ПЬРСЕД ЩАҺЬЛА
Әз Гәрәке Чь Бькьм Һәрге Де-Баве Мьн Наһельн Малпәред Сосйали Бьдьмә Хәбате?
Дьԛәԝьмә һʹәму һәвалед тә малпәред сосйали дьдьнә хәбате у әԝана тʹьме дәрһәԛа ве йәке хәбәр дьдьн. Дьбәкә әԝана һәла һе ԛәрфе хԝә тә дькьн, чьмки малпәра тәйә сосйали тʹӧнә йә. Ве дәрәщеда тӧ чь гәрәке бьзаньби? У чь тӧ дькари бьки?
Тӧ гәрәке чь бьзаньби
Тӧ тʹәне нини. Гәләк де-бав наһельн, ԝәки зарʹед ԝан малпәред сосйали бьдьнә хәбате. Дьԛәԝьмә әв йәк жь бо ве йәке йә, кӧ әԝана дьфькьрьн ԝәки сәр малпәред сосйали, әԝана дькарьн рʹасти ԝан тьшта бен:
депресийа у нәхԝәшийед дьн йед емосийалива гьредайи нә.
порнографийа, секстинг у беһӧрмәткьрьн.
проблем у нәфәʹмдари ортʹа һәвала.
Гәләк щаһьл сафи кьрьн малпәред сосйали ида нәдьнә хәбате. Ԝана хԝәха тедәрхьст, ԝәки әв йәк дьһа зийане ԝанрʹа дьани нә кӧ кʹаре. Дина хԝә бьдьне мәсәлед щаһьла:
Прискила тедәрхьст ԝәки әԝ гәләк ԝәʹдә сәр малпәред сосйали хәрщ дькә, дәԝса кӧ әԝ ԝәʹдә сәр дьһа тьштед фәрз хәрщ кә.
Щереми хԝәш нәдьһат әв йәк, кӧ әԝи нькарьбу контрол кьра тьштед нәщайиз, кӧ ньшкева сәр малпәред сосйали дәрдькʹәтьн.
Бетани тʹәхмин кьр кӧ әԝ гәләк дина хԝә дьдә ве йәке, ԝәки мәрьвед дьн чьва мьжул дьбьн.
«Мьн сафи кьр малпәра хԝәйә сосйали у малпәра апп тʹәмьз кьм. Әз гәләк ша мә кӧ мьн әв йәк кьр, чьмки ньһа әз дьһа дина хԝә дьдьмә ԝан тьшта, чь кӧ бона мьн фәрз ә»—Сиера.
«Мьн хԝәш найе әв йәк, кӧ әз дькарьм малпәред сосйалива ӧса бемә гьредане ԝәки дәстпекьм бәр хԝә кʹәвьм һәла мәрьв сәр малпәра мьн ча дьньһерʹьн. Рʹаст бежьм нәһеса бу малпәра хԝәйә сосйали тʹәмьз кьм, ле чахе мьн әв йәк кьр мьн дьлрʹьһʹәти сәр хԝә тʹәхмин кьр. Дьле мьн ньһа дьһа рʹьһʹәт ә»—Кеит.
Тӧ чь дькари бьки?
Ԛәдьре сафикьрьна де-баве хԝә бьгьрә. Ԝанрʹа бьдә кʹьфше, ԝәки тӧ ида мәзьн буйи у һерс накʹәви нә жи дьки кӧтә-кӧт, ле ԛәдьре сафикьрьна ԝан дьгьри.
Принсипа Кʹьтеба Пироз: «Ахмах һʹәму һерса хԝә дьдә дәр, ле йе сәрԝахт хԝәда зәфт дькә» (Мәтʹәлок 29:11).
Һьнәк дькарьн тәрʹа бежьн, кӧ дьзикава малпәра сосйали хԝәрʹа чеки у жь де-баве хԝә вәшери. Ле әв йәк ԝе нәрʹаст бә! Һәрге тӧ нәһʹәлал би, жь бо ве йәке тӧ дькари паше бәр хԝә кʹәви у хԝә нәһәԛ һʹәсаб ки. Ӧса жи әв йәк дькарә проблема пешда бинә, чьмки һәрге де-баве тә пебьһʹәсьн, әԝана ԝе ида нькарьбьн итʹбарийа хԝә тә биньн.
Принсипа Кʹьтеба Пироз: «Әм . . . дьхԝазьн кӧ һәр тьшти рʹаст бькьн» (Ибрани 13:18).
Сафи кә. Мина щаһьлед бәʹса кʹижана мә жоре кьр, дьԛәԝьмә щәм тә жи һәнә мәʹни жь бо чь жи тӧ дьхԝази малпәред сосйали нәди хәбате. Һәрге тӧ дьвини ԝәки хәбьтандьна малпәред сосйали сәр тә хьраб һʹӧкӧм дькьн у тә сафи кьрийә нәди хәбате бьдә кʹьфше кӧ әв йәк нә тʹәне жь бо сафикьрьна де-бава йә, ле чьмки тә жи хԝәха сафи кьрийә нәди хәбате. Ләма жи һәрге һәвал тә пьрс кьн чьма тӧ малпәред сосйали нади хәбате, те шәрми нәби у әԝана жи ԝе ԛәрфе хԝә тә нәкьн бона ве йәке.
Фькьра сәрәкә: Тʹәви де-баве хԝә һәвкʹарийе бькә, ԝәки дәрһәԛа хәбьтандьна малпәред сосйали һун бенә сәр нетәке у сафикьрьна тә мина йа ԝан бә. Чь жи һәбә, тӧ дькари бе малпәред сосйали бьжийи.