ПʹАРА 1
Щьнәт у Мәрьвед Пешьн
Хԝәде дьнйа әʹлам у әʹмьр сәр әʹрде дьәʹфьринә. Әԝ ӧса жи жьн у мере беԛьсур дьәʹфьринә, ԝана щиԝар дькә бахче бәдәԝда у тʹәмийа дьдә ԝан
«ДӘСТПЕБУНЕДА Хԝәде әʹрд у әʹзман әʹфьрандьн», әв гьли гәләкарʹа нас ьн (Дәстпебун 1:1, ПКʹМ). Рʹаст ә әв гьли һеса нә, ле әԝана ӧса жи гәләк һʹәԝас ьн, чьмки бь ван гьлийа Кʹьтеба Пироз насийа мә дьдә Кәсе лапи фәрз, демәк Йаһоԝа Хԝәдайе Һьмзор. Рʹезед пешьнә Кʹьтеба Пироз гьли дькьн дәрһәԛа ԝе йәке, кӧ Хԝәде дьнйа әʹлам у ӧса жи әʹрд әʹфьранд, сәр кʹижани әм дьжин. Рʹезед майинда те шьровәкьрьне ԝәки нава чәнд рʹожед симболикда, демәк нав чәнд ԝәхте дьрежда, Хԝәде әʹрд да мәрийа сәва кӧ әԝана бьжин, у ӧса жи һʹәму кʹәрәмәтед тʹәбийәте әʹфьранд.
Әʹфринәки Хԝәдейә лапи баш сәр әʹрде, мәри бу. Чьмки мәри дьлԛе Хԝәдеда һатьбу әʹфьрандьне, демәк дькарьбу хәйсәт-һʹӧнӧред Йаһоԝа әʹйан кьра, мәсәлә йед ӧса ча һʹьзкьрьн у билани. Хԝәде мәри жь аха әʹрде әʹфьранд. Наве ԝи дани Адәм у әԝ кьрә щьнәте, бахче Едене. Ви бахчәйида Хԝәде гәләк даред бәдәԝ у бәрдар дачькандьн.
Хԝәде дит ԝәки Адәмрʹа аликʹарчи лазьм ә. Ләма жи әԝи пʹарханәкә Адәм һьлда, кʹӧлфәтәк чекьр у ани щәм ԝи. Әԝ бу жьна Адәм у паше һатә навкьрьне Һеԝа. Адәм жь шабуне гьлийед ӧса гот: «Ньһа әва һәстуйе жь һәстуйе мьн ә у гоште жь гоште мьн ә». Хԝәде гот: «Ләма мере де у баве хԝә бьһелә, хԝә ль жьна хԝә бьгьрә у бьбьнә бәдәнәк» (Дәстпебун 2:22-24; 3:20, ПКʹМ).
Хԝәде дӧ тʹәми да Адәм у Һеԝайе. Йа пешьн, ԝана гәрәке әʹрд бещәр кьрана, хԝәй кьрана у пева мьжул буна, паше жи әʹрд пе мәрийа тʹьжи кьрана. Йа дӧда, Хԝәде гот кӧ жь тʹәмамийа бахче Едене тʹәне жь дарәке әԝана гәрәке емиш нәхԝьн, демәк жь «дара ԛәнщи у хьраби наскьрьне» (Дәстпебун 2:17, ПКʹМ). Һәрге ԝана гӧрʹа Хԝәде нәкьрана, әԝана гәрәке бьмьрана. Бь ван тʹәмийа Хԝәде мәщал да Адәм у Һеԝайе, ԝәки нишан кьн кӧ әԝана ԛәбул дькьн Йаһоԝа ча сәрԝере хԝә. Бь гӧһдарикьрьна хԝә, әԝана ӧса жи дькарьбун һʹьзкьрьн у рʹазибуна хԝә һьндава Хԝәде кʹьфш кьрана. Гәләк мәʹнийед ԝан һәбун, ԝәки гӧрʹа Йаһоԝада буна, кӧ шабун ԝанарʹа дьани. Әв мәрьвед беԛьсур бун. Кʹьтеба Пирозда ньвисар ә: «Хԝәде дина хԝә да һʹәму кьрьна хԝә кӧ ва йе әԝ гәләки ԛәнщ бун» (Дәстпебун 1:31, ПКʹМ).
—Сәр һʹиме кʹьтеба Дәстпебун сәре 1 у 2.