Хԝәде Бьраһим у Малбәта Ԝи Кʹәрәм Дькә

ЙАҺОԜА заньбу ԝәки Кәсе кӧ сәва ԝи жь һʹәмушка ԛимәттьр ә, гәрәке рʹожәке щәфе бькʹьшинә у бьмьрә. Пʹехәмбәртийа кӧ кʹьтеба Дәстпебун 3:15-да ньвисийә, дәрһәԛа ве рʹастийе дьбежә. Ле гәло Йаһоԝа дькарьбу мәрийарʹа нишан кьра, ԝәки ԛӧрбанбуна Кӧрʹе ԝи ԝе чьԛас гьран сәр ԝи рʹуньшта? Кʹьтеба Пирозда мәсәләк те гьликьрьне, йа кӧ али мә дькә әве йәке фәʹм бькьн. Щарәке, Хԝәде готә Бьраһим, ԝәки әԝ кӧрʹе хԝәйи һʹьзкьри, демәк Исһаԛ бькә ԛӧрбан.

Баԝәрийа Бьраһим зәʹф мәзьн бу. Те бира тә кӧ Хԝәде соз дабу ԝи ԝәки Хьлазкʹар йан жи Зӧрʹәт, жь Исһаԛ гәрәке бьһата? Бьраһим баԝәр дькьр ԝәки чь жи һәбә у һәрге лазьм бе, Хԝәде ԝе бькарьбә кӧрʹе ԝи сах кә, ләма жи әԝи гӧрʹа Хԝәде кьр у һазьр бу кӧрʹе хԝә бькә ԛӧрбан. Ле мәләкәк кӧ жь алийе Хԝәдеда һатьбу шандьне, ԝәʹдәда ԝи да сәкьнандьне. Хԝәде пʹайе Бьраһим да, чьмки әԝ һазьр бу кӧрʹе хԝәйи кӧ гәләк ԛимәт бу бона ԝи, пʹешкʹеши Хԝәде кьра. Ләма жи Хԝәде диса щарәке созе хԝәйи бәре готи, ԝирʹа ԝәкʹьланд.

Ԝәʹдә шунда Исһаԛрʹа дӧ кӧрʹ бун, Әсаԝ у Аԛуб. Аԛуб нә мина Әсаԝ бу, әԝи тьштед рʹӧһʹани гәләк ԛимәт дькьр, у сәва ве йәке һатьбу хәлаткьрьне. Хԝәде наве Аԛуб гӧһаст у дани Исраел. 12 кӧрʹед ԝи жи бунә сәрокед ԛәбилед Исраеле. Ле гәло ча жь ве малбәте щьмәʹтәкә мәзьн дәркʹәт?

Кӧрʹед Аԛуб дәстпекьрьн һʹәвсудийе бьре хԝәйи бьчʹук Усьв бькьн. Жь бо ве йәке, ԝана әԝ дилти фьротьн. Усьв бьрьнә Мьсьре. Рʹаст ә ԝедәре Усьв гәләк дьчәрчьри, ле Хԝәде кʹәрәма хԝә да ԝи хорте амьн у мерхас. Фьрәԝьн пʹадше Мьсьре, Усьв бәгәм кьр у ԝи кʹьфш кьр ча сәркʹарәки мәзьн. Һәма ви чахи, чахе хәлайикә мәзьн дәстпебу, Аԛуб кӧрʹед хԝә шандә Мьсьре ԝәки ль ԝьр һьнә хԝарьн бькʹьрʹьн. У һьнге сәр пʹарәвәкьрьна хԝарьне, Усьв сәрԝерти дькьр. Чахе ԝана бьре хԝә Усьв дит, сәва кьре хԝә пʹошман бун у тʹобә кьрьн. Усьв жи бахшандә ԝана у хәм кьр, ԝәки тʹәмамийа малбәта баве ԝи дәрбази Мьсьре бә. Нәфәред Усьврʹа әʹрдәки лапи баш һатә дайине, кʹидәре кӧ әԝана дьжитьн у зедә дьбун. Аһан, ньһа Усьв фәʹм кьр, ԝәки Хԝәде рʹебәрийа ван һʹәму ԛәԝьмандьна дькьр, ԝәки созед хԝә бинә сери.

Аԛубе кӧ әʹмьре хԝәда мәзьн бу, тʹәви малбәта хԝәйә мәзьн ида һʹәта мьрьне Мьсьреда жит. Чахе әԝ бәр мьрьне бу, пʹехәмбәрти кьр кӧ Зӧрʹәта создайи йан Хьлазкʹар ԝе жь кӧрʹе ԝи Щьһуда пешда бе, у бьбә Сәрԝерәки ԛәԝи. Гәләк сал дәрбаз бун у чахе Усьв жи бәр мьрьне бу, әԝи пʹехәмбәрти кьр, кӧ Хԝәде ԝе малбәта Аԛуб жь Мьсьре дәрхә.

​—Сәр һʹиме кʹьтебед Дәстпебун сәре 20 һʹәта 50; Ибрани 11:17-22.