Фьрqийа Ортʹа Мәрьва Бьвиньн

1, 2. Иро щьмәʹта Хwәде рʹасти кʹижан чәтьнайе те? (Бьньһерʹә шькле әʹwльн.)

ГӘЛӘК һʹәким дьхәбьтьн дор бәре wан мәрьва йед кö бь нәхwәшикә öса нәхwәш ьн, кʹижан кö дькарә дәрбази мәрьвед дьн бә. Һʹәким мьqати нәхwәша дьбьн, чьмки дьхwазьн али wан бькьн. Ле әwана гәрәке хwә хwәй кьн чахе wан нәхwәша qәнщ дькьн, у фәсал бьн wәки әв нәхwәши дәрбази wан нәбә. Мина ве йәке, иро әм жи дьжин у дьхәбьтьн тʹәви wан мәрьва, йед кö бь симболик нәхwәш ьн бь wан нет-фькьра у хәйсәт-һʹöнöра, кʹижан кö Хwәде qәбул накә. Әв йәк дькарә чәтьнайе пешда бинә.

² Wан рʹожед ахьрийеда, мәрьв qанун у принсипед Хwәде пьшт гöһе хwәва давежьн. Паwлосе шанди нәʹма Тимотʹейо дöдада гьли дькә дәрһәqа хәйсәт-һʹöнöред wан мәрьва, йед кö Хwәде һʹьз накьн. Әм чьqас һе незики ахьрийе дьбьн, әв хәйсәт-һʹöнöр һе бәлабуйи дьбьн. (Бьхунә 2 Тимотʹейо 3:1-5, 13.) Рʹаст ә әw хәйсәтед хьраб бона мә әʹщеб ьн, ле йәкә дькарә öса бьqәwьмә кö фькьр у рʹабун-рʹуньштьна wан мәрьва сәр мә һʹöкöм кьн (Мәтʹлк. 13:20). Ве готареда, әме шеwьр кьн кö чаwа әw һʹöнöред хьраб щöдә дьбьн жь wан һʹöнöра, кʹижан кö щьмәʹта Хwәде дьдә кʹьфше. Әме öса жи бьвиньн кö чаwа әм дькарьн хwә хwәй кьн, wәки әв һʹöнöр нав мәда шин нәбьн, у öса жи чаwа али мәрьва бькьн алийе рʹöһʹанида.

3. Нәʹма 2 Тимотʹейо 3:2-5-да дәрһәqа кʹе те готьне?

³ Паwлос ньвиси кö «рʹожед ахьрийеда» wе «зәманед хьраб» бьн. Паши ве йәке Паwлос 19 хәйсәт-һʹöнöред хьраб рʹез дькә, кʹижан кö рʹожед ахьрийеда мәрьв wе бьдьнә кʹьфше. Бәʹса wан хәйсәт-һʹöнöра Паwлос öса жи Рʹомайи 1:29-31-да дькә, ле нәʹма Тимотʹейорʹа Паwлос хәбәред öса дьдә хәбате кö Ньвисаред Йунанида тʹö щики тʹöнә. Паwлос пешийа кö wан һʹöнöра рʹез кә, әw гьлийед хwә дәстпедькә бь wан хәбәра: «Мәрьве бьбьнә». Ле әw хәйсәт-һʹöнöр нә һʹәму мәрьв дьдьнә кʹьфше, чьмки һʹöнöред Мәсиһийа щöдә дьбьн. (Бьхунә Малахи 3:18.)

ӘМ ЧА СӘР ХWӘ ДЬНЬҺЕРʹЬН?

4. Ча һун дьфькьрьн чь те һʹәсабе кʹöбари?

⁴ Чахе Паwлос гот кö мәрьв wе бьбьнә хwәһʹьз у пʹәрәһʹьз, әwи ньвиси кö мәрьв wе öса жи бьбьнә кʹöбар, бабах у хwәрʹази. Мәрьвед бь wан һʹöнöра дьфькьрьн wәки әwана жь йед дьн баштьр ьн чьмки әwана аqьл ьн, бәдәw ьн, дәwләти нә, йан жи нав у дәнг ьн. Мәрьвед wи щурʹәйи дьхwазьн wәки гьшк wана бьльнд кьн у пʹайе wан бьдьн. Зандарәки дәрһәqа мәрьве qöрʹә ньвиси: «Дьле wида qöрбангәһәкә бьчʹук һәйә, кʹидәре кö әw сәре хwә бәр хwә датинә». Һьнә мәрьв дьбежьн кö qöрʹәбун хәйсәтәкә öса мьрдар ә, wәки һәла һе мәрьвед кʹöбар жи һʹьз накьн чахе нав мәрьвед майинда qöрʹәбуне дьвиньн.

5. Һьнә хьзмәткʹаред амьн чаwа кʹәтьнә бәр байе кʹöбарийе?

⁵ Кʹöбари, демәк qöрʹәбун бәр чʹәʹве Йаһоwа рʹәш ә. Кʹьтеба Пироз дьбежә wәки әw «чʹәʹвед кʹöбар» нәфрʹәт дькә (Мәтʹлк. 6:16, 17). Бь рʹастийе кʹöбари мәрьва жь Хwәде дур дьхә (Зәб. 10:4). Әw хәйсәтәки Мире-щьна йә (1 Тимтʹ. 3:6). Йазьх, ле һәла һе һьнә хьзмәткʹаред амьн жи бунә qöрʹә. Мәсәлә, Пʹадша Узийа, гәләк сала Йаһоwарʹа амьн бу. Ле Кʹьтеба Пироз дьбежә кö чахе әw «qәwате дит, дьле wи qöрʹә бу, у бь ве йәке бәла ани сәр сәре хwә. Әwи һьндава Йаһоwа Хwәдейе хwә нәамьни да кʹьфше, у кʹәтә пʹарьстгәһа Йаһоwа сәва бьхуре бьшәwьтинә сәр горигәһа бона шәwьтандьна бьхуре». Wәʹдәки Һьзqийа Пʹадша жи бу йәки qöрʹә, ле паше әw пʹошман бу у хwә ньмьз кьр (2 Дир. 26:16, ДТʹ; 32:25, 26).

6. Чьрʹа Даwьд дькарьбу бьбуйа йәки qöрʹә, ле чьрʹа әw нәбу йәки öса?

⁶ Һьнә мәрьв qöрʹә бунә жь бо бәдәwбуна хwә, йан жи чьмки нав у дәнг ьн, алийе мусикида һостә нә, физикида qәwи нә, йан жи чьмки гьшк wанрʹа фьрнаq дьбьн. Бал Даwьд әw һәр фәрәсәт һәбу, ле йәкә тʹәмамийа әʹмьре хwәда әw мьлук ма. Чахе әwи Голйатʹ кöшт, Шаwул Пʹадша жерʹа гот wәки дьхwазә qиза хwә бьдә wи. Дина хwә бьдьн кö Даwьд ча сәр ве йәке щаба wи да, әwи гот: «Әз кʹи мә у жийана мьн у ль Исраеле әшира баве мьн чи йә кö әз бьбьм зәвайе qьрал [пʹадша]?» (1 Сам. 18:18). Гәло чь али Даwьд кьр кö мьлук бьминә? Даwьд заньбу кö һәр һʹöнöр, фәрәсәт, у qәдьр-һöрмәт кö бал wи һәбун жь Хwәде бун, чьмки Хwәде хwә мьлук кьр кö «дина хwә» да wи (Зәб. 113:5-8). Бәле, Даwьд фәʹм дькьр кö һәр тьштед баш чь кö бал wи һәнә жь Йаһоwа нә (Бәрамбәр кьн 1 Корьнтʹи 4:7).

7. Чь wе али мә бькә мьлук бьн?

⁷ Мина Даwьд, иро щьмәʹта Йаһоwа жи мьлукти нав хwәда пешда тиньн. Әм мәтал дьминьн чахе заньн кö Йаһоwа, Кәсе һәри жорьн нав дьнйалькеда, мьлук ә (Зәб. 18:35). Әм алийе хwәда дьхwазьн әве ширәте бьдьнә хәбате: «Дьлшәwатийе, qәнщийе, мьлуктийе, бәрбьһерийе у сәбьре ль хwә wәргьрьн» (Колс. 3:12). Һьн жи әм заньн wәки һʹьзкьрьн «кʹöбар набә, пʹьшька хwәда наwәрьмә» (1 Корн. 13:4). Чахе әм мьлук ьн, әw йәк дькарә мәрьва бәрбь Йаһоwа бинә. Мәсәлә, чаwа жьн дькарә пе кьред хwә дьле мере хwә бькʹьрʹә wәки әw бе сәр рʹийа рʹаст, öса жи мәрьв дькарьн незики Йаһоwа бьн чахе бьвиньн мьлуктийа щьмәʹта wи (1 Пәт. 3:1).

ЧАWА БЬН ҺЬНДАВА МӘРЬВА?

8. а) Иро мәрьв ча дьньһерʹьн сәр ве йәке чахе зарʹ нә гöрʹа де-бавада ньн? б) Кʹьтеба Пироз чь тʹәми дьдә зарʹа?

⁸ Паwлос шьровәкьр кö мәрьв wе ча бьн һьндава һәвдö рʹожед ахьрийеда. Әwи гот кö зарʹ wе нә гöрʹа де-бавада бьн. Әв йәк öса бәлабуйи йә иро, wәки һәла һе кʹьтебада, филмада, у телевисйонеда жи бәрбь нәгöһдарийе һелан дькьн. Нәгöһдарибун малбәте сьст дькә, һәләqәтийа ортʹа нәфәра сар дькә, у хьраб һʹöкöм дькә сәр тʹьфаqийа ортʹа мәрьва. Мәрьв ве йәке ида бәреда заньн. Мәсәлә, Йунаньстана бәреда һәрге кәсәк де-баве хwә хьста, ча бажарван изьна wи кәси һʹәму тьштида öнда дьбу. Ле Рʹомеда һәбу qанун кö һәрге кәсәк баве хwә хьста, әw бәрамбәри кöштьне бу, демәк гöнәки гәләк гьран дьһатә һʹәсабе. Чаwа Ньвисаред Ибранида öса жи Ньвисаред Йунанида тʹәми һәнә кö зарʹ гәрәке qәдьре де-баве хwә бьгьрьн (Дәркʹ. 20:12; Әфәс. 6:1-3).

9. Чь wе али щаһьла бькә кö гöрʹа де-баве хwәда бьн?

⁹ Ле гәло ча зарʹ дькарьн чʹәʹв нәдьнә wан, йед кö нә гöрʹа де-бавада ньн? Әwана гәрәке бьфькьрьн кö де-бав чь әмәк данә wан. Чахе әwана әмәке де-баве хwә бьшекьриньн, әwана wе дьһа бьхwазьн гöрʹа wанда бьн. Зарʹ öса жи гәрәке фәʹм бькьн кö Хwәде, Баве һʹәмуйа, жь wана дәʹwа дькә wәки гöрʹа де-баве хwәда бьн. Чахе зарʹ дәрһәqа де-баве хwә баш хәбәр дьдьн, әw йәк wе бона щаһьлед дьн бьбә мәсәла баш, кö әwана жи qәдьре де-баве хwә бьгьрьн. Фәʹмдари йә кö һәрге де-бав дьлсар ьн һьндава зарʹед хwә, зарʹарʹа һе чәтьн ә бь дьл гöрʹа wан бькьн. Ле чахе зарʹ тʹәхмин дькә wәки де-бав wи һʹьз дькьн, әw wе бьхwазә гöрʹа wан бькә һәрге жи wирʹа чәтьн бә. Бьраки мә бь наве Остин гьли дькә: «Чахе мьн дьхwәст тьштәки нәрʹаст бькьра, де-баве мьн рʹебәрийед билан дьданә мьн, öса жи шьровәдькьрьн тʹәмийед кö дьданә мьн, у тʹьме һазьр бун гöһ бьдьнә мьн. Әв йәк али мьн кьр кö гöрʹа wанда бьминьм. Мьн дьдит кö әwана ча бона мьн хәм дькьн, у мьн жи алийе хwәда дьхwаст дьле wан ша кьм».

10, 11. а) Кʹижан һʹöнöред хьраб әʹйан дькьн кö мәрьв иро дьлсар бунә? б) Һʹьзкьрьна Мәсиһийа һьндава мәрьва чь щурʹәйи йә?

¹⁰ Паwлос паше рʹез дькә wан һʹöнöра, кʹижан кö дьдьнә кʹьфше кемасийа һʹьзкьрьне. Паше чахе әwи гот кö гәләк wе «нә гöрʹа де-бавада» бьн, әwи гот кö мәрьв wе бешекьр бьн, чь кö нишан дькә wәки мәрьв wе нәшекьриньн qәнщийа һьндава хwә. Паwлос öса жи гот wәки мәрьв wе бьбьнә һʹәрам, демәк нәамьн. Әwана wе берʹәʹм бьн, әw те һʹәсабе wәки әwана wе нә жи бьхwазьн әʹдьлайе чекьн у тʹәви мәрьва ль һәв бен. Әwана wе кʹьфьр у нәмам бьн, у бь хәбәрдана хwә wе кʹьфьрийа мәрьва бькьн у һәла һе Хwәде жи. Мәрьв öса жи wе бьбьнә бöхданбеж, демәк әwед кö пе дәрәwийе у шәрʹавитьне, наве мәрьва хьраб дькьн.a

¹¹ Рʹаст ә ве дьнйайеда кемасийа һʹьзкьрьне һәйә, ле хьзмәткʹаред Йаһоwа бь һʹьзкьрьна һʹәлал әʹйан ьн. Әw йәк тʹьме öса бу. Иса гот wәки Qануна Мусада тʹәмийа пешьн у һәрә мәзьн әw һәйә кö Хwәде һʹьз бькьн, у тʹәмийа дöда мәрьва һʹьз бькьн. Әв щурʹе һʹьзкьрьна «агапе» йә (Мәт. 22:38, 39). Иса öса жи гот wәки Мәсиһийед рʹаст wе бь һʹьзкьрьне һьндава һәвдö әʹйан бьн. (Бьхунә Йуһʹәнна 13:34, 35). Мәсиһи һәла һе жи wе әʹйан буна бь wе йәке кö дьжмьне хwә һʹьз бькьн (Мәт. 5:43, 44).

12. Чаwа Иса һʹьзкьрьна хwә да кʹьфше?

¹² Иса һʹьзкьрьна мәзьн да кʹьфше һьндава мәрьва. Әwи шәһәр пәй шәһәр дьчу мәрьварʹа мьзгинийа дәрһәqа Пʹадшатийа Хwәде гьли дькьр. Әwи кора, сәqәта, кʹотийа, у кәрʹ-лала qәнщ дькьр. Әwи мьрийа жи рʹадькьр (Луqа 7:22). Рʹаст ә Иса бәр чʹәʹве гәләк мәрьва рʹәш бу, ле әwи һәла һе жи әʹмьре хwә да бона тʹәмамийа инсанәте. Иса бь тʹәмами әʹйан кьр һʹьзкьрьна Баве хwә. Нав тʹәмамийа дьнйайеда, Шәʹдед Йаһоwа чʹәʹв дьдьнә Хwәде у Иса, у һьндава мәрьва һʹьзкьрьн дьдьн кʹьфше.

13. Чаwа һʹьзкьрьна мә дькарә мәрьва незики Йаһоwа кә?

¹³ Һʹьзкьрьна кö әм һьндава мәрьва дьдьнә кʹьфше, мәрьва незики Баве мәйи әʹзмана дькә. Мәсәлә, мәрьвәки жь Тайланде, чахе сәр щьвата мәзьнә һʹәмдьнйайе һʹьзкьрьна һьндава хушк-бьра дит, әw йәк гәләк дьле wи гьрт. Чахе әw вәгәрʹийа мал, әwи хwәст wәки тʹәви wи һʹәфте дö щара һинбуна Кʹьтеба Пироз дәрбаз кьн. Әw һʹәму мәрьве хwәйи незикрʹа гьли кьр дәрһәqа мьзгинийе, у паши щьвата мәзьн шәш мәһ дәрбаз бун, әwи щара пешьн щьватеда пе дәрса хwәндьна Кʹьтеба Пироз дәркʹәт. Сәва хwә бьщерʹьбиньн кö чаwа әм һʹьзкьрьне дьдьнә кʹьфше, wе баш бә пьрсед öса бьдьнә хwә: «Гәло әз мәщала дьгәрʹьм wәки аликʹарийе бьдьмә нәфәред хwә, щьвата хwә, у öса жи мәрьве кö хьзмәтийеда рʹасти мьн тен? Гәло әз сәр мәрьва мина Йаһоwа дьньһерʹьм?»

ГÖРʹ У БӘХ

14, 15. Гәләк мәрьв кʹижан һʹöнöред һʹәйwани дьдьнә кʹьфше, у чаwа һьнәка алийе башда һатьнә гöһастьне?

¹⁴ Һʹöнöред дьн кö мәрьв wан рʹожед ахьрийеда дьдьнә кʹьфше, зәлал Мәсиһийарʹа әʹйан дькьн, wәки хwә жь мәрьвед wи щурʹәйи хwәй кьн. Мәрьвед бехwәде wе нәйаред qәнщийе бьн, йан жи чаwа wәлгәрʹандьнед дьнда те готьне wе «дьжмьнед һʹәму qәнщийе» бьн. Әwана wе хwәгьрти нибьн у зöлмкʹар бьн. Һьнәка wе щöләт у сәрһʹьшк бьн, демәк һерс у бетʹалаш.

¹⁵ Гәләк мәрьвед кö бәре һʹöнöред һʹәйwани дьданә кʹьфше, алийе башда һатьнә гöһастьне. Кʹьтеба Пирозда һатийә пʹехәмбәртикьрьне wәки әw йәк wе бьqәwьмә. (Бьхунә Ишайа 11:6, 7.) Ль wедәре әм дьхуньн дәрһәqа һʹәйwанед бәйани, гöрʹ у шерʹа, йед кö әʹдьлайеда дьжин тʹәви һʹәйwанед мале, бәх у голька. Дина хwә бьдьн кö әв әʹдьлайи wе һьнге бә, чахе «дьнйа . . . бь занина Хöданва тʹьжи бьбә» (Иша. 11:9). Фәʹмдари йә һʹәйwан нькарьн дәрһәqа Йаһоwа пебьһʹәсьн, ләма жи әw те һʹәсабе кö әв пʹехәмбәрти дәрһәqа мәрьва те готьне.

16. Чаwа Кʹьтеба Пироз али гәләка кьрийә кö хwә бьгöһезьн?

¹⁶ Иро һәнә гәләк мәрьвед кö һʹöнöред һʹәйwани дьданә кʹьфше, ле паше һатьнә гöһастьне. Сәрһатийа һьнә wан мәрьва һун дькарьн бьхуньн сәр малпәра мә jw.org, рʹеза готареда бь наве «Кʹьтеба Пироз Жийина Мәрьва Дьгöһезә». Әw мәрьвед кö Йаһоwа нас кьрьн у жерʹа хьзмәт дькьн, мина wан мәрьва ниньн йед кö йанчь хwәденас ьн, ле qәwата wи инкʹар дькьн, демәк йед кö хwә дәwса хьзмәткʹаред Хwәде датиньн, ле пе кьред wан әw йәк найе кʹьфше. Дәwсе, әw мәрьв кö бәре зöлм бун, «мәрьве ну» ль сәр хwә кьрьн, кö «кьрасе Хwәдеда бь рʹастийе у һʹәлалийе бе qәлпи хöльqи йә» (Әфәс. 4:23, 24). Чахе мәрьв дәрһәqа Хwәде педьһʹәсьн, әwана тедәрдьхьн wәки wанрʹа лазьм ә ль гора принсипед wи бьжин. Паше әwана һелан дьбьн кö баwәрийа нәрʹаст бьһельн, һʹьш-аqьле хwә у рʹабун-рʹуньштьна хwә бьгöһезьн. Әв гöһастьн һеса ниньн, ле qәwата рʹöһʹе Хwәдейи пироз, али wан мәрьва дькә, йед кö бь дьл дьхwазьн qьрара Хwәде биньн сери.

ЖЬ ЙЕД ÖСА ХWӘ ДУР БЬГЬРЬН

17. Чаwа әм дькарьн хwә дур бьгьрьн жь мәрьвед кö хәйсәт-һʹöнöред wан хьраб ьн?

¹⁷ Фьрqийа ортʹа хьзмәткʹаред Хwәде у йед кö жерʹа хьзмәт накьн, әшкәрә те кʹьфше. Әм йед кö Хwәдерʹа хьзмәт дькьн гәрәке мьqати хwә бьн, wәки нәкʹәвьнә бәр байе нет-фькьред нәрʹаст кö иро бәлабуйи нә. Алийе мәда wе аqьлайи бә әве ширәта жь Хwәде биньн сери, кö жь wан мәрьва дәрһәqа кʹижана 2 Тимотʹейо 3:2-5-да те готьне, хwә дур бьгьрьн. Бәле, әм бь тʹәмами нькарьн хwә жь мәрьвед wи щурʹәйи хwәй кьн, чьмки әм мәщбур ьн тʹәви wан бьхәбьтьн, йан жи һәрʹьнә мәкʹтәбе, йан жи тʹәви wан бьжин. Ле әм дькарьн хwә дур бьгьрьн жь фькьред wан у чʹәʹв нәдьнә хәйсәт-һʹöнöред wан. Әме ве йәке бькарьбьн бькьн, һәрге бь сайа леколинкьрьна Кʹьтеба Пироз рʹöһʹанида хwә qәwи кьн, у тʹәви wан һәвалтийе бькьн йед кö бь дьл Йаһоwарʹа хьзмәт дькьн.

18. Чаwа хәбәрдан у кьред мә дькарьн алийе рʹöһʹанида кʹаре бьдьнә мәрьва?

¹⁸ Әм öса жи гәрәке алийе рʹöһʹанида али мәрьвед дьн бькьн. Һәр мәщалә бьдьнә хәбате сәва шәʹдәтийе бьдьн, жь Йаһоwа аликʹарийе бьхwазьн wәки әw али wә бькә рʹаст хәбәр дьн у wәʹдә жи рʹаст бьжберьн. Әм гәрәке мәрьварʹа бежьн кö әм Шәʹдед Йаһоwа нә, чьмки wи щурʹәйи әwана дькарьн рʹабун-рʹуньштьна мәйә баш бьвиньн, у һöрмәте бьдьнә Хwәде, нә кö мә. Әм һатьнә һинкьрьне wәки «нәпʹакийе у дьлһавьжийед дьнйайе инкʹар кьн у аqьлда гьран, бь рʹастийе у хwәденасийе бьжин ль ве дьне» (Тито 2:11-14). Һәрге рʹабун-рʹуньштьна хwәда әм чʹәʹв дьдьнә Хwәде, мәрьв wе дина хwә бьдьнә мә у һьнәк wе һәла һе бежьн жи: «Әм тʹәви wә бен, чьмки мә бьһист wәки Хwәде тʹәви wә йә!» (Зәкәр. 8:23, ДТʹ).