Әм Рʹасти ль «Ахьрийа ве Дьнйайе» Дьжин?

1. Жь кʹӧ әм дькарьн ахьрийе пебьһʹәсьн?

ДЬБӘК жи, гава тӧ дь телевизореда дәнг у бәʹса дьбьһейи, пьрс бал тә пешда те: ‹Гәло һʹале ве дьнйайе wе чаwа бә?› Qәзийа ӧса ньшкева дьqәwьмьн, кӧ рʹасти жи тʹӧ кәс ньзанә сьбе wе чь сәре wи бьqәwьмә (Аqуб 4:14). Ле Йаһоwа занә ль ахьрийе чь wе бьqәwьмә (Ишайа 46:10). Дь Кʹьтеба хwәйә Пирозда, Йаһоwа нә кӧ тʹәне дәрһәqа qәзийа у кӧл-дәрдед рʹожа иройин пʹехәмбәрти да ньвисаре, ле ӧса жи дәрһәqа кʹәрәма, йед кӧ зутьрәке wе бьqәwьмьн.

2, 3. Шагьртед Иса чь жь wи пьрсин, у Иса ча щаба хwә да?

² Иса Мәсиһ гьли дькьр дәрһәqа Пʹадшатийа Хwәде, йе кӧ wе һʹәму зӧлмийе бьдә һьлдане у әʹрде бькә щьнәт (Луqа 4:43). Мәрийа гәләк дьхwәст пебьһʹәсийана, кӧ Пʹадшатийа Хwәде кʹәнге wе бьһата. Дәрбәке шагьртед Иса жь wи пьрс кьрьн: «Бежә мә, әв тьшт wе кʹәнге бьqәwьмьн? У нишана һатьна тә у ахьрийа ве дьнйайе wе чаwа бә?» (Мәтта 24:3). Wи чахи Иса щаба wан да у гот, кӧ тʹәне Хwәде Йаһоwа занә, кʹәнге wе хьлазийа ве дьнйайе бе (Мәтта 24:36). Ле Иса пʹехәмбәрти кьр, wәки пешийа кӧ Пʹадшатийа Хwәде әʹрде бькә щьнәт, ль сәр әʹрде wе чь бьqәwьмьн. У әв пʹехәмбәрти һәма иро тенә сери!

³ Пешийа кӧ әм избат кьн, wәки әв йәк рʹасти жи ӧса нә, wәрә әм пебьһʹәсьн ль әʹзмана чь шәрʹ qәwьми. Рʹаст ә тʹӧ кәс жь мәрьва әв шәрʹ нәдитийә, ле әв шәрʹ ль сәр һʹәмуйа һʹӧкӧм бу.

ШӘРʹЕ ЛЬ ӘʹЗМАНА

4, 5. (а) Паши wе йәке ча Иса бу пʹадша, ль әʹзмана чь qәwьми? (б)  Ча жь Әʹйанти 12:12 те кʹьфше, паши шәрʹе ль әʹзмана чь qәwьми?

⁴ Жь сәре майин әм пеһʹәсийан, кӧ Иса дь сала 1914-да ль сәр әʹзмана бу Пʹадша. (Бьхунә Данйел 7:13, 14.) Чахе әwи сәрwерти сьтанд, әwи перʹа-перʹа дәстпекьр шьхӧлкʹарийе бькә. Дь Кʹьтеба Пирозда те готьне: «Ль әʹзмен шәрʹ дәстпебу. Мьхайил [сәрнавәки Иса] мьлйакʹәтед хwәва тʹәви зийе [Шәйтʹан Мире-щьна] шәрʹ кьр, зийе жи мьлйакʹәтед хwәва тʹәви wан шәрʹ кьр».a Дь ви шәрʹида Мире-щьна у мьлйакʹәтед хьраб демәк щьн, данә дәр у жь әʹзмана һатьнә авитьне сәр әʹрде. Бьдьнә һʹәсабе хwә, мьлйакʹәтед Хwәдейә амьн чьqас ша дьбун, кӧ әʹзман һатә тʹәмьзкьрьне. Ле сәва мәрьва әв бу кʹәдәрәкә мәзьн. Дь Кʹьтеба Пирозда те готьне: «Ле wәй ль әʹрде . . . чьмки Мирещьн жорда сәр wәда һатә авитьне у әw жь һерсе хwә дьхwә, кӧ занә wе һьндьки бьминә» (Әʹйанти 12:7, 9, 12).

⁵ Дина хwә бьде, әви шәрʹе ль әʹзмана чь гәрәке бьанийа ль сәр әʹрде. Мире-щьна бь һерса хwә гәрәке һʹәму мәрийарʹа ль сәр әʹрде wәй, демәк кӧл-дәрд бьанийа. Дь ви сәрида wе рʹьнд бе әʹйанкьрьне, кӧ әм рʹасти жи дь wәʹдәки ӧсада дьжин. Ле зутьрәке хьлазкьрьн wе һәбә, Шәйтʹан Мире-щьна хwәха жи занә кӧ «wе һьндьки бьминә». Кʹьтеба Пироз әви зәмани нав дькә «рʹожед ахьрийе» (2 Тимотʹейо 3:1). Чьqас әм гәрәке ша бьн, чьмки зутьрәке Хwәде wе әʹрде жь һʹӧкӧмтийа Мире-щьна хьлаз кә! Wәрә әм дәрһәqа һьнә тьшт хәбәрдьн, йед кӧ дь Кʹьтеба Пирозда һатьнә пʹехәмбәртикьрьне, у рʹожа иройин жи тенә сери. Әв йәк избат дькә, кӧ әм бь рʹастийе жи дь рʹожед ахьрийеда дьминьн, у Пʹадшатийа Хwәде wе зутьрәке кʹәрәма һʹәта-һʹәтайе бьбаринә ль сәр wан мәрьва, кʹи кӧ Хwәде һʹьз дькьн. Пешийе wәре әм хәбәрдьн дәрһәqа чар нишанед рʹожа иройин, кʹижан кӧ Иса дьгот.

QӘWЬМАНДЬНЕД МӘХСУС ДЬ РʹОЖЕД ПАШЬНДА

6, 7. Ча гьлийед Иса дәрһәqа шәрʹа у хәлайи-щәлайе, иро тенә сери?

⁶ «Мьләте рʹабә ль сәр мьләт, пʹадшати ль сәр пʹадшатийе» (Мәтта 24:7). Жь сала 1901-2000, бь милйона мәрьв дь шәрʹда һатьбун кӧштьне. Тʹәрихзанәки Британи ӧса ньвисийә: «Дь нав тʹәмамийа дирока дьнйайеда жь һʹәму qьрʹна зедәтьр дь qьрʹна бистида хуна мәрийа һатьбу рʹетьне . . . дь wан wәʹдада беһʹәсаб шәрʹ һәбун, әв шәрʹ һәрге хьлаз дьбун жи, һьнәк wәʹдә шунда диса дәстпедьбун». Дь рʹожнәмәкә бь наве «Wӧрлдwочда», ӧса ньвисар ә: «Тʹәне дь qьрʹна бистида, һаqас мәрьв һатьбун кӧштьне, чьqас кӧ дь нава тʹәмамийа дирокеда нәһатьбун кӧштьне». Дь сала 1914-да, нав шәрʹда wәкә 100 милйон мәрьв мьрьн. Һәрге кәсәк жь мәрийед мә нав шәрʹда мьрьнә, әв кʹәдәрәкә мәзьн ә, ле бьдә һʹәсабе хwә, мьрьна бь милйона мәрийа, чьqас кʹәдәрәкә мәзьн ани ль дьнйайе.

⁷ «Щи-щийа wе хәлайи-щәлайе. . . бә» (Мәтта 24:7). Ча жь леколина зандара те кʹьфше, дь нава 30 салед пашьнда хӧрәк һе зедә бу. Ле диса жи мәри бьрʹчи нә, чьмки пʹәре wан тʹӧнә хwарьне бькʹьрʹьн, йан жи әʹрде wан тʹӧнә, wәки тьшта бьчиньн. Wәкә бь милйарда мәрьв дь wәлатед пешдачуйида, мәщбур ьн рʹоже тʹәне пе доларәки бьжин. Гәләк жь wан мәрийа жь бьрчибуне нәхwәш дькʹәвьн. Бь һʹәсабкьрьна Организасиона Сахләмхwәйкьрьнейә Һәмдьнйайе, һәр сал wәкә пенщ милйон зарʹ жь бьрчибуне дьмьрьн.

8, 9. Жь чь те кʹьфше кӧ пʹехәмбәртийед Иса дәрһәqа әʹрдһʹәжа у нәхwәшийа һʹал, бь рʹастийе жи тенә сери?

⁸ «Әʹрдһʹәжед мәзьн . . . wе бьбьн» (Луqа 21:11). Ча жь Хьзмәткьрьна Әʹрднасийа Әмәрикайа Йәкбуйи те кʹьфше, һәр сал wәкә 19 әʹрдһʹәжед гран дькарьн бьqәwьмьн. Жь ван әʹрдһʹәжед гьран, авайи зийанәкә мәзьн дьстиньн у әʹрд жи дьqәльшә. Хенщи ве йәке, һәр сал әʹрдһʹәжед ӧса qайим жи дьqәwьмьн, кӧ гәлә авайи бь тʹәмами һьлдьшьн. Ӧса жи һʹәсабәк дьдә кʹьфше кӧ сала 1990-да дәстпебуйи, жь әʹрдһʹәжа дӧ милйона зедәтьр мәрьв мьрьн. Дь нәшьркьрьнәкеда һатьбу ньвисаре: «Тәкʹнолощийа мәрийа qәт тʹӧ тьшти нькарә бькә, сәва кӧ әʹмьре мәрийа жь әʹрдһʹәжа хьлаз кә».

⁹ «Мина нәхwәшийа һʹал wе бьбьн» (Луqа 21:11). Рʹаст ә медисинайә иройин пешда чуйә, ле йәкә әwана нькарьн әван нәхwәшийед ну бьдьнә сәкьнандьне, у нәхwәшийед бәре жи һәр щар һе гәләк бәла дьбьн. Дь әʹдәбийатәкида һатьбу готьне кӧ wәкә 20 нәхwәшийед ӧса, ча мәсәлә: «тубәркулоз, тʹа, кʹолера» һәнә, йед кӧ һәр щар һʹәкимарʹа һе чәтьн дьбә ван нәхwәшийа qәнщ кьн. Хенщи wе йәке, wәкә 30 нәхwәшийед ну ль дьнйайе бәла бун. Гәләк жь ван нәхwәшийа найенә qәнщкьрьне у гәләк мәри жь бо ван нәхwәшийа дьмьрьн жи.

ДЬ РʹОЖЕД АХЬРИЙЕДА МӘРЬВ WЕ ЧЬ ЩУРʹӘЙИ БЬН

10. Ча жи дь 2 Тимотʹейо 3:1-5-да һатьбу пʹехәмбәртикьрьне, иро мәри чь щурʹәйи нә?

¹⁰ Дь Кʹьтеба Пирозда те гьликьрьне нә кӧ тʹәне дәрһәqа wе йәке, wәки дь рʹожед ахьрийеда wе чь бьqәwьмьн, ле ӧса жи дәрһәqа wе йәке кӧ мәрьв wе чь щурʹәйи бьн. Паwлосе шанди рʹьнд әве йәке шьровәдькә у дьбежә, «кӧ рʹожед ахьрийеда зәманед хьраб wе бен». (Бьхунә 2 Тимотʹейо 3:1-5.) Паше жи зедә дькә, кӧ мәри wе бьбьнә:

• Хwәһʹьз

• Пʹәрәһʹьз

• Нә гӧрʹа де-бавада

• Һʹәрам

• Дьлсар

• Тәмсьст

• Зӧлмкʹар

• Рʹьһʹәтиһʹьз, нә кӧ Хwәдеһʹьз

• Пʹьшке хwәденасийе wе ль wан кʹәвә, ле wе qәwата wе инкʹар кьн

11. Ча жь кʹьтеба Зәбуре 92:7 те кʹьфше, чь wе бе сәре мәрьвед хьраб?

¹¹ Тӧ ча тʹәхмин дьки, дор-бәре тә рʹасти мәрийед ӧса һәнә? Һьлбәт, бәле. Чьмки ль дьнйайе мәрьвед ӧса тʹьжә нә. У әв йәк избат дькә, кӧ зутьрәке Хwәде wе чʹарәке бькә, чьмки дь кʹьтеба Зәбура 92:7-да ньвисар ә, кӧ чахе мәрийед нәһәq мина стрина шин бьн у һʹәмуйе кӧ зӧлмийе дькьн мина кӧлирка гӧлвәдьн, wи чахи әwана һʹәта-һʹәтайе wе бенә кʹӧтакьрьне.

МӘʹНИ БОНА ШАБУНЕ

12, 13. Чь щурʹәйи дь ван рʹожед ахьрийеда wе «занин зедә бьбә»?

¹² Ча Кʹьтеба Пироз пʹехәмбәрти кьрьбу, дь ван рʹожед ахьрийеда кӧл-дәрд гәләк ьн, рʹасти жи «wәй ль әʹрде». Ле дь ве дьнйа хьрабда, йед кӧ Хwәде һʹьз дькьн, гәләк мәʹнийед wан һәнә wәки әwана ша бьн.

¹³ Дь Кʹьтеба Данийелда те пʹехәмбәртикьрьне кӧ занәбун wе «зедә бьбә». Демәк әв те һʹәсабе кӧ занәбуна рʹаст дәрһәqа Хwәде wе зедә бьбә. Ле әв йәк кʹәнге гәрәке бьqәwьмийа? Wәʹде Рʹожа Ахрәте (Данийел 12:4). Дәстпебуйи жь сала 1914, Йаһоwа али мәрьвед амьн дькьр, wәки әwана һе рʹьнд бькарьбьн Кʹьтеба Пироз фәʹм бькьн. Мәсәлә, әwана пеһʹәсийан рʹасти дәрһәqа наве Хwәде, у qьрара wи, ӧса жи әwана һе кʹур пеһʹәсийан дәрһәqа qӧрбанбуна Иса Мәсиһ, һʹале мьрийа у сахкьрьне. Хенщи wе йәке, qӧльхкʹаред Йаһоwа пеһʹәсийан, кӧ ча әwана гәрәке бьжин, wәки әʹмьре wан бәхтәwар бә у дьле Хwәде жи ша бькьн. Ӧса жи wана һе рʹьнд фәʹм кьрьн шьхӧле Пʹадшатийа Хwәде чь йә, у әв Пʹадшати qьрара Хwәде ль сәр әʹрде wе чаwа бинә сери. Гәло, чахе qӧльхкʹаред Йаһоwа әв занәбун стандьн, чь дәстпекьрьн бькьн? Әв пьрс тʹәви пʹехәмбәртийед дьн тʹәвгьредайийә, йед кӧ дь рʹожед ахьрийеда тенә сери.

14. Даннасинкьрьн дәрһәqа Мьзгинийа Пʹадшатийе чьqаси бәла буйә, у әw кʹи нә кӧ дәрһәqа ве мьзгинийе даннасин дькьн?

¹⁴ Чахе Иса дәрһәqа хьлазийа дьнйа Мире-щьна пʹехәмбәрти кьр, әwи гьлийед ӧса гот: «Әв Мьзгинийа Пʹадшатийе wе ль нав тʹәмамийа дьнйайе бе даннасинкьрьне». (Бьхунә Мәтта 24:3, 14.) Әв Мьзгинийа Пʹадшатийе дь wәкә 235 wәлатада у ль сәр сәда зьмана те даннасинкьрьне. Бь милйона Шәʹдед Йаһоwа бь дьл у щан дәрһәqа ве мьзгинийа Пʹадшатийе даннасин дькьн у шьровәдькьн кӧ әв чь Пʹадшати йә, wе чь бькә у кʹижан кʹәрәма әм бькарьбьн жь ве Пʹадшатийе бьстиньн. Әwана «жь һәр мьләти, жь һәр бәрәке, жь һәр щьмәʹте у жь һәр зьмани» һатьнә жьбартьне (Әʹйанти 7:9). Шәʹдед Йаһоwа һинкьрьна Кʹьтеба Пироз бе пʹәрә дәрбаз дькьн тʹәви милйона мәрьва, йед кӧ дьхwазьн рʹастийе дәрһәqа Кʹьтеба Пироз пебьһʹәсьн. Бь рʹастийе жи әв кʹәрәмәтәкә мәзьн ә, кӧ пʹехәмбәрти дәрһәqа даннасинкьрьне ӧса тенә сери. Һәла һе әв пʹехәмбәртийа Иса жи, кӧ мәсиһийед рʹаст wе «бәр чʹәʹве һʹәмуйа рʹәш бьн» һатә сери (Луqа 21:17).

ТӦЙЕ ЧЬ БЬКИ?

15. (а) Тӧ баwәр дьки кӧ рʹасти жи әм дь рʹожед ахьрийеда дьжин, у чьрʹа баwәр дьки? (б) Чь те һʹәсабе хьлазийа дьнйайе сәва wан, кʹи кӧ мьqабьли Хwәде дьчьн, у чь wе бьqәwьмә тʹәви wан, кʹи кӧ гӧрʹа сәрwертийа Пʹадшатийа Хwәде дькьн?

¹⁵ Әw йәк кӧ һаqас пʹехәмбәрти жь Кʹьтеба Пироз тенә сери, тәрʹа избат дькә, кӧ әм дь рʹожед ахьрийеда дьжин? Чахе Йаһоwа wе qьрар кә кӧ шьхӧле даннасинкьрьне бьдә сәкьнандьне, wи чахи «хьлази» wе бе (Мәтта 24:14). «Хьлази» те һʹәсабе кӧ Хwәде wе әʹрд жь зӧлмийе тʹәмьз кә у qьрʹа wан мәрийа бинә, кʹи кӧ пешбәри wи дьчьн. Йаһоwа qьрара хwә, wе бь сайа Иса Мәсиһ у мьлйакʹәтед хwә бинә сери (2 Тʹесалоники 1:6-9). Мире-щьна у щьнед wи ида мьләта wе нәдьнә шашкьрьне. Һьнге Пʹадшатийа Хwәде wе кʹәрәме бьрʹәшинә сәр һʹәму мәрийа, йед кӧ дь гӧрʹа сәрwертийа wийә рʹастда ньн (Әʹйанти 20:1-3; 21:3-5).

16. Дь ван рʹожед ахьрийеда тӧ чь гәрәке бьки?

¹⁶ Дьнйа Мире-щьна wе зутьрәке бе кʹӧтакьрьне, ләма жи лазьм ә, пьрсе бьдьнә хwә: ‹Әз чь гәрәке бькьм?› Гәләк фәрз ә бәрдәwан ки, кӧ һе зедә пебьһʹәси дәрһәqа Йаһоwа у фәрманед wи (Йуһʹәнна 17:3). Кʹур Кʹьтеба Пироз леколин бькә. Хенщи wе йәке һәр гав тʹәви wан мәрийа бә, йед кӧ дьхwазьн qьрара Хwәде бьqәдиньн. (Бьхунә Ибрани 10:24, 25.) Дәрһәqа Йаһоwа Хwәде пебьһʹәсә бь аликʹарийа һинбуна Хәбәра wи, у гӧһастьнед лазьм дь әʹмьре хwәда бькә, сәва кӧ бькарьби дьле Хwәде ша ки (Аqуб 4:8).

17. Чьрʹа кʹӧтакьрьна мәрьвед зӧлм, сәва гәләка wе әʹщебмайи бә?

¹⁷ Иса пʹехәмбәрти кьр, кӧ һʹәчʹи зәʹф жь мәрийа wе гӧһ нәдьнә гьлийед Иса дәрһәqа рʹожед ахьрийе. Кʹӧтакьрьна мәрьвед зӧлм wе ньшкева бьqәwьмә. Гәләк мәри wе әʹщебмайи бьминьн, чьмки хьлази wе «мина дьзе шәве бе». (Бьхунә 1 Тʹесалоники 5:2.) Иса пешда әʹлам кьр: «Чаwа кӧ рʹожед Нӧһда qәwьми, һатьна Кӧрʹе Инсан жи wе ӧса бьqәwьмә. Чаwа кӧ wан рʹожед бәри тофане мәрьва дьхwарьн, вәдьхwарьн, дьзәwьщин у мер дькьрьн, һʹәта wе рʹожа кӧ Нӧһ кʹәтә гәмийе у мәрьв пе нәһʹәсийан, һʹәта кӧ лейи рʹабу у һʹәму жи хәньqандьн. Һатьна Кӧрʹе Инсан жи wе ӧса бә» (Мәтта 24:37-39).

18. Кʹижан гьлийед Иса, әм гәрәке һьлдьн дьле хwә?

¹⁸ Иса гӧһдаред хwәрʹа әʹлам кьр: «Мьqати хwә бьн, нәбә кӧ дьле wә хwарьн, вәхwарьне у хәмед ве дьнйайева гьредайи бә, ньшкева әw Рʹож сәр wәда бе. Чьмки әw рʹоже мина тʹәле бе сәре һʹәму мәрьвед ль сәр дьне. Һʹьшйар бьминьн у һәр гав дӧа бькьн, wәки һун бькарьбьн жь wан һʹәму тьштед кӧ wе бьqәwьмьн бьрʹәвьн-хьлаз бьн у ль бәр Кӧрʹе Инсан рʹуспи, [бь qәбулкьрьн] бьсәкьньн» (Луqа 21:34-36). Гәләк фәрз ә, wәки гьлийед Иса һьлди дьле хwә. Чьрʹа? Чьмки әw мәри йед кӧ Йаһоwа Хwәде у «Кӧрʹе Инсан» wан qәбул дькьн, әwана wе бькарьбьн хьлаз бьн жь кʹӧтакьрьна дьнйа Шәйтʹан Мире-щьна у бьжин ль щьнәте һʹәта-һʹәтайе. Әв рʹож незик ә, ль бәр шемике йә (Йуһʹәнна 3:16; 2 Пәтрус 3:13).