ГОТАРА БОНА ҺИНБУНЕ 28
КʹЬЛАМА 123 Пәй Рʹебәрийа Тʹәшкиләта Хԝәде Дьчьн
Гәло Тӧ Дькари Рʹастийе Тедәрхи?
«Щийе хԝәда бьсәкьньн, рʹастийе мина кʹәмбәре ль пьшта хԝә бьшьдиньн» (ӘФӘСИ 6:14).
ВЕ ГОТАРЕДА
Әме шеԝьр кьн, кӧ әм ча дькарьн фьрԛийе бьвиньн ортʹа рʹастийа кӧ әм жь Йаһоԝа һин бунә у дәрәԝед кӧ Мире-щьна у дьжмьнед мә бәла дькьн.
1. Ньһерʹандьна тә һьндава рʹастийе чь щурʹәйи йә?
ӘМ РʹАСТИЙА Кʹьтеба Пироз гәләки һʹәз дькьн у баԝәрийа мә сәр һʹиме ве рʹастийе авакьри йә (Рʹомайи 10:17). Әм баԝәр ьн, кӧ Йаһоԝа щьвата Мәсиһити чаԝа «стун у һʹиме рʹастийе» саз кьрийә (1 Тимотʹейо 3:15). Әм һазьр ьн гӧһ бьдьнә ԝан мәрьва, йед кӧ рʹебәрийа мә дькьн, рʹастийа Кʹьтеба Пироз мәрʹа зәлал дькьн у али мә дькьн ль гора хԝәстьна Хԝәде бьжин (Ибрани 13:17).
2. Ль гора Аԛуб 5:19, паши ве йәке кӧ мә рʹастийа Кʹьтеба Пироз ԛәбул кьрийә, диса жи чь дькарә бьԛәԝьмә?
2 Рʹаст ә мә һинкьрьнед Кʹьтеба Пироз ԛәбул кьрийә у фәʹм кьрийә, кӧ Хԝәде бь сайа тʹәшкиләта хԝә рʹебәрийа мә дькә, диса жи хоф һәйә кӧ әм жь рʹийа рʹастийе дәрен (Бьхунә Аԛуб 5:19). Мире-щьна гәләк дьхԝазә, ԝәки әм баԝәрийа хԝә һьндава Кʹьтеба Пироз у рʹебәрийа кӧ әм жь тʹәшкиләта Хԝәде дьстиньн, ӧнда кьн (Әфәси 4:14).
3. Чьрʹа лазьм ә кӧ әм хԝә ль рʹастийе бьгьрьн? (Әфәси 6:13, 14)
3 Бьхунә Әфәси 6:13, 14. Дәмәкә незикда Мире-щьна ԝе һʹәму мьләта бь сайа пропагандайе бьхапинә, ԝәки әԝана һьмбәри Йаһоԝа дәркʹәвьн (Әʹйанти 16:13, 14). Ӧса жи, Мире-щьна ԝе һе зедә бьхԝазә хьзмәткʹаред Йаһоԝа бьхапинә (Әʹйанти 12:9). Ләма жи әм гәрәке рʹьнд бьзаньбьн, кӧ фьрԛийа ортʹа рʹастийе у дәрәԝа чь йә, у гӧһ бьдьнә рʹастийе (Рʹомайи 6:17; 1 Пәтрус 1:22). Сәва кӧ әм тәнгасийа мәзьнда сах бьминьн, әв йәк гәләк фәрз ә!
4. Ве готареда әме чь шеԝьр кьн?
4 Ве готареда әме дина хԝә бьдьнә дӧ һʹӧнӧра, йед кӧ мәрʹа лазьм ьн, ԝәки рʹастийа Кʹьтеба Пироз нас кьн у рʹебәрийа тʹәшкиләта Хԝәде ԛәбул кьн. Паше әме дина хԝә бьдьнә се тьшта, йед кӧ дькарьн али мә бькьн, ԝәки әм хԝә ль рʹастийе бьгьрьн.
ҺʹӦНӦРЕД КӦ МӘРʹА ЛАЗЬМ ЬН, ԜӘКИ РʹАСТИЙЕ ТЕДӘРХЬН
5. Тьрса бәр Йаһоԝа ча али мә дькә рʹастийе тедәрхьн?
5 Тьрса бәр Йаһоԝа. Әв йәк кӧ әм гәрәке Йаһоԝа бьтьрсьн, те һʹәсабе кӧ әм гәрәке ӧса ԝи һʹәз бькьн, ԝәки нәхԝазьн дьле ԝи бешиньн. Әм дьхԝазьн рʹьнд бьзаньбьн, кӧ чь рʹаст ә у чь нәрʹаст ә, чь һәԛи йә у чь дәрәԝ ә, ԝәки бькарьбьн бь рʹабун-рʹуньштьна хԝә дьле Йаһоԝа ша кьн (Мәтʹәлок 2:3-6; Ибрани 5:14). Әм гәрәке Йаһоԝа гәләки һʹәз бькьн у һаш жь хԝә һәбьн, ԝәки дьле мәда тьрса бәр мәрьва жь ве һʹәзкьрьне мәзьнтьр нибә, чьмки гәләк тьштед кӧ мәрьва хԝәш тен, Йаһоԝа хԝәш найен.
6. Жь бо тьрса бәр мәрьва, дәһ сәрокед Исраеле кʹижан рʹасти бир кьрьн?
6 Һәрге әм жь Хԝәде зедәтьр мәрьва бьтьрсьн, әм һеса дькарьн баԝәрийа хԝә тьштәки ӧса биньн, чь кӧ мьԛабьли рʹастийа Хԝәде йә. Ԝәрә әм дина хԝә бьдьнә сәрһатийа 12 сәрока, йед кӧ ча щәʹсус шандьбунә Әʹрде Создайи. Дәһ щәʹсус жь Хԝәде зедәтьр Кәнанийа дьтьрсийан. Ләма жи ԝана Исраелийарʹа гот: «Әм нькарьн һәвраз һәрʹьн мьԛабьли ԝан, чьмки әԝ жь мә ԛәԝаттьр ьн» (Жьмар 13:27-31). Рʹаст ә бь ньһерʹандьна мәрьва Кәнани жь Исраелийа ԛәԝитьр бун, ле әв йәк нәдьһатә һʹәсабе кӧ мьләте Исраеле ԝе нькарьбуйа дьжмьнед хԝә алт кьра. Ԝана гәрәке дина хԝә бьда хԝәстьна Йаһоԝа у бьанийана бира хԝә, ԝәки Әԝи бәре жи али ԝан кьрьбу. Әв йәк ԝе али дәһ щәʹсуса бькьра кӧ фәʹм кьрана, ԝәки ԛәԝата Кәнанийа тьштәк нинә һьмбәри ԛәԝата Йаһоԝайә бесинор. Йешу у Кʹаләб чʹәʹв нәданә ван кәсед нәбаԝәр, чьмки ԝана дьхԝәст дьле Йаһоԝа ша кьн. Ләма жи ԝана щьмәʹтерʹа гот: «Һәгәр Хӧдан һʹьз кә, әԝе мә бьбә ԝьр у ԝи әʹрди бьдә мә» (Жьмар 14:6-9).
7. Әм ча дькарьн тьрса бәр Йаһоԝа дьле хԝәда дьһа ԛәԝи кьн? (Бьньһерʹә ӧса жи шькьл.)
7 Сәва кӧ әм тьрса бәр Йаһоԝа дьле хԝәда дьһа ԛәԝи кьн, әм гәрәке рʹьнд бьфькьрьн, кӧ кʹижан сафикьрьнед мә ԝе дьле Йаһоԝа ша кьн (Зәбур 16:8). Гава тӧ сәрһатийед Кʹьтеба Пироз дьхуни, жь хԝә бьпьрсә: «Һәрге әз ве дәрәщеда бума, мьне чь сафи кьра?» Мәсәлә, бьдә бәр чʹәʹве хԝә, гава дәһ сәрокед Исраеле әʹламәтийа хьраб анин, тӧ жи ԝедәре буйи. Гәло тәйе жь тьрса бәр мәрьва баԝәрийа хԝә гьлийед ԝан бьанийа, йан һʹәзкьрьна тә һьндава Йаһоԝа у хԝәстьна тә кӧ дьле Ԝи ша ки, ԝе дьһа ԛәԝи буйа, нә кӧ тьрса тә? Һʹәчʹи зәʹф Исраелийа баԝәр нәкьрьн, кӧ гьлийед Йешу у Кʹаләб рʹаст ьн. Ахьрийеда Йаһоԝа изьн нәда ван Исраелийа кӧ бькʹәвьнә Әʹрде Создайи (Жьмар 14:10, 22, 23).
Тәйе кʹе баԝәр кьра? (Бьньһерʹә абзаса 7)
8. Әм гәрәке кʹижан һʹӧнӧри нав хԝәда пешда биньн у чьрʹа?
8 Мьлукти. Йаһоԝа мәрьвед мьлукрʹа рʹастийе әшкәрә дькә (Мәтта 11:25). Мә бь мьлукти аликʹари ԛәбул кьр, кӧ рʹастийе һин бьн (Кʹаред Шандийа 8:30, 31). Ле әм гәрәке һаш жь хԝә һәбьн, ԝәки мьлуктийа хԝә ӧнда нәкьн. Һәрге әм фәсал нибьн, дьбәкә әм бьфькьрьн, ԝәки ньһерʹандьнед мәйә шәхси дьһа рʹаст ьн, нә кӧ принсипед Кʹьтеба Пироз у рʹебәрийа тʹәшкиләта Йаһоԝа.
9. Сәва кӧ әм мьлуктийа хԝә ӧнда нәкьн, әм гәрәке чь бькьн?
9 Сәва кӧ әм мьлуктийа хԝә ӧнда нәкьн, әм гәрәке бир нәкьн, ԝәки һьмбәри Йаһоԝа, әм гәләк бьчʹук ьн (Зәбур 8:3, 4). Ӧса жи әм дькарьн дӧа бькьн, ԝәки әм дьһа мьлук бьн у һазьр бьн һинкьрьнед ԝи ԛәбул кьн. Йаһоԝа ԝе али мә бькә, ԝәки әм ньһерʹандьнед ԝи, йед кӧ Әԝ бь сайа Кʹьтеба Пироз у тʹәшкиләта хԝә дьдә мә, дьһа зедә ԛимәт кьн, нә кӧ ньһерʹандьнед хԝә. Гава тӧ Кʹьтеба Пироз дьхуни, дина хԝә бьде, кӧ Йаһоԝа чаԝа мьлуктийе һәʹз дькә, ле ԛӧрʹәбуне у позбьльндийе нәфрʹәт дькә. Һәрге тәрʹа щабдарикә мәхсус бе дайине, ԝи чахи дьһа зедә мьԛати хԝә бә, ԝәки мьлуктийа хԝә ӧнда нәки.
ӘМ ЧА ДЬКАРЬН ХԜӘ ЛЬ РʹАСТИЙЕ БЬГЬРЬН?
10. Йаһоԝа бь сайа кʹе рʹебәрийа хьзмәткʹаред хԝә дькьр?
10 Баԝәрийа хԝә рʹебәрийа тʹәшкиләта Йаһоԝа бинә. Ԝәʹде бәре, Йаһоԝа бь сайа Муса у паше жи бь сайа Йешу рʹебәри дьда хьзмәткʹаред хԝә (Йешу 1:16, 17). Чахе Исраелийа ԛәбул дькьрьн, ԝәки әв мер жь Йаһоԝа һатьнә кʹьфшкьрьне, ԝи чахи әԝана дьһатьнә кʹәрәмкьрьне. Чәнд ԛьрʹнә шунда, гава щьвата Мәсиһитийә пешьн һатә сазкьрьне, кʹомәкә жь 12 шандийа рʹебәрийа щьвате дькьр (Кʹаред Шандийа 8:14, 15). Паше, рʹуспийед дьн жи бунә әндәмед ве кʹома Оршәлимеда. Жь бо ве йәке кӧ щьвата рʹебәрийа ван меред амьн ԛәбул дькьрьн, әԝана «баԝәрийеда дьшьдийан у рʹож бь рʹож һʹәсабе ԝан зедә дьбу» (Кʹаред Шандийа 16:4, 5). Иро жи чахе әм рʹебәрийа тʹәшкиләта Йаһоԝа ԛәбул дькьн, әм гәләк кʹәрәма дьстиньн. Ле һәрге әм ԝан бьра ԛәбул нәкьн, кʹижана кӧ Йаһоԝа кʹьфш кьрийә, гәло Йаһоԝа ԝе ча хԝә тʹәхмин кә? Ԝәрә әм дина хԝә бьдьне, кӧ чь һатә сәре ван Исраелийа, йед кӧ дьчунә Әʹрде Создайи.
11. Чь һатә сәре ԝан мәрьва, йед кӧ мьԛабьли Муса дәркʹәтьн, кʹижани кӧ Йаһоԝа кʹьфш кьрьбу? (Бьньһерʹә ӧса жи шькьл.)
11 Щарәке, гава мьләте Исраеле бәрбь Әʹрде Создайи дьчу, һьнә сәрок мьԛабьли Муса у щабдарийа кӧ Йаһоԝа дабу ԝи, дәркʹәтьн. Ԝана гот: «Тʹәмамийа щьвине [нә тʹәне Муса], һʹәму жи пироз ьн у Хӧдан ль нава ԝанда йә» (Жьмар 16:1-3). Рʹаст ә бәр чʹәʹве Йаһоԝа «тʹәмамийа щьвине» пироз бу, ле Йаһоԝа тʹәне Муса кʹьфш кьрьбу, кӧ рʹебәрийа щьмәʹта Ԝи бькә (Жьмар 16:28). Бь ве йәке кӧ ԝана Муса инкʹар дькьр, бь рʹасти ԝана Йаһоԝа инкʹар дькьр. Дәԝса кӧ ԝана дина хԝә бьда хԝәстьна Йаһоԝа, ԝана дина хԝә дьда хԝәстьна хԝә. Ахьрийеда, Хԝәде ԝан сәрокед кӧ бунә рʹабәр у бь һʹәзара мәрьвед кӧ пьштгьрийа ԝан дькьрьн, ԛьрʹ кьр (Жьмар 16:30-35, 41, 49). Иро жи әм дькарьн баԝәр бьн, кӧ Йаһоԝа жь ԝан мәрьва рʹази нинә, йед кӧ ԛәдьре рʹебәрийа ԝи нагьрьн, кʹижан кӧ әԝ бь сайа тʹәшкиләта хԝә дьдә.
Тәйе пьштгьрийа кʹе бькьра? (Бьньһерʹә абзаса 11)
12. Әм чьрʹа гәрәке итʹбарийа хԝә тʹәшкиләта Йаһоԝа биньн?
12 Әм дькарьн итʹбарийа хԝә тʹәшкиләта Йаһоԝа биньн. Гава лазьм дьбә һинкьрьнәкә Кʹьтеба Пироз бь щурʹәки дьн бе фәʹмкьрьне, йан методәкә бәлакьрьна мьзгинийе бе гӧһастьне, бьред кӧ рʹебәрийа мә дькьн, һазьр ьн ван гӧһастьна бькьн (Мәтʹәлок 4:18). Мәʹнийа ве йәке әв ә, кӧ әԝана дьхԝазьн жь һәр тьшти зедәтьр дьле Йаһоԝа ша кьн у хԝәстьна ԝи биньн сери. Ӧса жи әԝана чь жь дәсте ԝан те дькьн, ԝәки сәр һʹиме Кʹьтеба Пироз сафикьрьна бькьн.
13. Чь те һʹәсабе «һинкьрьна сахләм», у әм гәрәке чь бькьн?
13 «Хԝә ль ԝи нәхше сахләм бьгьрә» (2 Тимотʹейо 1:13). «Һинкьрьна сахләм» те һʹәсабе һинкьрьнед Кʹьтеба Пироз (Йуһʹәнна 17:17). Баԝәрийа мә бь тʹәмами сәр һʹиме ван һинкьрьна ава буйә. Тʹәшкиләта Йаһоԝа али мә кьрийә хԝә ль ԝан һинкьрьна бьгьрьн. Һәрге әм ве йәке бькьн, Йаһоԝа ԝе мә кʹәрәм кә.
14. Чь бу мәʹни кӧ һьнә Мәсиһи хԝә «һинкьрьна сахләм» нәдьгьртьн?
14 Һәрге әм хԝә ль «һинкьрьна сахләм» нәгьрьн, чь дькарә бьԛәԝьмә? Ԝәрә әм дина хԝә бьдьнә ве мәсәле. Ԛьрʹна йәкеда һьнә шагьртед Иса дьфькьрин, кӧ рʹожа Йаһоԝа ида һатийә. Дьбәкә нәʹмәкеда әв йәк һатьбу готьне у әԝана дьфькьрин, кӧ Паԝлосе шанди әв нәʹмә ньвисибу. Һьнә хушк-бьред Тʹесалоники баԝәрийа хԝә ве йәке дьанин. Ԝана һе лекʹолин нәкьрьбу әв йәк рʹаст ә йан на, ле ида дәрһәԛа ве йәке мәрьвед дьнрʹа жи дьготьн. Һәрге ԝана бьанийа бира хԝә, кӧ Паԝлос чь ԝана һин кьрьбу, әԝана ԝе нәһатана хапандьне (2 Тʹесалоники 2:1-5). Паԝлос ширәт да хушк-бьра, кӧ баԝәрийа хԝә һәр тьшти нәйньн, чь кӧ дьбьһен. Сәва кӧ әԝана диса нәкʹәвьнә тʹәлькәкә ӧса, Паԝлос хьлазийа нәʹма хԝәда ӧса гот: «Әва сьлава бь дәсте мьн Паԝлос ә, чаԝа нишана һʹәму нәʹмед мьн. Әз аһа дьньвисьм» (2 Тʹесалоники 3:17).
15. Әм ча дькарьн хԝә жь дәрәԝа бьпʹарезьн? Мәсәле биньн. (Бьньһерʹә ӧса жи шькьл.)
15 Әм жь гьлийед Паԝлос, кӧ әԝи Тʹесалоникийарʹа ньвиси, чь һин дьбьн? Гава әм тьштәки дьбьһен, чь кӧ мьԛабьли һинкьрьнед Кʹьтеба Пироз ә, йан жи ԛәԝьмандьнәкә әʹщеб дьбьһен, әм гәрәке мьԛати хԝә бьн. Гәләк сал пешда, Йәктийа Совйәтеда, дьжмьнед мә нәʹмә бәла кьрьн, йа кӧ йан чь жь офиса сәрәкә, йа Шәʹдед Йаһоԝа бу. Ве нәʹмеда һьнә бьрарʹа һатьбу готьне, кӧ хԝәрʹа тʹәшкиләтәкә башԛә саз кьн. Ӧса дьһатә кʹьфше, кӧ те бежи әв нәʹмә бь рʹасти жь офиса сәрәкә бу. Ле бьред амьн нәһатьнә хапандьне. Ԝана фәʹм кьр, кӧ гьлийед жь ве нәʹме ль гора һинкьрьнед Кʹьтеба Пироз нибун. Иро жи дьжмьнед рʹастийе щарна техноложийа модерн дьдьнә хәбате, ԝәки мә бьхальфиньн у йәктийа мә хьраб кьн. Сәва кӧ әм «фькьре хԝәда зу шаш нәбьн», әм гәрәке фәсал бьн у избат бьн, һәла әԝ тьштед кӧ әм дьбьһен йан жи дьхуньн, ль гора һинкьрьнед Кʹьтеба Пироз ьн, йан на (2 Тʹесалоники 2:2; 1 Йуһʹәнна 4:1).
Бь ԝан дәрәԝа, йед кӧ чаԝа рʹасти тенә кʹьфше, нәйенә хапандьне (Бьньһерʹә абзаса 15)a
16. Ль гора Рʹомайи 16:17, 18, һәрге һьнә мәрьв жь рʹастийе дәркʹәвьн, әм гәрәке чь бькьн?
16 Тʹәви хьзмәткʹаред Йаһоԝайә амьн йәктийеда бьн. Хԝәде дьхԝазә ԝәки әм йәктийеда жерʹа хьзмәт кьн. Һʹәта кӧ әм хԝә ль рʹастийе бьгьрьн, йәктийа мә ԝе хьраб нәбә. Һәр кәсе кӧ тьштед нәрʹаст бәла дькә, дьбьнә сәбәбе ве йәке, кӧ щьватеда йәкти хьраб дьбә, ләма жи Хԝәде дьбежә, кӧ әм гәрәке «жь ԝан дур бьн». Һәрге әм ӧса нәкьн, әм дькарьн бькʹәвьнә тʹәльке у жь рʹастийе дәркʹәвьн (Бьхунә Рʹомайи 16:17, 18).
17. Чьрʹа фәрз ә кӧ әм рʹастийе нас бькьн у хԝә ль рʹастийе бьгьрьн?
17 Һәрге әм рʹастийе тедәрдьхьн у хԝә ве рʹастийе дьгьрьн, һьнге баԝәрийа мә ԛәԝи дьбә у әм дьһа незики Йаһоԝа дьбьн (Әфәси 4:15, 16). Әме жь һʹӧкӧме пропаганда у дәрәԝед Мире-щьна бенә хԝәйкьрьне, у ԝәʹде тәнгасийа мәзьн, әме бьн сийа пʹәрʹе Йаһоԝада бьн. Бәле, хԝә ль рʹастийе бьгьрьн у «Хԝәдейе әʹдьлайийе ԝе тʹәви ԝә бә» (Филипи 4:8, 9).
КʹЬЛАМА 122 Ԛәԝи Бьсәкьньн!
a ШЬРОВӘКЬРЬНА ШЬКЬЛА: Ԝәʹде Йәктийа Совйәте бьра нәʹмә дьстиньн. Әв нәʹмә йан чь жь офиса сәрәкә йа Шәʹдед Йаһоԝа йә, ле бь рʹасти әв жь дьжмьнед мә йә. Иро дьжмьнед мә дькарьн бь сайа интернете дәрһәԛа тʹәшкиләта Йаһоԝа дәрәԝа бәла кьн.