Сәрһати 96

Иса Нәхԝәша Ԛәнщ Дькә

ИСА бажарава дәрбаз дьбу у нәхԝәша ԛәнщ дькьр. Әʹламәти дәрһәԛа кʹәрәмәтед ԝи нав һʹәму гӧнда у бажара бәла дьбу. Ләма жи мәрийа тʹәви хԝә сәԛәта, кора, кәра у ӧса жи гәлә мәрийед дьн дьани кӧ Иса ԝан ԛәнщ кә. Иса жи ван һʹәму мәрийа жь нәхԝәшийед ԝан ԛәнщ дькьр.

Ԝәкә се сал дәрбаз бу паше ԝе йәке ча Иса бал Йуһʹәнна һатә ньхӧмандьне. Иса дьвежә шагьртед хԝә кӧ зутьрке әԝ ԝе һәрә Оршәлиме, кʹидәре ԝе бе кӧштьне у паше жь мьрийа ԝе бе рʹакьрьне. Ле пешийа ве йәке Иса гәлә нәхԝәша ԛәнщ дькьр.

Щарәке Иса һин дькьр мәрийа рʹожа шәмийе. Һʹәму щьһу рʹожа шәмийе гәрәке һеса буна у нәдьхәвьтин. Ль ԝе рʹоже Иса незики жьнәке гәлә нәхԝәш бу. Әԝ ида 18 сал ԛонщьки бу у нькарьбу хԝә рʹаст кьра. Иса дәстед хԝә дани сәр ԝе, у әԝ перʹа-перʹа рʹаст бу. Әԝ жь нәхԝәшийа хԝә ԛәнщ бу.

Ле сәрԝеред кʹьниште жь бо ве йәке гәлә һерс кʹәтьн. Йәк жь ԝан дәстпекьр ԛужини кә:«Шәш рʹож бона шьхӧлкьрьне һәнә, һун нава ван рʹожада дькарьн бен ԛәнщ бьн, нә кӧ рʹожа шәмийе!»

Ле Иса ԝанарʹа гот: «Нәһәԛно! Кʹи жь ԝә, рʹожа шәмийе гайе хԝә йан кʹәра хԝә жь афьрʹ вәнакә у набә сәр аве? Ле әв кʹӧлфәта бәләнгәз, йа кӧ ида 18 сал ә нәхԝәш бу, нә лазьм бу кӧ әԝ рʹожа шәмийе жь нәхԝәшийа хԝә ԛәнщ буйа?» Жь щава Иса һʹәмуйед кӧ мьԛабьли ԝи бун шәрми ман.

Паше ве йәке Иса тʹәви шагьртед хԝә рʹе кʹәт һʹәта Оршәлиме. Гава әԝана жь Әриһайе дәркʹәтьн, дӧ кор сәр рʹе рʹуньштьбун. Гава бьһистьн кӧ Иса дәрбаз дьбә, кьрьнә ԛирʹин у готьне: «Хӧдан,али мә бькә!»

Иса сәкьни, гази ԝан кьр у гот: «Һун чь жь мьн дьхԝазьн кӧ әз бона ԝә бькьм?» Ԝана жерʹа гот: «Хӧдан, бьра чʹәʹвед мә вәбьн». Иса дәст дани сәр чʹәʹвед ԝан у әԝана перʹа-перʹа ԛәнщ бун у дәстпекьрьн бьвиньн! Ле гәло Иса чьрʹа ван һʹәму кʹәрәмәта дькьр? Чьмки әԝ мәрийа һʹәз дькьр у дьхԝәст кӧ әԝана баԝәрийа хԝә ԝи биньн. Ләма жи әм сәд сәләфи заньн кӧ чахе Иса ԝе бьбә пʹадша у сәркʹартийе бькә, тʹӧ кәс ԝе навежә кӧ әз нәхԝәш ьм.

Мәтта 15:30, 31; Луԛа 13:10-17; Мәтта 20:29-34.