Гәло Чь йә ‹Нишана Рʹожед Ахьрийе›?

Щаба Кʹьтеба Пироз

Кʹьтеба Пироз дәрһәԛа ԛәԝьмандьн у хәйсәт-һʹӧнӧред мәрьва дьбежә, кʹижан ԝе бьбуна «нишана . . . ахьрийа ве дьнйайе» (Мәтта 24:3). Кʹьтеба Пироз әԝи ԝәʹдәйи нав дькә «рʹожед ахьрийе» йан жи «зәмане даԝийе» (2 Тимотʹейо 3:1; Данийел 8:19, ИМ).

Кʹижан ьн һьнә пʹехәмбәртийед Кʹьтеба Пироз дәрһәԛа «рʹожед ахьрийе»?

Кʹьтеба Пироз пʹехәмбәрти кьрийә дәрһәԛа гәләк тьшта, йед кӧ гәрәке һәврʹа бьԛәԝьмийана у бьбуна «нишана» рʹожед ахьрийе (Луԛа 21:7). Ԝәрә һьнә мәсәла шеԝьр кьн:

Шәрʹед нав тʹәмамийа дьнйайе. Иса пʹехәмбәрти кьрийә: «Мьләте рʹабә ль сәр мьләт, пʹадшати ль сәр пʹадшатийе» (Мәтта 24:7). Анәгори ве йәке, Әʹйанти 6:4 пʹехәмбәртийе дькә дәрһәԛа сийаре һәспейи симболик. Әв сийар гәрәке «әʹдьлайийе жь дьнйайе» һьлда.

Хәлайи-щәлайи. Иса пʹехәмбәрти кьрийә: «Щи-щийа ԝе хәлайи-щәлайе . . . бьбьн» (Мәтта 24:7). Кʹьтеба Әʹйанти ӧса жи пʹехәмбәртийе дькә дәрһәԛа сийарәки һәспәки дьн, кʹижан кӧ гәрәке гәләк щийада хәлайи-щәлайи пәй хԝә бьанийа (Әʹйанти 6:5, 6)

Әʹрдһʹәж. Иса пʹехәмбәрти кьрийә, ԝәки «щи-щийа ԝе . . . әʹрдһʹәже бьбьн» (Мәтта 24:7; Луԛа 21:11). Әв әʹрдһʹәжед мәзьн кӧ нав тʹәмамийа дьнйайеда гәрәке бьԛәԝьмийана, ԝе зьрара мәзьн у һаԛас тәнгаси у мьрьн банийана, чьԛас кӧ пешда тʹӧ щар тʹӧнә буйә.

Нәхԝәши. Иса пʹехәмбәрти кьрийә, ԝәки «нәхԝәшийа һʹал» йан епидемийа ԝе пешда бен (Луԛа 21:11).

Зордари. Рʹаст ә бь сәда сала мәрьв зордарийе дькьн, ле Иса дәрһәԛа «зедәбуна нәһәԛийе» пʹехәмбәрти кьрийә, ԝәки рʹожед ахьрийеда нәһәԛи у зордари ԝе дьһа зедә бьн (Мәтта 24:12).

Хьрабкьрьна әʹрде. Әʹйанти 11:18-да һатийә пʹехәмбәртикьрьне, ԝәки инсанәте «дьне хьраб» кә. Әԝана ԝе әԝе йәке бь гәләк щурʹа бькьн, демәк нә кӧ тʹәне бь зордарийе у кьред хьраб, ле ӧса жи ԝе зийане бьдьнә тʹәбийәте.

Хәйсәт-һʹӧнӧред хьраб. Кʹьтеба Пирозда 2 Тимотʹейо 3:1-4-да һатийә пʹехәмбәртикьрьне, ԝәки һʹәчʹи зәʹф мәрьв ԝе бьбьнә «бешекьр, һʹәрам . . . берʹәʹм, бӧхданбеж, тәмсьст, зӧлмкʹар, нәйаред ԛәнщийе, нәмам, щӧләʹт, хԝәрʹази». Әԝ хәйсәт-һʹӧнӧр нав мәрьавада ԝе гәләк әшкәрә бьн, ләма жи дәрһәԛа ԝи зәмани һатийә готьне кӧ «рʹожед ахьрийеда зәманед хьраб ԝе бен».

Дьлсари малбәтеда. Кʹьтеба Пирозда, 2 Тимотʹейо 3:2, 3-да һатийә пʹехәмбәртикьрьне, кӧ нәфәред малбәте ԝе һьндава һәвда «дьлсар» бьн у зарʹ жи «нә гӧрʹа де-бавада» бьн.

Һʹьзкьрьн һьндава Хԝәдеда сар буйә. Иса пʹехәмбәрти кьрийә: «Һʹьзкьрьна гәләка ԝе сар бә» (Мәтта 24:12). Бь ван гьлийа Иса дьхԝәст бьгота, ԝәки һʹьзкьрьна гәләк мәрийа һьндава Хԝәдеда ԝе сар бә. Анәгори ве йәке 2 Тимотʹейо 3:4 дьбежә, ԝәки рʹожед ахьрийеда мәрьв ԝе бьбьнә «рʹьһʹәтиһʹьз, нә кӧ Хԝәдеһʹьз».

Дӧрʹути һʹәбандьнеда. Кʹьтеба Пирозда, 2 Тимотʹейо 3:5-да һатийә пʹехәмбәртикьрьне, кӧ мәрьв ԝе бьдьнә кʹьфше, йан чь Хԝәде дьһʹәбиньн, ле бь рʹасти ԝе нормед Ԝи пьшт гӧһе хԝәва бавежьн.

Фәʹмкьрьна пʹехәмбәртийед Кʹьтеба Пироз. Кʹьтеба Данийелда һатийә пʹехәмбәртикьрьне, ԝәки «һʹәта дәма кӧ даԝи» бе, гәләк мәрьв ԝе занәбуна рʹастийа Кʹьтеба Пироз у фәʹмкьрьна пʹехәмбәртийа ԛазанщ кьн (Данийел 12:4, ИМ).

Шьхӧле бәлакьрьна мьзгинийе һʹәмдьнйайеда. Иса пʹехәмбәрти кьрийә: «Әв Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне, кӧ һʹәму мьләтарʹа бьбә шәʹдәти у һьнге хьлази ԝе бе» (Мәтта 24:14).

Ԛәрфкьрьн у бетʹалаши. Иса пʹехәмбәрти кьр, ԝәки һʹәчʹи зәʹф мәрьв ԝе һьндава нишанед рʹожед ахьрийе бетʹалаш бьн (Мәтта 24:37-39). Хенщи ԝе йәке, 2 Пәтрус 3:3, 4-да һатийә пʹехәмбәртикьрьне, ԝәки һьнә мәрьв ԝе ԛәрфе хԝә ԝан нишана бькьн у избатийа инкʹар кьн.

Һʹәму пʹехәмбәрти һатьнә сери. Иса гот ԝәки рʹожед ахьрийе ԝе бь ве йәке бенә кʹьфше, ԝәки һʹәму пʹехәмбәрти ԝе һәврʹа бенә сери, нә кӧ һьнәк йан жи һʹәчʹи зәʹф жь ԝан (Мәтта 24:33).

Гәло әм «рʹожед ахьрийеда» дьжин?

Әре. Дәрәщед ԝе дьнйайе у хроноложийа Кʹьтеба Пироз зәлал дькьн, ԝәки рʹожед ахьрийе жь сала 1914 дәстпебун, демәк һәма ԝе сале гава Шәрʹе Һʹәмдьнйайейә I дәстпебу. Сәва кӧ һе зедә пебьһʹәсьн, кӧ ча һʹале ԝе дьнйайе избат дькә, ԝәки әм рʹожед ахьрийеда дьжин, әве видеойе бьньһерʹә:

Сала 1914-да Пʹадшатийа Хԝәде дәстпекьр сәрԝертийе бькә. Йа пешьн чь кӧ әԝе Пʹадшатийе кьр әв бу, кӧ Мире-щьна у щьнед ԝи жь әʹзмен авитә сәр әʹрде, у синор ԝанрʹа һатә дайине кӧ тʹәне сәр әʹрде һʹӧкӧм кьн (Әʹйанти 12:7-12). Һʹӧкӧмкьрьна Мире-щьна сәр инсанәте те кʹьфше бь ньһерʹандьн у кьред мәрьвайә хьраб, жь бо чь жи рʹожед ахьрийе бунә «зәманед хьраб» (2 Тимотʹейо 3:1).

Гәләк мәрьв дьчәрчьрьн жь бо ԝан рʹожед ахьрийейә гьран. Әԝана хәмгин дьбьн кӧ нькарьн тʹәвайи әʹдьлайеда бьжин у һәврʹа зьман бьвиньн. Һьнә мәрьв жи бәр хԝә дькʹәвьн кӧ ахьрийеда мәрьв ԝе ԛьрʹа һәв биньн.

Ле диса жи һәнә мәрьвед ӧса кӧ ԝи һʹалида һивийа ахьрийа баш ьн. Әԝана баԝәр ьн, ԝәки Пʹадшатийа Хԝәде зутьрәке ԝе һʹәму чәтьнайед инсанәте сафи кә (Данийел 2:44; Әʹйанти 21:3, 4). Әԝана бь сәбьр һивийа ԝи ԝәʹдәйи нә, гава Хԝәде һʹәму созед хԝә бинә сери. Һьм жи әԝана жь ԝан гьлийед Иса бәрдьлийе дьстиньн: «Кʹи кӧ һʹәта хьлазийе тәйах кә, әԝе хьлаз бә» (Мәтта 24:13; Миха 7:7).