Гәло Кʹьтеба Пирозда Һатийә Пʹехәмбәртикьрьне, кӧ Ԝәʹде Мәда Мәрьв ԝе Чь Щурʹәйи бьн?

Щаба Кʹьтеба Пироз

Бәле. Кʹьтеба Пирозда һатийә пʹехәмбәртикьрьне, кӧ ԝәʹде мәда мәрьв ԝе дьһа хьраб бьн. Хенщи ԝе йәке әв ӧса жи дьдә кʹьфше, ԝәки жь бо ве гӧһастьне нормед нав-намусийе у ԛимәтед мәрийа, ԝе ньмьз бьнa (2 Тимотʹейо 3:1-5). Ле Кʹьтеба Пирозда ӧса жи һатийә готьне, ԝәки ԝе һәбьн мәрьвед ӧса, кӧ дури ԝан тьшта бьн. Әԝана ԝе пе аликʹарийа Хԝәде нәкʹәвьнә бьн һʹӧкӧме мәрьвед хьраб, һьм жи ԝе бь фькьр у рʹабун-рʹуньштьна хԝә, Хԝәде хԝәш бен (Ишайа 2:2, 3).

Ве готареда

• Кʹьтеба Пироз чь пʹехәмбәрти кьрийә дәрһәԛа мәрьвед иройин?

• Чь щурʹәйи мәрьвед хԝәһʹьз сәр йед дьн һʹӧкӧм дьбьн?

• Чьма бь тʹәмами мәрьв һе хьраб бунә?

• Әм чь щурʹәйи гәрәке хԝә бьдьнә кʹьфше һьндава мәрьвед кӧ хьрабийе дькьн?

• Гәло һʹәму мәрьв ԝе алийе хьрабда бенә гӧһастьне?

• Гәло ахьрийеда тʹәмамийа инсанәте ԝе бькʹәвә нава бетʹәрбәтийе?

Кʹьтеба Пироз чь пʹехәмбәрти кьрийә дәрһәԛа мәрьвед иройин?

Кʹьтеба Пирозда һур бь һур те шьровәкьрьне, ԝәки ԝәʹде мәда ԝе рʹабун-рʹуньштьн у хәйсәтед мәрийа чь щурʹәйи бьн у ԝе һʹиме ве йәке хԝәһʹьзи бә. Мәрьв ԝе бьбьн «хԝәһʹьз», «тәмсьст», «рʹьһʹәтиһʹьз, нә кӧ Хԝәдеһʹьз» (2 Тимотʹейо 3:2-4).

Әв пʹехәмбәрти иро те сери, чьмки мәрьва һʹьш-аԛьле хԝә данә сәр хԝәстьнед хԝә, кʹара хԝә у кʹефа хԝә. Әԝ хәйсәт иро ӧса бәлабуйи нә, кӧ гәләк мәрьв хԝәстьнед хԝә, сәр һәр тьштирʹа бьльндтьр дьгьрьн у әԝана тенә навкьрьне Ньсьле Әз Әз Әз. Әԝана ӧса кʹәтьнә һʹәйра хԝә, кӧ бунә нәйаред ԛәнщийе. Әԝана бунә бешекьр, нә жи дьфькьрьн кӧ гәрәке рʹази бьн бь тьштед кӧ щәм ԝана һәнә, йан жи рʹазибуне бьдьнә кʹьфше гава ԝанарʹа ԛәнщийе дькьн (2 Тимотʹейо 3:2, 3).

Хԝәһʹьзи йә мәʹнийа ԝе йәке кӧ ньһерʹандьна мәрьва ви щурʹәйи буйә, у жь бо ви һʹӧнӧри гәләк һʹӧнӧред дьн жи пешда тен, кʹижан кӧ дькʹәвьнә нава нишана рʹожед мә. Әв һәнә:

• Тьмайи. Иро гәләк мәрьв бунә «пʹәрәһʹьз». Әԝана дьфькьрьн кӧ пʹәрә йан һәбука ԝан дьдә кʹьфше, кӧ әԝана пешдачуйи нә (2 Тимотʹейо 3:2).

• Бабахи. Иро һʹәчʹи зәʹф мәрьв бунә «кʹӧбар, бабах, кʹьфьр» у «хԝәрʹази» (2 Тимотʹейо 3:2, 4). Мәрьвед ӧса һʹьз дькьн хԝә бьдьнә кʹьфше у хԝә ԛӧрʹә кьн бь фәрәсәт, хәйсәт у һәбука хԝә.

• Бӧхданбежи. Иро мәрьвед «бӧхданбеж» һʹәму дәра һәнә (2 Тимотʹейо 3:2, 3). Әԝана бӧхдана давежьнә мәрьва у информасийа нәрʹаст дәрһәԛа ԝан бәла дькьн. Әԝана һәла һе һьндава Хԝәде жи хԝә ӧса дьдьнә кʹьфше.

• Хԝәрʹази. Иро гәләк мәрьв «нәмам, щӧләʹт, хԝәрʹази» нә (2 Тимотʹейо 3:2-4). Мәрьвед ӧсарʹа чәтьн ә зьман бьвиньн у тьштәки тʹәвайи сафи кьн. Әԝана һьм жи хԝәйе созе хԝә ниньн.

• Зӧлмкʹари. Рʹожа иройин мәрьв «зӧлмкʹар» ьн, зу һерс дькʹәвьн, жь бо чь жи шәрʹ-дәʹԝ пешда тен (2 Тимотʹейо 3:3).

• Нәһәԛи. Иса пʹехәмбәрти кьр, кӧ ԝәʹде мәда нәһәԛи ԝе дьһа зедә бә (Мәтта 24:12). Әԝи ӧса жи гот, кӧ һʹәму щийа әме дәрһәԛа «шәрʹ у дәʹԝа бьбьһен» (Луԛа 21:9).

• Малбәтеда кемасийа һʹьзкьрьне. Иро зарʹ «гӧрʹа де-бавада» ниньн у мәрьв һьндава малбәта хԝәда «дьлсар» ьн. Жь бо ве йәке нәфәред мале зорбәтийе һәв дькьн, һьндава һәвда бехәм ьн у һәв беһӧрмәт дькьн (2 Тимотʹейо 3:2, 3).

• Дӧрʹути һʹәбандьнеда. Иро һе зедә мәрьв дьбежьн кӧ Хԝәдерʹа хьзмәт дькьн, ле бь рʹасти әԝана тʹәне наве «хԝәденасийе» дьдьнә сәр хԝә (2 Тимотʹейо 3:5). Дәԝса кӧ гӧрʹа Хԝәде бькьн, әԝана пәй ԝан сәрԝеред религи дьчьн, йед кӧ тьштед «ль гӧһе ԝан хԝәш те» ԝанрʹа дьбежьн (2 Тимотʹейо 4:3, 4).

Чь щурʹәйи мәрьвед хԝәһʹьз сәр йед дьн һʹӧкӧм дьбьн?

Иро хԝәһʹьзи гәләк бәла буйә у жь бо ԝе йәке мәрьв дькʹәвьнә стресе, у проблемед емосийали у психики бал ԝан пешда тен (Ԝаиз 7:7). Мәсәлә, мәрьвед пʹәрәһʹьз, кәсед майин бона кʹара хԝә дьдьнә хәбате. Мәрьве дьлсар у берʹәʹм, һьндава малбәта хԝәда хԝә хьраб дьдә кʹьфше, у нәфәред ԝи жь бо ве йәке дькарьн бькʹәвьнә депресийайе у һәла һе бьхԝазьн хԝә бькӧжьн жи. Һьм жи мәрьве нәмам, бь нәамьнийа хԝә дькарә дьле йед дьн бешинә.

Чьма бь тʹәмами мәрьв һе хьраб бунә?

Кʹьтеба Пироз шьровәдькә, кӧ чьма мәрьв ӧса һатьнә гӧһастьне:

• Һʹьзкьрьна рʹаст һьндава Хԝәде у мәрийа сар дьбә (Мәтта 24:12). Жь бо ве йәке хԝәһʹьзи дьһа пешда те.

• Мире-щьна жь әʹзмен һатийә авитьне сәр әʹрде (Әʹйанти 12:9, 12). Жь ԝи чахи әԝ һʹӧкӧм дькә сәр мәрьва, ләма жи әԝана ӧса хԝәһʹьз у хьраб бунә (1 Йуһʹәнна 5:19).

Әм чь щурʹәйи гәрәке хԝә бьдьнә кʹьфше һьндава мәрьвед кӧ хьрабийе дькьн?

Хәбәра Хԝәдеда ньвисар ә: «Хԝә жь йед аһа дур бьгьрә» (2 Тимотʹейо 3:5). Әв найе һʹәсабе, кӧ әм гәрәке хԝә жь һʹәму мәрийа дур бьгьрьн. Ле әм тʹәви мәрьвед хԝәһʹьз, йед кӧ бь принсипед Хԝәде нажин, һәвалтийа незик накьн (Аԛуб 4:4).

Гәло һʹәму мәрьв ԝе алийе хьрабда бенә гӧһастьне?

На. Кʹьтеба Пирозда һатийә пʹехәмбәртикьрьне, ԝәки һьнә мәрьв ԝе жь бо хьрабийа ве дьнйайе бьчәрчьрьн у бьнәʹльн (Һәзәԛел 9:4). Әԝана ԝе хԝәһʹьз нибьн у бь нормед Хԝәде бьжин. Жь хәбәрдан у кьред ԝан ԝе әшкәрә бе кʹьфше, ԝәки әԝана жь йед майин щӧдә дьбьн (Малахи 3:16, 18). Мәсәлә, әԝана ԝе хирәт бькьн кӧ тʹәви һʹәму мәрьва әʹдьлайеда бьн у ԝе тʹәви шәрʹ-дәʹԝа у зорбәтийа нәбьн (Миха 4:3).

Гәло ахьрийеда тʹәмамийа инсанәте ԝе бькʹәвә нава бетʹәрбәтийе?

На, тьште ӧса ԝе нәԛәԝьмә. Зутьрәке Хԝәде ԝе ԝан мәрийа кʹӧта кә, йед кӧ нормед Ԝи пʹепәс дькьн (Зәбур 37:38). Әԝ ԝе «әʹрдәки ну» чекә, демәк инсанәта ну сәр әʹрде, кʹидәре кӧ мәрьвед мьлук ԝе һʹәта-һʹәтайе бәхтәԝарийеда бьжин (2 Пәтрус 3:13; Зәбур 37:11, 29). Әв һеви реали йә. Ида ньһада Кʹьтеба Пироз али мәрийа дькә, кӧ жийина хԝә алийе башда бьгӧһезьн у ль гора нормед Хԝәдейи рʹаст бьжин (Әфәси 4:23, 24).