Сәрһати 45

Дәрбазбуна Чʹәме Урдӧнева

БЬНЬҺЕРʹӘ! Исраели чʹәме Урдӧнева дәрбаз дьбьн! Ле кʹа ава чʹем? Нә ԝи чахи ԝәʹде бьһаре һаԛа баран дьбарә кӧ ава чʹем гәрәке тʹьжә буйа. Ле бьньһерʹә ава чʹем ԛә тʹӧнә! Исраели жи чʹәме Урдӧнерʹа әʹрде зьһава дәрбаз дьбьн, ча ԝәхте әԝана Бʹәра Сорва дәрбаз бун! Ле гәло ава чʹем ча һатә бьрʹине? Ԝәрә әм пебьһʹәсьн.

Чахе щьмәʹта Исраеле ида һазьр бу кӧ дәрбази чʹәме Урдӧне бә, Йаһоԝа фәрман да Йешу кӧ әԝ бежә щьмәʹте: «Кʹаһине мә гәрәке сьндоԛа пәймане һьлдьн у бькʹәвьнә пешийа мә. Гава ньгед ԝан ԝе аве кʹәвә, ава чʹем ԝе бе бьрʹине».

Кʹаһина сьндоԛа пәймане һьлдан у пешийа щьмәʹте бьрьн. Чахе әԝана гьһиштьнә чʹәме Урдӧне, кʹаһин кʹәтьнә аве. Ава чʹем жи гәлә кʹур бу у ԛайим дькʹьшийа. Ле гава ньгед ԝан аве кʹәт, ав һатә бьрʹине у мьчʹьԛи! Әв кʹәрәмәтәкә мәзьн бу! Йаһоԝа ава чʹем мина диԝар, йане бәнда аве, да сәкьнандьне, у һьнә ԝәʹдә шунда ава чʹем тʹәмам мьчʹьԛи!

Кʹаһин, йе кӧ сьндоԛа пәймане дьбьрьн, чун дь чʹәме зьһада ортʹе сәкьнин. Тӧ ван кʹаһина ль сәр шькьли дьвини? Бьдә һʹәсаве хԝә, кӧ һʹәта әԝана ԝе дәре дьсәкьнин, щьмәʹта исраели ортʹа чʹәме Урдoнерʹа ль сәр әʹрде зьһа дәрбаз дьбун!

Чахе щьмʹәта Исраеле тʹәмам дәрбаз бун, Йаһоԝа фәрман да Йешу кӧ әԝ бежә 12 меред ԛайимрʹа: «Һәрʹьн пашда бькʹәвнә чʹем бал кʹаһина, йе кӧ сьндоԛа пәймане дьгьрьн. Жь незики ԝан, 12 кәвьра һьлдьн у бьвьн кʹеләка ԝан щийа кʹидәре һуне ишәв бьминьн. Паше, дь ахьрийеда, гава зарʹед ԝә ԝе ԝә пьрс кьн кӧ әв кәвьр чь тенә һʹәсаве, һуне ԝанрʹа гьли кьн, ча гава сьндоԛа пәймане чʹәме Урдӧнева дәрбаз дьбу, ава ԝе һатә бьрʹине. Әв кәвьр, ви кʹәрәмәти ԝе бькә бира ԝә!» Ле хенщи ве йәке Йешу ӧса жи 12 кәвьред дьне һьлдьдә у датинә дь чʹәмеда, кʹеләка ԝан щийа кʹидәре кʹаһин сәкьнибун.

Хьлазийе Йешу готә ԝан кʹаһина: «Дәркʹәвьн жь чʹәме Урдӧне». Гава әԝана жь чʹем дәркʹәтьн, ава чʹем пашда дәстпекьр бькʹьшә.

Йешуа 3:1-17; 4:1-18.