Сәрһати 104

Иса Вәгәрʹийа Әʹзмана

ПӘЙ ԝан рʹожарʹа Иса гәлә щар хԝә нишани шагьрта кьр. Дәрбәке Иса хԝә нишани 500 шагьрта дькә. Ле зани ԝи чахи Иса ԝанарʹа дәрһәԛа чь хәвәр да? Бәле, дәрһәԛа пʹадшатийа Хԝәде. Йаһоԝа ԝи шандьбу әʹрде, ԝәки әԝ дәрһәԛа пʹадшатийе даннасин бькә. Дина хԝә бьдә кӧ Иса һәла һе паши сахбуна хԝә жи ԛьрара Хԝәде дьани сәри.

Ле те бира тә пʹадшатийа Хԝәде чь йә? Бәле, пʹадшатийа Хԝәде әв дәԝләта Хԝәдейә ль әʹзмана йә, йе кӧ рʹасти жи һәйә, у пʹадше ԝи дәԝләти Иса Мәсиһ ә. Ча әм ида пеһʹәсийан, Иса ль сәр әʹрде һьн бьрʹчийа тʹер дькьр, һьн нәхԝәша ԛәнщ дькьр, у һәла һе мьрийа жи сах дькьр. Әв һʹәму тьшт нишани мә дькьн кӧ Иса рʹасти жи пʹадшаки баш у һежа йә.

Дә бьдә һʹәсаве хԝә чахе Иса ԝе һʹәзар сали сәркʹартийе бькә, әʹмьр ль сәр әʹрде ԝе чь щурʹәйи бә! Бәле, тʹәмамийа әʹрде ԝе бьбә щьнәте бәдәԝ. Ида шәрʹ ԝе тʹӧнә бьн, нәһәԛи у нәхԝәши жи ԝе тʹӧнә бьн, һәла һе мьрьн жи ԝе тʹӧнә бә. Әм баԝәр дькьн кӧ жийин ԝе рʹасти жи ӧса бә, чьмки чахе Хԝәде сәре-сәрида әʹрд чекьрьбу, һʹәму тьшт һәма ӧса бу. Те бира тә кӧ Хԝәде сәре-сәрида бахче Адән чекьр, сәва кӧ мәрьве пешьн теда дь бәхтәԝарийеда бьжин. Иса ԝе ӧса бькә, ԝәки әв нета Хԝәде хьлазийе бе сәри.

Ньһа ԝәʹдә гьһишт кӧ Иса пашда вәгәрʹә әʹзмана. Нава 40 рʹожа Иса гәлә щар хԝә нишани шагьрта кьр. Ньһа шагьрт сәд сәләф заньн кӧ Иса сах ә. Ле пешийа чуйина сәр әʹзмана, Иса тьштәки ӧса готә шагьрта: «Һʹәта рʹӧһʹе пироз сәр ԝәда нәйе, жь Оршәлиме дәрнәкʹәвьн». Рʹӧһʹе пироз ԛәԝата Хԝәде йә, әв мина баки йә, йе кӧ ԝе али шагьрта бькә ԝәки әԝана ԛьрара Хԝәде бьԛәдиньн. Хьлазийе Иса готә шагьрта: «Һуне дәрһәԛа мьн даннасин бькьн, у һʹәта сәре дьне жи бьбьнә шәʹдед мьн».

Паши ван гьлийа, тьште кʹәрәмәт ԛәԝьми, Иса дәстпекьр һьлкʹьшә әʹзмана. Дина хԝә бьдә әв йәк ль сәр шькьли жи те кʹьвше. Паше әʹԝра ԝи дада у шагьрт ида тʹӧ щар ԝи нәдитьбун. Иса һьлкʹьшийа әʹзмана у жь ԝьр дәстпекьр ль сәр шагьрта сәрԝерти бькә.

1 Корьнтʹи 15:3-8; Әʹйанти 21:3, 4; Кʹаред Шандийа 1:1-11.