Сәрһати 53

Созе Йәфтаһ

ТʹӘВИ тә тьште ӧса ԛәԝьмийә, кӧ пешийе созәки бьди кәсәкирʹа ле паше пʹошман би? Мере кӧ ль сәр шькьл те кʹьвше һәма сәва ве йәке бәрхԝә дькʹәвә, чьмки әԝи пешийе соз да, ле паше те дәрхьст кӧ ԝирʹа чәтьнә ԝи сози бинә сәри. Наве ԝи Йәфтаһ йә у әԝ һʹакьме мерхас ә дь Исраеледа.

Йәфтаһ ԝәʹдәки ӧсада дьжит чахе исраели Йаһоԝарʹа ида ԛӧльх нәдькьрьн. Әԝана диса жи хьрави дькьрьн. Ләма жи Хԝәде дьһишт кӧ әԝана жь дәсте Аммонийа бьчәрчьрьн. Жь ве йәке исраелийа дәстпекьрьн лавайа Йаһоԝа бькьн: «Мә гӧнә кьр бәр тә. Ле һиви тә дькьн, мә хьлаз кә!»

Паши ве йәке щьмәʹте диса дәстпекьр Йаһоԝарʹа ԛӧльх кә. Бь ве йәке һатә кʹьвше кӧ әԝана жь кьред хԝәйә хьрав пʹошман бун у гӧнед хԝә данә рʹуйе хԝә. Ләма жи Йаһоԝа дәстпекьр али ԝан бькә.

Исраелийа, сәва кӧ пешбәри Аммонийа шәрʹ кьн, Йәфтаһ ԝәԛәтандьн. Йәфтаһ жи гәлә дьхԝәст кӧ дь ви шәрʹида Йаһоԝа али ԝи бькьра. Ләма жи әԝи соз да Йаһоԝа: «Һәрге тӧ дь ви шәрʹида мьн сәрфьнийаз ки, чахе әз вәгәрʹьм мал, әзе ԝи мәрьви йе кӧ пешийа һʹәмуйа рʹасти мьн бе тʹәсмили тә бькьм».

Йаһоԝа созе Йәфтаһ ԛәбул кьр у дь ви шәрʹида ԝи сәрфьнийаз кьр. Зани чахе Йәфтаһ жь шерʹ вәгәрʹийа, кʹи пешийа һʹәмуйа рʹасти ԝи дәркʹәт? Пешийа һʹәмуйа ԛиза ԝи дәркʹәт, йа кӧ зарʹа ԝийә тайе тʹәне бу. Гьрин кʹәтә ԝи: «Ԝәй ль сәре мьн! Ԛиза мьн, тә чь сәре мьн кьр. Ле мьн соз дайә Йаһоԝа, у әз нькарьм жь созе хԝә вәгәрʹьм».

Чахе ԛиза Йәфтаһ созе баве хԝә бьһист, пешийе әԝ жи бәрхԝәкʹәт. Зани чьрʹа? Чьмки әԝ гәрәке мала баве хԝә у һʹәму һәвалед хԝә бьһишта, у бьчуйа Шилойе. Ле алийе дьнва жь ви баштьр чь һәйә, кӧ тʹәмамийа әʹмьре хԝә дь коне Йаһоԝада ԛӧльх кә. Ләма жи әԝе гoтә баве хԝә: «Һәрге тә соз дайә Йаһоԝа, бьра созе тә бе сәри».

Ӧса ԛиза Йәфтаһ чу Шилойе, у тʹәмамийа әʹмьре хԝә Йаһоԝарʹа дь коне ԝида ԛӧльх дькьр. Ԛизед исраели жи һәр сал, сале чар рʹожа дьһатьн кӧ сәрики ле хьн, у тʹәвайи әԝана ԝәʹде хԝәш дәрбаз дькьрьн. Щьмәʹта Исраеле ԛиза Йәфтаһ гәләк һʹәз дькьрьн, чьмки әԝе бь дьл у щан Йаһоԝарʹа ԛӧльх дькьр.

Һ’акьмти 10:6-18; 11:1-40.