Мьн Дит кӧ Йаһоԝа Кәсед Амьн Кʹәрәм Дькә

Кʹәне мьн һат, чьмки әз нә жи дьфькьрим кӧ әԝ йәки баԝәрмәнд ә. Мьн ле пьрси: «Тӧ дәрһәԛа Кʹьтеба Пирозда чь зани?» Серида әԝи тьштәк нәгот. Паше, әԝи гот кӧ дийа ԝи Шәʹде Йаһоԝа йә. Әԝ жь дийа хԝә һьнә тьшт пеһʹәсийабу. Мьн жь ԝи лава кьр, ԝәки һе зедә тьшт мьнрʹа гьли кә.

Хәбәрдана мә һʹәта ниве шәве бәрдәԝам бу. Һәвале мьн мьнрʹа гот кӧ Кʹьтеба Пироз дьбежә, ԝәки Мире-щьна сәрԝере ве дьнйайе йә (Йуһʹәнна 14:30). Мьн әʹмьре хԝәда ԛәт тьштәки ӧса нәбьһистьбу. Мьн тʹәне заньбу кӧ дьнйа бьн һʹӧкӧме Хԝәдайе дьлованда йә. Ле чьмки мьн жийина хԝәда гәләк тьшт дитьбун, әв фькьра һане нәдькʹәтә һʹьше мьн. Рʹаст ә әз 26 сали бум, ле гәләк тьштед кӧ бәр чʹәʹве мьн ԛәԝьмибун, әз әʹщьз дькьрьм.

Баве мьн пилоте Америкайе бу. Гава әз зарʹ бум, мьн хԝәрʹа дьгот кӧ иро йан сьбе шәрʹе атоми ԝе дәстпебә. Әскәр һәртʹьм һазьр бун кӧ бомбе атоме бавежьн. Чахе әз Калифорнйайеда дьчумә занингәһе, шәрʹе Вийәтнаме дәстпебьбу. Әз тʹәви шагьртед дьн дьчумә протеста. Гәләк щар әм жь полиса дьрʹәвийан, чьмки ԝана пе дара әм дькʹӧтан у газ дьданә хәбате, йа кӧ чʹәʹве мәрьва дьшәԝьтанд. Бина мә дьчʹькийа у чʹәʹвед мә рʹьнд нәдьдит. Әв дәмәкә тʹәвльһәв у рʹабәрибуне бу. Политик дьһатьнә кӧштьне, мәрьва сәри һьлдьдан у протестед мәзьн дьԛәԝьмин. Фькьр у ньһерʹандьнед мәрьва гәләк жь һәв щӧдә бун. Һәр тьшт тʹәвльһәв бьбу.

Сала 1970-да, мьн дәстпекьр Аласкайа бакӧреда бьхәбьтьм у мьн пʹәре ԛальм чедькьр. Паше әз пе тәйаре чумә Лондоне. Ԝедәре мьн хԝәрʹа мотосиклетәк кʹьрʹи у мьн һәма бе нет бәре хԝә да рʹийа башуре. Чәнд мәһ шунда, әз гьһиштьмә Африкайе. Рʹеда, әз рʹасти гәләк мәрьва һатьм. Һʹьзрәта ԝан әв бу, ԝәки жь кӧл-дәрдед хԝә хьлаз бьн.

Жь бо ве йәке кӧ мьн гәләк тьшт дитьбун у бьһистьбун, мьн фәʹм кьр кӧ әв гьлийед Кʹьтеба Пироз рʹаст ьн: Дьнйа бьн һʹӧкӧме Мире-щьнада йә. Ле әз бәрхԝә дькʹәтьм у мьн дьхԝәст пебьһʹәсьм, кӧ чьрʹа Хԝәде тьштәки накә.

Паши чәнд мәһа мьн щаба пьрса хԝә станд. Ԝәʹдә шунда, мьн гәләк мәрьв нас кьрьн у ԝана һʹьз кьр. Нава чәтьнайада жи, ԝана бь амьни Йаһоԝарʹа хьзмәт дькьр.

ИРЛӘНДА БАКӦРЕ—«ԜӘЛАТЕ БОМБ У ГӦЛӘ»

Паши кӧ әз вәгәрʹийамә Лондоне, мьн жь дайика һәвале хԝә, Кʹьтеба Пироз хԝәст у әԝе да мьн. Паше, әз чумә Нидерланде, бажаре Амстердаме. Рʹожәке, Шәʹдәки Йаһоԝа дит, кӧ әз кʹучʹеда бьне ләмпеда Кʹьтеба Пироз дьхуньм у әԝи али мьн кьр, ԝәки әз дьһа зедә тьшт пебьһʹәсьм. Паше, әз дәрбази Ирләндайе, бажаре Дӧблине бум. Ԝедәре, мьн Филиала Шәʹдед Йаһоԝа дит. Мьн дәре ԝан хьст. Паши кӧ әз кʹәтьмә һьндӧрʹ, әз тʹәви Артур Метйус бьра бумә нас. Әԝ йәки сәрԝахт у щерʹьбанди бу. Мьн һинбуна Кʹьтеба Пироз хԝәст, у әԝ ԛайил бу ԝәки тʹәви мьн һинбуна Кʹьтеба Пироз дәрбаз кә.

Мьн бь хирәтәкә мәзьн дәстпекьр леколина бькьм у бь дьл у щан кʹьтеб у журналед Шәʹдед Йаһоԝа дьхԝәнд. У һәмьки, мьн Кʹьтеба Пироз жи хԝәнд. Гәләк һʹәԝаса мьн ве йәкерʹа дьһат! Сәр щьвате, мьн дьдит кӧ зарʹ щабед пьрсед ӧса фәрз заньбун, йед кӧ бь ԛьрʹна зандар дьхԝәстьн пебьһʹәсьн, мәсәлә: «Чьма һаԛас кӧл-дәрд һәнә? Хԝәде бь рʹасти кʹи йә? Паши мьрьне чь те сәре мәрьва?» Мьн ԝәʹде хԝә тʹәне тʹәви Шәʹдед Йаһоԝа дәрбаз дькьр. Хенщи Шәʹдед Йаһоԝа, ԝи ԝәлатида мьн тʹӧ кәс нас нәдькьр. Ԝана али мьн кьр кӧ әз Йаһоԝа һʹьз бькьм у әʹмьре хԝә ль гора хԝәстьна ԝи дәрбаз бькьм.

Сала 1972-да, әз һатьмә ньхӧмандьне. Саләк шунда, әз бумә пешәнг у мьн ль Ирләнда Бакӧре, бажаре Нийурийайеда, щьватәкә бьчʹукда хьзмәт дькьр. Мьн хԝәрʹа бьн пʹийа чʹийеда маләкә жь кәвьр кʹьре гьрт. Незики ԝедәре чʹеләк дьчʹерийан, у мьн готара хԝә бәр ԝана һазьр дькьр. Гава ԝана гиһа дьщут, мьнрʹа ӧса дьһатә кʹьфше, кӧ ԝана рʹьнд гӧһ дьда готара мьн. Ԝана нькарьбу ширәт бьдьнә мьн, ле ԝана али мьн кьр, кӧ әз ль чʹәʹвед гӧһдаред хԝә бьньһерʹьм. Сала 1974-да, әз ча пешәнге мәхсус һатьм кʹьфшкьрьне. Ԝи чахи, һәвале мьни хьзмәте, Нигел Пит бу. Әм бунә һәвалед сал у зәмана.

Һьнге Ирләнда Бакӧреда һәр дәра зӧльм у зордари һәбу. Һьнәка Ирләнда Бакӧре ча «ԝәлате бомб у гӧлә» нав дькьрьн. Мәрьва кʹучʹада шәрʹ дькьр, гӧлә бәрʹдьданә һәв у әʹрәба дьтʹәԛандьн. Гәләк щара һьм сәва религийа у һьм жи сәва политике проблем пешда дьһатьн. Ле Протестант у Католика заньбун, кӧ Шәʹдед Йаһоԝа тʹәв политике набьн. Ләма жи мә дькарьбу аза у бехоф хьзмәт кьн. Кәсед кӧ ԝедәре дьжитьн, гәләк щара заньбун кӧ кʹәнге у кʹидәре шәрʹ дькарә дәстпебә, у ԝана мә дьданә һʹәсандьне.

Ле диса жи, дәрәщед хоф һәбун. Рʹожәке, әз тʹәви пешәнгәки бь наве Денис Кариган бона хьзмәтийе чумә бажарәки незик. Ԝедәре, Шәʹдед Йаһоԝа тʹӧнә бун у әм пешда тʹәне щарәке чубун ԝедәре. Ԝедәре жьнькәке шәрʹ авитә мә, кӧ әм әскәред Британи нә, чьмки тʹӧ кәси жь мә сәр зьмане Ирләнди хәбәр нәдьда. Ләма жи, әм гәләки тьрсийан. Һәрге кәсәк әскәрәкирʹа һʹәйф буйа, мәрьва дькарьбу гӧлә бәрʹда чока ԝи, йан жи әԝ бькӧшта. Щарәке гава әм дәрва бәр сӧрʹ-сәрме тʹәне һивийа отобусе сәкьни бун, мә дит кӧ чаԝа әʹрәбәк незики дькʹана ԛаԝәйе бу, щийе кӧ жьньке шәрʹ авитә мә. Жьньк дәркʹәт дәрва у тʹәви һәрдӧ меред әʹрәбеда хәбәр да у пе дәсте хԝә нишани сәр мә кьр. Әԝ мер бәрбь мәва һатьн у сәр чуйин-һатьна отобусе чәнд пьрс данә мә. Гава отобус һат, ԝана тʹәви ажован хәбәр да. Мә нәбьһист кӧ әԝ чь дьбежьн. Хенщи мә, тʹӧ кәсәки дьн һивийа отобусе нәсәкьнибу. Ӧса дьһатә кʹьфше кӧ әԝана дьхԝазьн жь бажер дәр, тьштәки биньн сәре мә. Ле әв йәк нәԛәԝьми. Гава әз жь отобусе пәйа бум, мьн жь ажован пьрси: «Ԝан һәрдӧ мера дьхԝәст дәрһәԛа мә тьштәки бьзаньбьн?» Әԝи гот: «Мьн ԝанрʹа гот кӧ әз заньм һун кʹи нә. Ԛәт хәм нәкьн. Әԝ ԝе тьштәки сәре ԝә нәкьн».

Сала 1976-да, әз чумә сәр щьвата мәзьн ль Дӧблине. Ԝедәре, мьн Паулина Лемакс нас кьр. Әԝ пешәнга мәхсус бу у жь Британйайе һатьбу. Әԝ хушкәкә амьн, мьлук у дьлован бу. Әԝ у бьре ԝе Рей, жь бьчʹуктийеда рʹастийеда мәзьн бьбун. Саләк шунда, әз у Паулина зәԝьщин у мә тʹәвайи хьзмәтийа хԝә ча пешәнгед мәхсус ль Ирләнда Бакӧре Балименайеда бәрдәԝам кьр.

Ԝәхтәке мә ль Белфаст, Лондондәррй у ль щийед дьнә хоф хьзмәт дькьр, у мьн ԝедәре чаԝа бәрпьрсийаре мьһале хьзмәт дькьр. Ԝедәре, баԝәрийа хушк-бьра дьле мә гәләки ԛәԝи кьр. Сәва кӧ Йаһоԝарʹа хьзмәт бькьн, ԝана һʹәбандьна ԛәлп һишт, нәфрʹәти жь дьле хԝә дәрхьстьн у фьрԛи нәдькьрьнә ортʹа мәрьва. Йаһоԝа ԝана кʹәрәм кьрьн у парастьн.

Әз ԝәкә дәһ сала ль Ирләнде мам. Паше, сала 1981-да, әм һатьн тʹәглифкьрьне Мәкʹтәба Гиләде кʹома 72. Паши мәкʹтәбе, мә Сиерра-Леонеда (Африкайа Рʹоава) кʹьфш кьрьн.

СИЕРРА-ЛЕОНЕ—ХУШК-БЬРЕД ДӘСТТНӘГ, ЛЕ АМЬН

Әм тʹәви 11 хушк-бьра мала бона мисйонерада дьжитьн. Ԝе маледа тʹәне хԝарьнгәһәк, се дәстав, дӧ һʹәмам, телефонәк, мәкʹинәйәкә кʹьнщшуштьне у мәкʹинәйәкә кʹьнщзьһакьрьне һәбун. Гәләк щар, лус ньшкева дьчу. Банида мьшкед мәзьн һәбун, у бьне маледа жи мәʹр һәбун.

Жийин чьԛас зәʹмәт бу жи, мә жь хьзмәтийе шабунәкә мәзьн дьстанд. Хәлԛе ԛәдьре Кʹьтеба Пироз дьгьрт у бь хирәт гӧһдари дькьр. Гәләк мәрьва Кʹьтеба Пироз леколин кьрьн у бунә Шәʹдед Йаһоԝа. Мәрьве ԝедәре мьнрʹа дьготьн «Роберт аха», ле Паулинайерʹа жи дьготьн «Робәрт ханьм». Паши дәмәке, шьхӧле Бәйтʹәле дьһа зедә ԝәхт жь мьн дьстанд у әз дьһа кем дьчумә хьзмәтийе. Ләма жи, хәлԛе дәстпекьрьн Паулинайерʹа бежьн «Паулина ханьм», ле мьнрʹа жи дьготьн «Паулина аха». Паулина ве йәкерʹа гәләк ша дьбу!

Гәләк хушк-бьред мә кʹәсиб бун, ле Йаһоԝа тʹьме ԝана дьбу хԝәйи, щарна бь щурʹед ӧса, кӧ әԝана гәләк әʹщебмайи дьман (Мәтта 6:33). Те бира мьн кӧ пʹәре хушкәке тʹәне тʹера хԝарьна рʹожәке дькьр, бона ԝе у зарʹед ԝе. Ле диса жи, әԝе әв һʹәму пʹәре хԝә да бьраки нәхԝәш, йе кӧ нькарьбу дәрмане маләрийа бькʹьрʹийа. Һәма ве рʹоже, жьнькәк ньшкева һатә щәм хушка мә у пʹәрә да ԝе, ԝәки хушк пʹорʹе ԝе чекә. Дәрәщед ӧса гәләк щар дьԛәԝьмин.

НИЖӘРЙА—ӘМ ҺИНИ КУЛТУРӘКӘ ТʹӘЗӘ ДЬБЬН

Әм ԝәкә нәһ сала ԝәлате Сиерра-Леонеда ман. Паше, әм шандьнә Бәйтʹәла Нижәрйайе. Әм ида Бәйтʹәләкә мәзьнда дьман. Әз диса жи офиседа дьхәбьтим у мьн һәма әв шьхӧл дькьр, чь кӧ Сиерра-Леонеда дькьр. Ле бона Паулинайе, әв йәк гӧһастьнәкә мәзьн у зәʹмәт бу. Бәре, әԝе һәр мәһ 130 сьһʹәт хьзмәт дькьр у әԝе тʹәви гәләк мәрьва һинбуна Кʹьтеба Пироз дәрбаз дькьр, йед кӧ рʹьнд пешда дьчун. Ле ньһа, әԝе ида шьхӧле дьрутьне дькьр. Жерʹа ԝәхт лазьм бу кӧ һини ви шьхӧли бә, ле һьнә ԝәхт шунда, әԝе фәʹм кьр кӧ хушк-бьред мә гәләк шьхӧле ԝе ԛимәт дькьрьн. Ӧса жи, әԝе мәщал дьгәрʹийа, ԝәки һелане бьдә хушк-бьред Бәйтʹәледа.

Култура Нижәрйайе бона мә хәриб бу у лазьм бу ԝәки әм гәләк тьшт һин бьн. Рʹожәке, бьрак һатә офиса мьн. Әԝи дьхԝәст хушкәкә кӧ тʹәзә һатьбу Бәйтʹәле, тʹәви мә бькә нас. Гава мьн дәсте хԝә дьрежи ԝе кьр, кӧ ле сьлав кьм, әԝе сәре хԝә ль бәр мьн дахьст у кʹәтә сәр чока. Әз гәләки әʹщебмайи мам! Ԝе дәме дӧ рʹез кʹәтьнә бира мьн: Кʹаред Шандийа 10:25, 26 у Әʹйанти 19:10. Мьн дьле хԝәда гот: «Гәло әз жерʹа бежьм кӧ гәрәке әԝ тьштед ӧса нәкә?» Ле мьн хԝәрʹа гот: «Һәрге ле тʹәглифи Бәйтʹәле кьрьнә, демәк әԝ занә кӧ Кʹьтеба Пироз чь дьбежә».

Паши сьлавдайине, мьн шәрм кьр кӧ жерʹа хәбәр дьм. Паше мьн дәрһәԛа ве йәке һьнә тьшт леколин кьр. Әз пеһʹәсийам кӧ хушка мә ль гора әʹрф-әʹдәтед мьһала хԝә сьлав да мьн. Мера жи бь ви щурʹәйи сьлав дьданә мәрьва, ԝана сәре хԝә дадьхьстьн у дькʹәтьн сәр чока. Бь ви щурʹәйи ԝана ԛәдьр нишан дькьр. Әв йәк нә дьһатә һʹәсабе щурʹе һʹәбандьне. Мәсәлед ӧса Кʹьтеба Пирозда жи һәнә (1 Самуйел 24:8). Әз гәләки ша бум кӧ мьн жь нәзанийа хԝә тьштәки шаш нәготә хушке у ле нәда шәрме.

Нижәрйайеда, мә гәләк хушк-бьред кӧ бь сала амьн бун, нас кьрьн. Мәсәлә, дина хԝә бьдьн сәрһатийа Исайа Адагбона.a Әԝи щаһьлтийа хԝәда рʹийа рʹастийе нас кьр, ле паше әԝ нәхԝәшийа кʹотибуне кʹәт. Ԝи шандьнә щийе кʹидәре кӧ кәсед кʹоти хԝәй дькьрьн. Ԝедәре тʹәне әԝ Шәʹде Йаһоԝа бу. Нава пәйкʹәтьнада жи әԝи али 30 мәрьва зедәтьр кьр, йед кӧ кʹоти бун, ԝәки рʹийа рʹастийе нас бькьн, у әԝи ԝедәре щьватәк саз кьр.

КӘНЙА—ХУШК-БЬРА МЬН СӘБЬР ДЬКЬРЬН

Сала 1996-да, әм шандьнә Бәйтʹәла Кәнйайе. Әв щара әʹԝльн бу, кӧ әз диса вәгәрʹийамә ԝи ԝәлате, кʹижан кӧ мьн серида бәʹса ԝи кьрьбу. Әм Бәйтʹәледа дьжитьн. Ԝедәре гәләк мәймун һәбун. Ԝан мәймуна жь хушка емиш дьдьзин. Рʹожәке, хушкәке Бәйтʹәледа пʹәнщәрә вәкьри һиштьбу. Гава әԝ һатә мале, әԝе дит кӧ кʹомәкә мәймуна хԝарьна ԝе дьхԝьн. Хушка мә кьрә ԛужини у рʹәви дәрва. Мәймун жь тьрса вәщьньԛин у пʹәнщәрерʹа банз дан.

Мьн у Паулинайе щьвата бь зьмане Сԝаһилида хьзмәт дькьр. Паши дәмәкә кьн, мьнрʹа готьн кӧ әз Леколина Кʹьтебе йа Щьвате дәрбаз кьм (иро әм дьбежьн Һинбуна Кʹьтеба Пироз Щьватеда). Ле мьн сәр зьмане ԝан баш хәбәр нәдьда. Ләма жи мьн хԝә ча лазьм ә һазьр дькьр, ԝәки бькарьбьм пьрса баш бьхуньм. Ле гава щабед һьнәка жь готьнед абзаса һәма һьнәки щӧдә бун, мьн ԛә фәʹм нәдькьр әԝ чь дьбежьн. Бь рʹасти жи, әв йәк щарна әʹщеб бу. Гӧне мьн хушк-бьра дьһат! Ԝана бь сәбьр у бь мьлукти ԛәбул дькьр, кӧ әз щьвине дәрбаз бькьм. Ве йәке гәләки дьле мьн дьгьрт.

АМЕРИКА—ХУШК-БЬРЕД АМЬН ԜӘЛАТӘКИ ДӘԜЛӘМӘНДДА

Әм ԝәкә саләке Кәнйайеда ман. Паше, сала 1997-да, мә тʹәглифи Бәйтʹәла Бруклине кьрьн. Ижар әм ԝәлатәки ӧсада дьжитьн, кӧ мәрьв хԝәйе мал у мьлкʹ бун. Һәбук жи дькарә дәрде гьран пешда бинә (Мәтʹәлок 30:8, 9). Ле ви ԝәлатида жи, хушк-бьра нишан кьрьн ԝәки баԝәрийа ԝан гәләк ԛәԝи йә. Хушк-бьред мә ԝәхт, мал у мьлкʹе хԝә, нә сәва кӧ дәԝләмәнд бьн дьданә хәбате, ле ԝәки пьштгьрийа шьхӧле тʹәшкиләта Йаһоԝа бькьн.

Нава гәләк салада, мә дит кӧ хушк-бьред мә нава щурʹә-щурʹә дәрәщада бь амьни Йаһоԝарʹа хьзмәт дькьн. Ль Ирләндайе, чьԛас зӧльм у зордари һәбу жи, мә дьдит кӧ хушк-бьред мә амьн ьн. Африкайеда, кʹәсиббун һәйә у хушк-бьра ль щийед ӧса дьжин, кʹидәре кӧ Шәʹдед Йаһоԝа тʹӧнә нә, ле диса жи әԝана амьн ьн. Америкайеда, хушк-бьра рʹьнд дьжин, ле диса жи әԝана амьн ьн. Гава Йаһоԝа жь әʹзмана дьвинә кӧ мәрьв чаԝа һʹьзкьрьна хԝә ԝирʹа нишан дькьн, әԝ гәләки ша дьбә.

Әʹмьре мьн гәләки зу дәрбаз бу (Ибо 7:6). Ньһа әм тʹәви кәсед дьн ль Ԝорԝике, Офиса Сәрәкә йа Шәʹдед Йаһоԝада, хьзмәт дькьн. Әм гәләки ша нә кӧ әм тʹәви ԝан мәрьва хьзмәт дькьн, йед кӧ бь рʹасти һәвдӧ һʹьз дькьн. Әм гәләк ша нә кӧ әм дькарьн ль гора мәщалед хԝә пьштгьрийа Пʹадше мә Иса Мәсиһ бькьн. Дәмәкә незикда, әԝе мәрьвед амьн кʹәрәм бькә (Мәтта 25:34).