Гәло Малпәред Сосйали Зийане Дьдьнә Зарʹед Ԝә?—Чаԝа Кʹьтеба Пироз Дькарә Али Де-Бава Бькә

Рʹожнәʹмәкеда «The New York Times» йа 17 Һʹәзиране, сала 2024, Вивек Мурти хирурге сәрәкә йе кӧ жь Дәԝләтед Йәкбуйи йә, дьбежә: «Рʹожа иройин щаһьл алийе емосийалида хофеда ньн, у мәʹнийа сәрәкә жь бо чь әԝ йәк дьԛәԝьмә, малпәред сосйали нә».

Чаԝа де-бав дькарьн зарʹед хԝә жь зийана малпәред сосйали бьпʹарезьн? Кʹьтеба Пироз ширәтед керһати дьдә мә.

Де-бав чь дькарьн бькьн

Ԝәрен принсипед Кʹьтеба Пироз шеԝьр кьн.

«Йе аԛьл дина хԝә дьдә гавед хԝә» (Мәтʹәлок 14:15).

Малпәред сосйали дькарьн зийане бьдьнә зарʹа, ләма жи де-бав гәрәке хԝә паш нәхьн жь ԝе йәке, кӧ изьн нәдьн зарʹед хԝә ван малпәра бьдьнә хәбате. Пешийа кӧ бьһели ԝәки зарʹа тә малпәра сосйали бьдә хәбате, баԝәр бә кӧ әԝ дькарә һәвалед баш ԛазанщ кә, пе ԝәʹде конкрет бьдә хәбате у хԝә жь тьштед бенамуси дур бьгьрә.

• Сәва кӧ һе зедә пебьһʹәсьн, бьхуньн готар «Гәло Зарʹа Мьн Гәрәке Малпәред Сосйали Бьдә Хәбате?» у «Зарʹед Хԝә Һин кьн кӧ Малпәред Сосйали Рʹаст Бьдьнә Хәбате».

«Дәст бьдьнә бәр ԝәхт» (Әфәси 5:16).

Һәрге һун изьн дьдьнә зарʹед хԝә, ԝәки әԝана малпәред сосйали бьдьнә хәбате, бона ԝе йәке синора дайньн у ԝанарʹа шьровәкьн, кӧ әԝ синор ча дькарьн ԝана бьпʹарезьн. Ӧса жи дина хԝә бьдьнә рʹабун-рʹуньштандьна ԝан, сәва кӧ тедәрхьн әв йәк жь бо малпәред сосйали йә йан на, һәрге әре, кем изьн бьдьнә ԝан бькʹәвьнә малпәред сосйали.

• Һун дькарьн бьдьнә хәбате видеойа анимасийоне Малпәред Сосйал бь Билани Бьдә Хәбате сәва кӧ али зарʹа хԝә бькьн ԝәки фәʹм кә, кӧ чьма фәрз ә синора дайньн.

Һе зедә пебьһʹәсьн

Кʹьтеба Пироз дьбежә кӧ «зәманед хьраб ԝе бен» (2 Тимотʹейо 3:1-5). Ӧса жи теда ширәтед керһати һәнә, йед кӧ дькарьн али мә бькьн ԝан дәрәщада тәйах кьн. Һун дькарьн зедәтьри 20 ширәтед жь Кʹьтеба Пироз бона де-бава у зарʹа ве готареда бьвиньн, һʹале щаһьла алийе емосийалида.