Ԝә Заньбу?

Кʹәлпичʹ у методед чекьрьна кʹәлпичʹа, кӧ нава кәвьр-кӧчʹькед Бабилонеда һатьнә дитьне, чаԝа избат дькьн кӧ Кʹьтеба Пироз рʹаст ә?

АРХЕОЛОЖА Бабилона кәвьнда гәләк кʹәлпичʹед кӧ бажар пе һатьбу авакьрьне дитьн. Ль гора леколина археоложәки бь наве Роберт Колдԝей, кʹәлпичʹед ӧса фьрʹнада «жь бажер дәр, щийе кӧ һʹәрʹийа сор йа баш һәбу . . . ӧса жи бахед бьчʹук бона шәԝьтандьне һәбун», дьһатьнә чекьрьне.

Жь ньвисаред бәре те кʹьфше, ԝәки сәрԝеред Бабилонийа фьрʹна бона нетед хьраб жи дьданә хәбате. Пол-Алан Болйу, йе кӧ занингәһа Торонтойеда професоре Асуриоложийе йә, дьбежә: «Чәнд канийед Бабилонийада . . . те готьне кӧ бь фәрмана Пʹадша, әв мәрьвед кӧ гӧрʹа пʹадше нә дькьрьн у ԛәдьр һьндава тьштед пироз нәдьданә кʹьфше, давитьнә фьрʹна агьр». Ньвисарәк йа һена Нәбукәднәсәр Пʹадша ӧса дьбежә: «Ԝана ԛьрʹ кьн, ԝана бьшәԝьтиньн, ԝана бьԛәлиньн . . . тәндуреда . . . бьра думана ԝан бьльнд бә, бь алаԝа агьр ԝана бькӧжьн».

Әв гьли мина гьлийед жь кʹьтеба Данийел сәре сьсийа йә. Ви сәрида һатийә ньвисаре, ԝәки Нәбукәднәсәр Пʹадша дәшта Дурайеда, жь бажаре Бабилоне дәр һʹәйкәләки зерʹин данибу. Гава се хортед Ибрани йед бь наве Шәдрак, Мәшак у Абәднәго инкʹар кьрьн кӧ сәре хԝә бәр һʹәйкәл дайньн, Нәбукәднәсәр гәләки сәр ԝана һерс кʹәт. Әԝи фәрман да, ԝәки фьрʹнә һʹәфт щара зедәтьр гӧрʹ кьн у ԝан се хорта бавежьнә фьрʹьна агьр, ле мәләке Хԝәде әԝ жь мьрьне хьлазкьрьн (Данийел 3:1-6, 19-28).

Кʹәлпичʹәк кӧ наве Нәбукәднәсәр сәр һатийә ньвисаре

Кʹәлпичʹед кӧ Бабилонеда һатьнә дитьне, нишан дькьн кӧ Кʹьтеба Пироз рʹаст ә. Сәр гәләк кʹәлпичʹа ӧса жи һәбун ньвисар, кʹидәре кӧ пʹадша дьһатә рʹумәткьрьне. Мәсәлә, ньвисарәк ӧса дьбежә: «Пʹадше Бабилоне Нәбукәднәсәр . . . Мьн, Пʹадше Гьринг әв ԛәсьр ава кьр . . . Бьра зӧрʹәта мьн һʹәта-һʹәтайе сәрԝертийе бькә». Әв гьли мина гьлийед жь кʹьтеба Данийел ьн. Ль ԝьр, Нәбукәднәсәр ӧса дьбежә: «Ва йә Бабил! Әԝ Бабила кӧ мьн жь бо рʹумәт у бәрзийа хԝә, бь һеза хԝә йа мәзьн жь бо пʹайтʹәхта пʹадшатийа хԝә ава кьр!» (Данийел 4:30, ИМ).