Гәло Лазьм ә Әм Щәжьна Дәрбаз кьн?

ЩӘЖЬНЕД навдарә религийайи у йед нә религийайи, йед кӧ рʹожа иройин дь гәлә wәлатада дәрбаз дькьн, әw нә ль сәр һʹиме Кʹьтеба Пироз ьн. Ле wәки ӧса нә, әв һʹәму щәжьн жь кʹӧ һатьнә? Һәрге мәщала тә һәйә кӧ дь кʹьтебханеда леколине бьки, wе тәрʹа һʹәwас бә пебьһʹәси, һәла щурʹә-щурʹә кʹьтеб у әнсиклопеди чь дьбежьн дәрһәqа wан щәжьна йед кӧ дь wәлате тәда әʹйан ьн. Wәрә әм бьбиньн чәнд мәсәла.

Әʹйда Сала Тʹәзә. Рʹожа дәрбазкьрьна Сала Тʹәзә у ӧса жи әʹйд-qәйдед ве рʹожева гьредайи, дь һәр wәлатәкида щурʹә-щурʹә wәʹдәда те кьрьне у һәр кәс бь щурʹе хwә дькә. Дәрһәqа wе йәке кӧ әв щәжьн жь кʹӧ һат, «Wорлд Бук» әнсиклопедийада ӧса те готьне: «Д.М. сала 46-да, сәрwере Рʹоме Ийули Сезар, 1 Йануайе (Чьлә) кʹьфш кьр ча рʹожа Щәжьна Сала Тʹәзә». Рʹомайийа әв рʹож тʹәсмили Йанус кьрьн, йе кӧ хӧдане дәргәһ, дәрийа у һʹәму дәстпебуна бу. Ләма жи, ча qәдьр бона ви хӧдане Йанус, наве ве мәһе данинә Йануай. Дӧ рʹуйе Йанус һәбун, йәк пешийе дьньһерʹи йе дьн жи парʹава. Аһан, ча те кʹьфше һʹиме щәжьна дәрбазкьрьна Сала Тʹәзә, жь әʹйд-qәйдед нәрʹаст һатийә.

Әʹйда Езди. Әве щәжьне хьлазийа мәһа Кануна Пешьн (Десамбьре) дәрбаз дькьн. Религийа Ездити һин дькә, кӧ әв рʹож һәйә рʹожа буйина хӧдан Йезид (Әздаһ). Дь кʹьтеба «Езди-Религийа у Мьләт», дәрһәqа ве щәжьне ӧса һатийә ньвисаре: «Рʹожа әʹйда Езди дькʹәвә рʹожа буйина Авеста, хӧдан Митрʹа, йе кӧ дәрбаз дькьрьн мәһа Кануна Пешьн дь һʹәфтийа сьсийада. Ча әʹйан ә 25 Десамбьре, католик ӧса жи дәрбаз дькьрьн рʹожа буйина Иса Мәсиһ (Кьрьсмьс), у 7 Йануайе (Чьлә) жи ль гора салнәма Йулийайа кәвьн, мәсиһи жи әв щәжьн дәрбаз дькьрьн». Жь вьр зәлал те кʹьфше кӧ щәжьна Әʹйда Езди, жь религийайед qәлп һатийә.

Рʹожа Мәзәла. Әве рʹоже мәһа Һʹәзиране (Жуйен) дәрбаз дькьн. Мәʹнийа ве рʹожейә фәрз әw ә, кӧ мәри дьчьнә ль сәр мәзәле мьрийед хwә. Ве рʹоже, һәр малбәтәк нане мьрийа дәрдьхә у хwарьне тиньн ль сәр мәзәла бона мьрийед хwә. Бь рʹастийе мәри һәрʹә ль сәр мәзәле мьрийед хwә, дь ве йәкеда тьштәки нәрʹаст тʹӧнә. Чьмки qӧльхкʹаред Хwәдейә рʹаст жи дьчунә ль сәр тʹьрбед мьрийед хwә, у шина wан дькьрьн (Йуһʹәнна 11:31). Ле һьнә щурʹә qәйдед кӧ wәʹде әʹйда Рʹожа Мәзәла тенә кьрьне, мәсәлә хәбәрдан тʹәви мьрийа у нане мьрийа, бь рʹастийе гьредайи нә тʹәви баwәрийа нәрʹаст, wәки йан чь паши мьрьне әʹмьр бәрдәwан дьбә. Qӧльхкʹаред Йаһоwа фәʹм дькьн wәки мәри шина мьрийед хwә бькә, һәрʹә ль сәр мәзәл, у мьрийед хwә бинә бира хwә, дь ве йәкеда тьштәки нәрʹаст тʹӧнә. Ле әwана тʹӧщар wан әʹйд-qәйдед кӧ мьqабьли qанунед Кʹьтеба Пироз дәртен, накьн (Wаиз 9:5, 10).

Щәжьнед Дьн. Әм нькарьн хәбәрдьн дәрһәqа wан һʹәму щәжьна йед кӧ дь нав тʹәмамийа дьнйайеда дәрбаз дькьн. Ле фәʹмдари йә кӧ Йаһоwа qәбул накә ван щәжьна, йед кӧ мәрийа йане тʹәшкиләта һӧрмәт дькьн (Йерәмйа 17: 5-7; Кʹаред Шандийа 10:25, 26). Һәрге тӧ бьзаньби һәр әʹйд жь кʹидәре те, тәрʹа һе һеса бә сафи ки, кӧ кʹижан щәжьне Хwәде qәбул дькә у кʹижане на. Фәрз ә әве йәке бини бира хwә (Ишайа 52:11; Әʹйанти 18:4). Принсипед Кʹьтеба Пироз дәрһәqа кʹижана кӧ дь сәре 16-да те гьликьрьне, ве али тә бькьн пебьһʹәси, кӧ ча Йаһоwа дьньһерʹә ль сәр дәрбазкьрьна щурʹә-щурʹә щәжьна.