹәму мьләтада бе кьрьне. Ӧса жи әԝи шагьртед хԝәрʹа готьбу: «Әз ирода тʹьме һʹәта ахьрийа дьнйайе тʹәви ԝә мә» (Мәтта 28:20). Әв готьн рʹьнд нишан дькьн, кӧ шьхӧле бәлакьрьна мьзгинийе ԝе бьн рʹебәрийа Исада һʹәта рʹожед мә бәрдәԝам бә.

5. Әм чаԝа пьштгьрийа пʹехәмбәртийа жь Зәбур 110:3 дькьн?

⁵ Иса бәрхԝә нәдькʹәт, кӧ незики хьлазийа ве дьнйайе хәбаткʹар ԝе һьндьк бьн. Әԝи заньбу кӧ әв готьн ԝе бенә сери: «Рʹожа һәрʹи шерʹ, щьмәʹта Тәйе бь рʹәзәдьли бе» (Зәбур 110:3). Гава тӧ мьзгинийе бәла дьки, тӧ пьштгьрийа Иса у хӧламе амьн дьки у ве йәкеда кʹар дьки, ԝәки әԝ пʹехәмбәрти бе сери. Бәле, шьхӧл пешда дьчә, ле чәтьнайи жи һәнә.

6. Чәтьнайик рʹасти кʹижани кӧ мьзгинванед Пʹадшатийе тен, чь йә?

⁶ Йәк жь чәтьнайа әв ә кӧ гәләк кәс шьхӧле мә нәфрʹәт дькьн. Рʹабәр, сәрԝеред религи у политик дәрһәԛа шьхӧле мә дәрәԝа бәла дькьн. Һәрге мәрьвед мә, һәвал йан һәвалхәбатчийед мә ван дәрәԝа баԝәр бькьн, дьбәкә әԝана зоре мә бькьн, кӧ әм хьзмәта Йаһоԝарʹа у бәлакьрьна мьзгине бьһельн. Һьнә ԝәлатада, хушк-бьред мә дьдьнә тьрсандьне, дьгьрьн у дькьнә кәле. Әм сәва ве йәке әʹщебмайи наминьн, чьмки Иса пешда готьбу: «[Һуне] бона наве мьн бәр чʹәʹве һʹәму мьләта рʹәш бьн» (Мәтта 24:9). Әв йәк кӧ мәрьв мә нәфрʹәт дькьн, избат дькә ԝәки Йаһоԝа жь мә рʹази йә (Мәтта 5:11, 12). Сәбәба ве нәфрʹәте, Мире-щьна йә. Ле Иса жь ԝи ԛәԝитьр ә! Пе аликʹарийа Иса, мьзгини дьгьһижә мәрьвед жь һʹәму мьләта. Ньһа әме дина хԝә бьдьн һьнә избатийа.

7. Бь ньһерʹандьна тә, готьнед Әʹйанти 14:6, 7 чаԝа тенә сери?

⁷ Диса тьштәк кӧ бәлакьрьна мьзгинийа Пʹадшатийе чәтьн дькә әв ә, кӧ гәләк зьман һәнә у әм ван зьмана ньзаньн. Ле кʹьтеба Әʹйантида Иса пʹехәмбәрти кьрьбу, кӧ рʹожед мәда мьзгини ԝе нава гәләк чәтьнайада жи бе бәлакьрьне (Әʹйанти 14:6, 7 бьхунә). Гәло чь щурʹәйи? Сәр малпәра мә jw.org, сәр 1 000 зьмани зедәтьр әʹдәбйәтед сәр һʹиме Кʹьтеба Пироз һәнә, у әм хирәт дькьн кӧ хәбәра Пʹадшатийе бьгьһиньн һәр кәси. Жь бо ве йәке, Кʹома Рʹебәрийе сафи кьр кӧ кʹьтеба «Ша бә Жийинерʹа Һʹәта-Һʹәтайе!» сәр 700 зьмани зедәтьр бе ԝәлгәрʹандьне. Әв кʹьтеб ньһа һащәта мәйә сәрәкә йә, сәва кӧ али мәрьва бькьн, ԝәки әԝана бьбьнә шагьртед Иса. Ӧса жи, әʹдәбйәтед пе һʹәрфед Бьрел у видео тенә дәрхьстьне, ԝәки хԝарьна рʹӧһʹани бьгьһижә кәсед кор у йед кәрʹ-лал. Пʹехәмбәртийед жь Кʹьтеба Пироз бәр чʹәʹве мә тенә сери. Мәрьвед «жь һәр зьман у жь һәр мьләти» ньһа ‹зьмане паԛьж› йа рʹастийа Кʹьтеба Пироз һин дьбьн (Зәкәрйа 8:23, ИМ; Сефанйа 3:9). Әв шьхӧл бь тʹәмами бьн рʹебәрийа Исада те кьрьне.

8. Кʹара бәлакьрьна мьзгинийе чь йә?

⁸ Иро тʹәшкиләта Йаһоԝада зедәтьри 8 милйон мәрьв жь 240 ԝәлати һәнә, у һәр сал бь дәһа һʹәзара мәрьв тенә ньхӧмандьне. Тьштәки кӧ жь ван һәжмара фәрзтьр ә әв ә, кӧ әв шагьртед тʹәзә «мәрьве ну» ль хԝә кьрьнә (Колоси 3:8-10). Гәләк жь ԝан тʹәрка бенамуси, зордари, насйонализм у фьрԛикьрьна ортʹа мәрьва, данә. Чаԝа кӧ Ишайа 2:4-да һатьбу пʹехәмбәртикьрьне, әԝ ида ‹һини шәрʹ набьн›». Хирәта мә кӧ «мәрьве ну» ль хԝә бькьн, сәр кәсед дьн жи һʹӧкӧм дькә у али ԝан дькә кӧ әԝ жи бьбьн шагьртед Иса Мәсиһ. Ӧса жи, гава әм чь жь дәсте мә те дькьн кӧ «мәрьве ну» ль хԝә бькьн, әм избат дькьн ԝәки әм пәй рʹебәре хԝә Иса Мәсиһ дьчьн (Йуһʹәнна 13:35; 1 Пәтрус 2:12). Әв һәр тьшт ньшкева набә. Бь сайа аликʹарийа Иса әм пешда дьчьн.

ИСА ХӦЛАМЕ АМЬН КʹЬФШ ДЬКӘ

9. Мәтта 24:45-47-да, дәрһәԛа рʹожед ахьрийе чь һатьбу пʹехәмбәртикьрьне?

⁹ Мәтта 24:45-47 бьхунә. Иса пешда готьбу кӧ рʹожед ахьрийеда, әԝе «хӧламе амьн у сәрԝахт» кʹьфш кә, ԝәки әԝ хԝарьна рʹӧһʹани бьдә мә. Әв хӧлам иро бь дьл у щан дьхәбьтә. Рʹебәре мә Иса Мәсиһ бь сайа кʹомәкә меред кʹьфшкьри, ԝәхтда хԝарьна рʹӧһʹани дьдә хьзмәткʹаред Хԝәде у кәсед кӧ гӧһ дьдьнә мьзгинийе. Әв мер һʹӧкӧми сәр баԝәрийа тʹӧ кәси накьн (2 Корьнтʹи 1:24). Әԝана ԛәбул дькьн ԝәки «сәрԝер у фәрмандаре» хьзмәткʹаред Хԝәде, Иса Мәсиһ йә (Ишайа 55:4, ИМ).

10. Тә рʹийа рʹастийе бь сайа кʹижан әʹдәбйәте нас кьр?

¹⁰ Жь сала 1919-да, хӧламе амьн бь сайа щурʹә-щурʹә әʹдәбйәта али хԝәндәкʹаред тʹәзә дькә, кӧ әԝана хԝарьна рʹӧһʹани тәʹм бькьн. Сала 1921-да, хӧламе амьн кʹьтеба «Лире Хԝәде» дәрхьст, йа кӧ али кәсед кӧ гӧһ дьданә мьзгинийе, дькьр, ԝәки рʹастийед сәрәкә йед Кʹьтеба Пироз пебьһʹәсьн. Ԝәʹдә шунда, гәләк мәрьва Баве мәйи әʹзмана бь аликʹарийа ван әʹдәбйәта нас кьрьнә: «Хԝәде Рʹаст ә», «Рʹастийа кӧ Дьбә бәрбь Жийина Һʹәта-Һʹәтайе», «Тӧ Дькари Һʹәта-Һʹәтайе Щьнәтеда сәр Әʹрде Бьжи», «Занәбун кӧ Дьбә бәрбь Жийина Һʹәта-Һʹәтайе», «Чь Һин Дькә Кʹьтеба Пироз?», «Кʹьтеба Пироз бь Рʹасти Чь Дьбежә?» йан жи пе әʹдәбйәта бь наве «Ша бә Жийинерʹа Һʹәта-Һʹәтайе!», йа кӧ тʹәзә дәркʹәтийә. Ԝәʹде хԝәда гава әв кʹьтеб дьһатьнә нәшьркьрьне, әԝ бь рʹасти жи гәләк керһати бун.

11. Әм чьма һʹәԝще хԝарьна рʹӧһʹани нә?

¹¹ Хенщи кәсед кӧ рʹастийе тʹәзә һин дьбьн, әм жи һʹәԝще хԝарьна рʹӧһʹани нә, ԝәки Кʹьтеба Пироз у Йаһоԝа рʹьнд нас бькьн. Паԝлосе шанди ӧса готьбу: «Хԝарьна гьран бона мәрьвед гьһишти йә». Чаԝа кӧ Паԝлос зәлал кьрьбу, хԝарьна ӧса али мә дькә ԝәки әм «ԛәнщи у хьрабийе жь һәв» дәрхьн (Ибрани 5:14). Иро дьнйайеда нормед нав-намусийе гәләк кʹәтьнә, ләма жи щарна һеса нинә кӧ әм гӧһ бьдьн ԛанунед Йаһоԝа. Ле бь сайа хԝарьна рʹӧһʹанийә тәʹмхԝәш, Иса ԛәԝате дьдә мә, ԝәки әм сәркʹәвьн. Чʹәʹвканийа ве хԝарьне, Хәбәра Хԝәде йә. Хӧламе амьн ве хԝарьне бьн рʹебәрийа Иса Мәсиһда һазьр дькә у бәла дькә.

12. Мина Иса әм сәр наве Хԝәде чаԝа дьньһерʹьн?

¹² Мина Иса әм жи наве Хԝәде рʹумәт дькьн (Йуһʹәнна 17:6, 26). Мәсәлә, жь сала 1931, әм хԝә ча «Шәʹдед Йаһоԝа» нав дькьн. Бь сайа ви нави, кӧ мә жь Кʹьтеба Пироз стандийә, әм нишан дькьн ԝәки әм чьԛас незики Баве хԝәйи әʹзмана нә (Ишайа 43:10-12). Ӧса жи, жь мәһа Щотмәһе йа сала 1931, наве Хԝәде сәр рʹуйе ве журнала «Бьрща Ԛәрәԝьлийе» йә. Гәләк ԝәлгәрʹандьнед Кʹьтеба Пирозда, йед кӧ алийе дерава тенә нәшьркьрьне, наве Хԝәде һатийә дәрхьстьне, ле Шәʹдед Йаһоԝа наве Хԝәде «Ԝәлгәрʹандьна Дьнйа Тʹәзәда» һʹәму щийед ԝеда данә хәбате.

ИСА РʹЕБӘРИЙА ШАГЬРТЕД ХԜӘ ДЬКӘ

13. Тӧ чьма баԝәр дьки кӧ иро Иса «хӧламе амьн у сәрԝахт» дьдә хәбате? (Йуһʹәнна 6:68)

¹³ Бь сайа «хӧламе амьн у сәрԝахт», Иса тʹәшкиләтәкә мәхсус саз кьрийә, ԝәки һʹәбандьна рʹаст сәр әʹрде пешда һәрʹә. Тӧ сәр ве тʹәшкиләте чаԝа дьньһерʹи? Дьбәкә тӧ жи мина Пәтрусе шанди хԝә тʹәхмин дьки, йе кӧ Исарʹа ӧса готьбу: «Хӧдан, әме һәрʹьнә щәм кʹе? Готьнед жийина һʹәта-һʹәтайе щәм тә нә» (Йуһʹәнна 6:68). Һәрге мә тʹәшкиләта Йаһоԝа нас нәкьра, һʹале мә ԝе ньһа чаԝа буйа? Бь сайа тʹәшкиләте, әм жь алийе рʹӧһʹанива тʹӧ щара бьрʹчи наминьн. Ӧса жи, Иса мә бь сайа тʹәшкиләте һин дькә, кӧ әм хьзмәтийеда пешда һәрʹьн, у әԝ али мә дькә кӧ әм «мәрьве ну» ль хԝә бькьн, ԝәки Йаһоԝа жь мә рʹази бә (Әфәси 4:24).

14. Ԝәʹде пандәмийа COVID-19, тә жь рʹебәрийа тʹәшкиләта Йаһоԝа чаԝа кʹар дьдит?

¹⁴ Рʹожед чәтьнда, Иса рʹебәрийа мә дькә. Гава пандәмийа COVID-19 дәстпебу, кʹара ван рʹебәрийед билан әшкәрә бун. Гәләк мәрьвед ве дьнйайе тʹәвльһәв бьбун, ле Иса бь зәлали рʹебәрийа мә дькьр, ԝәки әм хԝәйкьри бьн. Мәрʹа дьһатә готьне ԝәки бәрдәвка бьдьнә хәбате у тʹәви кәсед дьн дистансйайе хԝәй кьн. Рʹуспийарʹа дьһатә готьне кӧ әԝана тʹәви һʹәму хушк-бьра текли бьн у һаш жь һʹәԝщед ԝанә физики у рʹӧһʹани һәбьн (Ишайа 32:1, 2). Ӧса жи, мә бь сайа әʹламәтийед жь Кʹома Рʹебәрийе һелан у рʹебәри дьстанд.

15. Ԝәʹде пандәмийе, бона дәрбазкьрьна щьвина у бәлакьрьна мьзгине чь рʹебәри һатьбу дайине, у ахьри чь бу?

¹⁵ Ԝәʹде пандәмийе, мәрʹа рʹебәри дьһатә дайине кӧ гәрәке әм щьвата чаԝа дәрбаз бькьн у чаԝа мьзгинийе бәла кьн. Жь бо дәрбазкьрьна щьвин у кʹомщьвина, әм зу-зу һини програмед видео-конференсйайе бун. Ӧса жи, әм һин бун кӧ мьзгинийе бь сайа тʹеле у нәʹма бәла бькьн. Йаһоԝа хирәта мә кʹәрәм кьр. Гәләк ԝәлатада, һәжмара мьзгинвана зедә буйә. Ԝәʹде пандәмийе, гәләк кәсед дьлпʹак һатьнә сәр рʹийа рʹастийе (Чаргошә «Йаһоԝа Хьзмәта Мә Кʹәрәм Дькә» бьньһерʹә).

16. Әм дькарьн чьда баԝәр бьн?

¹⁶ Һьнә кәс дьбәкә дьфькьрин кӧ рʹебәрийа тʹәшкиләте дәрһәԛа пандәмийе бь зедәйи сәрт ә. Ле мә дит кӧ ахьрийеда, рʹебәрийа кӧ мә дьстанд чьԛас бь билани бу (Мәтта 11:19). Гава әм дина хԝә дьдьне, кӧ Иса чаԝа бь дьловани рʹебәрийа шагьртед хԝә дькә, баԝәрийа мә дьһа ԛәԝи дьбә, кӧ чь жи һәбә, Йаһоԝа у Кӧрʹе ԝийи дәлал ԝе тʹәви мә бьн (Ибрани 13:5, 6 бьхунә).

17. Әԝ йәк кӧ тӧ бьн рʹебәрийа Исада шьхӧлкʹарийе дьки, тӧ чь сәр хԝә тʹәхмин дьки?

¹⁷ Әм чьԛас ша нә кӧ әм бьн рʹебәрийа Исада шьхӧл дькьн. Фьрԛийед ӧса ча култур, мьләт йан зьманед щӧдә, йәктийа тʹәшкиләта мә хьраб накьн. Бь сайа ве тʹәшкиләте, Хԝәде хԝарьна рʹӧһʹани дьдә мә у мә һин дькә кӧ әм мьзгинийе бәла бькьн. Ӧса жи, әм аликʹарийе дьстиньн кӧ «мәрьве ну» ль хԝә кьн, у әм һин дьбьн кӧ һәвдӧ һʹьз бькьн. Әм рʹасти жи сәрбьльнд ьн кӧ Иса рʹебәре мә йә!