Йаһоԝа Чаԝа Щаба Дӧайед Мә Дьдә?

1-2. Дьԛәԝьмә әм щара дәрһәԛа чь бәрхԝә дькʹәвьн?

ТӦ ԚӘ бәрхԝә кʹәти һәла Йаһоԝа щаба дӧайед тә дьдә йан на? Һәрге әре, тӧ тʹәне нини, чьмки гәләк хушк-бьра бона ве йәке бәрхԝә дькʹәвьн, илаһи гава дькʹәвьнә тәнгасийа. Чахе әм кӧл-дәрда дькʹьшиньн, мәрʹа чәтьн ә бьвиньн, кӧ Йаһоԝа бь рʹасти гӧһ дьдә дӧайед мә, йан на.

² Әме ньһа бьвиньн, кӧ әм чьрʹа дькарьн баԝәр бьн, ԝәки Йаһоԝа гӧһ дьдә дӧайед хьзмәткʹаред хԝә (1 Йуһʹәнна 5:15). Ӧса жи, әме дина хԝә бьдьнә ван пьрса: Чьрʹа щарна ӧса те кʹьфше, ԛәй те бежи Йаһоԝа щаба дӧайед мә надә? Гәло Йаһоԝа чаԝа щаба дӧайед мә дьдә?

ЙАҺОԜА ЩАРА ЩАБА МӘ ӦСА НАДӘ ЧА ӘМ ҺИВИЙЕ НӘ

3. Йаһоԝа чьрʹа дьхԝазә кӧ әм ԝирʹа дӧа бькьн?

³ Кʹьтеба Пироз дьбежә, кӧ Йаһоԝа жь дьл мә һʹьз дькә у әм бәр чʹәʹве ԝи гәләк ԛимәт ьн (Һагай 2:7; 1 Йуһʹәнна 4:10). Ләма жи, әԝ дьле мә ԛәԝи дькә, кӧ әм бь сайа дӧа аликʹарийе жь ԝи бьхԝазьн (1 Пәтрус 5:6, 7). Әԝ дьхԝазә, кӧ әм незики ԝи бьн у һьмбәри чәтьнайа сәр кʹәвьн.

4. Әм жь кʹӧ заньн ԝәки Йаһоԝа щаба дӧайед хьзмәткʹаред хԝә дьдә? (Бьньһерʹә ӧса жи шькьл.)

⁴ Кʹьтеба Пирозда те готьне, ԝәки Йаһоԝа гәләк щар щаба дӧайед хьзмәткʹаред хԝә дабу. Ԝәрә әм дина хԝә бьдьнә мәсәла Даԝьд Пʹадша. Тʹәмамийа әʹмьре ԝи, дьжмьнед ԝи һәбун, у әԝи гәләк щар аликʹари жь Йаһоԝа дьхԝәст. Щарәке, әԝи жь дьл гот: «Йа Хӧдан, дӧайе мьн бьбьһе! Гӧһ бьдә һеԝарза мьн, бь һәԛи у амьнийа Хԝә щаба мьн бьдә!» (Зәбур 143:1). Йаһоԝа дӧайе Даԝьд бьһист у ԝи хьлаз кьр (1 Самуйел 19:10, 18-20; 2 Самуйел 5:17-25). Даԝьд бь баԝәрийа ԛәԝи гот: «Хӧдан незики ԝан һʹәмуйа йә, кʹижан кӧ гази Ԝи дькьн». Әм жи дькарьн ве йәкеда баԝәр бьн (Зәбур 145:18).

5. Гәло бәре Йаһоԝа тʹьме ль гора хԝәстьна хьзмәткʹаред хԝә щаба дӧайед ԝан дьда? Мәсәләке бинә. (Бьньһерʹә ӧса жи шькьл.)

⁵ Йаһоԝа щара ӧса щаба дӧайед мә надә чаԝа кӧ әм дьхԝазьн. Ԝәрә әм дина хԝә бьдьнә мәсәла Паԝлосе шанди. Әԝи жь Хԝәде рʹәща дькьр, ԝәки әԝ жь стьруйа кӧ бәдәна ԝида бу, ле хьлаз кә. Паԝлосе шанди се щара һәма дәрһәԛа ви дәрде хԝә дӧа кьр. Гәло Йаһоԝа щаба дӧайед ԝи да? Әре, ле нә ӧса чаԝа кӧ Паԝлос һивийе бу. Дәԝса кӧ жь ви дәрди ле хьлаз кә, Йаһоԝа ԛәԝат да ԝи, ԝәки әԝ бькарьбә тʹьме бь амьни ԝирʹа хьзмәт кә (2 Корьнтʹи 12:7-10).

6. Щара чьрʹа ӧса те кʹьфше, ԛәй те бежи Йаһоԝа щаба дӧайед мә надә?

⁶ Щара дьбәкә әм жи щаба дӧайед хԝә ӧса нәстиньн, чаԝа кӧ әм дьхԝазьн. Ле әм дькарьн баԝәр бьн, ԝәки Йаһоԝа рʹьнд занә, кӧ ча бь щурʹе лапи баш али мә бькә. Әԝ «дькарә һәр тьшти һе зедә кә, нә чаԝа әм дьхԝазьн йан дьфькьрьн» (Әфәси 3:20). Ләма жи, әԝ дькарә нә кӧ чаԝа әм дьхԝазьн у дьфькьрьн, ле щурʹәки майин щаба мә бьдә.

7. Чьрʹа гәрәке әм щара щурʹе дӧайед хԝә бьгӧһезьн? Мәсәләке бинә.

⁷ Гава әм зәлал фәʹм бькьн, кӧ хԝәстьна Йаһоԝа чь йә, әме ида ль гора хԝәстьна ԝи дӧа бькьн. Ԝәрә әм дина хԝә бьдьнә мәсәла бьре мә Мартин Пойтзингер. Һьнә ԝәхт шунда паши зәԝаще, әԝ кʹәтә гьртигәһа Натсиста. Серида әԝи жь Йаһоԝа рʹәща дькьр, кӧ әԝ жь гьртигәһе дәркʹәвә, ԝәки жьна хԝә хԝәй кә у мьзгинийе бәла кә. Ле паши дӧ һʹәфтийа, әԝи ԛә нишанәк жи нәдит, кӧ Йаһоԝа ԝе жь гьртигәһе ԝи дәрхә. Ләма жи әԝи дәстпекьр ӧса дӧа бькә: «Йаһоԝа лава дькьм, нишани мьн кә ԝәки тӧ дьхԝази әз чь бькьм». Паше, әԝи дина хԝә дьда һʹале бьред дьн, йед гьртигәһеда. Гәләк жь ԝан бона малбәтед хԝә бәрхԝә дькʹәтьн. Паше бьре Пойтзингер дәстпекьр ӧса дӧа бькә: «Йаһоԝа шькьр жь тәрʹа бона ве щабдарийа тʹәзә. Али мьн бькә, ԝәки әз дьле бьред хԝә ԛәԝи кьм у һелане бьдьмә ԝан». Әԝи гьртигәһеда нәһ сала хут әв йәк дькьр!

8. Чахе әм дӧа дькьн, гәрәке әм чь бир нәкьн?

⁸ Гәрәке әм бир нәкьн, ԝәки Йаһоԝа ԝе нета хԝә ԝәхтда бинә сери. Нета ԝи әв ә, кӧ һʹәму проблема бьдә һьлдане, жь бо чь жи әм кӧл-дәрда дькʹьшиньн, мәсәлә тʹәшԛәлед тʹәбийәте, нәхԝәши у мьрьне. Йаһоԝа ԝе нета хԝә бь сайа Пʹадшатийа хԝә бинә сери (Данийел 2:44; Әʹйанти 21:3, 4). Ле һʹәта һьнге, Йаһоԝа дьһелә кӧ Мире-щьна сәрԝертийа ве дьнйайе бькәb (Йуһʹәнна 12:31; Әʹйанти 12:9). Һәрге Йаһоԝа проблемед дьнйайе ньһа бьдә һьлдане, ԝе ӧса бе кʹьфше, кӧ бьн сәрԝертийа Мире-щьнада һәр тьшт баш ә. Рʹаст ә, әм һивийе нә кӧ созед Йаһоԝа Хԝәде бенә сери, ле әԝ мә бе аликʹари наһелә. Ньһа әме бьвиньн кӧ Йаһоԝа чаԝа те һәԝара мә.

ЧАԜА ЙАҺОԜА ЩАБА ДӦАЙЕД МӘ ДЬДӘ

9. Йаһоԝа чаԝа дькарә али мә бькә, ԝәки әм сафикьрьнед баш бькьн? Мәсәләке бинә.

⁹ Әԝ биланийе дьдә мә. Йаһоԝа соз дьдә, кӧ әԝе биланийа хԝә бьдә мә, ԝәки әм сафикьрьнед баш бькьн. Биланийа Хԝәде мәрʹа лазьм ә, илаһи бона сафикьрьнед кӧ сәр тʹәмамийа жийина мә һʹӧкӧм дькьн, мәсәлә гава әм дьфькьрьн бьзәԝьщьн йан на (Аԛуб 1:5). Ԝәрә әм дина хԝә бьдьнә мәсәла хушка мә Марийа.c Әԝе бь шабун ча пешәнга һәртʹьм хьзмәт дькьр. Ле рʹожәке, әԝ тʹәви бьраки бу нас. Әԝ дьбежә: «Чьԛас һәвалтийа мә ԛәԝи дьбу, һаԛас мә һәвдӧ һʹьз дькьр. Мьн заньбу, кӧ әз гәрәке сафикьрьнәке бькьм. Ләма жи мьн бона ве йәке гәләк дӧа дькьр. Әз һʹәԝще рʹебәрийа Йаһоԝа бум, ле мьн заньбу ԝәки Йаһоԝа ԝе дәԝса мьн сафи нәкә». Марийайе жь Йаһоԝа билани дьхԝәст, у әԝе тедәрдьхьст, ԝәки Йаһоԝа дәнге ԝе дьбьһе. Гәло чаԝа? Чахе әԝе әʹдәбйәтед мә леколин дькьр, әԝе готаред баш бона пьрсед хԝә дьдит. Ӧса жи, ширәта дайика ԝе али ԝе кьр, кӧ әԝ дәрһәԛа һәстед хԝә кʹур бьфькьрә. Ахьрийеда әԝе сафикьрьнәкә баш кьр.

10. Ль гора Филипи 4:13, Йаһоԝа чаԝа али хьзмәткʹаред хԝә дькә? Мәсәләке бинә. (Бьньһерʹә ӧса жи шькьл.)

¹⁰ Хԝәде ԛәԝате дьдә мә, ԝәки әм сәбьр кьн. Чаԝа кӧ Йаһоԝа ԛәԝат дабу Паԝлосе шанди, Әԝе ԛәԝате бьдә мә жи, ԝәки әм һьмбәри тәнгасийед хԝә сәбьр кьн (Бьхунә Филипи 4:13). Ԝәрә әм дина хԝә бьдьне, кӧ Йаһоԝа чаԝа али бьраки бь наве Бенжамен кьрийә. Щаһьлтийа хԝәда, Бенжамен у малбәта ԝи гәләк сала Африкайеда, зома рʹәвийада дьман. Бенжамен дьбежә: «Мьн тʹьме Йаһоԝарʹа дӧа дькьр у жь ԝи лава дькьр, кӧ ԛәԝате бьдә мьн, ԝәки әз бькарьбьм дьле ԝи ша кьм. Йаһоԝа һʹьш у дьле мьн рʹьһʹәт дькьр, ԛәԝат дьда мьн, ԝәки әз бәрдәԝам кьм мьзгинийе бәла кьм, у Әԝи бь сайа әʹдәбйәта али мьн дькьр кӧ әз баԝәрийеда ԛәԝи бьминьм». Ӧса жи, әԝ дьбежә: «Мьн жь хԝәндьна сәрһатийед хушк у бьра фәʹм дькьр, кӧ Йаһоԝа чаԝа ԛәԝат дьда ԝан, ԝәки әԝана сәбьр кьн. Әве йәке дьле мьн ԛәԝи дькьр, кӧ әз Хԝәдерʹа амьн бьминьм».

11-12. Йаһоԝа чаԝа дькарә бь сайа хушк-бьра щаба дӧайед мә бьдә? (Бьньһерʹә ӧса жи шькьл.)

¹¹ Хԝәде бь сайа хушк-бьра али мә дькә. Шәва пешийа мьрьна хԝә, Иса жь дьл Йаһоԝарʹа дӧа кьр. Әԝи жь Йаһоԝа лава дькьр, ԝәки әԝ бәр чʹәʹве мәрьва ча йәки кӧ кʹьфьрийа дькә нәйе һʹәсабе. Дәԝса ве йәке Йаһоԝа бьраки ԝи, демәк мәләкәк шанд, кӧ дьле Иса ԛәԝи кә (Луԛа 22:42, 43). Иро жи Йаһоԝа дькарә бь сайа хушк-бьра, мәсәлә йед кӧ мәрʹа тʹеле дьхьн йан жи сәрики мә дьхьн, али мә бькә. Әм гьшк дькарьн мәщала бьгәрʹьн кӧ һәвдӧ бь «готьнәкә ԛәнщ» ԛәԝи кьн (Мәтʹәлок 12:25).

¹² Ԝәрә әм дина хԝә бьдьнә сәрһатийа хушка мә Мириаме. Паши мьрьна мере хԝә, әԝ чәнд һʹәфтийа малда тʹәне бу. Әԝ хәмгин бу у дьле ԝе гәләк дешийа. Әԝ тʹьме дьгьрийа у лазьм бу, кӧ әԝ дьле хԝә кәсәкирʹа вәкә. Әԝ дьбежә: «Ԛәԝата мьн тʹӧнәбу, ԝәки кәсәкирʹа тʹеле хьм, ләма жи мьн бь һесьра Йаһоԝарʹа дӧа кьр. Мьн һәла һе дӧайе хԝә хьлаз нәкьрьбу, кәсәки мьнрʹа тʹеле хьст. Әԝ рʹуспи бу, һәваләки дәлал». Әԝ тʹәви жьна хԝә бәр дьле Мириамеда һатьн. Мириам баԝәр бу, ԝәки Йаһоԝа ԝи бьрайи һелан кьр, кӧ жерʹа тʹеле хә.

13. Йаһоԝа чаԝа дькарә бь сайа кәсед дьн щаба дӧайед мә бьдә? Мәсәләке бинә.

¹³ Хԝәде дькарә бь сайа кәсед нәбаԝәр жи али мә бькә (Мәтʹәлок 21:1). Щара Йаһоԝа бь сайа ԝан мәрьва жи, кӧ ԝирʹа хьзмәт накьн, али хьзмәткʹаред хԝә дькә. Мәсәлә, сәва кӧ Нәһәмийа вәгәрʹә Оршәлиме у бажер тʹәзәда ава кә, Йаһоԝа дьле Артаһшашт Пʹадша нәрм кьр, ԝәки әԝ Нәһәмийа бәрдә (Нәһәмийа 2:3-6). Иро жи, Йаһоԝа дькарә бь сайа кәсен, кӧ хьзмәткʹаред ԝи ниньн, али мә бькә.

14. Сәрһатийа хушка мә Су Һинг чаԝа дьле тә ԛәԝи кьр? (Бьньһерʹә ӧса жи шькьл.)

¹⁴ Хушкәкә бь наве Су Һинг баԝәр ә, кӧ Йаһоԝа бь сайа дохдьрәки али ԝе кьрийә. Кӧрʹе ԝе жь нәхԝәшийа психоложи гәләк еш дькʹьшанд. Паши ԛәзикә гьран, әԝе тʹәви мере хԝә хәбата хԝә һиштьн кӧ бона ԝи хәм бькьн. Ахьрийеда һʹале ԝан алийе материйалида хьраб бу. Хушка мә гот, кӧ дәрде ԝе һаԛас гьран бу, ԝәки әԝе ида нькарьбу сәбьр кьра. Әԝе Йаһоԝарʹа дӧа кьр, дьле хԝә ԝирʹа вәкьр у аликʹари хԝәст. Дохдьре кӧрʹе ԝе гот, кӧ ԝе илащәки бона ԝан бькә. Бь аликʹарийа ԝи, ԝана жь дәԝләте аликʹари станд у хԝәрʹа маләкә әрзан дитьн. Паше хушка мә гот: «Мә дит кӧ дәсте Йаһоԝа Хԝәде сәр мә йә. Әԝ бь рʹасти дӧайед мә дьбьһе» (Зәбур 65:2).

БОНА ДИТЬН У ԚӘБУЛКЬРЬНА ЩАБА ЙАҺОԜА, БАԜӘРИ ЛАЗЬМ Ә

15. Хушкәке чаԝа фәʹм кьр, ԝәки Йаһоԝа щаба дӧайед ԝе дьда?

¹⁵ Йаһоԝа һʹәчʹи зәʹф әшкәрә щаба дӧайед мә надә. Ле щабед кӧ әм дьстиньн али мә дькьн, ԝәки әм Баве хԝәйи әʹзманарʹа амьн бьминьн. Ләма жи дина хԝә бьде, кӧ Йаһоԝа чаԝа щаба дӧайед тә дьдә. Хушкәкә бь наве Йоко дьфькьри, кӧ Йаһоԝа щаба дӧайед ԝе надә. Ле паше, әԝе дәстпекьр һәр тьшти хԝәрʹа бьньвисә, чь кӧ жь Йаһоԝа лава дькьр. Ԝәхт шунда, гава әԝе ньвисара хԝә ньһерʹи, әԝе фәʹм кьр, ԝәки Йаһоԝа щаба гәләк дӧайед ԝе дабу, һәла һе щаба ван дӧа жи, йед кӧ әԝе ида бир кьрьбу. Щара әм гәрәке бьфькьрьн, кӧ Йаһоԝа чаԝа щаба дӧайед мә дайә (Зәбур 66:19, 20).

16. Чахе әм дӧа дькьн, әм ча дькарьн баԝәрийа хԝә бьдьнә кʹьфше? (Ибрани 11:6)

¹⁶ Гәло әм чаԝа дькарьн баԝәрийа хԝә бьдьнә кʹьфше? Гәрәке әм Йаһоԝарʹа дӧа бькьн у паше щаба дӧайед мә чь щурʹә жи бе дайине, ԝе йәке бь дьл у щан ԛәбул кьн (Бьхунә Ибрани 11:6). Ԝәрә әм дина хԝә бьдьнә мәсәла бьре мә Майк у жьна ԝи Криси. Нета ԝан әԝ бу, ԝәки Бәйтʹәледа хьзмәт бькьн. Майк дьбежә: «Мә гәләк сала бланка бона хьзмәткьрьна Бәйтʹәледа тʹьжә дькьр у тʹьме бона ве йәке дӧа дькьр, ле әм нәһатьнә тʹәглифкьрьне». Майк у Криси баԝәр бун, ԝәки Йаһоԝа дьһа баш занә, кӧ чаԝа ԝана бь щурʹе лапи баш хьзмәтийеда бьдә хәбате. Чь жь дәсте ԝан дьһат ԝана дькьр. Ԝана ча пешәнгед һәртʹьм, щийед кӧ аликʹари лазьм бу, хьзмәт дькьрьн, у ԝана пьштгьрийа проектед авакьрьне дькьр. Рʹожа иройин, әԝ ча бәрпьрсийаре рʹеви хьзмәт дькә. Майк дьбежә: «Йаһоԝа щара нә ль гора хԝәстьна дьле мә, ле бь щурʹе дьһа баш щаба дӧайед мә дьдә».

17-18. Ль гора Зәбур 86:6, 7, әм дькарьн баԝәрийа хԝә чь биньн?

¹⁷ Бьхунә Зәбур 86:6, 7. Даԝьд Пʹадша баԝәр дькьр, ԝәки Йаһоԝа дӧайед ԝи һьм дьбьһе һьм жи щаба ԝи дьдә. Тӧ жи дькари ве йәкеда баԝәр би. Мәсәлед ве готареда нишан дькьн, кӧ Йаһоԝа дькарә билани у ԛәԝате бьдә мә, ԝәки әм сәбьр кьн. Дьбәкә әԝ бь сайа хушк-бьра, йан жи бь сайа кәсед нә баԝәрмәнд, али мә бькә.

¹⁸ Әм заньн ԝәки Йаһоԝа щаба дӧайед мә дьдә, ле щара нә ӧса чаԝа кӧ әм дьхԝазьн. Тьштед кӧ мәрʹа лазьм ьн, әԝ ԝәхта рʹастда дьдә мә. Ләма жи, һәр гав дӧа бькә у баԝәр бә, кӧ Йаһоԝа дәнге тә дьбьһе. Тӧ дькари баԝәр би, ԝәки Йаһоԝа ԝе тә бьбә хԝәйи у дьнйа тʹәзәда «хԝәстьнед дьле тә бьдә тә» (Зәбур 37:4).