ПЬРСЕД ЩАҺЬЛА
Әз Чь Дькарьм Бькьм, ԝәки Ԛьдум Нәкʹәвьм?
Тӧ жи ӧса дьԝәсти кӧ ԛьдум дькʹәви? Һәгәр әре, демәк әв готар сәва тә йә жи.
Чьрʹа әв йәк дьԛәԝьмә
Гәләк шьхӧл. Дина хԝә бьдә щаһьләк бь наве Щули чь дьбежә: «Тʹьме мәрʹа дьбежьн кӧ әм гәрәке дьһа рʹьнд хәбата хԝә бькьн, һе зедә сәр хԝә бьхәбьтьн, нетед мәзьн бьдьн пешийа хԝә у һәр тьшти лапә баш бькьн. Бь рʹасти әԝ һʹәму тьшт мәрьва дькьнә стресе».
Һащәтед әләктроник. Тʹел, планшет у һащәтед әләктроникийә дьн, мәщале дьдьнә мә рʹоже 24 сьһʹәта тʹәви мәрьва текли бьн, ле әв һәр тьшт стресе зедә дькьн, әм дьԝәстьн у ԝәʹдә шунда дькарьн ԛьдум кʹәвьн.
Кемасийа хәԝе. Щаһьләк бь навә Миранда ӧса дьбежә: «Гәләк щаһьл шәбәԛа зу рʹадьбьн у дәрәнг рʹадьзен, ԝәки перʹа бьгьһиньн һин бьн, бьхәбьтьн у ԝәʹде хԝә дәрбаз кьн. Ахьрийе әԝана ида нькарьн ԝәʹде хԝә контрол кьн». Графика ви щурʹәйи гәләк ԛәԝате жь щаһьла дьстинә у алийе емосийалида ԛьдум дьхә.
Чьрʹа тӧ гәрәке һаш ве йәке һәби
Кʹьтеба Пироз һелан дькә хәбатһʹьз бьн (Мәтʹәлок 6:6-8; Рʹомайи 12:11). Ле әв һелане надә, ԝәки һʹәму ԛәԝата хԝә сәр хәбате хәрщ кьн, йа кӧ ахьрийе дькарә гәләк алийава зийане бьдә мә, у сьһʹәт-ԛәԝата мә.
«Щарәке әз һаԛас шьхӧлава мьжул бум, кӧ мьн тедәрхьст ԝәки тʹәмамийа рʹоже мьн бир кьр хԝарьна хԝә жи бьхԝьм. Мьн фәʹм кьр, кӧ сәва әз перʹа бьгьһиньм һʹәму шьхӧли бькьм, гәрәке зийане нәдьм сьһʹәт-ԛәԝата хԝә» (Ешли).
Ләма жи Кʹьтеба Пироз дьбежә: «Сәйе сах жь шере мьри четьр ә» (Ԝаиз 9:4). Гава тӧ гәләк шьхӧл дьки стуйе хԝә, тӧ дькари хԝә мина шер тʹәхмин ки, ле әв ԝәʹдәлу йә. Һәгәр тӧ хԝә гәләк бьԝәстини, ӧса тӧйе ԛьдум кʹәви, у сьһʹәт-ԛәԝата хԝә хьраб ки.
Тӧ чь дькари бьки
Һин бә бежи на. Кʹьтеба Пироз дьбежә: «Сәрԝахти т’әви шкәстийа йә» (Мәтʹәлок 11:2). Мәрьвед шкәсти синоред хԝә заньн у баре гьран накьнә стуйе хԝә.
«Һʹәчʹи зәʹф мәрьве ӧса ԛьдум дькʹәвә, йе кӧ нькарә бежә на у һәр шьхӧли дькә стуйе хԝә. Әԝ йәк шкәстибуне надә кʹьфше. Зу йан дәрәнг, мәрьве ӧса ԝе бетʹаԛәт бә» (Щордан).
Епʹещә һеса бә. Кʹьтеба Пироз дьбежә: «Мьста тʹьжә йа бь рʹьһʹәти, жь кʹӧлма тʹьжә йа бь зәʹмәти у кʹәтьна пәй байе четьр ә» (Ԝаиз 4:6, ИМ). Хәԝе нав дькьн «хԝарьна мәжу», ле һʹәчʹи зәʹф щаһьл хәԝа хԝә ча лазьм ә настиньн, демәк шәве 8-10 сьһʹәта рʹаназен.
«Гава шьхӧлед мьн зәʹф бун, мьн хәԝа хԝә нәдьстанд. Ле щара һәма тʹәне сьһʹәтәк мьнрʹа лазьм ә рʹазем, ԝәки рʹожа майин ԛәԝат бьм у шабуна хԝә ӧнда нәкьм» (Бруклин).
Бь организә бә. Кʹьтеба Пироз дьбежә: «Тʹьвдира мәрьве хирәт әʹсә кʹаре тинә» (Мәтʹәлок 21:5). Һәгәр тӧ һин би бь аԛьлайи ԝәʹде хԝә хәрщ ки, әв йәк ԝе тʹәмамийа әʹмьре тәда кʹаре бинә.
«Әм дькарьн хԝә жь стреса зедә аза кьн, һәгәр план хԝәрʹа башԛә бьньвисьн. Гава плана рʹоже бәр чʹәʹве тә йә, дьһа һеса йә тьштәки бьгӧһези, ԝәки гәләк нәԝәсти» (Ванеса).