Һʹәбандьна кӧ Хwәде Qәбул Дькә

1. Һәрге әм рʹаст Хwәдерʹа qӧльх кьн, әме чь кʹаре бьстиньн?

ЙАҺОWА Хwәде бона мә гәлә хәм дькә у дьхwазә, wәки әм жь рʹебәрийа wийә бь һʹьзкьрьне кʹаре бьстиньн. Һәрге әм рʹаст Хwәдерʹа qӧльх кьн, әме бәхтәwар бьн у бькарьбьн хwә жь проблема хwәй кьн. Әме ӧса жи кʹәрәм у аликʹарийа wи бьстиньн (Ишайа 48:17). Рʹожа иройин бь сәда һʹәбандьн һәнә у һәр кәс жь wан дьбежьн, кӧ әwана рʹастийе дәрһәqа Хwәде һин дькьн. Ле һинкьрьнед wан дәрһәqа wе йәке, кӧ кʹи йә Хwәде у әw чь жь мә дәʹwа дькә, жь һәв гәлә щӧда дьбьн.

2. Ча әм дькарьн бьзаньбьн кʹижан ә һʹәбандьна рʹаст кӧ Йаһоwа qәбул дькә, у кʹижан мәсәлә али мә дькә әве йәке фәʹм бькьн?

² Ле ча тӧ дькари бьзаньби, кʹижан ә һʹәбандьна рʹаст кӧ Йаһоwа qәбул дькә? Лазьм нинә һин би йан жи һьмбәри һәв ки һинкьрьнед һʹәму религийа. Тʹәне лазьм ә пебьһʹәси, чь һин дькә Кʹьтеба Пироз дәрһәqа һʹәбандьна рʹаст. Мәсәлә, дь гәлә wәлатада проблемәкә ӧса һәйә, кӧ пʹәрʹед qәлп чедькьн. Һәрге тәрʹа шьхӧл бьдана wәки тӧ гәрәке пʹәрʹед qәлп тедәрхи, тәйе әв йәк ча бькьра? Тәйе дәстпекьра һʹәму щурʹә пʹәрʹед qәлп һинбуйайи нас кьра у бира хwәда щурʹед wан хwәй кьра? Фәʹмдари йә на. Wе дьһа аqьлайи буйа һәрге тә wәʹде хwә хәрщ кьра ль сәр wе йәке, кӧ пʹәрʹед рʹаст рʹьнд һинбуйайи нас бьки. Чахе тӧ ида бьзаньби кӧ пʹәрʹед рʹаст чь щурʹәйи йә, тӧйе бькарьби пʹәрʹед qәлп жи тедәрхи. Һәма ӧса жи чахе әм һин дьбьн кӧ ча һʹәбандьна рʹаст нас кьн, әме ида бькарьбьн тедәрхьн кӧ һʹәбандьнед qәлп кʹижан ьн.

3. Әм чь гәрәке бькьн сәва кӧ Хwәде хwәш бен?

³ Гәлә фәрз ә wәки әм Йаһоwарʹа qӧльх кьн ӧса, ча әw дьхwазә. Гәләк мәри баwәр дькьн wәки Хwәде һʹәму һʹәбандьна qәбул дькә. Ле Кʹьтеба Пироз әве йәке һин накә. Бәс нинә тʹәне бежьн: «Әз Хwәде баwәр дькьм!». Паwлосе шанди дәрһәqа һьнәка ӧса гот: «Әw дьбежьн, кӧ Хwәде нас дькьн, ле бь кьред хwә wи инкʹар дькьн, һʹәрам у хwәсәрихwә нә у һәр кьрьнәкә qәнщрʹа бекер ьн» (Тито 1:16). Сәва кӧ әм Хwәде хwәш бен, лазьм ә әм һин бьн Хwәде чь жь мә дәʹwа дькә, у wан дәʹwакьрьна бьqәдиньн. Ле кʹи кӧ qьрара Хwәде наqәдинә, Иса ль сәр wан гот «нәһәqно» (Мәтта 7:21-23). Ча qимәте пʹәрʹед qәлп тʹӧнә, ӧса жи бь рʹастийе qимәте һʹәбандьнед qәлп тʹӧнә. Һе зедә, һʹәбандьнед ӧса зийандар ьн.

4. Чь те һʹәсабе гьлийе Иса дәрһәqа дӧ рʹийа у һәр рʹек бәрбь чь дьбә?

⁴ Йаһоwа һәр кәсирʹа мәщале дьдә, wәки әwана әʹмьре һʹәта-һʹәтайе бьстиньн. Сәва кӧ әм дь щьнәта ль сәр әʹрде һʹәта-һʹәтайе бьжин, әм гәрәке Хwәдерʹа рʹаст qӧльх кьн у бьжин ӧса ча әw qәбул дькә. Йазьх wәки мәри ниве зәʹф нахwазьн әве йәке бькьн. Ләма жи Иса гот: «Дәре тәнгрʹа бькʹәвьнә һьндӧрʹ, чьмки фьрә йә әw дәри у бәр ә әw рʹийа кӧ дьбә бәрбь ӧндабуне у гәләк ьн әwед кӧ wеда дьчьн. Ле гәләки тәнг ә әw дәри у зәʹмәт ә әw рʹийа кӧ дьбә бәрбь жийине у һьндьк ьн әwед кӧ wе рʹейе дьбиньн» (Мәтта 7:13, 14). Һʹәбандьна рʹаст, бәрбь әʹмьре һʹәта-һʹәтайе дьбә. Ле һʹәбандьна qәлп, бәрбь мьрьне дьбә. Йаһоwа нахwазә wәки кәсәк жь мәрийа бьмьрә, ләма жи әw һʹәму щийа у гьшкарʹа мәщале дьдә, wәки бькарьбьн дәрһәqа wи һин бьн (2 Пәтрус 3:9). Бь рʹастийе, әw йәк кӧ әм ча Хwәде дьһʹәбиньн, бона мә дькарә бе һʹәсабе йан әʹмьр йан мьрьн.

ЧА ТЕДӘРХЬН ҺʹӘБАНДЬНА РʹАСТ

5. Ча әм дькарьн нас кьн wан мәрийа, кʹи кӧ дь һʹәбандьна рʹастда нә?

⁵ Ча әм дькарьн бьбиньн «рʹийа кӧ дьбә бәрбь жийине»? Иса Мәсиһ гот кӧ һʹәбандьна рʹаст әм дькарьн нас кьн бь кьред wан мәрьва, йед кӧ дь ве һʹәбандьнеда ньн. Әwи ӧса гот: «Дара qәнщ бәре qәнщ дьдә», сәрда жи зедә кьр: «Аwа һуне wана жь кьред wан нас бькьн» (Мәтта 7:17, 20). Бь щурʹәки майин бежьн, кʹи кӧ дь һʹәбандьна рʹастда ньн, тенә наскьрьне пе баwәри у кьред хwә. Рʹаст ә әwана нәqәданди нә у шашийа дькьн, ле ча кʹом әwана һʹәму тьшти дькьн, wәки qьрара Хwәде бьqәдиньн. Wәре әм ньһа хәбәр дьн дәрһәqа шәш тьшта, бь сайа кʹижана әме бькарьбьн нас кьн wан мәрийа, кʹи кӧ Хwәдерʹа рʹаст qӧльх дькьн.

6, 7. Ча qӧльхкʹаред Хwәде дьньһерʹьн ль сәр Кʹьтеба Пироз у дь ве йәкеда Иса ча дьбә мәсәлә?

⁶ Һинкьрьнед qӧльхкʹаред Хwәде ль сәр һʹиме Кʹьтеба Пироз ьн. Дь Кʹьтеба Пирозда ньвисар ә: «Тʹәмамийа ньвисаре жь бина бәр Хwәде йә у керһати йә бона һинкьрьне, леһьлатьне, рʹасткьрьне у ширәткьрьна жийина рʹастийеда, wәки мәрьве Хwәде бекемаси бә, бона һʹәму кьрьнед qәнщ һазьр сәкьни бә» (2 Тимотʹейо 3:16, 17). Паwлосе шанди мәсиһийарʹа ӧса ньвиси: «Гава wә жь мә хәбәра Хwәде бьһист, wә нә кӧ чаwа хәбәра мәрьвайе, ле чаwа хәбәра Хwәде qәбул кьр, рʹаст жи ӧса йә» (1 Тʹесалоники 2:13). Ча те кʹьфше баwәри у һинкьрьнед һʹәбандьна рʹаст ль сәр һʹиме дьшьрмишбун у әʹрф-әʹдәтед мәрьва ниньн. Әw тʹәне ль сәр һʹиме Хәбәра Хwәде нә, демәк Кʹьтеба Пироз.

⁷ Дь ве пьрседа Иса Мәсиһ мәсәләкә баш мәрʹа һишт, чьмки һинкьрьнед wи тʹьме ль сәр һʹиме Хәбәра Хwәде бун. Дь дӧакьрьнеда Баве хwәйи әʹзманарʹа әwи гот: «Хәбәра тә рʹасти йә» (Йуһʹәнна 17:17). Иса баwәрийа хwә Хәбәра Хwәде дьани у һинкьрьнед wи һәма рʹаст жь Хәбәра Хwәде бун. Әва йәка әм жь кʹӧ заньн? Чахе Иса дьхwәст жь Хәбәра Хwәде тьштәк бьгота әwи тʹьме дьгот: «Ньвисар ә». Паше Хәбәра Хwәде дьгот (Мәтта 4:4, 7, 10). Рʹожа иройин жи qӧльхкʹаред Хwәде жь хwә һин накьн. Әwана баwәр дькьн кӧ Кʹьтеба Пироз Хәбәра Хwәде йә, у һинкьрьнед хwә бь тʹәмами ль сәр ве кʹьтебе һʹин дькьн.

8. Чь те һʹәсабе Йаһоwарʹа qӧльх ки?

⁸ Кʹи кӧ дь һʹәбандьна рʹастда нә, тʹәне Йаһоwарʹа qӧльх дькьн у наве wи әʹйан дькьн. Иса Мәсиһ гот: «Бьпʹәрьзә [qӧльх кә, ДТʹ] Хwәдайе хwә Йаһоwа у бь тʹәне жь wирʹа хьзмәте бькә» (Мәтта 4:10, АБ). Ләма жи qӧльхкʹаред Хwәде бәр тʹӧ кәси сәре хwә данайньн пештьри Йаһоwа Хwәде. Әwана Йаһоwарʹа qӧльх дькьн у мәрийарʹа гьли дькьн кӧ наве Хwәдайе рʹаст чь йә у әw йәки ча нә. Дь кʹьтеба Зәбур 83:18-да, ньвисар ә: «Наве тә, Йаһоwа йә! У йе кӧ ль сәр тʹәваһийа Гәрдуне Һәри Бьльнд ә, тʹәне тӧ йи (АБ)». Иса али мәрийа дькьр wәки әwана Хwәде нас кьн, у бь ве йәке мәсәлә мәрʹа һишт. Дӧакьрьнеда әwи гот: «Мьн наве тә жь wан мәрьварʹа әшкәрә кьр йед кӧ тә жь дьнйайе дан мьн» (Йуһʹәнна 17:6, ИМ). Һәма ӧса рʹожа иройин qӧльхкʹаред рʹаст, һин дькьн мәрийа дәрһәqа наве Хwәде, qьрара wи у ӧса жи хәйсәт-һʹӧнӧред wи.

9, 10. Мәсиһийед рʹаст бь чь щурʹәйи һьндава һәв һʹьзкьрьне нишан дькьн?

⁹ Qӧльхкʹаред Хwәде һьндава һәв һʹьзкьрьна һʹәлал у нәхwәһʹьзи нишан дькьн. Иса гот: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹәнна 13:35). Мәсиһийед пешьн жи һʹьзкьрьна ӧса һьндава һәв нишан дькьрьн. Бь рʹастийе жи һʹьзкьрьна кӧ Хwәде дьхwазә wәки бал мә һәбә, али мә дькә wәки әм һʹьз бькьн һʹәму мьләта у тʹәви wан дь әʹдлайеда бьн, у һьлнәдьнә һʹәсаб кӧ әwана мәринә кʹәсиб йан дәwләти нә, мәрьвнә навдар ьн йан бәләнгаз ьн. Әв һʹьзкьрьн мәрийа бьратийа рʹастда qәwи гьредьдә. (Бьхунә Колоси 3:14.) Ле әв мәри кʹи кӧ дь һʹәбандьна qәлпда ньн, щәм wана бьратийа ӧса бь һʹьзкьрьн тʹӧнә. Әве йәке әм жь кʹӧ заньн? Әwана һәвдӧ дькӧжьн жь бо ве йәке кӧ әwана жь щурʹә-щурʹә мьләта у бәрәка ньн. Ле мәсиһийед рʹаст чʹәк һьлнадьнә дәсте хwә, сәва кӧ кәсәки жь бьратийа хwә йан жи мәрьвед дьн бькӧжьн. Дь Кʹьтеба Пирозда ньвисар ә: «Зарʹед Хwәде у зарʹед Мирещьн бь ве йәке жь һәв тенә фьрqикьрьне: Әwе кӧ рʹастийе накә, әw нә жь Хwәде йә у ӧса жи әwе кӧ бьре хwә һʹьз накә. . . . Гәрәке әм һәвдӧ һʹьз бькьн. Мина Qайин нибьн, кӧ жь Йе Хьраб бу у бьре хwә кӧшт» (1 Йуһʹәнна 3:10-12; 4:20, 21).

¹⁰ Ле һʹьзкьрьна һʹәлал найе һʹәсабе тʹәне кәсәки нәкӧжи, әв тьштәки һе зедә йә. Мәсиһийед рʹаст һазьр ьн wәʹде хwә, qәwата хwә у хәрщед хwә бьдьн, сәва кӧ али һәв бькьн у һәвдӧ бьшьдиньн (Ибрани 10:24, 25). Әwана дь тәнгасийада али һәв дькьн у һьндава мәрьва, рʹаст у һʹәлал ьн. Мәсиһийед рʹаст дь әʹмьре хwәда пек тиньн әве ширәта жь Кʹьтеба Пироз: «Һʹәмуйарʹа qәнщийе бькьн» (Галати 6:10).

11. Чьрʹа фәрз ә, кӧ Иса Мәсиһ qәбул кьн ча мәщала хьлазкьрьнейә тʹәк дь алийе Хwәдеда?

¹¹ Мәсиһийед рʹаст, Иса Мәсиһ qәбул дькьн ча мәщала хьлазкьрьнейә тʹәк дь алийе Хwәдеда. Дь Кʹьтеба Пирозда ньвисар ә: «Бь кәсәки майин хьлазбун тʹӧнә, чьмки бьн пʹәрʹе әʹзменда навәки дьн мәрьварʹа нәһатийә дайине, кӧ әм бькарьбьн бь wи хьлаз бьн» (Кʹаред Шандийа 4:12). Ча әм жь сәре 5 пеһʹәсийан, Иса әʹмьре хwә сәва мәрьвед гӧһдар ча кʹьрʹин бәрва да (Мәтта 20:28). Хенщи ве йәке Хwәде, Иса дь Пʹадшатийа әʹзманада кʹьфш кьр ча Пʹадша, сәва кӧ әw ль сәр тʹәмамийа дьнйайе сәрwертийе бькә. Һәрге әм дьхwазьн һʹәта-һʹәтайе бьжин әм гәрәке гӧрʹа Иса бькьн у һинкьрьнед wи бьqәдиньн, чьмки Хwәде әве йәке жь мә дәʹwа дькә. Ләма жи дь Кʹьтеба Пирозда ньвисар ә: «Әwе кӧ Кӧрʹ баwәр дькә, жийина wийә һʹәта-һʹәтайе һәйә. Әwе кӧ гӧрʹа Кӧрʹ накә, әw жийине набинә» (Йуһʹәнна 3:36).

12. Чь те һʹәсабе жь ве дьнйайе нибьн?

¹² Мәсиһийед рʹаст нә жь ве дьнйайе нә. Чахе Иса бәр сәрwере Рʹоме Пилато сәкьнибу, гот: «Пʹадшатийа мьн нә жь ве дьнйайе йә» (Йуһʹәнна 18:36). Һʹәму мәсиһийед рʹаст кʹижан wәлатида жи бьминьн, әwана хwә һʹәсаб дькьн бьнәлийед Пʹадшатийа әʹзмана у ләма жи хwә жь шьхӧлед политика ве дьнйайе хwәй дькьн у дур дьгьрьн. Мәсиһийед рʹаст накʹәвьнә нав шәрʹ-дәʹwа. Хенщи ве йәке әwана мьqабьли wан дәрʹнайен, кʹи кӧ дькʹәвә нав шьхӧле политике, йан жи кʹи дьхwазә дь шьхӧле политикеда хwә пешда бьбә, мәсиһийед рʹаст нә жи дәнге хwә дьдьн сәва кӧ кәсәки бьжберьн ча сәрwер. Рʹаст ә мәсиһийед рʹаст хwә жь политике дур дьгьрьн, ле әwана бь qануне ви wәлати дьжин. Ле гәло чьрʹа? Чьмки Хәбәра Хwәде тʹәмикә ӧса дьдә wана, wәки «гӧрʹа wан һʹӧкӧмәтийада» бьн, «кӧ сәр» wанрʹа нә (Рʹомайи 13:1). Ле чахе qануна wәлат дәʹwа дькә wәки мәсиһи гәрәке тьштәки ӧса бькьн кӧ мьqабьли qануна Хwәде йә, һьнге мәсиһийед рʹаст пәй мәсәла шагьрта дьчьн йед кӧ готьн: «Әм гәрәке гӧрʹа Хwәде бькьн, нә кӧ йа мәрьва» (Кʹаред Шандийа 5:29; Марqос 12:17).

13. Ча мәсиһийед рʹаст дьньһерʹьн ль сәр Пʹадшатийа Хwәде, у жь бо ве йәке әwана чь шьхӧли дькьн?

¹³ Мәсиһийед рʹаст даннасин дькьн кӧ тʹәне Пʹадшатийа Хwәде дькарә һʹәму проблемед инсанәте сафи кә. Иса Мәсиһ гот: «Әв Мьзгинийа Пʹадшатийе wе ль нав тʹәмамийа дьнйайе бе даннасинкьрьне, кӧ һʹәму мьләтарʹа бьбә шәʹдәти у һьнге хьлази wе бе» (Мәтта 24:14). Мәсиһийед рʹаст мәрийа һелан накьн кӧ гӧмана хwә бьдьнә сәр сәрwеред мәрьвайи, дәwсе әwана даннасин дькьн кӧ тʹәне Пʹадшатийа Хwәде һәйә гӧмана мәрийа, кӧ дькарә һʹәму проблемед wан сафи кә (Зәбур 146:3). Иса Мәсиһ әм һин кьрьн, wәки дәрһәqа ве сәрwерийе дӧа бькьн. Әwи гот: «Пʹадшатийа тә бе, әʹмьре тә бә, чаwа ль әʹзмен, ӧса жи ль сәр әʹрде» (Мәтта 6:10). Дь Хәбәра Хwәдеда пешда һатийә пʹехәмбәртикьрьне кӧ әв Пʹадшатийа әʹзмана wе «һʹәму ван пʹадшатийа [йе кӧ иро һәнә] алт кә у кӧтасийа wан бинә, ле әw хwәха wе һәр у һәр бьминә» (Данийел 2:44, ДТʹ; Әʹйанти 16:14; 19:19-21).

14. Бь дьшьрмишбуна тә, кʹижан һʹәбандьн рʹаст ә?

¹⁴ Дәрһәqа чь жи мә ньһа хәбәр да, пьрса бьдә хwә: ‹Һинкьрьнед кʹижан һʹәбандьне ль сәр һʹиме Кʹьтеба Пироз ьн? Кʹи наве Хwәде Йаһоwа әʹйан дькә? Дь кʹижан һʹәбандьнеда мәри бь рʹастийе һәвдӧ һʹьз дькьн у баwәрийа хwә Иса Мәсиһ тиньн? Кʹи хwә жь шьхӧлед ве дьнйайе дур дьгьрә, у дәрһәqа Пʹадшатийа Хwәде даннасин дькә, wәки тʹәне әw ә гӧмана мәрийа? Жь һʹәму һʹәбандьнед дьнйайе, кʹижан һʹәбандьн ван һʹәму тьшта дькә?› Һʹәму избаткьрьн дьдьнә кʹьфше, wәки әв һәнә Шәʹдед Йаһоwа. (Бьхунә Ишайа 43:10-12.)

ЛЕ ТӦЙЕ ЧЬ БЬКИ?

15. Хенщи wе йәке, wәки баwәр кьн кӧ Хwәде һәйә, чь диса лазьм ә бькьн?

¹⁵ Сәва кӧ Хwәде ша бькьн, бәс нинә тʹәне баwәрийа хwә wи биньн. Чьмки дь Кʹьтеба Пирозда ньвисар ә, кӧ һәла һе щьн жи баwәр дькьн wәки Хwәде һәйә (Аqуб 2:19). Әшкәрә йә кӧ әwана qьрара Хwәде наqәдиньн у Хwәде жи wана qәбул накә. Ле сәва кӧ Хwәде мә qәбул кә, әм нә кӧ тʹәне гәрәке баwәр бькьн кӧ әw һәйә, ле ӧса жи әм гәрәке qьрара wи бьqәдиньн. Һе зедә, мәрʹа лазьм ә wәки әм жь һʹәбандьна qәлп дәрен у хwә ль һʹәбандьна рʹаст бьгьрьн.

16. Чь әм гәрәке бькьн, һәрге әм һʹәбандьна qәлпда гьредайи нә?

¹⁶ Паwлосе шанди нишан кьр, кӧ әм гәрәке тʹәви шьхӧлед һʹәбандьна qәлп нибьн. Әwи ньвиси: «Бона ве йәке Хӧдан дьбежә: ‹Дә рʹабьн жь нава wан дәрен, щӧдә бьн. Ль тьштед һʹәрам нәкʹәвьн, у әзе wә qәбул кьм›» (2 Корьнтʹи 6:17; Ишайа 52:11). Ләма жи мәсиһийед рʹаст жь wан һʹәму тьшта хwә дур дьгьрьн, чь кӧ һʹәбандьна qәлпва гьреда йә.

17, 18. Чь йә «Бабилона Мәзьн», у чьрʹа әм гәрәке зускава «жь нава wе» дәркʹәвьн?

¹⁷ Кʹьтеба Пироз нишан дькә кӧ һʹәму һʹәбандьнед qәлп тʹәвайи тенә навкьрьне «Бабилона Мәзьн»a (Әʹйанти 17:5). Әв нав тинә бира мә шәһәрәки кәвьн демәк Бабилон, кʹидәре паши Селава Дьнйайе һʹәму һʹәбандьнед qәлп пешда һатьн. Гәлә һинкьрьн у әʹрф-әʹдәт йед кӧ ньһа нав һʹәбандьна qәлпда һәнә, һәма жь шәһәре Бабилоне дәркʹәтьнә. Мәсәлә, бьнәлийед Бабилоне сейәканә баwәр дькьрьн, йан се кәс Хwәдекә. Рʹожа иройин жи һинкьрьнәкә фәрз йа гәләк һʹәбандьна, әв һәйә һинкьрьн дәрһәqа сейәканә. Ле Кʹьтеба Пироз рʹьнд әʹйан дькә у һин дькә кӧ тʹәне Хӧдайәк һәйә, әв Йаһоwа йә у Иса Мәсиһ жи Кӧрʹе wи йә (Йуһʹәнна 17:3). Бьнәлийед Бабилоне ӧса жи баwәр дькьрьн, кӧ паши мьрьне рʹӧһʹ йан нәфса мәрийа дәрдькʹәвә у дьжи, йан жи дь щәʹньмеда дькарә бьчәрчьрә. Иро һинкьрьн дәрһәqа ве йәке, кӧ паши мьрьне мәри дьжи йан жи дькарә дь щәʹньмеда бьчәрчьрә, дь гәлә һʹәбандьнада бәла буйә.

¹⁸ Рʹаст ә һинкьрьнед Бабилоне нав тʹәмамийа дьнйайе бәла бунә, ле Бабилона Мәзьн йа рʹожа иройин, әв һәйә кʹома һʹәму һʹәбандьнед qәлп ль тʹәмамийа дьнйайе. Хwәде пʹехәмбәрти кьр, кӧ әв кʹома һʹәбандьна qәлп, wе ньшкева бе кʹӧтакьрьне. Ньһа тӧ фәʹм дьки чьрʹа ӧса фәрз ә, wәки тӧ жь wан һʹәму тьшта, чь кӧ Бабилона мәзьнва гьредайи йә, хwә дур бьгьри у хwәй ки. Ләма жи һʹәта wәʹдә һе һәйә, Йаһоwа Хwәде дьхwазә wәки тӧ зускава «жь нава wе» дәркʹәви. (Бьхунә Әʹйанти 18:4, 8.)

19. Чь wе тәрʹа бинә qӧльхкьрьна Йаһоwарʹа?

¹⁹ Чахе һьнәк пебьһʹәсьн кӧ тӧ дьхwази жь һʹәбандьна qәлп дәрейи, әwана дьбәк һәләqәтийа хwә тʹәви тә бьqәтиньн у нахwазьн тʹәви тә хәбәр дьн. Ле һәрге тӧ Йаһоwарʹа тʹәви щьмәʹта wи qӧльх ки, тӧ чь ӧнда ки те ви зедәтьр бьстини. Тӧйе гәлә хушк у бьред рʹӧһʹани хwәрʹа qазьнщ ки, мина шагьртед Исайә пешьн йед кӧ һʹәму тьшт һишт ьн у пәй wи чун. Тӧйе бьби пʹара малбәта Йаһоwайә мәзьн, нава кʹижанида бь милйона мәсиһийед рʹаст һәнә, йед кӧ һʹьзкьрьна һʹәлал у рʹаст һьндава тә wе нишан кьн. Хенщи wе йәке жи, гӧмана тәйә әʹмьре һʹәта-һʹәтайе дьнйа тʹәзәда, wе һәбә. (Бьхунә Марqос 10:28-30.) У дьqәwьмә кӧ wәʹдә дәрбаз бә, һьнәк жь wан мәрийа кʹи кӧ жь бо баwәрийа тә һәләqәтийа хwә тʹәви тә qәтанд, әwана wе бьхwазьн пебьһʹәсьн дәрһәqа һинкьрьнед Кʹьтеба Пироз у бьбьнә qӧльхкʹаред Йаһоwа.

20. Чь ахьри һивийа wан мәрьва йә, кʹи кӧ хwә ль һʹәбандьна рʹаст дьгьрьн?

²⁰ Кʹьтеба Пироз һин дькә, кӧ зутьрке Хwәде әв дьнйа хьраб wе кʹӧта кә у дәwсе дьнйа ну у рʹаст wе кʹьфш кә ль сәр кʹижани Пʹадшатийа wи wе Пʹадшатийе бькә (2 Пәтрус 3:9, 13). Бь рʹастийе жи әʹмьрәки чьqас баш һивийа мәйә! Дь дьнйа нуда тʹәне һʹәбандьнәкә рʹаст wе һәбә. Гәло wе аqьлайи нибә, wәки тӧ ида иро һʹәму тьшти бьки чь кӧ лазьм ә, сәва кӧ хwә ль һʹәбандьна рʹаст бьгьри?