АЛИКʹАРИ БОНА МАЛБӘТЕ | РОЛА ДЕ-БАВА
Зарʹ у Малпәред Сосйали—Пʹара 2: Зарʹед Хԝә Һин кьн кӧ Малпәред Сосйали бь Аԛьлайи Бьдьнә Хәбате
Гәләк де-бав изьне надьнә зарʹед хԝә, ԝәки малпәред сосйали бьдьнә хәбате, чьмки дьфькьрьн кӧ әԝ йәк хоф ә. Ле һәрге һун дьһельн, ԝәки зарʹед ԝә бьдьнә хәбате, һун чаԝа дькарьн али ԝан бькьн, ԝәки бь аԛьлайи бьдьнә хәбате у зийане нәстиньн?
Ве готареда
Чь бона зарʹа ԝә дьһа фәрз ә
Тӧ гәрәке чь бьзаньби: Мәрьв һеса дькарә малпәред сосйалива бе гьредане, ләма жи али зарʹа хԝә бькә ԝәки әԝ контрол кә, һәла чьԛас ԝәʹдә сәр ве йәке хәрщ дькә.
Принсипа Кʹьтеба Пироз: «Кʹижан һәрә ԛәнщ ә, һун ԝе бьбьжерьн» (Филипи 1:10).
Бьфькьрә: Гәло зарʹа тә малпәред сосйали дьдә хәбате, гава гәрәке рʹазе, дәрсед хԝә бькә, йан жи тʹәви нәфәред мале ԝәʹдә дәрбаз кә? Лекʹолинкʹар дьбежьн, ԝәки щаһьл гәрәке ԝәкә 9 сьһʹәта рʹазен сәва хԝәва хԝә бьстиньн, ле әԝед кӧ рʹоже чәнд сьһʹәта сәр малпәред сосйали хәрщ дькьн, дьбә 7 сьһʹәта кемтьр рʹадьзен.
Тӧ чь дькари бьки? Тʹәви зарʹа хԝә шеԝьр кә кӧ чь дьһа фәрз ә, у чьԛас кʹар ә ԝәки әԝ ԝәʹде хԝә бь аԛьлайи сәр ван малпәра хәрщ кә. Синор дайнә, ԝәки мәсәлә гава әԝ шәв ида нав щи-ньвинада йә, һащәтед електроник нәдә хәбате. Нета тә әԝ ә, ԝәки али зарʹа хԝә бьки хԝәгьртьне нав хԝәда пешда бинә, чь кӧ ԝе ахьрийеда жи кери ԝи бе (1 Корьнтʹи 9:25).
Сьһʹәт-ԛәԝата емосийали йа зарʹа ԝә
Тӧ гәрәке чь бьзаньби: Гава зарʹ шькьлед бәдәԝ, селфи, у ӧса жи видеойед һәвалед хԝә дьвинә, әԝ дькарә хԝә тʹәне тʹәхмин кә, дьлтәнг бә у бькʹәвә депресийайе.
Принсипа Кʹьтеба Пироз: «Һʹәвсудийе . . . жь пʹеша хԝә даԝшиньн» (1 Пәтрус 2:1).
Бьфькьрә: Гәло дьбәкә зарʹа ԝә жь бо малпәред сосйали хԝә бәгәм накә? Гәло әԝ дьфькьрә ԝәки гьшк рʹьнд хԝәрʹа һеса дьбьн у ԝәʹде хԝә дәрбаз дькьн, ле жийина ԝи һʹәԝас нинә?
Тӧ чь дькари бьки? Тʹәви зарʹа хԝә шеԝьр кә кӧ чьԛас хоф у зийан ә һәрге әԝ хԝә бәрамбәри мәрьвед дьн бькә. Һьлдьн һʹәсаб ԝәки бона кәчʹька әԝ йәк һе хоф ә, чьмки әԝана һе зедә хәм дькьн бона бәдәԝбуне у һәләԛәтийа хԝә ортʹа мәрьва. Һун дькарьн ӧса жи ширәте бьдьнә зарʹа хԝә, ԝәки сәр чәндәке жь малпәред сосйали һеса бә. Хортәки бь наве Щейкоб дьбежә: «Әз ԝәʹдәки жь малпәра сосйали дәркʹәтьм у мьн әԝ тʹәмьз кьр. Әԝе йәке али мьн кьр ԝәки тьштед дьһа фәрз дайньн пешийа хԝә, һьм жи сәр хԝә у сәр мәрьва бь ньһерʹандьна рʹаст бьньһерʹьм».
Рʹабун-рʹуньштьна зарʹа ԝә интернетеда
Тӧ гәрәке чь бьзаньби: Малпәред сосйалида гьшк ча бежи тә дьвиньн тӧ чь дьки у чь дьбежи. Ләма жи жь бо ве йәке дькарә нәфәʹмкьрьн у шәрʹ-дәʹԝ пешда бе.
Принсипа Кʹьтеба Пироз: «Бьра һәр тәʹлайи, һерс, бәрзәԛи, ԛарʹә-ԛарʹ у кʹьфьри-зьфьри жь ԝә дур бьн . . . һәврʹа ширьн . . . бьн» (Әфәси 4:31, 32).
Бьфькьрә: Гәло жь бо малпәред сосйали зарʹа ԝә дәстпекьрийә гәвәзтийе бькә, бькʹәвә нав шәрʹ-дәʹԝа, йан жи тʹәви мәрьва сәрт хәбәр дә?
Тӧ чь дькари бьки? Али зарʹа хԝә бькә ԝәки әԝ фәʹм кә, кӧ гәрәке әԝ интернетеда ча хԝә бьгьрә. Кʹьтебәк дьбежә: «Нета мә де-бава әԝ ә, али зарʹа хԝә бькьн кӧ әԝ фәʹм бькә, ԝәки сәртбун ԛә щики жи нәщайиз ә, нә гава рʹу бь рʹу тʹәви мәрьва хәбәр дьди, нә жи интернетеда» (Digital Kids).
Бир нәкьн ԝәки малпәред сосйали һʹәԝщәти нинә у һʹәму де-бав изьне надьнә зарʹед хԝә, кӧ ван бьдьнә хәбате. Һәрге жи һун изьне дьдьнә зарʹа хԝә, ԝәки малпәред сосйали бьдә хәбате, һун гәрәке баԝәр бьн кӧ әԝ епʹещә гьһишти йә, кӧ дькарә синор дайнә чьԛас ԝәʹдә сәр хәрщ кә, тʹәви мәрьва һәләԛәтийа баш хԝәй кә, у бькарьбә хԝә жь тьштед нәщайиз дур бьгьрә.