Гәло мьзгинийед жь Кʹьтеба Пироз, бь рʹастийе жь Хwәде нә?

1. Кʹи йә авторе Кʹьтеба Пироз?

Мьзгинийа дәрһәqа wе йәке, кӧ мәри wе ль сәр әʹрде һʹәта-һʹәтайе бьжин, дь Кʹьтеба Пирозда ньвисар ә (Зәбур 37:29). Тʹәмамийа Кʹьтеба Пироз, бь 66 кʹьтебед бьчʹук һатийә тʹоп кьрьне. Хwәде бона ньвисандьна ван кʹьтеба, 40 пʹехәмбәред хwә да хәбате. Пенщ кʹьтебед пешийе, бь дәсте Муса пʹехәмбәр wәкә 3 500 сал пешда һатьнә ньвисаре. Ле кʹьтеба пашийе, бь дәсте Йуһʹәнна пʹехәмбәр wәкә 1 900 сали зедәтьр пешда һатийә ньвисаре. Ле гәло ньвискʹаред Кʹьтеба Пироз нет-фькьред кʹе дьньвисин? Бь рʹастийе wана фькьред Хwәде дьньвисин, Хwәде фькьред хwә бь рʹӧһʹе пироз әʹлами wан ньвискʹара дькьр (2 Самуйел 23:2). Әwана нет-фькьред Хwәде дьньвисин, нә кӧ фькьред хwә. Ләма жи авторе Кʹьтеба Пироз, Йаһоwа Хwәде йә. Бьхунә 2 Тимотʹейо 3:16; 2 Пәтрус 1:20, 21.

Видео: Ньвискаре Әсли йе Кьтеба Пироз Ки йә?

2. Ча әм дькарьн баwәр бькьн, кӧ Кʹьтеба Пироз жь Хwәде йә?

Хенщи Хwәде тʹӧ кәс нькарә пешда дәрһәqа ахьрийе пʹехәмбәртийе бькә. Дь Кʹьтеба Пирозда, дәрһәqа ахьрийе рʹаст у һур бь һур һатийә пʹехәмбәртикьрьне (Йешуа 23:14). Ләма жи әм баwәр дькьн, wәки Кʹьтеба Пироз жь Хwәде йә. Чьмки тʹәне Хwәде дәрһәqа ахьрийа мәрийа занә. Бьхунә Ишайа 42:9; 46:10.

Дьбәк һун жи qайил ьн, wәки кʹьтеба жь Хwәде гәрәке кʹьтебәкә мәхсус бә. Әw рʹасти жи кʹьтебәкә ӧса нә. Кʹьтеба Пироз ль сәр сәда зьмана у бь милйарда һʹәв тенә нәшьр кьрьне. Рʹаст ә Кʹьтеба Пироз кʹьтебәкә кәвьн ә, ле дь алийе зандарийеда әw рʹаст ә у һәвгьредайи йә. Кʹьтеба Пироз wәкә 40 мәри ньвисинә, ле ньвисаред wан мьqабьли һәв ниньн, әwана һәвва гьредайи нәa. Хенщи ве йәке, Кʹьтеба Пироз һʹәзкьрьна Хwәде дьдә кʹьфше. Кʹьтеба Пироз һәла һе иро жи дькарә әʹмьре мәрьва бәрбь башбуне бьгӧһезә. Әв һʹәму тьшт у избаткьрьн, баwәрийа милйона мәрийа qәwи дькә, кӧ Кʹьтеба Пироз Хәбәра Хwәде йә. Бьхунә 1 Тʹесалоники 2:13.

Видео: Ча Әм Дькарьн Баwәр Бькьн, кö К′ьтеба Пироз жь Хwәде йә?

3. Кʹьтеба Пироз дәрһәqа чь гьли дькә?

Кʹьтеба Пироз дина мә дьдә ль сәр мьзгинийа Хwәде, демәк әw гьли дькә дәрһәqа нета Хwәдейә баш бона мәрийа. Кʹьтеба Пироз шьровәдькә кӧ ча мәрийа ӧнда кьр мәщал, wәки дь щьнәтеда ль сәр әʹрде бьжин, у ча әʹрд wе диса бьбә щьнәт. Бьхунә Әʹйанти 21:4, 5.

Дь Хәбәра Хwәдеда, ӧса жи һәнә qанун, принсип у ширәт. Хенщи ве йәке дь Кʹьтеба Пирозда те гьликьрьне дәрһәqа һәләqәтийа Хwәде тʹәви мәрийа, у жь ве йәке әм педьһʹәсьн Хwәде чь щурʹәйи йә. Бь ви щурʹәйи Кʹьтеба Пироз дькарә али тә бькә, wәки тӧ Хwәде нас бьки. Әw шьровәдькә, ча тӧ дькари бьби һәвале Хwәде. Бьхунә Зәбур 19:7, 11; Аqуб 2:23; 4:8.

4. Ча тӧ дькари Кʹьтеба Пироз фәʹм бьки?

Иса Мәсиһ ньвисаред Кʹьтеба Пироз рʹез бь рʹез пәй һәв шьровәдькьр, сәва кӧ мәри рʹьнд «ньвисара фәʹм бькьн». Дь ве брошуреда жи те хәбьтандьне әw метода һинкьрьна Кʹьтеба Пироз, йед кӧ Иса Мәсиһ дьда хәбате. Ләма жи әва брошура wе али тә бькә Кʹьтеба Пироз рʹьнд фәʹм бьки. Бьхунә Луqа 24:27, 45.

Мьзгинийед Хwәде, жь һʹәму тьшти һе гәлә һʹәwаскʹар у qимәт ьн. Рʹаст ә һьнә жь мәрийа дь һьндава ван мьзгинийада бетʹалаш ьн. Һьнәк жи, жь ван мьзгинийа әʹщьз дьбьн у һерс дькʹәвьн. Ле тӧ жь бо ве йәке qәт бәрхwә нәкʹәвә. Бьзаньбә, кӧ һәгәр тӧ занәбуне дәрһәqа Хwәде бьстини, гӧмана тә дәрһәqа жийина һʹәта-һʹәтайе wе һәбә. Бьхунә Йуһʹәнна 17:3.