Әз Чь Бькьм Гава Һәвале Мьн Дьле Мьн Дешинә?

• Тӧ гәрәке чь бьзаньби

• Тӧ чь дькари бьки

• Щаһьлед дьн чь дьбежьн

Тӧ гәрәке чь бьзаньби

• Нава мәрьвада тʹьме проблем пешда тен. Һәвале тә, һәла һе йе лапи баш жи ԛьсурдар ә у щарна дькарә тьштәки ӧса бежә йан жи бькә чь кӧ ԝе дьле тә бешинә. Һәмьки тӧ жи беԛьсур нини. Ԝәрә әм рʹаст бежьн, ԛә ӧса нәбуйә кӧ тә жи дьле кәсәки ешандийә? (Аԛуб 3:2)

• Интернетеда мәрьв дькарә һеса дьле кәсәки бешинә. Щаһьләк бь наве Деԝид ӧса дьбежә: «Щарна ӧса дьбә кӧ дь интернетеда шькле һәвалед хԝә дьвини кӧ тʹәвайи ԝәʹдә дәрбаз кьрьнә, ле гази тә нәкьрьнә. Ԝе дәме дьле тә дешә у тӧ хԝә ӧса тʹәхмин дьки те бежи тә бәр тьштәки һʹәсаб накьн».

• Тӧ дькари бь щурʹәки майин сәр ве проблеме бьньһерʹи

Тӧ чь дькари бьки

Хԝә бьщерʹьбинә. Кʹьтеб Пирозда те готьне: «Тӧ зу нәхәйьдә, чьмки хәйд дь дьле беаԛьлада дьсьтьрә» (Ԝаиз 7:9).

«Щарна сәр кәсәки дьхәйиди, ле паше фәʹм дьки кӧ әв проблем һаԛас жи мәзьн нибу» (Алиса).

Дәрһәԛа ве йәке бьфькьрә: Дьбәкә тӧ зу тьшта һьлдьди бәр дьле хԝә? Ле тӧ дькари бь зедәйи дина хԝә нәди сәр кемасийед кәсед дьн? (Ԝаиз 7:21, 22)

Дәрһәԛа кʹара бахшандьне бьфькьрә. Кʹьтеба Пирозда те готьне кӧ бәдәԝийа мәрьв «ԛӧсур-нәньһерʹандьн ә» (Мәтʹәлок 19:11).

«Һәрге мәʹни жи һәнә кӧ тӧ сәр кәсәки хәйидийи, дьһа баш ә бь дьл у щан бьбахшини ԝи, тʹӧ щар шашийа ԝи нәки бира ԝи у ӧса нәки, ԝәки әԝ һәргав сәва ве шашийе бахшандьне жь тә бьхԝазә. Гава дьбахшини ида гәрәке бир бьки» (Мелори).

Дәрһәԛа ве йәке бьфькьрә: Гәло әв проблем бь рʹасти мәзьн ә? Тӧ дькари бьбахшини у бь ве йәке әʹдьлайе хԝәй ки? (Колоси 3:13)

Бькʹәвә һʹәйра кәсед дьн. Кʹьтеба Пироз дьбежә: «Тʹәне ль кʹара хԝә нәгәрʹьн, ле бьра һәр кәс ль кʹара һәвале хԝә жи бьгәрʹә» (Филипи 2:4).

«Һәрге тӧ һәвале хԝә һʹьз дьки у ԛәдьре ԝи дьгьри тӧйе зу проблеме сафи ки. Ԝә һаԛас ԛәԝат хәрщ кьрийә ԝәки ве һәвалтийе саз кьн, ләма һежа нинә сәва шашики һәвале хԝә ӧнда ки» (Никол).

Дәрһәԛа ве йәке бьфькьрә: Тӧ дькари ньһерʹандьна һәвале хԝәда тьштәки баш бьвини? (Филипи 2:3)

Дәрс: Һәрге тӧ һин би зу нәхәйиди, әв йәк ԝе паше жи кери тә бе. Ԝе баш бә ньһада сәр хԝә бьхәбьти.