Шәрʹ, Шәрʹе Йаһоԝа йә!

Проблем сала 1999-да пешда һат. Ԝе сале, дәԝләта Франсайе хԝәстьбу ԝәки әм бона ԛӧрбанкьрьнед кӧ жь сала 1993 һʹәта сала 1996 шандьбунә Бәйтʹәла Франсайе, хәрщ бьдьн. Серида әм чун диԝанед Франсайе, ле һʹәму тьшт бадиһәԝа бу. Чахе мә диԝана апиласийонеда да дәр, дәԝләте жь һʹәсабе Бәйтʹәле йа банкеда зедәтьри 4,5 милйон евро һьлдан. Ләма жи пʹарастьна мафед хԝә бәр Диԝана Әԝропайе йа Мафе Мәрьва, мәщала мәйә пашьн бу. Ле пешийа кӧ диԝане дәстпекьра шьхӧле мә сафи кә, ԝана хԝәст кӧ әм у һьнә ԛанунзанед дәԝләте, рʹасти һәв бен сәва кӧ бәр секретара диԝане бьщерʹьбиньн, һәла әм дькарьн бенә сәр нетәке йан на.

Әм дьфькьрин кӧ секретар ԝе зоре мә бькә, ԝәки әм һьнә пʹәре кӧ дәԝләте жь мә дьхԝәст, бьдьн у проблеме бь ви щурʹәйи сафи кьн. Ле мә фәʹм дькьр кӧ һәрге әм һәма евроки жи бьдьн, әв йәк ԝе мьԛабьли принсипед Кʹьтеба Пироз бә. Хушк-бьра пʹәре хԝә бона шьхӧле Пʹадшатийа Хԝәде ԛӧрбан кьрьбун, ләма жи әв пʹәрә йа дәԝләте нибу (Мәтта 22:21). Ле диса жи, әм ль гора хԝәстьна диԝане чунә ве щьвине.

Щьвин диԝанеда, одәкә бәдәԝда дәрбаз бу. Серида әм һьнәки бәр хԝә кʹәтьн. Секретаре гот кӧ әԝ һивийе йә ԝәки Шәʹдед Йаһоԝа пʹарәкә жь хәрще кӧ дәԝләте дьхԝәст, бьдьн. Ле рʹӧһʹе пироз мә һелан кьр жь ԝе бьпьрсьн: «Гәло һун заньн кӧ дәԝләте ида зедәтьри чар у нив милйон евро жь һʹәсабе мәйә банкеда жь мә стандийә?»

Һатә кʹьфше, ԝәки секретар әʹщебмайи ма. Гава ԛанунзанед дәԝләте готьн кӧ ԝана бь рʹасти ӧса кьрьбу, ньһерʹандьна секретаре бь тʹәмами һатә гӧһастьне. Әԝ сәр ԝан һерс кʹәт у хәбәрдан дәрберʹа хьлаз кьр. Һьнге мьн фәʹм кьр, ԝәки Йаһоԝа һәр тьшт бь щурʹәки ӧса гӧһаст, кӧ әм нә жи һивийе бун. Гава әм жь ԝедәре чун, әм гәләк ша бун.

Сала 2011-да, 30 Һʹәзиране һʹәму һʹакьмед Диԝана Әԝропайе йа Мафе Мәрьва бь дәнгәки сафи кьрьн, ԝәки хәрща сәр ԛӧрбанед мә бәтал кьн у жь дәԝләте дәʹԝа кьрьн, ԝәки әԝана пʹәре кӧ жь мә стандьбун, у сәрда һе зедә пʹәрә вәгәрʹиньнә мә. Һʹәта иро жи, әв сафикьрьна фәрз һʹәбандьна Шәʹдед Йаһоԝа йед ль Франсайе дьпʹарезә. Мина кәвьре кӧ әʹнийа Голйатʹ кʹәтьбу, пьрса кӧ мә ньшкева пьрси, ахьрийа сафикьрьна диԝане гӧһаст. Гәло әм чьрʹа сәр кʹәтьн? Чьмки чаԝа кӧ Даԝьд Голйатʹрʹа готьбу, «шәрʹ, шәрʹе Хӧдан ә» (1 Самуйел 17:45-47, ИМ).

Һʹәта ньһа, әм гәләк щар сәр кʹәтьнә. Ԝәʹде пәйкʹәтьнед жь алийе дәԝләте у религийайе, диԝанед һәри бьльнд йед 70 ԝәлата у ӧса жи чәнд диԝанед һʹәмдьнйайе, 1 225 сафикьрьнед бона кʹара Шәʹдед Йаһоԝа кьрьнә. Бь сайа ван сәркʹәтьна, мафед мә тенә пʹарастьне, мәсәлә һәԛе мә кӧ әм ча религийәкә офисйали бенә ԛәбулкьрьне, ԝәки әм мьзгинийе бәла кьн, кӧ әм тʹәви политикайе нәбьн у хуне бәри хԝә нәдьн.

Ле әз ча кʹәтьмә нав диԝана Әԝропайе, һәрге ԝи чахи мьн ль Офиса Сәрәкә йа Шәʹдед Йаһоԝа кӧ ль Нийу Йорке йә, хьзмәт дькьр?

ХИРӘТА ДЕ-БАВЕ МЬН СӘР МЬН ҺʹӦКӦМ КЬРИЙӘ

Әз ль Әтйопйайе сала 1956-да һатьмә буйине. Дийа мьн Луси у баве мьн Щорщ кʹома 12 йа Мәкʹтәба Гиләде хьлаз кьрьбун у ԝедәре хьзмәт дькьрьн. Ԝана наве мьн дани Филип, мина наве Филипо, йе кӧ ԛьрʹна йәкеда мьзгинванәки хирәт бу (Кʹаред Шандийа 21:8). Саләк шунда дәԝләта Әтйопйайе һʹәбандьна мә ԛәдәхә кьр. Һьнге әз гәләк бьчʹук бум, ле рʹьнд те бира мьн кӧ малбәта мьн ча дьзикава Йаһоԝарʹа хьзмәт дькьр. Әз зарʹ бум, ләма жи әв йәк гәләк мьн хԝәш дьһат! Сәд һʹәйф кӧ сала 1960-да, әм жь Әтйопйайе һатьнә дәрхьстьне.

Әм Дәԝләте Йәкбуйида, бажаре Ԝичитайеда щиԝар бун. Де-баве мьн хирәта хԝәйә бона бәлакьрьна мьзгинийе тʹӧ щара ӧнда нәдькьрьн. Әԝана ль гора рʹастийа Кʹьтеба Пироз дьжитьн, у ԝана али мьн, хушка мьнә мәзьн Щуди у бьре мьни бьчʹук Лесли дькьрьн, йед кӧ мина мьн ль Әтйопйайе һатьнә буйине, ԝәки әм Йаһоԝа һʹәз бькьн у жерʹа хьзмәт кьн. Гава әз 13 сали бум, әз һатьмә ньхӧмандьне. Се сал шунда, әм дәрбази ԝәлате Перуйе бун, чьмки ԝедәре мьзгинван һьндьк бун.

Сала 1974-да, гава әз 18 сали бум, Бәйтʹәла Перуйе әз у чар бьред дьн ча пешәнгед мәхсус кʹьфш кьрьн. Щабдарийа мә әв бу ԝәки мьзгинийе щийед дур, нав Чʹийайед Андеда бәла кьн. Мәсәлә, мә шәʹдәти дьда щьмәʹта Кечуа у Аймара. Әм бь әʹрәбәки, йа кӧ мина ԛӧтʹикә мәзьн бу, дьчунә ԝан щийа. Әз гәләк ԛимәт дькьм ԝан биранина, кӧ бь сайа Кʹьтеба Пироз мә нишани мәрьва дькьр, кӧ дәмәкә незикда, Йаһоԝа ԝе кʹәсибийе, нәхԝәшийе у мьрьне бьдә һьлдане (Әʹйанти 21:3, 4). Гәләк жь ԝан мәрьва мьзгинийа Пʹадшатийе ԛәбул кьрьн.

ХЬЗМӘТИЙА ЛЬ ОФИСА СӘРӘКӘ

Сала 1977-да, бьре мә Алберт Шредер, йе кӧ әндәме Кʹома Рʹебәрийе йа Шәʹдед Йаһоԝа бу, һатә Перуйе. Әԝи мьнрʹа гот, ԝәки бланка бона хьзмәтийа Бәйтʹәледа тʹьжә кьм. Мьн ӧса жи кьр. Сала 1977-да, 17 Һʹәзиране, мьн Бәйтʹәла Бруклинеда дәстпекьр хьзмәт кьм. Чар сал мьн Идара Паԛьжкьрьнеда у Идара Ленерʹина Текʹьникеда хьзмәт дькьр.

Мәһа Һʹәзиране, сала 1978-да, сәр щьвата мәзьнә һʹәмдьнйайе йа кӧ ль Луисйанайе дәрбаз дьбу, мьн хушкәкә бь наве Елизабет Авалон нас кьр. Мина де-баве мьн, де-баве ԝе жи ль гора рʹастийа Кʹьтеба Пироз дьжитьн. Елизабете чар сал ча пешәнга һәртʹьм хьзмәт кьрьбу, у әԝе хьзмәтийа хԝә гәләк һʹәз дькьр. Мә дьһа баш һәвдӧ нас кьр, у гәләк ԝәхт дәрбаз нәбу кӧ дьле мә кʹәтә һәв. Сала 1979-да, 20 Щотмәһе әм зәԝьщин у мә тʹәвайи дәстпекьр Бәйтʹәледа хьзмәт кьн.

Хушк-бьред жь щьвата «Бруклин Испани», йа кӧ щьвата мәйә пешьн бун, гәләк дьлован бун. Нава салада мә се щьват гӧһаст, у хушк-бьред жь ԝан щьвата жи гәләк дьлован бун у хьзмәтийа мәйә Бәйтʹәледа пьштгьрийа мә дькьрьн. Әм бона аликʹарийа ԝан у һьм жи бона аликʹарийа һәвал у мәрьвед мә, гәләк рʹази нә, йед кӧ али мә дькьрьн мьԛати де-бавед мәйи әʹмьрда мәзьн бьн.

ХЬЗМӘТИЙА ЛЬ ИДАРА ԚАНУНЗАНИЙЕ

Әз гәләк әʹщебмайи мам гава мәһа Чьләйе, сала 1982-да, Бәйтʹәле әз дәрбази Идара Ԛанунзанийе кьрьм. Се сал шунда, ԝана әз шандьмә занингәһе ԝәки бьбьмә адвокат. Занингәһеда әз пеһʹәсийам, кӧ азайа мафед сәрәкә йа ль Америкайе у гәләк ԝәлатед дьнда бь сайа сәркʹәтьнед диԝанеда, йед Шәʹдед Йаһоԝа һатьбун дәстуркьрьне. Әԝ сәркʹәтьнед фәрз ԝәʹде дәрса гәләк щара дьһатьнә шеԝьркьрьне.

Сала 1986-да, гава әз 30 сали бум, әз ча бәрпьрсийаре Идара Ԛанунзанийе һатьмә кʹьфшкьрьне. Әз гәләк щаһьл бум, ләма жи әз һьм ша бум, һьм жи һьнәки дьтьрсийам, чьмки әв щабдарикә гәләк мәзьн бу.

Сала 1988-да, әз бум адвокат, ле мьн тедәрнәдьхьст ԝәки һинбуна кӧ мьн стандьбу, зьрарәкә чьԛас мәзьн дабу рʹӧһʹанийа мьн. Хԝәндьна бьльнд дькарә бьбә сәбәб, кӧ мәрьв хԝә жь кәсед дьн, йед кӧ хԝәндьна ӧса нәстандьнә, дьһа бьльнд һʹәсаб кьн у пәй навдарийе кʹәвьн. Ле шькьр кӧ Елизабете али мьн кьр, ԝәки әз тьштед кӧ мьн пешийа һинбуне, бона Йаһоԝа дькьр, диса бькьм. Ԝәхт лазьм бу, ле һеди-һеди әз диса незики Йаһоԝа бум. Мьн рʹьнд фәʹм кьр, кӧ әʹмьре мәда хԝәндьна бьльнд, тьште лапи фәрз нинә. Ле әʹмьре мәда тьште һәри фәрз әв ә, кӧ әм незики Йаһоԝа бьминьн у ԝи у хьзмәткʹаред ԝи бь дьл у щан һʹәз бькьн.

ПʹАРАСТЬНА МЬЗГИНИЙЕ БЬ ԚАНУНИ

Паши хьлазкьрьна занингәһе, мьн бона һʹәԝщед Бәйтʹәле алийе ԛанунеда хәм дькьр у шьхӧле Пʹадшатийа Хԝәде диԝанеда дьпʹараст. Тʹәшкиләта мә зу мәзьн дьбу у гәләк гӧһастьн теда дьԛәԝьмин, ләма жи рʹаст ә шьхӧле мьн һʹәԝас бу, ле һеса нибу. Мәсәлә, бәре мә кьрьбу ԛәйдә кӧ бона әʹдәбйәтед хԝә ԛӧрбана бьхԝазьн, ле сала 1990-да Кʹома Рʹебәрийе жь Идара Ԛанунзанийе аликʹарийе хԝәст, ԝәки әм ве ԛәйде бьгӧһезьн. Жь ԝи чахи Шәʹдед Йаһоԝа әʹдәбйәтед хԝә ида бе пʹәрә бәла дькьн. Ԛәйде тʹәзә шьхӧле Бәйтʹәле дьһа һеса кьр у һʹәта иро мә жь проблемед кӧ хәрщед дәԝләтева гьредайи нә, дьпʹарезә. Һьнә кәс дьфькьрин кӧ жь бо ве гӧһастьне, әме бепʹәрә бьминьн у нькарьбьн әʹдәбйәта бона бәлакьрьне дәрхьн, ләма жи мәрьв ԝе нькарьбьн рʹастийе пебьһʹәсьн у бенә сәр рʹийа рʹастийе. Ле һәр тьшт бь щурʹәки дьн ԛәԝьми. Жь сала 1990 һәжмара хьзмәткʹаред Йаһоԝа ԝәкә дӧ щара зедә бу, у иро мәрьв дькарьн бепʹәрә хԝарьна рʹӧһʹани бьстиньн. Мьн пе чʹәʹве хԝә дит кӧ тʹәне бь сайа ԛәԝата Йаһоԝа у рʹебәрийа кӧ әԝ бь сайа хӧламе амьн дьдә, гӧһастьнед ӧса кʹаре тиньн (Дәркʹәтьн 15:2; Мәтта 24:45).

Сәркʹәтьнед диԝанада нә тʹәне ахьрийа шьхӧле адвокатед баш ә. Гәләк щара рʹабун-рʹуньштьна баш йед Шәʹдед Йаһоԝа сәр дьле һʹакьм у сәрԝера һʹӧкӧм дькьн. Мәсәлә, сала 1998-да, гава се әндәмед Кʹома Рʹебәрийе у жьнед ԝан бона щьвата мәзьнә мәхсус чун Кубайе, ԛәдьр у ԛәнщийа ԝан дьһа зедә сәр сәрԝера һʹӧкӧм кьр у ԝана да баԝәркьрьне, кӧ әм бь рʹасти накʹәвьнә нав шьхӧле политики, нә кӧ хәбәрданед мәйә тʹәви ԝан бь офисйали.

Диса жи, әм щарна мәщбур ьн кӧ диԝанада мафед хԝә бьпʹарезьн (Филипи 1:7). Мәсәлә, дәԝләтед Әԝропа у Корейа Башуре бь гәләк сала һәԛе мә кӧ ԛӧльха әскәрийе инкʹар кьн, ԛәбул нәдькьр. Ԝәкә 18 000 бьред ль Әԝропайе у зедәтьри 19 000 бьред ль Корейа Башуре жь бо ве йәке кӧ исафа ԝан изьн нәдьда ԝан ԝәки һәрʹьнә әскәрийе, кʹәтьнә кәле.

Сала 2011-да, 7 Тирмәһе, Диԝана Әԝропайе йа Мафе Мәрьва пьрса Байатйан В. жь Әрмәнистане сафи кьр, ԝәки һʹәму дәԝләтед Әԝропайе гәрәке мәщале бьдьн кӧ мәрьв дәԝса ԛӧльха әскәри, һәрʹьнә ԛӧльха алтернатив. Паши ве сафикьрьне, 28 Һʹәзиране сала 2018-да, Диԝана Конститусийайә Корейа Башуре жи сафикьрьнәкә ӧса кьр. Һәрге һәма чәнд бьред мәйи щаһьл тʹәвнәбуйине хԝәй нәкьрана, мәйе ве диԝанеда сәр нәкʹәта.

Идара Ԛанунзанийе у бьред щабдар Бәйтʹәледа бь хирәт бона пʹарастьна мафед мә дьхәбьтьн. Әм гәләк ша нә кӧ әм дькарьн али хушк-бьра бькьн, йед кӧ жь алийе дәԝләтева рʹасти пәйкʹәтьна тен. Һәрге әм щарна сәр накʹәвьн жи, ԝәкʹил, пʹадша у мьләт бь сайа диԝанед мә мьзгинийа Пʹадшатийе дьбьһен (Мәтта 10:18). Рʹезед кӧ әм һʹәму документада дьньвисьн у диԝанеда бәʹса ԝан дькьн, дькʹәвьнә бәр чʹәʹве һʹакьма, мәрьвед дәԝләте, медйа у хәлԛе. Мәрьвед һʹәлал педьһʹәсьн кӧ Шәʹдед Йаһоԝа кʹе нә у канийа баԝәрийа ԝан чь йә. Бь сайа ве йәке, һьнә жь ԝан бунә хушк-бьред мә.

ШЬКЬР ЙАҺОԜАРʹА!

Нава зедәтьри 40 салед пашьнда, мьн гәләк ԝәлатада тʹәви Бәйтʹәлед Шәʹдед Йаһоԝа һәвкʹари кьрийә у мафед мә бәр гәләк диԝан у сәрԝера пʹарастийә. Әз һәвалкʹаред хԝәйә жь Идара Ԛанунзанийе йа офиса сәрәкә у жь Идаред Ԛанунзанийе йед нав тʹәмамийа дьнйайе һʹәз дькьм, у әз ԝанрʹа фьрнаԛ дьбьм. Мьн гәләк кʹәрәм стандьнә, у әз жь әʹмьре хԝә шабуна мәзьн дьстиньм.

Кʹӧлфәта мьн, Елизабет, нав 45 салед пашьнда ԝәʹде хԝәш у чәтьнда бь һʹәзкьрьне пьшта мьн дьгьрә. Әз жерʹа фьрнаԛ дьбьм, чьмки рʹаст ә нәхԝәшикә ԝейә гьран һәйә жь бо чь жи ԛәԝата ԝе кем дьбә, ле әԝ бь амьни али мьн дькә.

Мә бь чʹәʹве хԝә дит кӧ ԛәԝат у сәркʹәтьн, һʹӧнӧр у фәрәсәтед мәва гьредайи ниньн. Чаԝа кӧ Даԝьд Пʹадша готьбу: «Хӧдан ә ԛәԝата щьмәʹта Хԝә» (Зәбур 28:8). Бәле, шәрʹ, шәрʹе Йаһоԝа йә!