Сәрһати 24
Усьв Бьред Хԝә Дьщерʹьбинә
УСЬВ дьхԝәст пебьһʹәсийа һәла бьред ԝи мина бәре һе бехӧдан у бедьл ьн йан на. Ләма жи әԝи гот: «Һун щәʹсус ьн. Һун һатьнә вьра пебьһʹәсьн кӧ чьда ԝәлате мә сьст ә».
«На әм щәʹсус ниньн», ԝана гот. «Әм мәрийед дьле хԝәйи сагʹ ьн, әм гьшк бьред һәв ьн. Бәре әм 12 бьра бун, ле бьраки мә ида тʹӧнә йә, йе дьн жи һәри бьчʹук ә у тʹәви баве мә майә».
Усьв хԝә ӧса дани те бежи ԝанрʹа баԝәр накә. Әԝи бьраки ԝан Шьмһʹун кьрә кәле у һишт кӧ әԝана хԝарьн һьлдьн у һәрʹьнә мале. Ле сәрда гьлийе ӧса готә ԝан: «Чахе һун вәгәрʹьн Мьсьре, һун гәрәке бьре хԝәйә бьчʹук тʹәви хԝә биньн».
Чахе әԝана вәгәрʹийан Кәнане у һʹәму тьшт баве хԝәрʹа гьли кьрьн, әԝ гәлә бәр хԝә кʹәт. Әԝи гьринва гот: «Усьве мьн тʹӧнә йә, ньһа жи мьн Шьмһʹун ӧнда кьр. На, ԝәлә әз наһельм кӧ һун кӧрʹе мьн Бьнйамин тʹәви хԝә бьвьн». Ле чахе хԝарьна ԝана ида хьлаз бьбу, Аԛуб дьхԝази-нахԝази һишт кӧ Бьнйамин бьвьнә Мьсьре, сәва кӧ хԝарьне биньн.
Чахе Усьв дит кӧ бьре ԝи тен у Бьнйамин жи тʹәви ԝан ә, әԝ гәлә ша бу. Ԝи чахи тʹӧ кәс жь ԝан ньзаньбу, кӧ әв мере мәзьн у гьринг бь рʹастийе Усьв ә. Ньһа Усьв тьштәки ӧса дькә кӧ 10 бьред хԝә бьщерʹьбинә.
Әԝи готә хӧламе хԝә кӧ кʹисед ԝан тʹьжә кьн. Ле Усьв дь кʹисе Бьнйаминда кʹаса зив дани, ӧса кӧ бьред ԝи һаш пе тʹӧнә бьн. Чахе әԝана жь Мьсьре дәркʹәтьн у һьнә рʹе дәрбаз бун, Усьв хӧламе хԝә шандә пәй ԝан. Ԝана бьред Усьв данә сәкьнандьне у готьн: «Чьрʹа ԝә кʹаса хԝәйе мә дьзи?»
«Мә кʹаса ԝи нәдьзийә», ԝана гот. «Һун бал кʹе жи ԝе кʹасе бьвиньн, әԝ бьра бе кӧштьне».
Ԝана дәстпекьр бьгәрʹьн у әв кʹас бал Бьнйамин дитьн. Әв йәк ль сәр шькьли рʹьнд те кʹьвше. Хӧлам готьн: «Һәр кәс жь ԝә дькарә һәрә, ле Бьнйамин ԝе тʹәви мә бе». Гәло 10 бьред Бьнйамин ԝе чь бькьн?
Әԝана гьшк жи пәй Бьнйамин пашда чунә мала Усьв. Усьв готә бьре хԝә: «Һун гьшк жи дькарьн вәгәрʹьн мала хԝә, ле Бьнйамин ԝе бьминә у мьнрʹа ԝе хӧламтийе бькә».
Щьһуда гот: «Һәрге әз бе бьре хԝә вәгәрʹьм мал, баве мьн ԝе бьмьрә, чьмки баве мьн ԝи гәлә һʹәз дькә. Ләма жи лавайа тә дькьм бәрʹдә, бьра бьре мьн һәрʹә мал әзе дәԝса ԝи тәрʹа хӧламтийе бькьм».
Ньһа Усьв дит кӧ бьред ԝи рʹаст бунә. Әԝана ида мина бәре бехӧдан у бедьл ниньн. Ле кʹа әм пебьһʹәсьн чь Усьв ԝе ньһа бькә.
Дәстпебун 42:9-38; 43:1-34; 44:1-34.