Гәло Исафа Тә Рʹебәре Рʹаст ә?

1, 2. Исаф кʹе дайә мә, у чьрʹа әм гәрәке рʹази бьн кӧ исафа мә һәйә?

ЙАҺОԜА ХԜӘДЕ мәрьв бь азайа бьжартьне әʹфьрандьнә, демәк әм дькарьн бь азабуне тьшта сафи кьн. Ле сәва кӧ сафикьрьнед рʹаст бькьн, Йаһоԝа рʹебәр дайә мә. Әԝ рʹебәр һәйә исафа мә, у әԝ фәрәсәт ә нав мәда, бь сайа кʹижани әм дькарьн тедәрхьн чь рʹаст ә у чь нәрʹаст ә. Чахе әм исафа хԝә рʹаст дьдьнә хәбате, әԝ дькарә али мә бькә кӧ әм тьштед ԛәнщ бькьн у хԝә жь тьштед хьраб дур бьгьрьн. Әԝ йәк кӧ исафа мә һәйә избат дькә, кӧ Йаһоԝа мә һʹьз дькә у дьхԝазә кӧ әм баш бьн.

² Һьнә мәрьв иро принсипед Кʹьтеба Пироз ньзаньн, ле йәкә тьштед ԛәнщ дькьн у хьрабийе нәфрʹәт дькьн. (Бьхунә Рʹомайи 2:14, 15.) Ле гәло чьрʹа? Чьмки исафа ԝан һәйә. Әԝ йәк гәләк мәрьва хԝәй дькә, кӧ тьштед хьраб нәкьн. Һәла бьдә һʹәсабе хԝә, дьне ԝе чьԛас хьраб буйа, һәрге исафа тʹӧ кәси тʹӧнә буйа! Мә дьбәкә тьштед һе хьраб у зӧлм бьбьһиста, нә кӧ чьԛас ньһа дьбьһен. Әм гәрәке гәләк жь Йаһоԝа рʹази бьн, кӧ әԝи исаф дайә мәрьва!

3. Исафа мә ча дькарә али мә бькә дь щьватеда?

³ Гәләк мәрьв ԛә нафькьрьн кӧ лазьм ә исафа хԝә һин кьн. Ле щьмәʹта Йаһоԝа дьхԝазә кӧ исафа ԝан рʹаст бьхәбьтә, чьмки әԝ йәк дькарә аликʹарийа мәзьн бьдә йәктийа щьвате. Әм дьхԝазьн кӧ исафа мә принсипед Кʹьтеба Пироз бинә бира мә, дәрһәԛа рʹасти у нәрʹастийе, ԛәнщи у хьрабийе. Ле сәва исафа хԝә һин кьн у бьдьнә хәбате, әм гәрәке һе зедә бькьн, нә кӧ тʹәне пебьһʹәсьн һәла Кʹьтеба Пироз чь дьбежә. Әм гәрәке принсипед Хԝәде һʹьз бькьн, у баԝәр бьн кӧ әԝана бона мә керһати нә. Паԝлос ньвиси: «Сәре тʹәмийе һʹьзкьрьн ә, кӧ жь дьле сах, бь исафа рʹьһʹәт у жь баԝәрийа бедӧрʹути йә» (1 Тимотʹейо 1:5). Чахе әм исафа хԝә һин дькьн у гӧһ дьдьне, һʹьзкьрьна мә у баԝәрийа мә һьндава Йаһоԝа һе ԛәԝи дьбә. Әв йәк кӧ чаԝа әм исафа хԝә дьдьнә хәбате избат дькә, кӧ һәләԛәтийа мә тʹәви Йаһоԝа чьԛас незик ә у әм чьԛас дьхԝазьн дьле ԝи ша кьн. Исафа мә ӧса жи дьдә кʹьфше кӧ әм мәрьвед ча ньн.

4. Әм ча дькарьн исафа хԝә һин кьн?

⁴ Ле гәло әм ча дькарьн исафа хԝә һин кьн? Әм гәрәке Кʹьтеба Пироз тʹьме леколин бькьн, у чь дьхуньн сәр бьфькьрьн, у ӧса жи жь Йаһоԝа аликʹарийе бьхԝазьн сәва кӧ әм чь пеһʹәсийан бьдьнә хәбате. Чахе әм Кʹьтеба Пироз леколин дькьн, нета мә әԝ ә, кӧ Йаһоԝа һе рʹьнд нас кьн. Әм педьһʹәсьн кӧ әԝ йәки ча нә, у әԝ чь һʹьз дькә у чь һʹьз накә. Чахе әм дәрһәԛа Йаһоԝа һе зедә педьһʹәсьн, ахьрийе исафа мә ԝе дәрберʹа тедәрхә кӧ Йаһоԝа чь һʹәсаб дькә рʹасти у чь нәрʹаст. Чьԛас зәʹф әм исафа хԝә һин дькьн, һаԛас зәʹф әме ӧса бьфькьрьн чаԝа Йаһоԝа.

5. Дь ве тʹемайеда әме дәрһәԛа чь шеԝьр кьн?

⁵ Дьбәкә әм пьрсе бьдьнә хԝә: «Чаԝа исафа һинкьри дькарә али мә бькә, чахе мәрʹа лазьм бә сафикьрьна бькьн? Әм ча дькарьн ԛәдьре исафа хушк у бьред мә бьгьрьн? У ча исафа мә дькарә мә һелан кә кӧ тьштед ԛәнщ бькьн?» Ԝәрә әм дәрһәԛа се дәрәща шеԝьр кьн, кʹижанада мәрʹа лазьм ә исафа һинкьри: 1) хԝәйкьрьна сьһʹәт-ԛәԝате, 2) һесабун, 3) шьхӧле мәйи даннасинкьрьне.

БӘРБЬҺЕР БЬН

6. Әм чь сафикьрьна дькьн дәрһәԛа хԝәйкьрьна сьһʹәт-ԛәԝата хԝә?

⁶ Кʹьтеба Пироз мәрʹа дьбежә кӧ әм хԝә хԝәй кьн жь тьштед ӧса, кӧ дькарьн зийане бьдьнә мә, у сәрԝахт бьн ԝе йәкеда чь кӧ мәрʹа дьбә хәйсәт, мәсәлә хԝарьнеда у вәхԝарьнеда (Мәтʹәлок 23:20; 2 Корьнтʹи 7:1). Чахе әм гӧһ дьдьнә ширәтед жь Кʹьтеба Пироз, әԝ али мә дькьн кӧ сьһʹәтԛәԝата хԝә хԝәй кьн. Ле рʹаст ә әм диса жи нәхԝәш дькʹәвьн у кал-пир дьбьн, у ләма жи әм гәрәке бьзаньбьн кӧ чь щурʹә сафикьрьна бькьн. Һьнә ԝәлатада, щурʹәки ԛәнщкьрьне һәйә кӧ ԛәйдә йә у ӧса жи йа алтернатив һәйә. Комитейед филиала тʹьме нәʹмәка дьстиньн жь хушк у бьра, йед кӧ дьпьрсьн дәрһәԛа щурʹәщурʹә ԛәнщкьрьна. Гәләк жь ԝан пьрсе ӧса дьдьн: «Гәло ԛӧльхкʹаре Йаһоԝа дькарә әве ԛәнщкьрьне йан йа дьн бьдә хәбате?»

7. Дәрһәԛа хуне кʹе гәрәке сафикьрьна бькә у ча?

⁷ Изьна комитейа филиале йан жи рʹуспийа тʹӧнә, кӧ дәԝса Мәсиһи сафикьрьна бькьн дәрһәԛа щурʹе ԛәнщкьрьне, һәрге жи әԝ Мәсиһи һиви дькә (Галати 6:5). Ле рʹуспи дькарә Мәсиһирʹа бежә кӧ Йаһоԝа чь дьбежә, сәва али ԝи бькә кӧ әԝ бь билани сафикьрьне бькә. Мәсәлә, Хԝәде тʹәми дайә мә кӧ әм дури хуне бьн (Кʹаред Шандийа 15:29). Әԝ тʹәми әʹйан Мәсиһи дьдә фәʹмкьрьне, кӧ әԝ нькарә ԛәбул кә тʹӧ щурʹе ԛәнщкьрьнед бь хуне, йан жи бь чар компонентед хунейә сәрәкә. Әԝ тʹәми ӧса жи дькарә сәр исафа Мәсиһийа һʹӧкӧм бә, чахе әԝ сафи дькә һәла фраксийед бьчʹук, йед жь чар компонентед сәрәкәйә хуне, бьдә хәбате йан на.a (Бьньһерʹә спартьн.) Кʹижан ширәта Кʹьтеба Пироз дькарә али мә бькә кӧ дь ԛәнщкьрьнеда сафикьрьнед билан бькьн?

8. Чаԝа кʹьтеба Филипи 4:5 али мә дькә кӧ әм бь билани бьжартьна бькьн дәрһәԛа хԝәйкьрьна сьһʹәт-ԛәԝате?

⁸ Мәтʹәлок 14:15 дьбежә: «Кәсе һʹьшсьвьк бь һәр готьнева баԝәр дьбә, ле бәле йе аԛьл жи һʹәсабе гава хԝә йа давежә дькә». Иро һьнә нәхԝәши һәнә, кӧ ԛәнщкьрьнед ԝан әʹйан ниньн. Ләма жи әм гәрәке фәсал бьн бона ԝан ԛәнщкьрьна, йан жи дәрмана, кʹижан кӧ избаткьри нинә әԝ ԛәнщ дькьн йан на. Паԝлос ньвиси: «Бьра бәрбьһерийа ԝә һʹәму мәрьвава әʹйан бә» (Филипи 4:5). Бәрбьһери али мә дькә, кӧ әм һе зедә дина хԝә бьдьн сәр ԛӧльхкьрьна хԝә Йаһоԝарʹа, нә кӧ сәр әʹмьр у сьһʹәт-ԛәԝата хԝә. Һәрге әʹмьре мәда сьһʹәт-ԛәԝата мә щийе пешьн бьгьрә, ԝи чахи әм дькарьн ида тʹәне дәрһәԛа хԝә бьфькьрьн (Филипи 2:4). Әм заньн кӧ дь ве дьнйайеда әм нькарьн бь кʹамьли сьһʹәт-ԛәԝат бьн. Ләма жи, баԝәр бә кӧ әʹмьре тәда ԛӧльхкьрьна тә Йаһоԝарʹа, йа лапә фәрз ә. (Бьхунә Филипи 1:10.)

9. Ча кʹьтеба Рʹомайи 14:13, 19 дькарә һʹӧкӧм бә сәр сафикьрьна мә дәрһәԛа сьһʹәт-ԛәԝате, у ча йәктийа мә дькарә бькʹәвә бьн хофе?

⁹ Мәсиһийе бәрбьһер зоре кәсәки накә, кӧ әԝ кәс ӧса бькә ча әԝ дьфькьрә. Дь ԝәлатәкида, щотәки зәԝаще мәрьвед дьн һелан дькьрьн, кӧ һьнә дәрман бьдьнә хәбате у диетәке хԝәй кьн. Ԝана һьнә бьра данә баԝәркьрьне у әван бьра әԝ дәрман данә хәбате у диета хԝәй кьрьн, ле йед дьн сафи кьрьн кӧ нәкьн. Чахе дәрман у диетайе кʹар нәанин, жь ԝана гәләк һерскʹәтьн у хәйидин. Изьна ви щоте зәԝаще һәбу, кӧ тʹәне хԝәха бона хԝә сафи кьн, ԝан дәрмана бьдьнә хәбате у диете хԝәй кьн. Ле гәло аԛьлайи бу кӧ жь бо хԝәйкьрьна сьһʹәт-ԛәԝате йәктийа щьвате бькьнә бьн хофе? Бәре, Ромеда һьнә Мәсиһи щурʹә-щурʹә дьфькьрин дәрһәԛа һьнә хԝарьна у щәжьна. Паԝлос ширәт да ԝан у гот: «Йәк рʹожәке сәр рʹоже дьнрʹа дьгьрә, йәк жи һʹәму рʹожа ԝәкә һәв дьгьрә. Бьра һәр кәс фәʹмина хԝәда баԝәр бә». Ԝәрә әм мьԛат бьн кӧ кәсәкирʹа нәбьнә кәвьре лькʹӧмандьне. (Бьхунә Рʹомайи 14:5, 13, 15, 19, 20.)

10. Чьрʹа әм гәрәке ԛәдьре сафикьрьнед мәрьвед дьн бьгьрьн? (Бьньһерʹә шькьле әʹԝльн.)

¹⁰ Щара әм фәʹм накьн кӧ чьрʹа хушк йан бьра, пьрсәкә хԝәйә шәхси ԝи щурʹәйи сафи кьр. Ле әм гәрәке дәрберʹа ԝи мәрьви сущдар нәкьн, йан жи зоре нәкьн сәр ԝи кӧ әԝ фькьре хԝә бьгӧһезә. Чьмки дьбәкә әԝ гәрәке һе зедә исафа хԝә һин кә, йан жи дьбәкә исафа ԝи гәләк назьк кә (1 Корьнтʹи 8:11, 12). Йан жи дьбәкә исафа мә нә бь тʹәмами һинкьри йә. Һәр кәс гәрәке хԝәха сафикьрьна бькә бона сьһʹәт-ԛәԝата хԝә, у хԝәха жи щабдар ә бона сафикьрьна хԝә.

ЛӘЗӘТЕ БЬВИНӘ ЖЬ ҺЕСАБУНЕ

11, 12. Кʹьтеба Пироз ча али мә дькә кӧ әм рʹаст бьжартьна бькьн бона һесабуне?

¹¹ Йаһоԝа әм ӧса әʹфьрандьнә, кӧ әм дькарьн жь һесабуне ләзәте у кʹаре бьстиньн. Сьлеман ньвиси кӧ «ԝәхта кʹәнине һәйә . . . у ԝәхта листьне һәйә» (Ԝаиз 3:4). Ле нә һʹәму щурʹә һесабун кʹаре йан рʹьһʹәтийе тиньн, йан жи ԛәԝате дьдьнә мәрьва. Әм ӧса жи гәрәке ԝәʹде хԝә зәʹф хәрщ нәкьн сәр һесабуне. Ле исафа мә ча али мә дькә кӧ әм ша бьн у ләзәте бьвиньн жь һесабуне, кʹижан кӧ Йаһоԝа ԛәбул дькә?

¹² Кʹьтеба Пироз пешда дьбежә, кӧ әм гәрәке мьԛабьли «кьред бьнйатʹа инсен» бьн. Дькʹәвә нава ԝан кьра «бенамуси, һʹәрами, толти, пʹутпʹарьсти, пирәсерти, нәйарти, шәрʹ-дәʹԝ, һʹәвсуди, һерскʹәтьн, һәврʹькʹи, дӧтирәти, щӧдәти, чʹәʹве хьраб, меркӧжи, сәрхԝәш, кучʹьксанти у чь кӧ мина ван ьн». Паԝлос ньвиси кӧ «йед ван тьшта дькьн, Пʹадшатийа Хԝәде ԝар набьн» (Галати 5:19-21). Әм дькарьн пьрсе бьдьнә хԝә: «Гәло исафа мьн али мьн дькә, кӧ әз хԝә дур бьгьрьм жь ԝан спорта кʹижанада һәйә зорбәти, һʹӧщәти, у кʹижан кӧ фьрԛийе дькә ортʹа мьләта? Исафа мьн, мьн дьдә сәкьнандьне, чахе бал мьн хԝәстьн пешда те, кӧ бьньһерʹьм ԝан филма кʹижанада бенамуси һәйә, йан жи һелан дькьн кӧ бенамусийе, сәрхԝәшбуне йан сербазийе бькьн?»

13. Ча рʹезед жь 1 Тимотʹейо 4:8 у Мәтʹәлок 13:20 али мә дькьн бона һесабуне у ԝәʹдәдәрбазкьрьне?

¹³ Принсипед Кʹьтеба Пироз дькарьн али мә бькьн, кӧ исафа хԝә һин кьн бона бьжартьна һесабуне у ԝәʹдәдәрбазкьрьне. Мәсәлә Кʹьтеба Пироз дьбежә кӧ «һиндарийа ԛальб кери һьндьк тьшти те» (1 Тимотʹейо 4:8). Гәләк мәри тʹәхмин дькьн кӧ ԛәԝикьрьна бәдәне бона сьһʹәт-ԛәԝата ԝан баш ә. Дьбәк тӧ жи тьштед физики дьки йан жи спортева мьжул дьби, у дьхԝази кӧ тʹәви кʹомәкә мәрийа әве йәке бьки. Ле ча тӧ дьфькьри, фьрԛи һәйә тʹәви кʹе ԝе йәкева мьжул дьби? Мәтʹәлок 13:20-да те готьне: «Кʹи кӧ тʹәви билана рʹе дьчә, ԝе бьбә билан, ле кʹаре кʹе тʹәви беаԛьла йә, ԝе зьраре кʹәвә», (ДТʹ). Демәк фәрз ә кӧ әм исафа хԝә кӧ бь Кʹьтеба Пироз һинкьри йә, бьдьнә хәбате чахе сафи дькьн тʹәви кʹе ԝәʹдә дәрбаз кьн йан һеса бьн.

14. Малбәтәке ча кʹьтеба Рʹомайи 14:2-4 данә хәбате?

¹⁴ Дӧ ԛизед Кристиан у Данйелайе һәнә. Кристиан дьбежә: «Ԝәʹде ԛӧльхкьрьна тʹәви малбәте, мә тʹема дәрһәԛа һесабуне у ԝәʹдәдәрбазкьрьне шеԝьр кьр. Әм гьшк жи ԛайил бун кӧ һьнә щурʹә ԝәʹдәдәрбазкьрьн баш ьн ле һьнәк на. Ле ԝәʹде һесабуне кʹе дькарә бьбә һәвале баш? Ԛиза мә мәрʹа гьли кьр, кӧ дь мәкʹтәбеда ԝәʹде һесабуне, һьнә щаһьл кӧ Шәʹдед Йаһоԝа нә, тьштед нәрʹаст дькьрьн. У әԝ кʹәтә щерʹьбандьне кӧ әԝ жи мина ԝан бькә. Мә шеԝьр кьр тʹәви ԛизед хԝә у гот кӧ исафа мә һәр кәси һәйә, у әм гәрәке пәй исафе һәрʹьн, чахе дьжберьн чь бькьн у тʹәви кʹе бькьн». (Бьхунә Рʹомайи 14:2-4.)

15. Ча Мәтта 6:33 али мә дькә чахе әм дьхԝазьн һеса бьн?

¹⁵ Чьԛас ԝәхт тӧ хәрщ дьки бона һесабуне у ԝәʹдәдәрбазкьрьне? Тӧ щьвате, ԛӧльхкьрьне, у һинбуна Кʹьтеба Пироз датини щийе пешийе, йан һесабуне? Чь йә бона тә һе фәрз? Иса гот: «Бәре пешьн ль Пʹадшатийа Хԝәде бьгәрʹьн у бькьн кӧ рʹастийа ԝи бьԛәдиньн у әԝ һʹәмуйе ԝәрʹа бенә дайине» (Мәтта 6:33). Чахе тӧ сафи дьки кӧ ԝәʹде хԝә ча дәрбаз ки, исафа тә тинә бира тә әԝе ширәта Иса?

ӘМ ҺЕЛАН ДЬБЬН ДАННАСИН КЬН

16. Исафа мә ча мә һелан дькә кӧ даннасин кьн?

¹⁶ Исафа һинкьри нә кӧ тʹәне мә хԝәй дькә кӧ тьштед хьраб нә кьн, ле әԝ ӧса жи мә һелан дькә кӧ әм тьштед баш бькьн. Йәк жь ԝан тьштед баш әԝ ә чахе әм мал бь мал даннасин дькьн у ԝанрʹа кʹе жи рʹасти мә те. Паԝлос жи ӧса дькьр. Әԝи ньвиси: «Әв дәйне стуйе мьн ә. Ԝәй ль мьн һәгәр әз Мьзгинийе даннасин нәкьм!» (1 Корьнтʹи 9:16). Һәрге әм пәй мәсәла Паԝлос һәрʹьн, исафа мә ԝе баш бә, у әме бькарьбьн тьштед рʹаст бькьн. У һьн жи чахе әм мәрийарʹа мьзгинийа хере даннасин дькьн, әм исафа ԝан һʹьшйар дькьн. Паԝлос гот: «Ле сәрда әм рʹастийе әʹйан дькьн у бь ви аԝайи хԝә дийари исафа мәрьва дькьн ль бәр Хԝәде» (2 Корьнтʹи 4:2).

17. Хушкәкә щаһьл ча гӧһ да исафа хԝәйә бь Кʹьтеба Пироз һинкьри?

¹⁷ Чахе Жаклин 16 сали бу, әԝ мәкʹтәбеда биологиайе һин дьбу. Шагьрт һьн жи теорийа евалусиа һин дьбун. Әԝ гьли дькә: «Чахе дәрсханеда дәрһәԛа евалусиайе шеԝьр дькьрьн, исафа мьн изьн нәдьда мьн кӧ тʹәви шеԝьркьрьне бьм ча һәргав тʹәв дьбум. Чьмки мьн нькарьбу пьштгьрийа теорийа евалусиайе бькьра. Әз незики дәрсдар бум у мьн жерʹа шьровәкьр дәрһәԛа баԝәрийа хԝә. Әз гәләк әʹщебмайи мам әԝи ча рʹьнд гӧһ да мьн у готә мьн кӧ әз бәр һʹәму шагьрта шьровәкьм дәрһәԛа әʹфрандьне». Жаклин ша бу сәва ве йәке кӧ гӧһ да исафа хԝә, кʹижан кӧ бь Кʹьтеба Пироз һинкьри бу. Ле исафа тә жи тә һелан дькә кӧ ве йәке бьки чь кӧ рʹаст ә?

18. Чьрʹа әм гәрәке бьхәбьтьн кӧ исафа мә баш бә у рʹаст бә?

¹⁸ Нета мә әв ә кӧ бьжин пе принсипед Йаһоԝа. У исафа мә али мә дькә кӧ бьгьһижнә ве нета хԝә. Чахе әм һәргав Хәбәра Хԝәде леколин дькьн у сәр дьфькьрьн у чь кӧ әм һин дьбьн дьдьнә хәбате, бь ве йәке әм исафа хԝә һин дькьн. Паше әв пʹешкʹеша баш, демәк исафа мә ԝе рʹебәре рʹаст бә, дь жийина мәйә Мәсиһитида.