Сәрһати 106

Жь Кәле Аза Бун

БЬНЬҺЕРʹӘ ча мьлйакʹәт дәре кәле вәдькә. Әв мәри жи йе кӧ жь кәле аза дьбьн, шагьртед Иса нә. Гәло чьрʹа әԝана кʹәтьнә кәле? Ԝәрә әм пебьһʹәсьн.

Паши ԝе йәке ча Иса ль сәр шагьртед хԝә рʹӧһʹе пироз баранд, һьнә ԝәʹдә дәрбаз бу у тьштед ӧса ԛәԝьмин: Щарәке, нивро, Пәтрус у Йуһʹәнна чубун ль пʹарьстгәһа Оршәлиме. Ль ԝьр бәр дәрийе пʹарьстгәһе мәрик рʹуньштьбу, йе кӧ жь буйина хԝә ньгада сәԛәт бу. Һәр рʹож ԝи ль бәр пʹарьстгәһе датанин, ԝәки әԝ жь мәрийед, кӧ дьһатьнә пʹарьстгәһе, пʹәрә бьхԝазә. Гава Пәтрус у Йуһʹәнна дькʹәтьнә пʹарьстгәһе, әԝи дәстпекьр лава ԝан бькә кӧ тьштәки бьдьнә ԝи. Ле зани Пәтрус у Йуһʹәнна чь кьрьн?

Әԝана сәкьнин у дина хԝә данә ԝи мәрьви. Ԝи чахи Пәтрус гот: «Пʹәре мьн тʹӧнә, ле чи мьн һәйә әзе ԝи бьдьмә тә. Бь наве Иса Мәсиһ рʹабә бьгәрʹә!» Паше Пәтрус дәсте ԝийи рʹасте гьрт у мерьк банзда сәр хԝә сәкьни у перʹа-перʹа дәстпекьр бьгәрʹә. Гава тʹәмамийа щьмәʹте дит кӧ әԝ дьгәрʹә, зәндәгьрти ман у жь бо ве кʹәрәмәте гәлә ша дьбун.

Ԝи чахи Пәтрус гот: «Әԝи кʹәрәмәти мә бь рʹазийа ԛәԝата Хԝәде кьр, йе кӧ Иса жь мьрийа рʹакьр». Чахе Пәтрус у Йуһʹәнна һе хәбәр дьдан, һьнә жь сәрԝеред кʹьништа һатьн ль вьр. Әԝана гәлә һерс кʹәтьбун, чьмки шагьрт дәрһәԛа Иса, йе кӧ жь мьрийа рʹабу, гьли дькьрьн. Ләма жи сәрԝеред кʹьништа Пәтрус у Йуһʹәнна гьртьн у кьрьнә кәле.

Рʹожәке дьн сәрԝеред кʹьништа ль сәр щьвинәке мәзьн тʹоп бун. Пәтрус у Йуһʹәнна, ӧса жи ԝи мәрьве кӧ ԛәнщ бьбу, анинә ль вьр. Сәрԝеред кʹьништа пьрс данә шагьрта: «Ԝә бь чь ԛәԝате әв кʹәрәмәт кьр?»

Һинге Пәтрус щава хԝәда гот, кӧ әв кʹәрәмәт бь ԛәԝата Хԝәде һатә кьрьне, бь кʹижани жи Иса жи һатә сах кьрьне. Кʹәшиш нә жи дькарьбун инкʹар кьрана, кӧ әв кʹәрәмәт бь рʹастийе жи ԛәԝьми, нә жи заньбун чь бькьн. Ләма жи әԝана фәрман данә шагьрта кӧ тʹӧ щар бь наве Иса тʹӧ тьшти хәбәр нәдьн. Паше ве йәке сәрԝеред кʹьништа шагьрта бәрʹдан.

Ԝәʹдә дәрбаз дьбу, ле шагьрт йәкә дәрһәԛа Иса даннасин дькьрьн у һьн жи нәхԝәша ԛәнщ дькьрьн. Әʹламәти дәрһәԛа ван кʹәрәмәта ль һʹәму щийа бәла дьбу. Һәла һе жь һʹәму шәһәре дӧр-бәре Оршәлиме жи, әʹлаләт нәхԝәша дьанин щәм шагьрта, ԝәки ԝана ԛәнщ кьн. Жь бо ве йәке сәрԝеред кʹьништа гәлә әʹщьз дьбун, ләма жи ԝана шагьрт гьртьн у авитьнә кәле. Ле дь кәледа шагьрт гәлә ԝәʹдә нә ман.

Ча ль сәр шькьли те кʹьвше, еваре мьлйакʹәтәки Хԝәде дәре кәле вәкьр у гот: «Һәрʹьн ль пʹарьстгәһе у ль ԝьр мәрийарʹа даннасин бькьн». Рʹожәке дьн, чахе сәрԝеред кʹьништа мәрьва шандьн ль кәле пәй шагьрта, ԝана дина хԝә да кӧ шагьрт нә ль ԝьр бун. Гава әԝана чунә пʹарьстгәһе, ԝана дина хԝә дайе кӧ Пәтрус у Йуһʹәнна ль ԝьр ьн у мәрийа һин дькьн. Ԝана Пәтрус у Йуһʹәнна гьртьн у бьрьнә ль сәр щьвинәке мәзьн, сәва кӧ диԝана ԝан бькьн.

Чахе әԝана һатьн, сәрԝеред кʹьништа готьн: «Нә мә һʹьшк тʹәми ль ԝә кьрьбу, ԝәки һун бь наве Иса тʹӧ тьшти һин нәкьн? Ле ԝә һәла һе Оршәлим жи бь һинкьрьна хԝәва тʹьжә кьрийә». Шагьрта жи щава хԝәда готьн: «Әм гәрәке гӧрʹа Хԝәде бькьн, нә кӧ йа мәрьва». Ләма шагьрт диса жи дәрһәԛа «мьзгинийа хере» даннасин дькьр. Әв сәрһати гәлә мәсәләки баш ә сәва мә, ӧса нинә?

Кʹаред Шандийа сәре 3 һʹәта 5.