ПʹАРА 18
Кʹәрәмәтед Иса Мәсиһ
Жь кʹәрәмәтед Иса рʹьнд те кʹьфше, ԝәки чахе әԝ бьбә пʹадша әԝ ԛәԝата хԝә ԝе ча бьдә хәбате
ХԜӘДЕ ԛәԝат да Иса Мәсиһ сәва шьхӧлед ӧса, йед кӧ тʹӧ мәри нькарьбу бькьра. Иса гәләк кʹәрәмәт дькьрьн, у гәләк щар әʹлаләта мәзьн дьбу шәʹде ван кʹәрәмәта. Бь ван кʹәрәмәта Иса избат дькьр, ԝәки әԝ жь дьжмьнед хԝә гәләк ԛәԝаттьр ә у дькарә чәтьнайед ӧса сафи кә, йед кӧ тʹӧ кәс жь мәрийа нькарә сафи кә. Ньһа әме пебьһʹәсьн дәрһәԛа чәнд кʹәрәмәтед ԝи.
Бьрʹчибун. Дәрбәки, Иса жь аве шәравәкә баш чекьр, әва кʹәрәмәта ԝийә пешьн бу. Ле ӧса жи әԝи дӧ щара, пе чәнд мәʹси у нана, бь һʹәзара мәри тʹер кьр, у һәрдӧ щара жи хԝарьн ӧса зедә бу, кӧ бәр ԝана ма.
Нәхԝәши. Иса Мәсиһ «һәр щурʹә еш у нәхԝаши» ԛәнщ дькьрьн (Мәтта 4:23). Әԝи йед кор, кәрʹ, сәԛәт, тʹопал, кʹоти, һивкʹәти у шьлушәʹт жи ԛәнщ дькьрьн. Тʹӧнә бу нәхԝәшийа ӧса, кʹижан кӧ Иса нькарьбуйа ԛәнщ кьра.
Ԛәԝата тʹәбийәте. Щарәке Иса тʹәви шагьртед хԝә, пе ԛәйьке сәр Бәʹра Щәлилерʹа дьчу. Ньшкева фьртонәкә мәзьн рʹабу, шагьртед Иса гәләк тьрсийан. Һьнге Иса готә фьртоне: «Бьсәкьнә, кәрʹ бә!», у ба перʹа-перʹа сәԛьри (Марԛос 4:37-39). Щарәке жи, чахе ль сәр бәʹре фьртонә бу, Иса Мәсиһ хԝәрʹа һеса сәр аверʹа дьчу (Мәтта 14:24-33).
Рʹӧһʹед хьраб, демәк щьн. Щьн дьжмьнед Хԝәде нә, у әԝана жь мәрийа гәләк ԛәԝаттьр ьн, ләма жи мәри нькарә хԝә жь ԝана хьлаз кә. Иса гәләк щар әʹмьр кьрийә, ԝәки щьн жь мәрийа дәркʹәвьн у ԝана бьһельн. Иса жь щьна нәдьтьрсийа, ле әԝана жь Иса Мәсиһ дьтьрсийан, чьмки ԝана заньбу дәрһәԛа мәзьнайа һʹӧкӧме ԝи.
Мьрьн. Тʹӧнә мәрийед ӧса кӧ бькарьбә жь мьрьне хьлаз бә, ләма жи ль сәр мьрьне те готьне «дьжмьне хьлазийе» (1 Корьнтʹи 15:26). Ле Иса, мьри сах дькьрьн. Мәсәлә, әԝи кӧрʹе жьнәбике у ӧса жи кәчʹькәк вәгәрʹандә жийине. Кʹәрәмәта ԝийә лапә зор әԝ бу, кӧ әԝи бәр чʹәʹве гәләка һәвале хԝә Лазар, йе кӧ ида чар рʹож бу кӧ мьри бу, сах кьр! Һәла һе дьжмьнед Иса жи мәщбур бун ԛайил бьн, ԝәки Иса кʹәрәмәтәкә ӧса кьр (Йуһʹәнна 11:38-48; 12:9-11).
Ле гәло Иса чьрʹа әв кʹәрәмәт дькьрьн? Нә әԝ мәри, йәкә ԝе бьмьрана? Рʹаст ә әв ӧса нә, ле бь ван кʹәрәмәта дьһатә избаткьрьне, ԝәки пʹехәмбәртийед дәрһәԛа Мәсиһ у Пʹадшатийа ԝи, ԝе әʹсәйи бенә сери. Пʹадше кӧ Хԝәде хԝәха жьбарт, ԝе бьрʹчибун, нәхԝәшийа, тʹәшԛәлед тʹәбийәте, щьна у мьрьне бьдә һьлдане. Әм дькарьн бе дӧдьли ван пʹехәмбәртийа баԝәр бькьн, чьмки чахе Иса ль сәр әʹрде бу әԝи избат кьр, ԝәки әԝи жь Хԝәде ида ԛәԝатәкә ӧса стандийә.