ГОТАРА БОНА ҺИНБУНЕ 26
КʹЬЛАМА 123 Пәй Рʹебәрийа Тʹәшкиләта Хԝәде Дьчьн
Бь Мьлукти Ԛәбул кә ве Йәке, Чь кӧ Ньзани
«Чьԛаси кʹур ьн дәԝләмәндти, сәрԝахти у занәбуна Хԝәде! Гәло кʹи дькаре ԛьраред ԝи фәʹм бькә, у кʹи дькаре рʹийед ԝи бьзаньбә?» (РʹОМАЙИ 11:33).
ВЕ ГОТАРЕДА
Әме пебьһʹәсьн кӧ чахе әм ньзаньн чьрʹа фьлан тьшт дьԛәԝьмьн, йәкә әм дькарьн бәр чәтьнайа тәйах кьн һәрге әм итʹбарийа хԝә Йаһоԝа биньн у дәрһәԛа ԝан тьшта бьфькьрьн, чь кӧ әм заньн.
1. Йаһоԝа әм чаԝа әʹфьрандьнә у чьма?
ЙАҺОԜА әм ӧса әʹфьрандьнә, кӧ әм бькарьбьн бьфькьрьн, тьштед тʹәзә һин бьн у ль гора тьштед кӧ һин дьбьн, бьжин. Гәло чьма әԝи әм ӧса әʹфьрандьнә? Чьмки әԝ дьхԝазә ԝәки әм дәрһәԛа ԝи занәбуне бьстиньн у бь «һʹьш-аԛьле хԝә» ԝирʹа хьзмәт кьн (Мәтʹәлок 2:1-5; Рʹомайи 12:1).
2. а) Әм гәрәке чь ԛәбул кьн? (Рʹомайи 11:33, 34) (Бьньһерʹә ӧса жи шькьл.) б) Чьрʹа фәрз ә кӧ әм фәʹм кьн, ԝәки әм һәр тьшти ньзаньн?
2 Чьԛас жь дәсте мә те жи, ԝәки әм тьштед тʹәзә һин бьн, йәкә әм һәр тьшти ньзаньн (Бьхунә Рʹомайи 11:33, 34). Һәла дина хԝә бьдә сәрһатийа Ибо. Бь сайа чәнд пьрса, Йаһоԝа нишани Ибо кьр, ԝәки занәбуна ԝи чьԛас кем ә. Бь сайа ве хәбәрдане, Ибо фәʹм кьр кӧ гәрәке әԝ мьлук бә у ньһерʹандьна хԝә рʹаст кә (Ибо 42:3-6). Һәрге әм жи бь мьлукти ԛәбул кьн, кӧ әм һәр тьшти ньзаньн, әме баԝәр бьн, ԝәки Йаһоԝа ԝе мәрʹа әшкәрә кә ԝан тьшта кӧ мәрʹа бь рʹасти лазьм ә бьзаньбьн, ԝәки әм бькарьбьн сафикьрьнед баш бькьн (Мәтʹәлок 2:6).
Мина Ибо, ԝәрә әм жи ԛәбул кьн, кӧ әм һәр тьшти ньзаньн (Бьньһерʹә абзаса 2)
3. Ве готареда әме чь шеԝьр кьн?
3 Ве готареда әме шеԝьр кьн һьнә тьштед кӧ әм ньзаньн, у әме бьвиньн кӧ чьрʹа щарна жь бо ве йәке әʹмьре мә дьһа чәтьн дьбә. Ӧса жи әме пебьһʹәсьн, чьма баш ә кӧ әм һьнә тьшта ньзаньн. Әв йәк ԝе баԝәрийа мә дьһа ԛәԝи кә ве йәкеда, кӧ Йаһоԝа, йе кӧ «занина ԝи кʹамьл ә», ԝан тьшта, чь кӧ әм гәрәке бьзаньбьн мәрʹа әʹйан дькә (Ибо 37:16, ИМ).
ӘМ НЬЗАНЬН ХЬЛАЗИ ԜЕ КʹӘНГЕ БЕ
4. Ль гора Мәтта 24:36 әм чь ньзаньн?
4 Бьхунә Мәтта 24:36. Әм ньзаньн кӧ хьлазийа ве дьнйайе ԝе кʹәнге бе. Һәла һе Иса жи гава сәр әʹрде бу, ньзаньбу кӧ «әԝ рʹож у сьһʹәт ԝе кʹәнге бә».a Паше әԝи шандийед хԝәрʹа гот, кӧ тʹәне Йаһоԝа сафи дькә, ԝәки һьнә тьшт кʹәнге гәрәке бьԛәԝьмьн (Кʹаред Шандийа 1:6, 7). Йаһоԝа сафи кьрийә кӧ хьлазийа ве дьнйайе ԝе кʹәнге бе, ле әм нькарьн тедәрхьн кӧ әв йәк ԝе кʹәнге бьԛәԝьмә.
5. Әв йәк кӧ әм ньзаньн ԝәки хьлази ԝе кʹәнге бе, ча дькарә сәр мә һʹӧкӧм кә?
5 Жь гьлийед Иса әшкәрә йә, кӧ әм ньзаньн чьԛас гәрәке һивийе бьн, һʹәта хьлази бе. Ләма жи дьбәкә әм сәбьра хԝә ӧнда кьн у дьлтәнг бьн, илаһи һәрге әм ида гәләк сал һивийа ԝе рʹоже нә. Йан жи дьбәкә мәрʹа чәтьн ә һьмбәри ԛәрфед мәрьвед хԝә йан мәрьвед дьн сәбьр кьн (2 Пәтрус 3:3, 4). Дьбәкә әм дьфькьрьн кӧ һәрге мә бьзаньбуйа кӧ хьлази ԝе кʹәнге бе, ԝе мәрʹа дьһа һеса буйа сәбьр кьн.
6. Чьма баш ә кӧ әм ньзаньн ԝәки хьлази ԝе кʹәнге бе?
6 Бь сайа ве йәке кӧ Йаһоԝа мәрʹа әшкәрә нәкьрийә ԝәки хьлази ԝе кʹәнге бе, мәщала мә һәйә нишан кьн, ԝәки әм жь һʹәзкьрьне ԝирʹа хьзмәт дькьн у итʹбарийа хԝә ԝи тиньн. Әм дьхԝазьн нә тʹәне һʹәта хьлазийа ве дьнйайе, ле һʹәта-һʹәтайе Йаһоԝарʹа хьзмәт кьн. Ләма жи дәԝса кӧ һәри зедә дина хԝә бьдьнә ве йәке, кӧ «Рʹожа Хԝәде» ԝе кʹәнге бе, ԝәрә әм дина хԝә бьдьн тьштед баш, йед кӧ ԝе паши ԝе рʹоже бьԛәԝьмьн. Әв йәк ԝе али мә бькә дьһа незики Хԝәде бьн у чь жь дәсте мә те бькьн, ԝәки дьле ԝи ша кьн (2 Пәтрус 3:11, 12).
7. Әм чь заньн?
7 Ԝәрә әм бир нәкьн кӧ әм чь заньн. Мәсәлә, әм заньн кӧ рʹожед хьлазийе сала 1914-да дәстпебунә. Бь сайа Кʹьтеба Пироз, Йаһоԝа пешда мәрʹа әʹйан кьрийә, кӧ рʹожед хьлазийе ԝе жь ве сале дәстпебьн у паши ве йәке һʹале дьнйайе ԝе ча бе гӧһастьне. Ләма жи әм баԝәр ьн, кӧ «рʹожа мәзьн йа Хӧдан незик ә» (Сефанйа 1:14, ИМ). Ӧса жи әм заньн, кӧ Йаһоԝа дьхԝазә ԝәки әм «мьзгинийа Пʹадшатийе» бәла кьн (Мәтта 24:14). Әв мьзгини иро ԝәкә 240 ԝәлат у һәремада сәр 1 000 зьмани зедәтьр те бәлакьрьне. Сәва кӧ әм ви шьхӧли бь дьл у щан биньн сери, нәлазьм ԝәки әм «рʹож у сьһʹәт» бьзаньбьн.
ӘМ НЬЗАНЬН КӦ ЙАҺОԜА ԜЕ ЧА АЛИ МӘ БЬКӘ
8. «Кʹаре Хԝәде» чь те һʹәсабе? (Ԝаиз 11:5)
8 Щарна әм «кʹаре Хԝәде» ньзаньн (Бьхунә Ԝаиз 11:5‚ ИМ). «Кʹаре Хԝәде» те һʹәсабе һьм тьштед кӧ Йаһоԝа хԝәха дькә, һьм жи тьштед кӧ әԝ изьне дьдә ԝәки бьԛәԝьмьн. Әм бь тʹәмами ньзаньн кӧ Йаһоԝа чьрʹа изьне дьдә, ԝәки һьнә тьшт бьԛәԝьмьн, у әм ӧса жи ньзаньн кӧ әԝе ча али мә бькә (Зәбур 37:5). Мәсәлә йәк жь «кʹаре Хԝәде», кӧ әм жь ве һʹәйр-һʹӧжмәкʹар дьминьн, әԝ ә, кӧ зарʹ зьке дийа хԝәда ча мәзьн дьбә. Һʹәта иро жи зандар бь тʹәмами ньзаньн, кӧ ча әв йәк дьԛәԝьмә. Мина ве йәке, әм жи бь тʹәмами ньзаньн, кӧ Хԝәде ԝе ча али мә бькә.
9. Жь бо ве йәке кӧ әм ньзаньн Йаһоԝа ԝе ча али мә бькә, дьбәкә әм рʹасти чь чәтьнайа бен?
9 Әм ньзаньн Йаһоԝа ԝе ча али мә бькә, ләма жи дьбәкә әм бьтьрсьн һьнә сафикьрьна бькьн. Мәсәлә, дьбәкә әм ньзаньн ԝе баш бә йан на, кӧ әм әʹмьре хԝә һеса кьн сәва кӧ һе зедә хьзмәт кьн, йан һәрʹьн ԝан щийа, кʹидәре кӧ мьзгинван һьндьк ьн. Йан гава әм нькарьн бьгьһижьнә нетед хԝәйә рʹӧһʹани, йан жи гава әм хьзмәтийеда хирәт ьн ле бәред баш навиньн, йан гава әм шьхӧләки тʹәшкиләтеда рʹасти чәтьнайа тен, дьбәкә әм дӧдьли бьн кӧ Йаһоԝа жь мә рʹази йә.
10. Жь бо ве йәке кӧ әм ньзаньн ԝәки Йаһоԝа ԝе ча али мә бькә, әм гәрәке кʹижан һʹӧнӧред фәрз пешда биньн?
10 Әв йәк кӧ әм ньзаньн ԝәки Йаһоԝа ԝе ча али мә бькә, дьдә кʹьфше кӧ әм гәрәке мьлук бьн у синоред хԝә бьзаньбьн, чьмки фькьр у рʹийед Йаһоԝа жь йед мә бьльндтьр ьн (Ишайа 55:8, 9). Ӧса жи әв йәк нишани мә дькә, кӧ әм гәрәке хԝә һе зедә бьсперьнә Йаһоԝа у баԝәр бьн, кӧ әԝе бь щурʹе лапи баш бона мә хәм бькә. Гава әм хьзмәтийеда йан жи шьхӧләки тʹәшкиләтеда бәред баш дьвиньн, әм пәсьне Йаһоԝа дьдьн (Зәбур 127:1; 1 Корьнтʹи 3:7). Гава тьштәк нә ль гора дьле мә дьԛәԝьмә, әм гәрәке биньн бира хԝә кӧ һәр тьшт бьн контрола Йаһоԝада йә (Ишайа 26:12). Ләма жи ԝәрә әм чь жь дәсте мә те бькьн у баԝәр бьн, кӧ Йаһоԝа ԝе али мә бькә. Һәрге әԝ бона мә ӧса кʹәрәмәта нәкә, чаԝа кӧ әԝи бона хьзмәткʹаред хԝәйә бәре дькьр, йәкә әм баԝәр ьн кӧ әԝе рʹебәрийе мә бькә (Кʹаред Шандийа 16:6-10).
11. Әм кʹижан тьштед фәрз заньн?
11 Бьфькьрьн кӧ әм дәрһәԛа Йаһоԝа чь заньн. Мәсәлә әм заньн кӧ Йаһоԝа бь һʹәзкьрьн ә у әԝ һәԛ у билани ә. Ӧса жи әм заньн, кӧ әԝ ԛимәт дькә чь кӧ әм бона ԝи у хушк-бьра дькьн. У әм заньн кӧ Йаһоԝа тʹьме мәрьвед амьн хәлат дькә (Ибрани 11:6).
ӘМ НЬЗАНЬН СЬБЕ ԜЕ ЧЬ БЬԚӘԜЬМӘ
12. Ль гора Аԛуб 4:13, 14, әм чь ньзаньн?
12 Бьхунә Аԛуб 4:13, 14. Тʹӧ кәс ньзанә кӧ сьбе ԝе чь бьԛәԝьмә. Ве дьнйайеда гәләк тьшт ньшкева дьԛәԝьмьн у әм нькарьн контрол кьн (Ԝаиз 9:11). Ләма жи әм ньзаньн кӧ әме бьгьһижьнә нетед хԝә йан на. Әм һәла һе жи ньзаньн, әме һʹәта сьбе сах бьминьн йан на.
13. Әв йәк кӧ әм ньзаньн сьбе ԝе чь бьԛәԝьмә, ча дькарә сәр мә һʹӧкӧм бькә?
13 Әв йәк кӧ әм ньзаньн сьбе чь ԝе бьԛәԝьмә, дькарә бьбә сәбәб кӧ әм бәр хԝә кʹәвьн у шабуна хԝә ӧнда кьн. Гава ньшкева тьштед хьраб дьԛәԝьмьн, әм хәмгин дьбьн. Ӧса жи гава гӧмана мә найе сери, дьбәкә әм дьлтәнг бьн (Мәтʹәлок 13:12).
14. Шабуна мә бь рʹасти чьва гьредайи йә? (Бьньһерʹә ӧса жи шькьл.)
14 Гава әм бәр чәтьнайа тәйах дькьн, әм избат дькьн ԝәки чь жи бьԛәԝьмә, әм нә кӧ сәва кʹара хԝә Йаһоԝа Хԝәдерʹа хьзмәт дькьн, ле чьмки әм ԝи һʹәз дькьн. Сәрһатийед хьзмәткʹаред Йаһоԝа, йед кӧ ԝәʹде бәре дьжитьн, мәрʹа дьдьнә кʹьфше ԝәки әм гәрәке нәфькьрьн кӧ Йаһоԝа ԝе мә жь һʹәму тәнгасийа бьпʹарезә. Әԝи ӧса жи ахьрийа мә сәр әʹнийа мә нәньвисийә. Әԝ занә кӧ шабуна мә ве йәкева гьредайи нинә, кӧ әм бьзаньбьн ахьрийеда чь ԝе бьԛәԝьмә. Бь рʹасти шабуна мә ве йәкева гьредайи йә, кӧ әм ль гора рʹебәрийа ԝи бьжин у гӧһдарийа ԝи бькьн (Йерәмйа 10:23). Гава әм дьхԝазьн тьштәки бькьн, ԝәрә әм ӧса бежьн: «Һәгәр Хӧдан бьхԝазә, әме бьжин у фьлан йан беван тьшти бькьн» (Аԛуб 4:15).
Һәрге әм рʹебәрийа Йаһоԝа бьгәрʹьн у гӧһдарийа ԝи бькьн, әме бенә пʹарастьне (Бьньһерʹә абзаса 14-15)b
15. Әм дәрһәԛа ахьрийе чь заньн?
15 Рʹаст ә әм ньзаньн сьбе ԝе чь бьԛәԝьмә, ле әм заньн ԝәки Йаһоԝа соз дайә кӧ әԝе әʹмьре һʹәта-һʹәтайе бьдә мә, йан сәр әʹзмана йан жи сәр әʹрде. Әм заньн кӧ әԝ нькарә дәрәԝа бькә, у тʹӧ тьшт нькарә бьбә мәʹни ԝәки әԝ созед хԝә нәйнә сери (Тито 1:2). Тʹәне Йаһоԝа Хԝәде дькарә «жь бәреда ве йәке, чь кӧ һе нәбуйә» бежә. Чаԝа кӧ бәре хәбәред ԝи дьһатьнә сери, ӧса жи ахьрийеда ԝе бенә сери (Ишайа 46:10, ДТʹ). Әм рʹьнд заньн кӧ тʹӧ тьшт нькарә рʹийа Йаһоԝа бьгьрә, ԝәки әԝ мә һʹәз кә (Рʹомайи 8:35-39). Әʹмьре мәда чь жи бьԛәԝьмә, әԝе биланийе, дьлрʹьһʹәтийе у ԛәԝате бьдә мә, ԝәки әм бькарьбьн тәйах кьн. Әм дькарьн баԝәр бьн, ԝәки Йаһоԝа ԝе али мә бькә у мә кʹәрәм кә (Йерәмйа 17:7, 8).
ӘМ БЬ ТʹӘМАМИ ФӘʹМ НАКЬН КӦ ЙАҺОԜА ЧЬԚАС РʹЬНД МӘ НАС ДЬКӘ
16. Ль гора Зәбур 139:1-6, занәбуна Йаһоԝа чьԛас мәзьн ә?
16 Бьхунә Зәбур 139:1-6. Әʹфьрандаре мә Йаһоԝа дәрһәԛа мә һәр тьшти занә. Мәсәлә, әԝ занә кӧ мәʹнийед фькьр у һәстед мә чь нә. Әԝ тʹьме дькʹәвә һʹәйра мә. Әԝ занә кӧ әм чь дьбежьн, чь дькьн у чьма. Чаԝа кӧ Даԝьд Пʹадша готьбу, Йаһоԝа тʹьме һазьр ә мә бьпʹарезә у али мә бькә. Ԛәдьрәки чьԛас мәзьн ә кӧ Хԝәйе әʹрд у әʹзмана ӧса дина хԝә дьдә мә! Әм жи мина Даԝьд хԝә тʹәхмин дькьн, йе кӧ гот: «Әв занәбун жь һʹьше мьн дәр ә, нькарьм бьгьһижьме, гәләки кʹур ә» (Зәбур 139:6).
17. Чьрʹа һьнәкарʹа чәтьн ә баԝәр кьн, кӧ Йаһоԝа мә рʹьнд нас дькә?
17 Жь бо култура мә, баԝәрийа мәйә бәре, йан жь бо тьштед кӧ малбәта мәда ԛәԝьмибун, дьбәкә мәрʹа чәтьн бә баԝәр кьн, кӧ Йаһоԝа Бавәки бь һʹәзкьрьн ә у дькʹәвә һʹәйра мә. Йан жи дьбәкә әм жь бо шашийед хԝәйә бәре бьфькьрьн кӧ Йаһоԝа жь мә дур ә у нахԝазә незики мә бә. Даԝьд Пʹадша жи щара ӧса дьфькьри (Зәбур 38:18, 21). Дьбәкә мәрьве кӧ хирәт дькә ԝәки әʹмьре хԝә бьгӧһезә у ль гора ԛанунед Хԝәде бьжи, жь хԝә ӧса бьпьрсә: «Һәрге Хԝәде мьн фәʹм дькә, әԝ чьма дьхԝазә ԝәки әз тʹәрка жийина ви щурʹәйи бьдьм, кʹижан кӧ мьн хԝәш те?»
18. Әм чь кʹаре дьстиньн гава фәʹм дькьн, кӧ Йаһоԝа мә дьһа баш нас дькә, нә кӧ әм хԝәха? (Бьньһерʹә ӧса жи шькьл.)
18 Әм гәрәке ԛәбул кьн кӧ Йаһоԝа дьһа баш мә нас дькә, нә кӧ әм хԝәха у әԝ дькарә фәрәсәтед мәйә баш бьвинә, һәрге жи әм ԝан фәрәсәта навиньн. Рʹаст ә әԝ шашийед мә дьвинә, ле әԝ ӧса жи занә кӧ әм чьрʹа ԝан шашийа дькьн, у диса жи әԝ мә һʹәз дькә (Рʹомайи 7:15). Әм гәрәке ԛәбул кьн, кӧ Йаһоԝа занә ԝәки әм чь дькарьн бькьн у чь на. Әв йәк ԝе али мә бькә у ԛәԝате бьдә мә, ԝәки әм бь амьни у шабуне ԝирʹа хьзмәт кьн.
Йаһоԝа баԝәрийа мә һьндава дьнйа тʹәзә дьһа ԛәԝи дькә, сәва кӧ әм бькарьбьн бәр чәтьнайед кӧ ньшкева дьԛәԝьмьн, тәйах кьн. (Бьньһерʹә абзаса 18-19)c
19. Әм дәрһәԛа Йаһоԝа чь рʹьнд заньн?
19 Йәк жь ԝан тьшта чь кӧ әм заньн әв ә, кӧ Йаһоԝа һʹәзкьрьн ә (1 Йуһʹәнна 4:8). Жь ԛанунед ԝи әшкәрә йә, кӧ әԝ мә һʹәз дькә у кʹара мә дьхԝазә. Әԝ дьхԝазә ԝәки әм әʹмьре һʹәта-һʹәтайе бьстиньн. Ләма жи әԝи кʹьрʹин бона мә дайә. Чьԛас кемасийед мә һәбьн жи, кʹьрʹин мәщала әʹмьре һʹәта-һʹәтайе дьдә мә (Рʹомайи 7:24, 25). Ӧса жи «Хԝәде жь дьле мә мәстьр ә у һәр тьшти занә» (1 Йуһʹәнна 3:19, 20). Бәле, Йаһоԝа дәрһәԛа мә һәр тьшти занә, у әԝ баԝәр ә кӧ әм дькарьн хԝәстьна ԝи биньн сери.
20. Чь ԝе али мә бькә ԝәки әм бона тьштед кӧ ньзаньн, бь зедәйи бәр хԝә нәкʹәвьн?
20 Йаһоԝа мәрʹа һәр тьшти, чь кӧ лазьм ә әм бьзаньбьн, әʹйан дькә. Чахе әм ве йәке бь мьлукти ԛәбул дькьн, әм бь зедәйи бона тьштед кӧ дәсте мәда ниньн, бәр хԝә накʹәвьн, ле дина хԝә дьдьнә тьштед фәрз. Бь ви щурʹәйи әм дьдьнә кʹьфше, кӧ әм хԝә дьсперьнә Йаһоԝа, занәбуна кʹижани кӧ кʹамьл ә (Ибо 36:4). Рʹаст ә әм һәр тьшти ньзаньн, ле әм бь дьл у щан һивийе нә кӧ Хԝәде ԝе мә һʹәта-һʹәтайе һин кә, у әме дәрһәԛа ԝи тьштед тʹәзә һин бьн (Ԝаиз 3:11).
КʹЬЛАМА 104 Рʹӧһʹе Пироз Пʹешкʹеша Хԝәде йә
a Иса ԝе дьнйа Мире-щьна кʹӧта кә, ләма жи логики йә кӧ әԝ ида занә ԝәки Һармәгәдон ԝе кʹәнге дәстпебә у әԝе кʹәнге «сәркʹәвә» (Әʹйанти 6:2; 19:11-16).
b ШЬРОВӘКЬРЬНА ШЬКЬЛА: Мерәк у кӧрʹе ԝи чәнтʹе бона рʹәве һазьр дькьн. Әԝана тьштед лазьм у Кʹьтеба Пироз дькьне.
c ШЬРОВӘКЬРЬНА ШЬКЬЛА: Бьраки кӧ дьлтәнг ә дәрһәԛа дьнйа тʹәзә дьфькьрә.