Мина Садок Мерхас бә

1-2. Садок кʹе бу? (1 Дирок 12:22, 26-28)

БЬДӘ бәр чʹәʹве хԝә, кӧ зедәтьри 340 000 мер тʹәвайи тʹоп бьбун, сәва кӧ Даԝьд сәр тʹәмамийа мьләте Исраеле бькьнә пʹадша. Жь чʹийайед незики Һәброне, се рʹож дәнге хәбәрдан, шабуне у стьранед пәсьндайине дьһат (1 Дирок 12:39). Нава ван мәрьвада, хортәки бь наве Садок һәбу. Һәрге әм ԝедәре буна, нава һаԛас мәрьвада дьбәкә мә Садок нәдита. Ле Йаһоԝа әԝ дьдит у хԝәст ԝәки әм жи бьзаньбьн, кӧ Садок ԝедәре бу (Бьхунә 1 Дирок 12:22, 26-28). Гәло Садок кʹе бу?

² Садок кʹаһин бу у тʹәви Кʹаһине Мәзьн Абийатʹар, һәвкʹари дькьр. Садок ӧса жи мерәки билан бу у фәʹм дькьр кӧ ԛьрара Хԝәде чь йә (2 Самуйел 15:27). Мәрьв дьчунә бал ԝи, ԝәки ширәтед билан бьстиньн. Ве готареда әме пебьһʹәсьн, кӧ ча Садок мерхаси дьда кʹьфше.

3. (а) Чьрʹа хьзмәткʹаред Йаһоԝа гәрәке мерхас бьн? (б) Ве готареда әме чь шеԝьр кьн?

³ Ԝан рʹожед ахьрийеда, чьԛас дьчә һаԛас Мире-щьна һе зедә һʹьщуми сәр хьзмәткʹаред Хԝәде дькә (1 Пәтрус 5:8). Һʹәта кӧ Йаһоԝа Мире-щьна у ве система хьраб кʹӧта кә, мәрʹа мерхаси лазьм ә (Зәбур 31:24). Ԝәрә әм дина хԝә бьдьнә се дәрәща, кӧ чьда әм дькарьн чʹәʹв бьдьнә мерхасийа Садок.

ПЬШТГЬРИЙА ПʹАДШАТИЙА ХԜӘДЕ БЬКӘ

4. Чьрʹа хьзмәткʹаред Йаһоԝарʹа мерхаси лазьм ә, ԝәки пьштгьрийа Пʹадшатийа Хԝәде бькьн? (Бьньһерʹә ӧса жи шькьл.)

⁴ Чаԝа хьзмәткʹаред Йаһоԝа, әм бь дьл у щан пьштгьрийа Пʹадшатийа ԝи дькьн. Ле сәва ве йәке мәрʹа мерхаси лазьм ә (Мәтта 6:33). Мәсәлә, ве дьнйа хьрабда мәрʹа мерхаси лазьм ә, ԝәки әм ль гора ԛанунед Йаһоԝа бьжин у мьзгинийа Пʹадшатийа Хԝәде бәла кьн (1 Тʹесалоники 2:2). Ӧса жи мәрʹа мерхаси лазьм ә, сәва кӧ әм пьрсед политикида тʹәвнәбуйине хԝәй кьн (Йуһʹәнна 18:36). Гәләк Шәʹдед Йаһоԝа, щарна алийе материалида зьраре дьстиньн у рʹасти зӧльм у зордарийе тен. У ԝана дькьнә кәле, чьмки әԝана накʹәвьнә нава шьхӧлед политики у начьнә әскәрийе.

5. Садокрʹа чьрʹа мерхаси лазьм бу, ԝәки пьштгьрийа Даԝьд бькә?

⁵ Гава Садок чу Һәброне, нета ԝи нә тʹәне әв бу, кӧ пʹадшатийа Даԝьд бьмбарәк кә. Әԝи чʹәкед хԝә тʹәви хԝә бьр у һазьр бу тʹәви Даԝьд бьминә у шәрʹ бькә, сәва кӧ мьләте Исраеле жь дьжмьна хԝәй кә (1 Дирок 12:38). Дьԛәԝьмә Садок әскәрәки щерʹьбанди нибу, ле әԝ мерәки гәләк мерхас бу.

6. Даԝьд чь мәсәлә Садокрʹа һишт? (Зәбур 138:3)

⁶ Чь али Садок дькьр, ԝәки мерхас бә? Дәр-дора ԝи меред ԛәԝи у мерхас һәбун, у бе шьк әԝи жь мәсәла ԝан дәрс дьстанд. Мәсәлә, Даԝьд бь мерхаси рʹебәрийа мьләте Исраеле дькьр, у ләма жи тʹәмамийа мьләт һазьр бу бь дьл у щан али ԝи бькә (1 Дирок 11:1, 2). Даԝьд тʹьме баԝәр бу, кӧ Йаһоԝа ԝе али ԝи бькә, ԝәки әԝ дьжмьна алт кә (Зәбур 28:7; бьхунә Зәбур 138:3). Ӧса жи Садок мерхасийа мәрьвед ӧса дьдит ча Йәһойада, кӧрʹе ԝи Бәнайа у 22 сәрокед әʹшира, йед кӧ пьштгьрийа Даԝьд дькьрьн (1 Дирок 11:22-25; 12:26-28). Нета ԝан һʹәмуйа әв бу, кӧ Даԝьд бькьнә пʹадша.

7. (а) Иро әм дькарьн чʹәʹв бьдьнә мәсәла мерхасийа кʹе? (б) Әм жь мәсәла бьре Насайилу, дәрһәԛа кʹижани видеойеда те готьне, чь һин дьбьн?

⁷ Гава әм сәрһатийед ԝан мәрьва дьхуньн, йед кӧ бь мерхаси пьштгьрийа сәрԝертийа Йаһоԝа дькьрьн, ԛәԝат у мерхасийа мә жи зедә дьбә. Мәсәлә, гава Пʹадше мә Иса Мәсиһ сәр әʹрде бу, әԝи инкʹар дькьр бькʹәвә нава шьхӧлед политики йа система Мире-щьна (Мәтта 4:8-11; Йуһʹәнна 6:14, 15). Әԝи тʹьме жь Йаһоԝа ԛәԝат у мерхаси дьхԝәст, ԝәки чь кӧ рʹаст ә, ве йәке бькә. Иро жи гәләк бьред мәйи щаһьл бь мерхаси инкʹар дькьн һәрʹьнә әскәрийе, йан жи тʹәви шьхӧлед политики бьн. Сәр jw.orga тӧ дькари һьнә сәрһатийед ван бьра бьхуни.

АЛИ ХУШК-БЬРА БЬКЬН

8. Кʹәнге рʹуспийарʹа мерхаси лазьм ә, кӧ аликʹарийе бьдьнә хушк у бьра?

⁸ Хьзмәткʹаред Йаһоԝа һазьр ьн али һәв бькьн (2 Корьнтʹи 8:4). Ле щарна бона ве йәке ԝанрʹа мерхаси лазьм ә. Мәсәлә, гава шәрʹ дәстпедьбә, рʹуспи фәʹм дькьн кӧ хушк-бьра һʹәԝще һелане у аликʹарийе нә. Ӧса жи дьбәкә ԝанрʹа аликʹарийа материали у рʹӧһʹани лазьм бә. Рʹуспи гәләки хушк-бьра һʹәз дькьн, ләма жи әԝана һәла һе әʹмьре хԝә жи дькьнә бьн хофе, сәва кӧ аликʹарийе бьдьнә ԝан (Йуһʹәнна 15:12, 13). Бь ве йәке рʹуспи чʹәʹв дьдьнә мерхасийа Садок.

9. Ль гора 2 Самуйел 15:27-29, Даԝьд чь щабдари да Садок? (Бьньһерʹә ӧса жи шькьл.)

⁹ Щарәке әʹмьре Даԝьд Пʹадша кʹәтә бьн ԛәзийе. Кӧрʹе ԝи Абшалом изьн да хԝә, ԝәки тʹәхте пʹадшатийе жь ԝи бьстинә (2 Самуйел 15:12, 13). Ләма жи Даԝьд гәрәке жь Оршәлиме бьрʹәвийа! У әԝи хӧламе хԝәрʹа гот: «Дә әм рʹабьн у бьрʹәвьн! йан на әме жь дәсте Абшалом хьлаз нәбьн» (2 Самуйел 15:14, ИМ). Ле гава әԝана дьчун, Даԝьд готә Садок у һьнә кʹаһинед дьн, кӧ әԝана Оршәлимеда бьминьн, ԝәки дәрһәԛа нетед Абшалом әʹлами ԝи кьн (Бьхунә 2 Самуйел 15:27-29). Лазьм бу кӧ әԝана гәләк фәсал бьн, чьмки щабдарийа ԝан гәләк хоф бу. Һәла бьдә бәр чʹәʹве хԝә, кӧ һәрге Абшалом, йе кӧ мәрьвәки хԝәһʹәз у зӧльм бу, фәʹм бькьра кӧ әԝана бона кʹара Даԝьд щәсусийе дькьн, ԝе чь бьанийа сәре Садок у кʹаһинед дьн!

10. Садок у һәвалед ԝи ча әʹмьре Даԝьд хԝәй кьрьн?

¹⁰ Даԝьд готә Садок у достәки хԝәйи дьн, бь наве Һуша, кӧ әԝана пьштгьрийа планәкә ԝи бькьн (2 Самуйел 15:32-37). Һуша ль гора плана Даԝьд һәрәкʹәт кьр у ӧса кьр, ԝәки Абшалом итʹбарийа хԝә ԝи бинә, у готә Абшалом кӧ чь щурʹәйи әԝ дькарә һʹьщуми сәр Даԝьд кә. Бь сайа ве плане мәщал Даԝьдрʹа вәдьбу, ԝәки хԝә бона һʹьщумкьрьне һазьр кә. Паше Һуша дәрһәԛа ве плане готә Садок у Абийатʹар (2 Самуйел 17:8-16). У ԝана әв йәк әʹлами Даԝьд кьрьн (2 Самуйел 17:17). Бь аликʹарийа Йаһоԝа, Садок у кʹаһинед дьн әʹмьре Даԝьд хԝәйи кьрьн (2 Самуйел 17:21, 22).

11. Гава әм али хушк-бьра дькьн, әм ча дькарьн чʹәʹв бьдьнә мерхасийа Садок?

¹¹ Һәрге ԝәʹде хофда лазьм бә, ԝәки тӧ али хушк-бьра бьки, гәло тӧ ча дькари мина Садок мерхас би? (1) Гӧһ бьдә рʹебәрийе. Гәләк фәрз ә кӧ әм ԝәʹде ӧса йәктийа хԝә хԝәй кьн. Ләма жи, ль гора рʹебәрийа филиала мьһала хԝә һәрәкʹәт бькә (Ибрани 13:17). Мәсәлә, рʹуспи гәрәке тʹьме дина хԝә бьдьнә ван рʹебәрийа, йед кӧ әԝана бона тʹәшԛәлед тʹәбийәте жь филиале дьстиньн (1 Корьнтʹи 14:33, 40). (2) Мерхас бә, ле һаш жь хԝә һәбә (Мәтʹәлок 22:3). Пешийа кӧ тьштәки бьки, рʹьнд бьфькьрә у чьԛас дькари фәсал бә. (3) Хԝә бьсперә Йаһоԝа. Бир нәкә кӧ Йаһоԝа бона тә у хушк-бьра хәм дькә. Әԝ дькарә али тә бькә, ԝәки тӧ бькарьби ӧса али хушк-бьра бьки, кӧ зийане нәди хԝә.

12-13. Тӧ жь сәрһатийа Виктор у Витали чь һин дьби? (Бьньһерʹә ӧса жи шькьл.)

¹² Ԝәрә әм дина хԝә бьдьне, кӧ чаԝа дӧ бьред мә ав у хԝарьн дьгиһандьнә хушк-бьред ль Украинайе. Виктор дьбежә: «Мә һәр дәра хԝарьн дьгәрʹийа. Гәләк щар дәнге гӧләкьрьне дьһатә мә. Бьраки жь дькʹана хԝә гәләк хԝарьн пʹешкʹеши мә кьр. Әв хԝарьн тʹера гәләк хушк-бьра кьр, ԝәки ԝәхтәке әʹбура хԝә бькьн. Гава мә әв хԝарьн әʹрәба хԝәда щи дькьр, рʹакетәк ԝәкә 20 метри дури мә кʹәт. Ԝе рʹоже, мьн чәнд щара жь Йаһоԝа лава дькьр, ԝәки мерхасийе бьдә мьн, кӧ әз бькарьбьм аликʹарийе бьдьмә хушк-бьра».

¹³ Витали дьбежә: «Мәрʹа гәләк мерхаси лазьм бу. Щара пешьн рʹийа мьн 12 сьһʹәт кʹьшанд. Тʹәмамийа рʹе мьн Йаһоԝарʹа дӧа дькьр». Рʹаст ә Витали мерхас бу, ле әԝ ӧса жи фәсал бу. Әԝ дьбежә: «Мьн жь Йаһоԝа рʹәща дькьр биланийе бьдә мьн у али мьн бькә мьлук бьминьм. Мьн сәр рʹийед кӧ дәԝләте изьн дабу, әʹрәбә дажот. Һәвкʹарийа ортʹа хушк-бьрада баԝәрийа мьн дьһа ԛәԝи дькьр. Ԝана бона мә кʹучʹә тʹәмьз дькьрьн, ԝәки әм бькарьбьн бь әʹрәбе дәрбаз бьн, у бона мә хԝарьн, кʹьнщ у тьштед дьн тʹоп дькьрьн у щи дьданә мә, кӧ паши рʹийа дьреж әм сәре хԝә дайньн».

ЙАҺОԜАРʹА АМЬН БЬМИНӘ

14. Гава мәрьвәки мәйи һʹәзкьри жь рʹастийе дәрте, әв йәк ча дькарә сәр мә һʹӧкӧм кә?

¹⁴ Гава дост йан мәрьвәки мә жь рʹастийе дәрте, әм гәләк хәмгин дьбьн (Зәбур 78:40; Мәтʹәлок 24:10). Чьԛас һәләԛәтийа мә тʹәви ԝи мәрьви незик ә, һаԛас мәрʹа чәтьн ә ве дәрәще ԛәбул кьн. Гава тьштәки ӧса те сәре мә, әм дькарьн чʹәʹв бьдьнә амьнийа Садок.

15. Садокрʹа чьрʹа мерхаси лазьм бу, кӧ Йаһо­ԝарʹа амьн бьминә? (1 Пʹадшати 1:5-8)

¹⁵ Незики хьлазийа сәрԝертийа Даԝьд, гава әԝ ида бәр мьрьне бу, кӧрʹе ԝи Адонийа хԝәст тʹәхте пʹадшатийе зәфти хԝә кә. Ле Йаһоԝа соз дабу, кӧ Сьлеман ԝе бьбә пʹадша (1 Дирок 22:9, 10). Сәд һʹәйф, кӧ Абийатʹар пьштгьрийа Адонийа кьр (Бьхунә 1 Пʹадшати 1:5-8). Бь ве йәке Абийатʹар нә тʹәне Даԝьдрʹа, ле Йаһоԝарʹа жи амьн нәма. Ле досте Абийатʹар, Садок, Йаһоԝарʹа амьн ма. Дә бьдә бәр чʹәʹве хԝә, кӧ Садок жь бо ве йәке чьԛас хәмгин бу. Ԝәкә 40 сала Садок у Абийатʹар тʹәвайи ча кʹаһин хьзмәт кьрьбун (2 Самуйел 8:17). Ԝана тʹәвайи «Сьндоԛа Хԝәде» һьлдабун (2 Самуйел 15:29, ИМ). Серида һәрда жи пьштгьрийа сәрԝертийа Даԝьд дькьр у тʹәвайи гәләк Йаһоԝарʹа хьзмәт кьрьбун (2 Самуйел 19:11-14).

16. Дьԛәԝьмә чь али Садок дькьр амьн бьминә?

¹⁶ Рʹаст ә Абийатʹар хԝәрʹа рʹекә дьн бьжарт, йәкә Садок Йаһоԝарʹа амьн ма. Даԝьд тʹӧ щар дӧдьли нәдьбу кӧ Садок йәки амьн ә. Гава плана Адонийа әшкәрә бу, Даԝьд готә Садок, Натʹан у Бәнайа, кӧ әԝана Сьлеман ча пʹадша кʹьфш кьн (1 Пʹадшати 1:32-34). Бе шьк, Садок жь амьнийа хьзмәткʹаред Йаһоԝайә дьн ԛәԝат у һелане дьстанд, мәсәлә жь амьнийа Натʹан у мәрьвед дьн, йед кӧ пьштгьрийа Даԝьд Пʹадша дькьрьн (1 Пʹадшати 1:38, 39). Гава Сьлеман бу пʹадша, әԝи Садок дәԝса Абийатʹар ча кʹаһин кʹьфш кьр (1 Пʹадшати 2:35).

17. Һәрге мәрьвәки тәйи һʹәзкьри жь рʹастийе дәре, тӧ ча дькари чʹәʹв бьди Садок?

¹⁷ Гәло тӧ ча дькари чʹәʹв бьди Садок? Һәрге мәрьвәки тәйи һʹәзкьри жь рʹастийе дәре, Йаһоԝарʹа бьдә кʹьфше ԝәки тӧ дьхԝази жерʹа амьн бьмини (Йешу 24:15). Йаһоԝа ԝе ԛәԝат у мерхасийе бьдә тә. Бь сайа дӧа, хԝә бьсперә ԝи у тʹәви хушк-бьра незик бә. Йаһоԝа амьнийа тә гәләки ԛимәт дькә у әԝе бона ве йәке тә хәлат кә (2 Самуйел 22:26).

18. Тӧ жь сәрһатийа Марко у Сидсе чь һин буйи?

¹⁸ Дина хԝә бьдьнә сәрһатийа бьре мә Марко у кʹӧлфәта ԝи Сидсе. Дӧ ԛизед ԝан жь рʹастийе дәркʹәтьн. Марко дьбежә: «Жь рʹожа кӧ зарʹ те буйине, де-бав гәләки ԝан һʹәз дькьн у чь жь дәсте ԝан те дькьн, ԝәки ԝана жь ԛәзийе бьпʹарезьн. Ләма жи, гава әԝана сафи дькьн пьшта хԝә бьдьнә Йаһоԝа у жь рʹастийе дәртен, де-бав гәләк хәмгин дьбьн». Ӧса жи әԝ дьбежә: «Ле Йаһоԝа али мә дькә. Бь сайа аликʹарийа ԝи, гава әз сьст ьм, кʹӧлфәта мьн ԛәԝи йә, у гава әԝ сьст ә, әз ԛәԝи мә». Сидсе дьбежә: «Бе аликʹарийа Йаһоԝа, мәйе нькарьбуйа амьн бьминьн. Әз щарна дьфькьрим, кӧ әз һәр тьштида нәһәԛ ьм, ләма жи мьн Йаһоԝарʹа бәʹса һәстед хԝә дькьр. Дәмәкә кьн паши ве йәке, хушкәкә кӧ мьн гәләк сала ле нәдитьбу, һатә бал мьн, дәсте хԝә да сәр мьле мьн, чʹәʹве мьн ньһерʹи у гот: ‹Бир нәкә, Сидсе, әв нәһәԛийа тә нинә!› Бәле, бь аликʹарийа Йаһоԝа, әз дькарьм бь шабуне Ԝирʹа хьзмәт кьм».

19. Йаһоԝа дьхԝазә кӧ әм чь бькьн?

¹⁹ Йаһоԝа дьхԝазә кӧ һʹәму хьзмәткʹаред ԝи мина Садок мерхас бьн (2 Тимотʹейо 1:7). Ле әԝ нахԝазә, ԝәки әм хԝә бьсперьн ԛәԝата хԝә. Йаһоԝа дьхԝазә кӧ әм хԝә бьсперьн ԝи. Ләма жи һәрге бона тьштәки тәрʹа мерхаси лазьм бә, жь Йаһоԝа аликʹарийе бьхԝазә. Баԝәр бә, кӧ әԝе али тә бькә, ԝәки тӧ мина Садок мерхас би! (1 Пәтрус 5:10)