Сәрһати 105
Шагьрт Дь Оршәлимеда Һивийе Нә
ӘВ МӘРИ йед кӧ тӧ ль сәр шькьл дьвини, шагьртед Иса нә. Әԝана гӧрʹа Иса кьрьн у дь Оршәлимеда ман. Чахе әԝана тʹәвайи дь маләкида һивийе бун, дәнгәки ԛайим тʹәмамийа мале тʹьжә кьр. Әв дәнг мина баки ԛайим бу. Һинге зманед мина алава агьр ԝанарʹа хӧйа бу у ль сәр һәр йәки жь шагьртарʹа кʹьвш бу. Әв йәк кӧ зманед алава ча ль сәр ԝан һатә хԝәре, ль сәр шькьл рʹьнд те кʹьвше. Ле гәло әв һʹәму тьшт чь тен һʹәсаве?
Бь рʹастийе әв кʹәрәмәт ә! Иса ида щәм Баве хԝә ль әʹзмана йә, у әԝи ль сәр шагьртед хԝә рʹӧһʹе пироз баранд. Ле тӧ зани бь сайа рʹӧһʹе пироз чь кʹәрәмәт ԛәԝьми? Шагьрта дәстпекьрьн бь щурʹә-щурʹә змана хәбәр дьн.
Ԝе дәме дь Оршәлимеда гәлә мәрийа әв дәнгәки мина баки ԛайим бьһистьн, у ләма жи әԝана һатьн ль вьр кӧ пебьһʹәсьн һәла чь ԛәԝьми. Һьнә жь ԝан жь ԝәлате дьнена һатьбун Оршәлиме сәр әʹйда Рʹожа Пенщийә Һʹәсабе, у әԝана жи һатьн у незики шагьрта бун. Әԝана гьшк жи зәндәгьрти мабун! Чьмки һәр кәс жь ԝан ль сәр зьмане хԝә дьбьһист, ча шагьрт дәрһәԛа Хԝәде у кьред ԝи хәбәр дьдан.
Щьмәʹте дьгот: «Нә әв һʹәмуйед кӧ хәбәр дьдьн жь Щәлиле нә? Әԝана чаԝа дькарьн ль сәр ԝан һʹәму змана хәбәр дьн, йе кӧ дь ԝәлате мәда хәбәр дьдьн?»
Һинге Пәтрус рʹабу у дәстпекьр щьмәʹтерʹа шьровәкә. Әԝ бь дәнге ԛайим гьли дькьр, ча Иса һатьбу кӧштьне у ча Йаһоԝа жь мьрийа ԝи рʹакьр. Сәрда жи әԝи зедә кьр: «Хԝәде кӧрʹе хԝә Иса һьлкʹьшанд әʹзмана, да кʹеләка хԝәйә рʹасте, у Иса рʹӧһʹе пирозе созкьри жорда ль сәр шагьртед хԝә баранд. Аһан чьрʹа һун әв тьштед кʹәрәмәт дьбьһен у дьвиньн».
Чахе Пәтрус әван гьлийа дьгот, гәләка жь ԝан бәрхԝә дькʹәтьн, кӧ мәрийа чь сәре Иса кьрьн. Әԝана гьлийед ӧса дьготьн: «Әм чь гәрәке бькьн?» Пәтрус готә ԝан: «Һун гәрәке әʹмьре хԝә бьгӧһезьн у бенә нӧхьмкьрьне». Ԝи чахи ԝәкә 3 000 мәри хԝә ньхӧм кьрьн у бунә шагьртед Иса.