Али Хԝәндәкʹаре Хԝә Бькә кӧ Әԝ Бьбә Хьзмәткʹаре Йаһоԝа

1-2. а) Һьнә хԝәндәкʹаред Кʹьтеба Пироз чьма дьтьрсьн бьбьнә хьзмәткʹаред Йаһоԝа? б) Ве готареда әме чь шеԝьр кьн?

ГАВА тӧ Кʹьтеба Пироз һин дьбуйи, гәло серида тә хԝә паш нәдьхьст жь ве йәке, кӧ бьби Шәʹде Йаһоԝа? Дьԛәԝьмә тӧ дьтьрсийайи ԝәки малбәта тә у һәвалед тә ԝе чь бежьн. Йан жи дьбәкә тӧ дьшьрмиш дьбуйи кӧ гәләк чәтьн ә ль гора ԛанунед Йаһоԝа бьжийи. Һәрге дәрәща тә ӧса бу, тӧйе рʹьнд фәʹм ки, ԝәки чьрʹа һьнә хԝәндәкʹаред Кʹьтеба Пирозрʹа чәтьн ә сафи кьн бьбьнә Шәʹдед Йаһоԝа.

² Иса заньбу кӧ тьрса ви щурʹәйи дькарә бьбә мәʹнийа ве йәке, кӧ мәрьв рʹӧһʹанида пешда нәчә (Мәтта 13:20-22). Диса жи әԝи гӧмана хԝә жь кәсед кӧ һазьр нибун пәй ԝи һәрʹьн, нәдьбьрʹи. Ләма жи әԝи шагьртед хԝә һин дькьр, кӧ ча али кәсед ӧса бькьн 1) тедәрхьн кӧ чь дькарә рʹийа ԝан бьгьрә ԝәки рʹӧһʹанида пешда һәрʹьн, 2) һʹәзкьрьна хԝә һьндава Йаһоԝа дьһа ԛәԝи кьн, 3) жь һәр тьшти зедәтьр дина хԝә бьдьнә ԛьрара Йаһоԝа у 4) чәтьнайада сәркʹәвьн. Әм ча дькарьн һинкьрьнеда чʹәʹв бьдьнә Иса, гава әм бь сайа кʹьтеба Ша бә Жийинерʹа Һʹәта-Һʹәтайе! али хԝәндәкʹаред хԝә дькьн бьбьнә хьзмәткʹаред Йаһоԝа?

АЛИ ԜАН БЬКЬН ТЕДӘРХЬН КӦ ЧЬ ДЬКАРӘ РʹИЙА ԜАН БЬГЬРӘ РʹӦҺʹАНИДА ПЕШДА ҺӘРʹЬН

3. Дьбәкә чь бу мәʹни кӧ Никодемо дәрберʹа нәбу шагьрте Иса?

³ Никодемо нав Щьһуйада мәрьвәки бь нав у дәнг бу, ләма жи ԝирʹа чәтьн бу бьбә шагьрте Иса. Тʹәне ԝәкә шәш мәһ дәрбаз бьбу паши ве йәке, кӧ Иса хьзмәтийа хԝә дәстпекьрьбу, у Никодемо ида фәʹм кьр, кӧ Иса бь рʹасти жи Мәсиһе создайи йә (Йуһʹәнна 3:1, 2). Ле «жь тьрса Щьһуйа», әԝи дьзикава Исарʹа хәбәр дьда (Йуһʹәнна 7:13; 12:42). Дьбәкә әԝ дьфькьри кӧ һәрге әԝ бьбә шагьрте Иса, әԝе гәләк тьшт ӧнда кә.a

4. Иса Мәсиһ ча али Никодемо кьр, ԝәки әԝ хԝәстьна Хԝәде фәʹм бькә?

⁴ Никодемо Ԛануна Муса рʹьнд заньбу, ле жерʹа аликʹари лазьм бу ԝәки фәʹм бькә, кӧ Йаһоԝа чь жь ԝи дәʹԝа дькә. Гәло Иса ча али ԝи кьр? Әԝ һазьр бу һәла һе ниве шәве жи тʹәви Никодемо хәбәр дә, ԝәки али ԝи бькә бьбә шагьрт. Ӧса жи Иса Никодеморʹа зәлал гот, ԝәки әԝ гәрәке тʹобә кә, бе ньхӧмандьне у баԝәрийа хԝә Кӧрʹе Хԝәде бинә, кӧ бьбә шагьрте ԝи (Йуһʹәнна 3:5, 14-21).

5. Тӧ ча дькари али хԝәндәкʹаре хԝә бьки ԝәки әԝ тедәрхә, кӧ чь рʹийа ԝи дьгьрә рʹӧһʹанида пешда һәрʹә?

⁵ Һәрге хԝәндәкʹарәки тә ида рʹьнд Кʹьтеба Пироз фәʹм дькә, дьбәкә жерʹа аликʹари лазьм ә ԝәки әԝ тедәрхә, кӧ чь рʹийа ԝи дьгьрә рʹӧһʹанида пешда һәрʹә. Дьбәкә хәбата ԝи гәләк ԝәʹдә жь ԝи дьстинә, йан жи малбәта ԝи нахԝазә кӧ әԝ бьбә Шәʹде Йаһоԝа. Ләма жи тʹәви хԝәндәкʹаре хԝә ԝәʹдә дәрбаз кә. Һун дькарьн тʹәвайи ԛаԝәйе вәхԝьн йан жи дәрва бьгәрʹьн, ԝәки әԝ дьле хԝә тәрʹа вәкә у бежә кӧ чь рʹийа ԝи дьгьрә. Хԝәндәкʹаре хԝә һелан кә ԝәки гӧһастьна бькә, нә кӧ сәва дьле тә ша кә, ле сәва кӧ избат кә ԝәки әԝ Йаһоԝа һʹәз дькә.

6. Тӧ ча дькари хԝәндәкʹаре хԝә һелан ки, ԝәки әԝ сафи кә Йаһоԝарʹа хьзмәт кә? (1 Корьнтʹи 16:13)

⁶ Һәрге хԝәндәкʹаре тә баԝәр бә, кӧ Йаһоԝа ԝе али ԝи бькә ль гора принсипед Кʹьтеба Пироз бьжи, әв йәк ԝе ԝи һелан кә, ԝәки тьштед кӧ һин дьбә, әʹмьре хԝәда бьдә хәбате (Бьхунә 1 Корьнтʹи 16:13). Дькарьн бежьн ԝәки щабдарийа тә мина йа дәрсдарәки мәкʹтәбе йә. Һәла бинә бира хԝә гава тӧ мәкʹтәбеда һин дьбуйи, тә һʹәчʹи зәʹф кʹижан дәрсдара һʹәз дькьр? Һәмьки тә һәри зедә ԝан дәрсдара һʹәз дькьр, йед кӧ тә дьданә баԝәркьрьне, ԝәки тӧ йәки зен и у те бьби мәрьвәки пешдачуйи. Мина ве йәке, әм жи гәрәке нә тʹәне хԝәндәкʹаре хԝә һин кьн, ԝәки Йаһоԝа чь жь ԝи дәʹԝа дькә, ле ӧса жи ԝи бьдьнә баԝәркьрьне кӧ бь аликʹарийа Йаһоԝа әԝ дькарә рʹӧһʹанида пешда һәрʹә. Гәло тӧ ча дькари ве йәке бьки?

АЛИ ХԜӘНДӘКʹАРЕД ХԜӘ БЬКЬН ԜӘКИ ҺʹӘЗКЬРЬНА ХԜӘ ҺЬНДАВА ЙАҺОԜА ДЬҺА ԚӘԜИ КЬН

7. Иса ча али гӧһдаред хԝә дькьр, ԝәки әԝана дьһа зедә Йаһоԝа һʹәз бькьн?

⁷ Иса заньбу кӧ һәрге шагьртед ԝи Хԝәде һʹәз бькьн, әԝана ԝе бьхԝазьн ль гора ван тьшта бьжин, чь кӧ һин бунә. Ләма жи әԝи гәләк щар тьштед ӧса ԝана һин дькьр, чь кӧ али ԝан дькьр дьһа зедә Баве хԝәйи әʹзмана һʹәз бькьн. Мәсәлә, әԝи гот кӧ Йаһоԝа мина бавәки ӧса йә, йе кӧ тьштед баш дьдә зарʹед хԝә (Мәтта 7:9-11). Дьԛәԝьмә бавед һьнә мәрьва, йед кӧ гӧһ дьданә Иса, нә һаԛас дьлован бун. Һәла бьдә бәр чʹәʹве хԝә, ԝана хԝә ча тʹәхмин кьр, гава Иса мәтʹәлока дәрһәԛа баве дьлован ԝанрʹа гьли кьр, йе кӧ кӧрʹе хԝәйи жь рʹе дәркʹәти диса ԛәбул кьр. Бь ви щурʹәйи Иса мәрьварʹа да кʹьфше, ԝәки Йаһоԝа чьԛас ԝана һʹәз дькә (Луԛа 15:20-24).

8. Тӧ ча дькари али хԝәндәкʹаре хԝә бьки, кӧ әԝ дьһа зедә Йаһоԝа һʹәз бькә?

⁸ Сәва кӧ хԝәндәкʹаре тә дьһа зедә Йаһоԝа һʹәз кә, дина ԝи бькʹьшинә сәр һʹӧнӧред Ԝи. Ԝәʹде дәрса нишани ԝи кә, ԝәки ча тьштед кӧ әԝ һин дьбә, һʹәзкьрьна Йаһоԝава гьредайи нә. Мәсәлә, гава һун дәрһәԛа ԛӧрбана Иса шеԝьр дькьн, нишан кә кӧ ча әԝ жь ве йәке кʹаре дьстинә (Рʹомайи 5:8; 1 Йуһʹәнна 4:10). Һәрге хԝәндәкʹаре тә фәʹм кә, кӧ Йаһоԝа чьԛас хут ԝи һʹәз дькә, һʹәзкьрьна ԝи жи һьндава Йаһоԝа ԝе дьһа зедә бә (Галати 2:20).

9. Чь али Микʹайел кьр әʹмьре хԝә бьгӧһезә?

⁹ Ԝәрә әм дина хԝә бьдьнә сәрһатийа мерәки бь наве Микʹайел, йе кӧ ль Әндонәзийайе дьжи. Рʹаст ә әԝи жь бьчʹуктайе рʹастийа Кʹьтеба Пироз заньбу, ле әԝ нәһатә ньхӧмандьне. Гава Микʹайел 18 сали бу, әԝ чу ԝәлатәки дьн бьхәбьтә. Паше әԝ вәгәрʹийа ԝәлате хԝә у зәԝьщи, ле диса жи мәщбур бу малбәта хԝә бьһелә у һәрʹә ԝәлатәки дьн бьхәбьтә. Һьнге жьна ԝи у ԛиза ԝи дәстпекьрьн Кʹьтеба Пироз һин бьн у рʹӧһʹанида пешда чун. Чахе дийа Микʹайел мьр, әԝи сафи кьр вәгәрʹә ԝәлате хԝә ԝәки баве хԝә бьбә хԝәйи, у хԝәха жи дәстпекьр Кʹьтеба Пироз һин бә. Ԝәʹде һинбуна кʹьтеба Ша бә Жийинерʹа Һʹәта-Һʹәтайе!, дәрса 27 пʹара «Кʹур Лекʹолин кә», гәләк дьле Микʹайел гьрт. Чахе әԝи да бәр чʹәʹве хԝә кӧ гава Иса һатә кӧштьне, дьле Йаһоԝа гәләк ешийа, әԝ кʹәлогьри бу. Әԝ бона ԛӧрбана Иса гәләк рʹази бу, у дәстпекьр әʹмьре хԝә бьгӧһезә у паше һатә ньхӧмандьне.

АЛИ ХԜӘНДӘКʹАРЕД ХԜӘ БЬКЬН ЖЬ ҺӘР ТЬШТИ ЗЕДӘТЬР ДИНА ХԜӘ БЬДЬНӘ ԚЬРАРА ЙАҺОԜА

10. Иса ча али шагьртед хԝә кьр, ԝәки әԝана дьһа зедә дина хԝә бьдьнә хьзмәтийе? (Луԛа 5:5-11) (Бьньһерʹә ӧса жи шькьл.)

¹⁰ Шагьртед пешьн зу фәʹм кьрьн кӧ Иса бь рʹасти жи Мәсиһе создайи йә, ле ԝанрʹа аликʹари лазьм бу, ԝәки жь тьштед дьн зедәтьр дина хԝә бьдьнә хьзмәтийе. Гава Иса гази Пәтрус у Әндраԝьс кьр ԝәки тʹьме тʹәви ԝи һәрʹьн, әԝана ида шагьртед ԝи бун (Мәтта 4:18, 19). Ԝана тʹәви Аԛуб у Йуһʹәнна шьхӧле мәʹсигьртьнеда кʹар дькьр, у шьхӧле ԝан баш дьчу (Маркос 1:16-20). Гава Пәтрус у Әндраԝьс «тʹоред хԝә һиштьн» у тʹәви Иса чун, дьбәкә ԝана ида сафи кьрьбу кӧ чь щурʹәйи әʹбура малбәта хԝә бькьн. Гәло ԝана чьрʹа ида жь хәбата хԝә зедәтьр дина хԝә данә хьзмәтийе? Кʹьтеба Луԛада те готьне, кӧ Иса бь сайа кʹәрәмәтәке али ԝан кьр, ԝәки әԝана баԝәр бьн кӧ Йаһоԝа дькарә бона һʹәԝщед ԝан хәм бькә (Бьхунә Луԛа 5:5-11).

11. Тӧ ча дькари али хԝәндәкʹаре хԝә бьки, ԝәки баԝәрийа ԝи дьһа ԛәԝи бә?

¹¹ Әм нькарьн мина Иса кʹәрәмәта бькьн, ле әм дькарьн дәрһәԛа сәрһатийед хԝәш гьли кьн, йед кӧ нишан дькьн ԝәки Йаһоԝа ча али ԝан мәрьва дькә, кʹижан кӧ жь һәр тьшти зедәтьр дина хԝә дьдьнә ԛьрара ԝи. Мәсәлә, тӧ дькари дәрһәԛа әʹмьре хԝә жи гьли ки. Гәло те бира тә кӧ гава тә тʹәзә дәстпекьр һәрʹи щьвата, Йаһоԝа ча али тә дькьр? Дьбәкә лазьм бу кӧ тӧ мәзьне хәбатерʹа бежи, ԝәки тӧ нькари һʹәта дәрәнг бьхәбьти, чьмки дьхԝази һәрʹи щьвата. Хԝәндәкʹаре хԝәрʹа бьдә кʹьфше, кӧ гава тә сафи кьрьбу жь һәр тьшти зедәтьр дина хԝә бьди хԝәстьна Йаһоԝа, тә дәсте Йаһоԝа ча әʹмьре хԝәда дьдит у ве йәке чь щурʹәйи баԝәрийа тә дьһа ԛәԝи дькьр.

12. а) Чьрʹа ԝе баш бә, ԝәки әм щурʹә-щурʹә хушк-бьра тʹәглифи сәр һинбуна хԝә кьн? б) Тӧ ча дькари видеойа бьди хәбате? Мәсәле бинә.

¹² Бона хԝәндәкʹаре тә ԝе ӧса жи керһати бә, ԝәки әԝ пебьһʹәсә кӧ хушк-бьред дьн чь гӧһастьн әʹмьре хԝәда кьрьнә, сәва кӧ бькарьбьн дина хԝә бьдьнә хԝәстьна Йаһоԝа. Ләма жи щурʹә-щурʹә хушк-бьра тʹәглифи сәр һинбуна хԝә бькә. Бьра әԝана хԝәндәкʹаре тәрʹа гьли кьн, кӧ ча бунә Шәʹдед Йаһоԝа у чь кьрьнә, ԝәки жь һәр тьшти зедәтьр дина хԝә бьдьнә хьзмәтийе. Хенщи ве йәке, тʹәви хԝәндәкʹаре хԝә жь кʹьтеба Ша бә Жийинерʹа Һʹәта-Һʹәтайе! бьньһерʹә видеойед жь пʹара «Һе Зедә Пебьһʹәсә» йан жь пʹара «Кʹур Лекʹолин кә». Мәсәлә, гава һун дәрса 37 лекʹолин кьн, тӧ дькари дина ԝи бькʹьшини сәр принсипед жь видеойа бь наве «Йаһоԝа Ԝе сәва Һʹәԝщед Мә Хәм Бькә».

АЛИ ХԜӘНДӘКʹАРЕД ХԜӘ БЬКЬН ЧӘТЬНАЙАДА СӘРКʹӘВЬН

13. Иса шагьртед хԝә ча бона пәйкʹәтьна һазьр кьр?

¹³ Иса чәнд щара шагьртед хԝәрʹа гот, кӧ әԝана ԝе һәла һе жь алийе мәрьвед хԝә жи рʹасти пәйкʹәтьна бен (Мәтта 5:11; 10:22, 36). Пешийа мьрьна хԝә Иса шагьртед хԝәрʹа гот, кӧ әԝана дькарьн бенә кӧштьне, чьмки Йаһоԝарʹа хьзмәт дькьн (Мәтта 24:9; Йуһʹәнна 15:20; 16:2). Ләма жи Иса гот, кӧ әԝана гәрәке тʹәви мьԛабьла нәкʹәтана дәʹԝе у мьԛати хәбәрдан у кьред хԝә буна.

14. Әм ча дькарьн али хԝәндәкʹаред хԝә бькьн, ԝәки әԝана хԝә бона пәйкʹәтьна һазьр кьн? (2 Тимотʹейо 3:12)

¹⁴ Әм гәрәке пешда хԝәндәкʹаред хԝә һазьр кьн, чьмки дьԛәԝьмә әԝана жь алийе һәвалхәбатчи, дост у мәрьвед хԝә рʹасти пәйкʹәтьна бен (Бьхунә 2 Тимотʹейо 3:12). Мәсәлә, дьбәкә һьнә һәвалхәбатчийед ԝан ԛәрфед хԝә ԝан бькьн, чьмки әԝана дьхԝазьн ль гора Кʹьтеба Пироз бьжин. Һьнә кәс у һәла һе мәрьвед ԝан жи дьԛәԝьмә баԝәрийа ԝан сущдар кьн. Ләма жи ԝе баш бә ԝәки әм сәре серида хԝәндәкʹаред хԝә һазьр кьн, у гава әԝана рʹасти пәйкʹәтьна бен, ида бьзаньбьн чь бькьн.

15. Ԝәʹде пәйкʹәтьнед жь алийе малбәте, чь дькарә али хԝәндәкʹаре тә бькә ԝәки әԝ хԝә рʹаст бьдә кʹьфше?

¹⁵ Бьра хԝәндәкʹаре тә жь хԝә бьпьрсә, һәла сәбәбе реаксийа мәрьвед ԝи чь йә. Дьбәкә әԝана дьфькьрьн кӧ әԝ һатийә хапандьне, йан жи ньһерʹандьна ԝан һьндава Шәʹдед Йаһоԝада нәрʹаст ә. Һьнә мәрьвед Иса жи дьфькьрин кӧ әԝ дин буйә (Маркос 3:21; Йуһʹәнна 7:5). Хԝәндәкʹаре хԝә һин кә, кӧ әԝ сәбьра хԝә ӧнда нәкә у тʹәви мәрьвед хԝә у кәсед дьн бь нәрми хәбәр дә.

16. Әм диса чь дькарьн дәрһәԛа хьзмәтийе хԝәндәкʹаре хԝә һин кьн?

¹⁶ Һәрге мәрьвед хԝәндәкʹаре тә дәрһәԛа һинкьрьнед мә пьрса бьдьне, ԝе баш бә кӧ әм пешда ле һин кьн, ԝәки әԝ һәр тьшти дәрбәкерʹа ԝанрʹа шьровәнәкә. Һәрге әԝ ӧса бькә, дьбәкә мәрьвед ԝи әʹщьз бьн у ида нәхԝазьн дәрһәԛа рʹастийе хәбәр дьн. Ләма жи бьра хԝәндәкʹаре тә кьн бәʹса рʹастийе бькә у мәщале бьһелә ԝәки щарәкә дьн жи һʹәԝаса ԝан пешда бе пьрса бьдьнә ԝи (Колоси 4:6). Дьбәкә хԝәндәкʹаре тә дькарә дина мәрьвед хԝә бькʹьшинә сәр малпәра jw.org. Ԝедәре әԝана дькарьн дьһа зедә информасийайе дәрһәԛа Шәʹдед Йаһоԝа бьстиньн.

17. Тӧ ча дькари хԝәндәкʹаре хԝә һин ки, ԝәки әԝ бькарьбә щаба ԝан мәрьва бьдә, йед кӧ Шәʹдед Йаһоԝа рʹьнд нас накьн? (Бьньһерʹә ӧса жи шькьл.)

¹⁷ Тӧ дькари бь сайа рʹеза готара бь наве «Пьрсед Гәләк Мәрийа», йа кӧ сәр малпәра jw.org һәйә, али хԝәндәкʹаре хԝә бьки, ԝәки әԝ бькарьбә һьнә щабед һеса һазьр кә, ԝәки щаба пьрсед мәрьвед хԝә у һәвалхәбатчийед хԝә бьдә (2 Тимотʹейо 2:24, 25). Ӧса жи бир нәкьн хьлазийа һәр дәрса жь кʹьтеба Ша бә Жийинерʹа Һʹәта-Һʹәтайе! бьԝәкʹьлиньн пʹара «Һьнә Мәрьв Дьбежьн». Хԝәндәкʹаре хԝәрʹа бежә, ԝәки әԝ пешда хԝә һазьр кә, кӧ бькарьбә щаба пьрсед дәрһәԛа баԝәрийа хԝә бьдә. Һәрге тӧ дьвини кӧ лазьм ә ԝәки әԝ дьһа зәлал баԝәрийа хԝә шьровәкә, али ԝи бькә. Ӧса әԝе бькарьбә бь мерхаси баԝәрийа хԝә бьпʹарезә.

18. Тӧ ча дькари хԝәндәкʹаре хԝә һелан ки мьзгинийе бәла кә? (Мәтта 10:27)

¹⁸ Иса шагьртед хԝәрʹа готьбу, кӧ әԝана һʹәму щийа мьзгинийе бәла кьн (Бьхунә Мәтта 10:27). Чьԛас зу хԝәндәкʹар дәстпекә мьзгинийе бәла кә, һаԛас зу әԝе аликʹарийа Йаһоԝа сәр хԝә тʹәхмин кә у һин бә дьһа зедә итʹбарийа хԝә ԝи бинә. Гәло тӧ ча дькари али хԝәндәкʹаре хԝә бьки, ԝәки әԝ хԝәрʹа нет дайнә мьзгинийе бәла кә? Мәсәлә, чахе щьватеда бе әʹламкьрьне кӧ кампанийа бона бәлакьрьна мьзгинийе ԝе һәбә, хԝәндәкʹаре хԝәрʹа бежә, кӧ әԝ бьфькьрә һәла әԝ һазьр ә бьбә мьзгинван йан на. Жерʹа шьровәкә кӧ ԝәʹде кампанийайе дьһа һеса йә мьзгинийе бәла кьн. Ӧса жи әԝ дькарә хԝәрʹа нет дайнә, ԝәки сәр щьвате пе дәрса дәркʹәвә. Әв йәк ԝе али ԝи бькә һин бә бь мерхасийе баԝәрийа хԝә избат кә.

ИТʹБАРИЙА ХԜӘ ХԜӘНДӘКʹАРЕ ХԜӘ БИНӘ

19. Иса ча баԝәрийа хԝә һьндава шагьртед хԝә дьда кʹьфше, у әм ча дькарьн чʹәʹв бьдьнә ԝи?

¹⁹ Пешийа кӧ Иса вәгәрʹийа әʹзмана, әԝи шагьртед хԝәрʹа гот кӧ әԝана ԝе диса тʹәвайи бьн. Ле шагьрта фәʹм нәдькьр кӧ әв йәк те һʹәсабе, ԝәки әԝана жи ԝе һәрʹьн сәр әʹзмана. Рʹаст ә шагьрта гәләк тьшт фәʹм нәдькьрьн, ле Иса дина хԝә дьда амьнийа ԝан, нә кӧ шькед ԝан, у баԝәр бу кӧ әԝана дьхԝазьн дьле Йаһоԝа ша кьн (Йуһʹәнна 14:1-5, 8). Әԝи заньбу кӧ ԝанрʹа ԝәʹдә лазьм ә ԝәки һьнә тьшта фәʹм кьн, мәсәлә ве йәке кӧ әԝана ԝе һәрʹьнә сәр әʹзмана (Йуһʹәнна 16:12). Ԝәрә әм жи чʹәʹв бьдьнә Иса у хԝәндәкʹаред хԝәрʹа бьдьнә кʹьфше кӧ әм дӧдьли набьн, ԝәки әԝана дьхԝазьн дьле Йаһоԝа ша кьн.

20. Малавйайеда хушкәке ча баԝәрийа хԝә хԝәндәкʹара хԝә ани?

²⁰ Әм гӧмана хԝә ӧнда накьн, кӧ хԝәндәкʹаред мә дьхԝазьн ԝан тьшта бькьн, чь кӧ рʹаст ә. Мәсәлә, ԝәрә әм дина хԝә бьдьнә сәрһатийа хушка мә Чифундо, йа кӧ Малавйайеда дьжи. Әԝе тʹәви жьнькәкә щаһьл бь наве Алинафе, йа кӧ Католик бу, бь сайа кʹьтеба Ша бә Жийинерʹа Һʹәта-Һʹәтайе! һинбуна Кʹьтеба Пироз дәстпекьр. Гава ԝана дәрса 14 хьлаз кьр, Чифундойе жь хԝәндәкʹара хԝә пьрси һәла әԝ дәрһәԛа һʹәбандьна пʹута чь дьфькьрә. Алинафе гәләк әʹщьз бу у гот: «Әв йәк сафикьрьна шәхси йә!» Чифундо дьфькьри кӧ әв жьньк ԝе тʹәрка һинбуна Кʹьтеба Пироз бьдә. Ле ӧса нәԛәԝьми. Чифундо бәрдәԝам дькьр бь сәбьр тʹәви Алинафе һинбуна Кʹьтеба Пироз дәрбаз кә, у баԝәр бу кӧ рʹожәке әԝе ве рʹастийа фәрз фәʹм бькә. Чәнд мәһ шунда, гава ԝана дәрса 34 лекʹолин дькьр, Чифундойе пьрс хԝәнд: «Һинбуна Кʹьтеба Пироз у занәбуна дәрһәԛа Йаһоԝа чь кʹар тәрʹа анинә?» Гәло Алинафе ча щаба ве пьрсе да? Чифундо ӧса дьбежә: «Әԝе бәʹса гәләк фькьред фәрз кьр. Мәсәлә, әԝе гот кӧ Шәʹдед Йаһоԝа хԝә жь тьштед кӧ Кʹьтеба Пироз ԛәдәхә дькә, дур дьгьрьн». Паши ве йәке, гәләк ԝәхт дәрбаз нәбу, кӧ Алинафе тʹәрка һʹәбандьна пʹута да у һатә ньхӧмандьне.

21. Әм ча дькарьн хԝәндәкʹаред хԝә һелан кьн, кӧ бьбьнә хьзмәткʹаред Йаһоԝа?

²¹ Рʹаст ә әм заньн, ԝәки йе кӧ «мәзьн дькә» Йаһоԝа йә, ле әм жи дькарьн али хԝәндәкʹаред хԝә бькьн, кӧ әԝана рʹӧһʹанида пешда һәрʹьн (1 Корьнтʹи 3:7). Бәс нинә ԝанрʹа бежьн кӧ Хԝәде чь жь ԝан дәʹԝа дькә. Әм гәрәке ӧса жи али ԝан бькьн кӧ Йаһоԝа һʹәз бькьн. Хенщи ве йәке әм гәрәке али ԝан бькьн жь һәр тьшти зедәтьр дина хԝә бьдьнә хԝәстьна Йаһоԝа у бь ви щурʹәйи һʹәзкьрьна хԝә ԝирʹа избат кьн. Ӧса жи әм гәрәке ԝана һин кьн, кӧ гава рʹасти тәнгасийа тен, ча дькарьн хԝә бьсперьнә Йаһоԝа. Әм гәрәке дӧдьли нәбьн, ԝәки хԝәндәкʹаред мә дькарьн ль гора принсипед Йаһоԝа бьжин у бьбьнә хьзмәткʹаред ԝийә хирәт.