Сәрһати 26

Ибо Хԝәдерʹа Амьн Дьминә

ҺӘЛА ль сәр ви мәри бьньһерʹә, ԛә гӧне тә пе найе? Наве ԝи мерьки Ибо йә, у әв кʹӧлфәт жи йа кӧ ль бәр сәкьнийә, жьна ԝи йә. Ле зани әԝ чь дьвежә мере хԝәрʹа? Дьвежә: «Ньфьрʹа Хԝәде бькә, кӧ бькарьби бьмьри». Кʹа әм пебьһʹәсьн чьрʹа әԝе гьлийе ӧса мере хԝәрʹа гот у чьрʹа Ибо кʹәтә рʹожәкә ӧса чәтьн.

Ибо дь ԝәлате Утседа дьжит, йе кӧ жь Кәнане дур нибу. Әԝи гӧрʹа Хԝәде дькьр у ль бәр чʹәʹве Хԝәде амьн дьма. Йаһоԝа Ибо гәлә һʹәз дькьр, ле һәбу кәсәк, йе кӧ Ибо һʹәз нәдькьр у ԝи нәфрʹәт дькьр. Зани әԝ кʹи йә?

Әԝ Шәйтʹане мире щьна йә. Те бира тә, кӧ әԝ мьлйакʹәте хьрав пешбәри Хԝәде рʹабу. Шәйтʹан дәʹвда Адәм у Һеԝа кӧ әԝана гӧрʹа Хԝәде нәкьн, у әԝи дьхԝәст ӧса бькьра кӧ һәр кәс жь мәрийа гӧрʹа Хԝәде нәкьн. Ле ча әм заньн әԝ нета ԝийә хьрав һатә сәри? На, чьмки гәлә мер у жьнед бәре йәкә Хԝәдерʹа амьн дьман. Һәла текә бира хԝә чәнд жь ԝан мәрийа, дәрһәԛа кʹе жи әм ида пеһʹәсийан. Навед кʹижана жь ԝан тӧ дькари бежи?

Паши ԝе йәке ча Аԛуб у Усьв дь Мьсьреда мьрьн, ль нав тʹәмамийа дьнйайе мәрийе жь һʹәмушка амьн Ибо бу. Йаһоԝа дьхԝәст кӧ Шәйтʹан бьзаньбә, ԝәки әԝ нькарә һʹәму мәрийа бьдә шашкьрьне. Ләма жи Хԝәде гот: «Һәла бьньһерʹә, ԛӧльхчийе мьн Ибо чьԛас мьнрʹа амьнә».

Шәйтʹан мәʹни Хԝәде гьрт у гот: «Чьмки тӧ ԝи кʹәрәм дьки у һʹәму тьштед баш дьди ԝи, ләма әԝ тәрʹа амьнә. Ле һәрге тӧ һʹәму тьшти жь ԝи бьстини, әԝ ԝе ньфьрʹа тә бькә».

Паши ван гьлийа Хԝәде готә ԝи: «Дә ԝәки ӧса нә, һәрʹә һʹәму тьшти жь ԝи бьстинә. Чь сәре ԝи дьки, бькә. Әме бьвиньн һәла Ибо ԝе ньфьрʹа мьн бькә йан на. Тʹәне дәсте хԝә нәдә әʹмьре ԝи, ԝи нәкӧжә».

Пешийе Шәйтʹан мерәк да хәвате, кӧ дәԝаред у һʹәму һʹәйԝанед Ибо бьдьзә, у пәзе ԝи жи һатьбун кӧштьне. Паше әԝи 10 кӧрʹед у ԛизед ԝи дь тофанеда да кӧштьне. Ле паше әԝи диса кӧләк ани сәр. Ибо бь нәхԝәшийе гьран нәхԝәш кʹәт у гәлә дьчәрчьри. Ләма жи жьна Ибо гьлийе ӧса готә ԝи: «Ньфьрʹа Хԝәде бькә, кӧ бькарьби бьмьри». Ле Ибо тʹӧ щар ӧса нә кьр. Әԝан кӧл-дәрд бәс нибун, сәрда жи се һәвалед дӧрʹу һатьн бал ԝи у готьн, кӧ йан чь Ибо бь жийина нә пʹак у хьрав дьжит. Ле Ибо йәкә амьн дьминә.

Йаһоԝа жь ве йәке гәлә ша бу, у әԝи дь ахьрийеда кʹәрәма хԝә пашда да Ибо. Әв йәк ль сәр шькьли рʹьнд те кʹьвше. Хԝәде Ибо жь нәхԝәшийа ԝи ԛәнщ кьр, дәһә зарʹ зедәтьр да ԝи у һәр кәс жь ԝан, гәлә бәдәԝ бун. Һьн жи Иборʹа, жь һʹәму дәԝаред у һʹәйԝанед ԝи бәре, дӧ дәрба зедәтьр һатә дайине.

Тӧ дьхԝази мина Ибо һәр гав Йаһоԝарʹа амьн би йан на? Тʹӧ щар бир нәкә, кӧ һәрге тӧ Хԝәдерʹа амьн бьмини, әԝ ԝе тә жи кʹәрәм кә. Тӧйе бькарьби ль сәр әʹрде бәдәԝ дь щьнәтеда һʹәта-һʹәтайи бьжи.

Ибо 1:1-22; 2:1-13; 42:10-17.