Ча әм дькарьн те дәрхьн Хwәде кʹижан һʹәбандьне qәбул дькә?

1. Һʹәбандьна кӧ Хwәде qәбул дькә тʹәне йәк ә?

Иса Мәсиһ шагьртед хwәрʹа тʹәне һʹәбандьнәк һишт, у тʹәне әwе һʹәбандьне Хwәде qәбул дькә. Әв һʹәбандьн мина рʹеке йә, йе кӧ бәрбь жийина һʹәта-һʹәтайе дьбә. Иса Мәсиһ гьлийед ӧса гот: «Һьндьк ьн әwед кӧ wе рʹейе дьбиньн» (Мәтта 7:14). Хwәде тʹәне әwе һʹәбандьне qәбул дькә, йа кӧ ль сәр һʹиме Хәбәра wи йә. Бьхунә Йуһʹәнна 4:23, 24; 14:6; Әфәси 4:4, 5.

Видео: Гәло Һәму Религийа Хwәде Хwәш Тен?

2. Чь Иса Мәсиһ гот дәрһәqа мәсиһийед нәрʹаст?

Иса Мәсиһ әʹлам кьр, кӧ пʹехәмбәред дәрәw wе мәсиһитийа рʹаст тʹәвиһәв хьн. Гава ль сәр wана дьньһерʹи, тә тʹьре кӧ әwана qӧльхкʹаред рʹаст ьн. Wана нав данийә ль сәр хwә кӧ мәсиһи нә. Ле кʹи нә әwана бь рʹастийе әм һеса дькарьн те дәрхьн. Чьмки мәсиһийед рʹаст Хwәдерʹа рʹаст qӧльх дькьн, ләма жи тʹәне щәм мәсиһийед рʹаст һәнә әw һʹӧнӧр у хәйсәтед баш, бь сайа чь жи әwана тенә наскьрьне. Бьхунә Мәтта 7:13-23.

3. Ча тӧ дькари те дәрхи кʹижан ьн мәсиһийед рʹаст?

Ньһа әм пебьһʹәсьн дәрһәqа пенщ тьшта, бь сайа чь жи мәсиһийед рʹаст тенә наскьрьне:

• Мәсиһийед рʹаст Кʹьтеба Пироз һʹәсаб дькьн Хәбәра Хwәде у qәдьре ве кʹьтебе дьгьрьн. Әwана һʹәму тьшти дькьн, wәки пе принсипед Кʹьтеба Пироз бьжин. Мәсиһийед рʹаст чь кӧ даннасин дькьн, бь ви щурʹәйи хwәха жи дьжин. Ле һʹәбандьна нәрʹаст ль сәр һʹиме нет у фькьред мәрийа йә (Мәтта 15:7-9). Ләма жи ортʹа һʹәбандьна рʹаст у йед майин фьрqи һәйә. Бьхунә Йуһʹәнна 17:17; 2 Тимотʹейо 3:16, 17.

• Мәсиһийед рʹаст, наве Хwәде Йаһоwа һӧрмәт дькьн. Муса у Даwьде пʹехәмбәр наве Хwәде заньбун у дьданә хәбате (Дәркʹәтьн 3:15; Зәбур 8:1). Иса Мәсиһ жи наве Хwәде һӧрмәт дькьр у әʹйан дькьр. Әwи али мәрьва дькьр, wәки әwана Хwәде нас бькьн. Иса ӧса жи әwана һин дькьрьн дӧа бькьн, кӧ наве Хwәде пироз бә (Мәтта 6:9). Ле ньһа пьрсе бьдә хwә: Ль wан щийа кʹидәре кӧ әз дьжим, кʹи дәрһәqа наве Хwәде хәбәр дьдә? Бьхунә Йуһʹәнна 17:26; Рʹомайи 10:13, 14.

• Мәсиһийед рʹаст дәрһәqа Пʹадшатийа Хwәде даннасин дькьн. Йаһоwа Хwәде, Иса шандә сәр әʹрде, кӧ әw мьзгинийа хере дәрһәqа пʹадшатийа Хwәде даннасин бькә, чьмки тʹәне әв ә гӧмана мәрийа. Иса Мәсиһ тʹьме дәрһәqа ве пʹадшатийе хәбәр дьда, у әwи һʹәта бәр мьрьне жи хәбәр да дәрһәqа пʹадшатийе (Луqа 4:43; 8:1; 23:42, 43). Иса Мәсиһ гот, wәки шагьртед wи жи гәрәке дәрһәqа Пʹадшатийа Хwәде даннасин бькьн. Ньһа пьрсе бьдә хwә: Иро кʹи дәрһәqа Пʹадшатийа Хwәде даннасин дькә? Бьхунә Мәтта 24:14.

• Йед пәй Иса Мәсиһ дьчьн, хwә жь ве дьнйа нәһәq дур дьгьрьн. Тӧ дькари мәсиһийед рʹаст бь wе йәке нас ки, кӧ әwана накʹәвьнә нав шьхӧлед политике у шәрʹ-дәʹwе ве дьнйайе (Йуһʹәнна 17:16; 18:36). Әwана ӧса жи хwә жь һʹәму шьхӧлед һәʹрам у хьраб, йед кӧ дь ве дьнйайеда тенә кьрьне, дур дьгьрьн. Бьхунә Аqуб 4:4.

• Ортʹа мәсиһийед рʹаст һʹәзкьрьна мәзьн һәйә. Мәсиһийед рʹаст жь Кʹьтеба Пироз һин дьбьн qәдьре һʹәму мьләта бьгьрьн. Һʹәбандьнед нәрʹаст тʹьме пьштгьрийа шәрʹе ортʹа мьләта дькьн у wана кʹәрәм дькьн, ле мәсиһийед рʹаст инкʹар дькьн ве йәке (Миха 4:1-3). Мәсиһийед рʹаст wәʹде хwә у пʹәре хwә хәрщ дькьн, сәва кӧ али мәрьва бькьн у wана дьлгәрм кьн, у дь ве йәкеда әwана кʹара хwә нагәрʹьн. Бьхунә Йуһʹәнна 13:34, 35; 1 Йуһʹәнна 4:20.

4. Тӧ дькари те дәрхи кʹижан ә һʹәбандьна рʹаст?

Һинкьрьна кʹижан һʹәбандьне бь тʹәмами ль сәр һʹиме Кʹьтеба Пироз ә? Кʹижан һʹәбандьн наве Хwәде рʹумәт дькә у даннасин дькә, кӧ тʹәне Пʹадшатийа Хwәде дькарә һʹәму проблемед мәрийа сафи кә? Ча тӧ дьшьрмиш дьби әв кʹижан һʹәбандьн ә, кӧ һʹәзкьрьне әʹйан дькә у хwә жь шәрʹа дур дьгьрә? Бьхунә 1 Йуһʹәнна 3:10-12.