Техноложи Чь Щурʹәйи Дькарә Һʹӧкӧм бә Сәр Һәвалтийа Тә?
Бь сайа смс, емайл, видеоконференсийа у щурʹә-щурʹә месенщера, мәрьв дькарьн һеса һәвдӧрʹа текли бьн, һәла һе жи һәгәр щурʹә-щурʹә ԛӧлчʹед дьнйайеда дьжин. Дәрәщед ӧсада техноложи кʹарәкә мәзьн дьдә мәрьва.
Ле һьнә мәрьв кӧ бь сайа техноложийе һәвдӧрʹа һәвалтийе дькьн, рʹасти проблемед ӧса тен . . .
бь тʹәмами һәстед һәвалед хԝә фәʹм накьн.
тʹәнебуне тʹәхмин дькьн.
дьһа зедә дькʹәвьнә һʹәйра хԝә нә кӧ һәвалед хԝә.
ТӦ ГӘРӘКЕ ЧЬ БЬЗАНЬБИ
ДЬЛШӘԜАТИ
Һәгәр әм дьлшәԝат бьн, әме бона һәвалед хԝә ԝәʹдә бьвиньн у һәстед ԝан һьлдьн һʹәсаб. Ле һәгәр әм щарәкерʹа гәләк нәʹма дьстиньн у ләзә-ләз щаба ԝан гьшка дьдьн, әме нькарьбьн дьлшәԝатийе бьдьнә кʹьфше.
Тӧ һеди-һеди дькари бькʹәви бьн һʹӧкӧме техноложийе. Бона тә дькарә дьһа фәрз бә дәрбәкерʹа щаба смсед һʹәму һәвалед хԝә бьди, сәва кӧ йаха хԝә ԝан хьлаз ки. У ве дәме тӧ дькари тʹәхмин нәки кӧ һәваләки тә һʹәԝще аликʹарийа тә бу.
БЬФЬКЬРӘ: Чаԝа һун дькарьн «сәр һәв шәԝат бьн», чахе пе һащәтед әләктроник тʹәви һәвалед хԝә хәбәр дьдьн? (1 ПӘТРУС 3:8)
ТʹӘНЕБУН
Ль гора леколинкьрьнәке, гәләк мәрьв паши ве йәке кӧ шькле кәсед нав-дәнг дьньһерʹьн, хԝә тʹәне тʹәхмин дькьн у дькʹәвьнә депресийайе. Леколинкʹар дьбежьн, ԝәки кәсед ӧса дьфькьрьн кӧ «жь әʹмьре хԝә ԛә ләзәт нәдитьнә».
Ӧса жи чахе мәрьв интернетеда дина хԝә дьдьнә шьклед кәсед дьн, әԝ дьлтәнг дьбьн, чьмки хԝә һьмбәри ԝан дькьн у дьфькьрьн кӧ рʹьнд нажин. Пе шькла дькарә ӧса бе кʹьфше, ԝәки дьне дьнйа ԝан ә у кʹеф кʹефа ԝан ә.
БЬФЬКЬРӘ: Чахе тӧ шьклед мәрьва дьньһерʹи, чь дькарә али тә бькә, ԝәки тӧ хԝә һьмбәри ԝан нәки? (ГАЛАТИ 6:4)
ХԜӘҺʹЬЗИ
Дәрсдарәки дина хԝә дайе, ԝәки гәләк шагьртед ԝи тʹәне һәвалед ӧса хԝәрʹа дьжберьн, жь кʹижана ԝе бькарьбьн кʹаре бьстиньн. Бона һьнә мәрьва һәвал ча програмәкә тʹеле йә, һәгәр кери ԝан бе, ԝе бьһельн, ле һәгәр на, ԝе һеса жь һәвалтийа хԝә рʹәт кьн.
БЬФЬКЬРӘ: Гәло шьклед тәйә кӧ тӧ дьки интернете, надьнә кʹьфше ԝәки тӧ мәрьварʹа дькʹәви ләще у йәки гәләк хԝәһʹьз и? (ГАЛАТИ 5:26)
ТӦ ЧЬ ДЬКАРИ БЬКИ
ТЕДӘРХӘ ҺӘЛА ТӦ ЧАԜА ТЕХНОЛЖИЙЕ ДЬДИ ХӘБАТЕ
Һәгәр техноложи хӧламе тә йә нә кӧ сәрԝере тә, демәк әԝе али тә бькә тʹәви һәвалед хԝә текли би у дьһа незики ԝан би.
ПРИНСИПА КʹЬТЕБА ПИРОЗ: «Һʹьзкьрьн . . . йа хԝә нагәрʹә». (1 КОРЬНТʹИ 13:4, 5)
Жь ван ширәтед кӧ жере һатьнә дайине, кʹижан кӧ ԝе тәрʹа керһати бьн, хԝәрʹа бьжберә у һьнәка жи хԝәха бьньвисә.
Һе зедә шәхси тʹәви мәрьва хәбәр дә, нә кӧ пе смс у емайла
Чахе тӧ тʹәви кәсәки хәбәр дьди, телефона хԝә дайнә щики ӧса, ԝәки тә әʹщьз нәкә
Әв ԝәʹде кӧ тӧ сәр интернете хәрщ дьки, кем кә
Бьбә гӧһдарәки дьһа баш
Тʹәви ван һәвалед хԝә текли бә, йед кӧ тәнгасийада ньн