Гӧмана Рʹасти сәва Мьрийед Тә

1-3. Әв чь дьжмьн ә кӧ пәй мә һʹәмуйа кʹәтийә, у чьрʹа созед жь Кʹьтеба Пироз дьле мә рʹьһʹәт дькә?

БЬДӘ бәр чʹәʹве хwә, wәки тӧ жь дьжмьнәки хwә дьрʹәви. Әw гәлә жь тә qәwаттьр ә у жь тә зутьр дьрʹәвә. Тӧ зани кӧ әw мәрьвәки гәләк бехwәде йә, чьмки әwи бәр чʹәʹве тә чәнд һәвалед тә кӧштийә. Тӧ чьqаси һе зу дьрʹәви, әw йәкә пәй тә дькʹәвә у һе незики тә дьбә. Ида тӧ дьшьрмиш дьби, кӧ һʹале тә гәләк хьраб ә, тʹӧ гӧман сәва тә тʹӧнә. Ле ньшкева тӧ пешийа хwә мәрьвәки дьбини. Әw жь дьжмьне тә гәләк щар qәwаттьр ә у әw соз дьдә тә, кӧ wе тә хьлаз кә. Wи чахи тӧйе чьqас ша би, ӧса нинә?

² Иро рʹасти жи дьжмьнәки ӧса бехwәде һәйә, йе кӧ пәй тә кʹәтийә. Әw пәй һʹәму мәрьва кʹәтийә. Ча әм пешда пеһʹәсийан, Кʹьтеба Пироз дьбежә кӧ әв дьжмьн һәйә мьрьн. Тʹӧ кәс жь мә нькарә жь wи бьрʹәвә, йан жи тʹәви wи шәрʹ бькә. Гәләк мәрийа жь бо wи дьжмьни, мәрьвед хwәйә незик ӧнда кьрьнә. Ле Йаһоwа жь wи дьжмьни гәләк qәwаттьр ә. Әw һәйә хьлазкʹаре мә, у әwи ида избат кьрийә кӧ дькарә мә жь мьрьне хьлаз кә. Йаһоwа соз дьдә кӧ wе әви дьжмьни, демәк мьрьне бьдә һьлдане. Кʹьтеба Пироз ӧса дьбежә: «Дьжмьне хьлазийе кӧ wе кʹоке ле бинә, мьрьн хwәха йә» (1 Корьнтʹи 15:26). Әва рʹасти жи мьзгиникә хер ә!

³ Wәрә әм ньһа һьнәки дьшьрмиш бьн, кӧ гава мәрьвәки мәйи незик дьмьрә әм чь ль сәр хwә тʹәхмин дькьн. Бь сайа ве йәке әме бькарьбьн фәʹм бькьн, кӧ созе Йаһоwа Хwәде чьqас дькарә мә бәхтәwар кә. Чьмки Йаһоwа соз дьдә кӧ мьри wе бенә сахкьрьне (Ишайа 26:19). Әwана wе диса жи бьжин. Әва созе Хwәде, һәйә гӧман сәва мьрийа.

ГАВА МӘРЬВӘКИ МӘЙИ НЕЗИК ДЬМЬРӘ

4. (а) Чьрʹа әw йәк кӧ Иса фәʹм дькьр еша мәрийа, нишан дькә мәрʹа кӧ Йаһоwа чь ль сәр хwә тʹәхмин дькә гава мәрьвәки мә дьмьрә? (б) Иса тʹәви кʹе һәвалти дькьр?

⁴ Гава мәрьвәки мә дьмьрә, ешәкә мәзьн дькʹәвә дьле мә у әw мәрʹа дьбә кӧл-дәрдәки мәзьн. Ле wәʹде ӧса әм дькарьн дьлбинийе жь Кʹьтеба Пироз бьстиньн. (Бьхунә 2 Корьнтʹи 1:3, 4.) Кʹьтеба Пироз али мә дькә әм пебьһʹәсьн, кӧ Йаһоwа у Иса Мәсиһ дәрһәqа мьрьне чь дьшьрмиш дьбьн. Исайе кӧ һʹәму алийава мина Баве хwә йә, занә кӧ чахе мәрьвәки мәрийа дьмьрә, әв кʹәдәрәкә чьqас мәзьн ә (Йуһʹәнна 14:9). Чахе Иса дь Оршәлимеда бу, әw гәлә щара дьчу гӧнде кʹеләке бь наве Бәйтанйа, сәва кӧ сәрики Лазар, Мәрйәме у Мәртʹайе хә. Пашwәхтийе әwана бунә достед wи. Кʹьтеба Пироз ӧса дьбежә: «Иса Мәртʹа, хушка wе у Лазаре бьре wан һʹьз дькьрьн» (Йуһʹәнна 11:5). Ле ча әм ида пешда пеһʹәсийан, паше ӧса qәwьми кӧ Лазар мьр. Ле гәло Иса чь ль сәр хwә тʹәхмин кьр, чахе пеһʹәсийа кӧ Лазар мьр?

5, 6. (а) Гава Иса дит кӧ бьра-пьсмам у достед Лазар ча шина Лазар дькьн, әв йәк ча ль сәр Иса һʹӧкӧм бу? (б) Әw йәк кӧ Иса жь бо мьрьна Лазар бәр хwә кʹәт, ча мә дьлгәрм дькә?

⁵ Чахе Иса пеһʹәсийа кӧ Лазар мьр әw чу щәм хушкед wи у достед wи, йед кӧ шина Лазар дькьрьн. Гава Иса әwана дитьн, гәләк бәр хwә кʹәт, «кʹәсәра кʹур һате у дьле wи ешийа». Паше жи, чаwа әм жь ве сәрһатийе педьһʹәсьн «Иса гьрийа» (Йуһʹәнна 11:33, 35). Ле гәло гьрийе Иса дьһатә һʹәсабе, кӧ гӧмана wи тʹӧнә бу? На. Бь рʹастийе Иса ида заньбу кӧ кʹәрәмәтәк wе бьqәwьмә (Йуһʹәнна 11:3, 4). Ле йәкә әw бәр хwә кʹәт.

⁶ Гьри у бәрхwәкʹәтьна Иса, мә дьлгәрьм дькә. Чьмки жь ве йәке әшкәрә те кʹьфше, кӧ мьрьн бәр чʹәʹве Иса у Йаһоwа рʹәш ә. Ле qәwата Йаһоwа дьгьһиже шәрʹ бькә тʹәви мьрьне у wи бьдә һьлдане! Wәрә әм бьньһерʹьн бь сайа qәwата Йаһоwа, Иса чь карьбу бькьра?

«ЛАЗАР, ДӘРКʹӘВӘ»

7, 8. Чьрʹа бь ньһерʹандьна мәрийа, сәва Лазар тʹӧ чʹарә ида тʹӧнә бу, ле Иса чь кьр?

⁷ Чьмки Лазар дь шкәфтеда дәфьн кьрьбун, ләма жи Иса гот wәки кәвьре бәр дәре шкәфте wеда кьн. Ле Мәртʹа qайил нибу кӧ шкәфте вәкьн, чьмки Лазар ида чар рʹож бу кӧ мьрьбу у дьбәк бин жи кʹәтьбу бәдәна wи (Йуһʹәнна 11:39). Һьн жи, бь ньһерʹандьна мәрийа сәва мьрийа ида чь чʹар һәйә?

⁸ Гава кәвьр wеда кьрьн, Иса бь дәнгәки бьльнд кьрә гази: «Лазар, дәркʹәвә!» Зани wи чахи чь qәwьми? «Йе мьри . . . дәркʹәтә дәрва» (Йуһʹәнна 11:43, 44). Дькари бьди бәр чʹәʹве хwә шабуна мәрийед дор-бәр? Сәва һьнәка Лазар һәвал бу, сәва йед дьн жи бьра-пьсмам, у wана заньбу кӧ әw мьрийә. Ле wа әw бәр wан сәкьнийә, диса әw Лазар. Wана чʹәʹве хwә баwәр нәдькьрьн. Гәләк жь wан жь шабуне дьрʹәвьнә бәр Лазар wәки wи һʹәмез кьн. Жь вьр әм дьбиньн, wәки qәwата Йаһоwа рʹасти жи дьгьһиже, кӧ тʹәви мьрьне шәрʹ бькә у wи бьдә һьлдане!

9, 10. (а) Ча Иса нишан кьр, кӧ qәwата сахкьрьне жь кʹе йә? (б) Жь хwәндьна мәсәла дәрһәqа сахбуне, кʹара мә чь йә?

⁹ Иса әшкәрә нишан кьр, кӧ әwи әв кʹәрәмәт бь qәwата хwә нәкьр. Пешийа кӧ гази Лазар бькә, Иса Йаһоwарʹа дӧа кьр у нишан кьр кӧ әв qәwата сахкьрьне жь Йаһоwа йә. (Бьхунә Йуһʹәнна 11:41, 42.) Йаһоwа диса гәләк щар әв qәwат дайә хәбате, хенщи Лазар дь Кʹьтеба Пирозда диса һʹәйшт мәсәлә һәнә дәрһәqа сахкьрьна мьрийа.a Хwәндьн у дьшьрмишбуна дәрһәqа ван мәсәла, гәләк һʹәwас ә. Жь ван мәсәла әм педьһʹәсьн, кӧ Йаһоwа Хwәде фьрqийе накә ортʹа мәрийа. Жь wан сахкьрийа һәбунә щаһьл жи, кал-пир жи, мер жи, жьн жи, Исраели у нә Исраели жи. Ӧса жи жь ван мәсәла әм дьбиньн, кӧ мәрьв ча пʹьрʹ шадьбун. Мәсәлә, дькари бьди бәр чʹәʹве хwә чахе Иса кәчʹька щаһьл сах кьр, шабуна де-баве wе чьqас мәзьн бу? (Марqос 5:42). Бәле, Йаһоwа сәва шабуне мәʹникә ӧса дабу wан, кӧ wана тʹӧ щар wе бирнәкьрана.

¹⁰ Фәʹмдари йә wәки мәрьвед кӧ Иса сах кьрьбун, ахьрийе диса мьрьн. Ле әв йәк те һʹәсабе, кӧ Иса бадиһәwа wана сах кьр? На. Чьмки бь сайа ван кʹәрәмәта, әм дәрһәqа мьрийа рʹастийе педьһʹәсьн, у гӧмане дьстиньн бона мьрийед хwә.

ӘМ ЧЬ ҺИН ДЬБЬН ЖЬ СӘРҺАТИЙЕД ДӘРҺӘQА САХБУНЕ?

11. Ча сәрһатийа дәрһәqа Лазар избат дькә wан гьлийа, кʹижан кӧ дь Wаиз 9:5-да ньвисинә?

¹¹ Жь Кʹьтеба Пироз әм педьһʹәсьн кӧ «мьри тьштәки ньзаньн» (Wаиз 9:5). Сәрһатийа дәрһәqа Лазар әве йәке рʹьнд избат дькә. Чахе Лазар жь мьрьне рʹабу, әwи qәт гьли кьрийә сәва әʹмьре ль сәр әʹзмана? Йан жи qәт гьли кьрийә, кӧ мәри щики дьчәрчьрьн, йан жи щәʹньм һәйә? На. Дь Кʹьтеба Пирозда тʹӧнә щики ӧса, wәки Лазар дәрһәqа тьштед ӧса гьли кьра. Һʹәта Лазар мьри бу, ван чар рʹожа әwи «тьштәк ньзаньбу». Лазар, ча бежьн бь хәwа мьрьне рʹаза бу (Йуһʹәнна 11:11).

12. Әм чьрʹа дькарьн баwәр бькьн, кӧ Лазар рʹасти жи жь мьрьне рʹабу?

¹² Сәрһатийа дәрһәqа Лазар ӧса жи нишан дькә, кӧ сахкьрьн рʹасти жи һәйә, әв чʹирʹок нинә. Шәʹдед wе йәке кӧ Иса Лазар жь мьрьне рʹакьр, гәләк мәри бун. Һәла һе сәркʹаред дине щьһуйа жи, кӧ Иса бәр чʹәʹве wан рʹәш бу, нькарьбун инкʹар кьрана кʹәрәмәта wи. Wана сәрда жи гьлийед ӧса готьн: «Әме чь бькьн? Әва мәрьва [Иса] гәләк нишана дькә?» (Йуһʹәнна 11:47). Гәләк мәрьв дьһатьн, wәки Лазаре сахбуйи бьбиньн. Паше, гәләк жь wана дәстпекьрьн жь Иса баwәр кьн. Лазаре сахбуйи wанарʹа дьбу избаткьрьн, кӧ Иса рʹасти жи жь Йаһоwа Хwәдеда һатийә шандьне. Әва избаткьрьн һаqаси qәwи бу, кӧ сәркʹаред дине щьһуйа хwәстьн һьн Иса, һьн жи Лазар бькӧжьн (Йуһʹәнна 11:53; 12:9-11).

13. Ль сәр чь һʹими әм дькарьн баwәр кьн, кӧ Йаһоwа дькарә мьрийа рʹакә?

¹³ Гәло бь аqлайи йә баwәр кьн кӧ мәрьв дькарә бе сахкьрьне? Бәле, чьмки Иса дьбежә кӧ wәхтәке бе, чахе «һʹәмуйед тʹьрбада wе дәнге wи бьбьһен» у wе рʹабьн (Йуһʹәнна 5:28). Йаһоwа һәйә Әʹфьрандаре һʹәму тьшти. Чәтьн ә баwәр бьки, wәки әw дькарә мәрьвәки тʹәзәда бьәʹфьринә? Вьра гәләк тьшт тʹәви бира Йаһоwа гьредайи йә. Ле гәло әw дькарә мьрийед мә дь бира хwәда хwәй кә? Бьдьн һʹәсабе хwә, кӧ дь әʹзменда милйард-милйарда стәйрк һәнә, у Йаһоwа наве һәр йәке жь wана, занә! (Ишайа 40:26). Ләма жи әм дькарьн гӧман бьн, кӧ Йаһоwа дькарә һʹәму тьшти, һур бь һур, дәрһәqа мьрийед мә дь бира хwәда хwәй кә у һазьр ә wана тʹәзәда бьәʹфьринә.

14, 15. Чь жь гьлийед Ибо те кʹьфше, Йаһоwа ча дьньһерʹә ль сәр рʹакьрьна мьрийа?

¹⁴ Ле гәло, Йаһоwа ча дьньһерʹә сәр рʹакьрьна мьрийа? Дь Кʹьтеба Пирозда ньвисар ә, wәки Йаһоwа гәлә дьхwазә, кӧ мәрийа жь мьрьне рʹакә. Мәрики амьн бь наве Ибо, пьрсәкә ӧса дабу: «Һәгәр мәрьв бьмьрә, гәло дькарә диса бьжи?» Бь ве йәке Ибо дьхwәст бьгота, wәки чахе әw бьмьрә, wе дь тʹьрбеда бә, һʹәта кӧ Йаһоwа Хwәде wи бира хwә бинә. Әwи готә Йаһоwа: «Те гази мьн бьки, әзе жи щаба тә бьдьм. Те бира әʹфьрандьнед дәстед хwә бьки» (Ибо 14:13-15, ДТʹ).

¹⁵ Жь вьр әм дьбиньн, кӧ Йаһоwа дьхwазә у гәләк һивийа wе рʹоже йә, чахе мьри wе сах бьн. Әв йәк мә гәләк дьлгәрьм дькә, ӧса нинә? Ле гәло, кʹи wе бе сахкьрьне, у әwана кʹидәре wе бьжин?

«ҺʹӘМУЙЕД ТʹЬРБАДА»

16. Гава мәри бенә сахкьрьне, әʹмьре wан ль сәр әʹрде wе чь щурʹәйи бә?

¹⁶ Сәрһати дәрһәqа сахкьрьна мьрийа, йед кӧ дь Кʹьтеба Пирозда ньвисар ьн, али мә дькьн фәʹм бькьн, wәки ль ахьрийе Йаһоwа Хwәде сәва мәрийа wе чь бькә. Жь ван сәрһатийа ӧса жи те кʹьфше, wәки әw мьрийед кӧ һатьбун сахкьрьне, диса жи ль сәр әʹрде тʹәви бьра-пьсмамед хwә дьжитьн. Демәк дь ахьрийеда жи, гава мьри бенә сахкьрьне, әwана wе ль сәр әʹрде бьжин, ле һьнге жийин wе һе хwәш бә. Ча әм ида жь сәре 3 пеһʹәсийан, нет-qьрара Хwәде әw ә, wәки әʹрд бь тʹәмамийе бьбә щьнәт. Ләма жи мәрьвед мәйә незик, гава бенә сахкьрьне wе ль щьнәте сәр әʹрде бьжин, кʹидәре ида шәрʹ, зӧлми у нәхwәши wе тʹӧнә бьн. Ль вьр сәр әʹрде, әwана wе бькарьбьн һʹәта-һʹәтайе бьжин, у бь рʹастийе жи бәхтәwар бьн.

17. Кʹижан мәри wе бенә сахкьрьне?

¹⁷ Ле гәло, кʹи wе бе сахкьрьне? Дь Кʹьтеба Пирозда ӧса ньвисар ә: «Һʹәмуйед тʹьрбада wе дәнге wи [Иса] бьбьһен» у «wе . . . рʹабьн» (Йуһʹәнна 5:28, 29). Дь Кʹьтеба Әʹйанти 20:13-да жи те гьликьрьне: «Бәʹре мьрийед хwә дан, Мьрьне у Дийаре Мьрийа жи мьрийед хwә дан». Бь ве йәке әм фәʹм дькьн, кӧ һʹәчʹи зәʹф жь мьрийа wе рʹабьн. (Зедә әʹламәти дәрһәqа «Дийаре Мьрийа» бьньһерʹә ль сәр рʹупʹела 212-213.) Демәк мәзәле һʹәму мьрийа wе бенә валакьрьне. Һʹәму мәри, йед кӧ мьрьнә, диса вәгәрʹьн жийине. Паwлосе шанди дәрһәqа ве йәке гот: «Һʹәму һәq у нәһәqе жь мьрьне рʹабьн» (Кʹаред Шандийа 24:15). Ле әв йәк чь те һʹәсабе?

18. Кʹи нә мәрьвед «һәq», йед кӧ бенә сахкьрьне, у әв гӧмана сахкьрьне жь чь тә аза дькә?

¹⁸ Мәрьвед «һәq», әв һәнә мәрийед рʹаст, дәрһәqа кʹижана әм дь Кʹьтеба Пирозда пеһʹәсийан, йед кӧ пешийа буйина Иса Мәсиһ дьман. Һәла дьшьрмиш бә дәрһәqа Нӧһ, Бьраһим, Сара, Муса, Рʹутʹ, Әстәр у диса гәләк мәрьвед дьн. Дәрһәqа һьнә жь ван мәрийед амьн, дь кʹьтеба Ибрани сәре 11-да те гьликьрьне. Мәрьвед «һәq», ӧса жи тенә һʹәсабе әw qӧльхкʹаред Йаһоwа, йед кӧ ида дь wәʹде мәда мьрьнә. Бь сайа гӧмана сахкьрьне, тьрса мә бәр мьрьне тʹьнә (Ибрани 2:15).

19. Кʹи нә «нәһәq» у Йаһоwа бь рʹәʹмтийа хwә чь мәщале дьдә wан?

¹⁹ Ле пьрсәк пешда те: әw мәрьвед кӧ Хwәдерʹа qӧльх нәкьрьнә у мьрьнә, ле һʹале wан wе ча бә? Әв милйарда мәрьвед «нәһәq» жь алийе Йаһоwа Хwәдеда wе нәйнә бир кьрьне. Әwана жи wе бенә сахкьрьне у мәщале бьстиньн, wәки һин бьн дәрһәqа Хwәде у wирʹа qӧльх кьн. Нава һʹәзар сала әв һʹәму мьри wе бенә сахкьрьне у бькарьбьн бь шабуне тʹәви мәрьвед дьн, амьн Йаһоwарʹа qӧльх кьн. Әв рʹасти жи wе зәманәки хwәш бә. Әв wәʹдә дь Кʹьтеба Пирозда те навкьрьне «Рʹожа Ахрәте».b

20. Чь йә «гәәнна», у кʹи дькʹәвә ль гәәннайе?

²⁰ Ле әв йәк те һʹәсабе, wәки һәр кәс жь мәрийа йед кӧ ль сәр әʹрде дьман, wе бенә сахкьрьне? На. Дь Кʹьтеба Пирозда ньвисар ә, wәки һьнә жь мьрийа, дь «щәʹньмеда» ньн (Луqа 12:5). Дь һьнә wәлгәрʹандьнед Кʹьтеба Пирозда хәбәра Ибрани «гәәнна», йан жи бь зьмане Йунани «гәәнна», һатийә тʹәрщьмәкьрьне «щәʹньм». Мәсәлә бәре, гәәна наве щийе гәмаре бу, йе кӧ пьшт диwаре Оршәлиме бу. Ль wьр щьнйаз у щурʹә-щурʹә бәрмайи дьшәwьтандьн. Ле тʹәне щьнйазе wан мәрьва давитьнә гәәннайе, йед кӧ нә һежайи дәфьнкьрьне бун у нә жи сахкьрьне. Ләма жи хәбәра гәәнна бь симболике те һʹәсабе qьркьрьна һʹәта-һʹәтайе. Рʹаст ә Иса Мәсиһ wе диwана мәрьвед сах у мьри бькә, ле һʹакьме һәри жорьн дьминә Йаһоwа (Кʹаред Шандийа 10:42). Йаһоwа тʹӧщар сах накә wан мәрьва, йед кӧ зӧлм у хьраб ьн, у нахwазьн хwә бьгӧһезьн.

САХКЬРЬН СӘВА ЖИЙИНА ЛЬ ӘʹЗМАНА

21, 22. (а) Чь те һʹәсабе «рʹабуна мьрийайә пешьн»? (б) Кʹи бу йе пешьн, кӧ ча кәсе рʹӧһʹани һатә сахкьрьне?

²¹ Дь Кʹьтеба Пирозда ӧса жи те гьликьрьне дәрһәqа сахкьрьна мәрийа, йед кӧ ль сәр әʹзмана wе бьжин ча кәсед рʹӧһʹани (Әʹйанти 20:6). Дәрһәqа сахкьрьна ӧса дь Кʹьтеба Пирозда тʹәне мәсәләк һәйә, әв һәйә мәсәлә Иса Мәсиһ.

²² Гава Иса Мәсиһ мьр, Йаһоwа нәһишт, wәки Кӧрʹе wи дь Тʹьрбеда бьминә (Зәбур 16:10; Кʹаред Шандийа 13:34, 35). Йаһоwа жь мьрьне Иса рʹакьр, ле әw ида ча мәрьв нибу. Пәтрусе шанди әве йәке шьровәдькә: «Әw алийе бәдәнида һатә кӧштьне, ле алийе рʹӧһʹанида жийинерʹа һатә вәгәрʹандьне» (1 Пәтрус 3:18). Бь рʹастийе жи әв кʹәрәмәтәкә мәзьн бу. Иса пашда вәгәрʹийа ль жийине, ле ида ча кәсе рʹӧһʹани у qәwат! (Бьхунә 1 Корьнтʹи 15:3-6.) Иса йе пешьн ә жь wан, кʹижани qәдрәки ӧса стандьнә, демәк ви щурʹәйи һатьнә сахкьрьне. Чьмки хенщи Иса диса кәсед ӧса һәбун, йед кӧ qәдрәки ӧса гәрәке бьстандана (Йуһʹәнна 3:13).

23, 24. Кʹи дькʹәвә нава кʹома «кәрийе пези бьчʹук», у һʹәсабе wан чьqас ә?

²³ Иса заньбу, кӧ паши рʹабуна жь мьрьне, әwе зутьрәке вәгәрʹә ль әʹзмана. Ләма жи пешийа мьрьна хwә әwи готә шагьртед хwә, кӧ әw дьчә wанарʹа «щи һазьр» кә (Йуһʹәнна 14:2). Мәри йед кӧ бьчуна ль әʹзмен, Иса wана нав дькә ча «кәрийе пези бьчʹук» (Луqа 12:32). Ле гәло, чьqас ьн йед дькәʹвьнә нава ве кʹӧма бьчʹукә мәсиһийед амьн? Йуһʹәннайе шанди әве йәке дь кʹьтеба Әʹйанти 14:1-да wа шьровәдькә: «Паше мьн дина хwә дайе, ва Бәрх [Иса Мәсиһ] ль сәре чʹийайе Сийоне сәкьни бу у сәд чьл чар һʹәзар мәрьв тʹәви wи бун, кӧ ль сәр әʹнийа wан наве wи у наве Баве wи ньвисар бун».

²⁴ Әв 144 000 мәсиһийед амьн wе бенә сахкьрьне сәва кӧ ль әʹзмана бьжин. Дь нав wанда ӧса жи шагьртед Исайә пешьн һәнә, йед кӧ шанди тенә навкьрьне. Ле әв сахкьрьн wе кʹәнге дәстпебә? Паwлосе шанди гот, wәки әв йәк wе бьqәwьмә рʹожа һатьна Иса Мәсиһ (1 Корьнтʹи 15:23). Һатьна Иса, әв те һʹәсабе wәʹдә чахе Иса wе дәстпекә сәрwертийе бькә. Әм ида дь wәʹде һатьна Иса Мәсиһда дьминьн. Дәрһәqа ве йәке әме дь сәре 9-да һур бь һур пебьһʹәсьн. Ләма жи рʹожа иройин жь wан 144 000 мәрьва, кʹи кӧ дьмьрә, перʹа-перʹа те сахкьрьне сәва жийина ль әʹзмана (1 Корьнтʹи 15:51-55). Ле әʹлаләтәкә мәзьн wе бенә сахкьрьне, сәва кӧ ль щьнәте сәр әʹрде бьжин.

25. Дь сәре майинда әме дәрһәqа чь хәбәр дьн?

²⁵ Бәле, Йаһоwа бь рʹастийе жи дьжмьне мә, демәк мьрьне, wе бьдә һьлдане! (Бьхунә Ишайа 25:8.) Ле ньһа дьбәк жи пьрсәк бал тә пешда те: ‹Сәва чь һьнәк жь мәрьва, гәрәке ль әʹзмана бьжин?› Сәва кӧ жь әʹзмана пʹадшатийе бькьн. Дәрһәqа ве йәке, һе зедә әме дь сәре майинда пебьһʹәсьн.