Сәрһати 116
Чь Әм Гәрәке Бькьн Ԝәки Һʹәта-һʹәтайе Бьжин
ҺӘЛА бьньһерʹә әв кәчʹька бьчʹук тʹәви һәвалед хԝә чь дьхунә? Бәле, әԝана жи һәма ве кʹьтебе дьхуньн, йе кӧ ньһа дь дәсте тәда нә, демәк кʹьтеба «Сәрһатийед Кʹьтеба Пироз». Әԝана жи мина тә ньһа сәрһатийа 116 дьхуньн наве кʹижани ӧса нә: «Әм чь гәрәке бькьн ԝәки һʹәта-һʹәтайе бьжин».
Ле зани дәрһәԛа чь әԝана ньһа педьһʹәсьн? Һәрге әм дьхԝазьн һʹәта-һʹәтайе бьжин, пешийе әм гәрәке бьзаньбьн дәрһәԛа Йаһоԝа у кӧрʹе ԝи Иса. Кʹьтеба Пироз дьвежә: «Һәрге әм дьхԝазьн һʹәта-һʹәтайе бьжин, әм гәрәке Хԝәдайе йәкани у рʹаст, ӧса жи кӧрʹе ԝийә Иса Мәсиһ, йе кӧ әԝи шандьбу әʹрде, нас кьн».
Ле ча әм дькарьн насийа хԝә бьдьнә Йаһоԝа у кӧрʹе ԝи Иса Мәсиһ? Мәсәлә, һәрге әм кʹьтеба «Сәрһатийед Кʹьтеба Пироз» жь сәри һʹәта хьлазийе бьхуньн. Дь ве кʹьтебеда гәлә тьшт дәрһәԛа Йаһоԝа у Иса те гьли кьрьне, ӧса нинә? Әв кʹьтеб ӧса жи гьли дькә дәрһәԛа шьхӧлед ԝан, йе кӧ ԝана ида кьр, у дәрһәԛа ԝан шьхӧла йе кӧ әԝана ль ахьрийе ԝе бькьн. Ле әм гәрәке нә тʹәне ве кʹьтебе бьхуньн.
Һәла дина хԝә бьдә, кӧ кʹеләка ван зарʹа диса кʹьтебәк һәйә. Әв, Кʹьтеба Пироз ә. Бежә кәсәки, ԝәки тәрʹа жь Кʹьтеба Пироз ван һʹәрфе ньвисара бьхуньн, ль сәр һиме кʹижани әв һʹәму сәрһати һатьн ньвисаре. Хԝәндьна Кʹьтеба Пироз ԝе али тә бькә, ԝәки тӧ Хԝәдерʹа рʹаст ԛӧльх ки у бьжи һʹәта-һʹәтайе. Ләма жи хԝәрʹа бькә хәйсәт ԝәки тʹьме Кʹьтеба Пироз бьхуни.
Ле бь рʹастийе тʹәне нас бькьн Йаһоԝа у Иса Мәсиһ, бәс нинә. Һәрге жи тӧ рʹьнд бьзаньби әԝана дәрһәԛа чь һин дькьн, әв жи ԝе бәс нибә сәва жийина һʹәта- һʹәтайи. Ле гәло чь диса лазьм ә?
Лазьм ә әм чь жи педьһʹәсьн, бьдьнә хәвате. Щьһудайе Исхәрйоти те бира тә? Әԝ йәк жь ԝан донздәһ шандийа бу, йе кӧ Иса жьбартьбу. Щьһуда гәлә тьшта дәрһәԛа Йаһоԝа у Иса заньбу. Ле чь сәре ԝи ԛәԝьми? Һьнәк ԝәʹда шунда әԝ бу мәрики хԝәһʹәз, у сәва 30 зива әԝи нәмамийа Иса кьр. Ләма жи Щьһуда һʹәта-һʹәтайе ԝе нажи.
Ньһа мәрьвәк бь наве Гәһази бина бира хԝә, дәрһәԛа ԝи әм дь сәрһатийа 69-да пеһʹәсийан. Әԝи кʹьнщед у зерʹ-зиве кӧ перʹа нәдькʹәт, дьхԝәст һьлда хԝәрʹа. Сәва кӧ ван тьшта бьстинә, әԝ һәла һе дәрәԝ кьр. Ләма жи Йаһоԝа ԝи щәза кьр. Һәрге әм гӧрʹа ԛанунед Йаһоԝа нәкьн, әԝ ԝе мә жи щәза кә.
Ле дь тʹәрихийеда һәбун мәрийед ӧса, йе кӧ бь һʹәлали Йаһоԝарʹа ԛӧльх дькьрьн. Әм жи дьхԝазьн мина ԝан бьн, ӧса нинә? Мәсәләки баш мәрʹа гәде бьчʹук бь наве Самуйел һишт. Дь сәрһатийа 55-да, әм пеһʹәсийан кӧ Самуйел һе ԝәкә чар-пенщ сали бу, гава дәстпекьр дь коне Йаһоԝада ԛӧльх кә. Ләма жи фьрԛи тʹӧнә тӧ чәнд сали йи, тӧ жи ида мәзьн и у дькари Йаһоԝарʹа ԛӧльх ки.
Ле диса кәсәк һәйә, кӧ әм дьхԝазьн чʹәʹв бьдьнә мәсәле ԝи. Бәле, әв Иса Мәсиһ ә. Дь сәрһатийа 87-да әм пеһʹәсийан кӧ Исайе щаһьл, гава дь пʹарьстгәһеда бу, дәрһәԛа Баве хԝәйә әʹзмана тʹәви мәрийа хәбәр дьда. Кʹа ԝәрә әм жи ӧса бьк ьн. Ԝәрә әм чьԛас дькарьн һе гәлә мәрийарʹа гьли кьн, дәрһәԛа Хԝәдайе хԝә Йаһоԝа у кӧрʹе ԝийә Иса Мәсиһ. Һәрге әм ӧса дькьн, әме бькарьбьн бьжин дь щьнәте Хԝәдеда һʹәта-һʹәтайе.
Йуһʹәнна 17:3; Зәбур 145:1-21.