Ча тӧ дькари незики Хwәде би?

1. Гәло Хwәде һʹәму дӧа дьбьһе?

Хwәде һʹәму щурʹә мәрийа тʹәглиф дькә, wәки әwана бь дӧакьрьн незики wи бьн (Зәбур 65:2). Ле Хwәде һʹәму дӧа qәбул накә. Мәсәлә һәгәр мер жьна хwәрʹа хьраб ә, Хwәде дӧайед wи qәбул накә (1 Пәтрус 3:7). Чахе щьмәʹта Исраел нәдьхwәст гӧрʹа Хwәде бькьра у хьраби дькьрьн, Йаһоwа Хwәде дӧайед wан инкʹар дькьр. Рʹаст ә дӧакьрьн qәдьрәки гәләк мәзьн ә. Ле Йаһоwа тʹьме һазьр ә мә бьбьһе, әw һәла һе дӧайед wан жи дьбьһе, кʹи кӧ гӧнед гьран кьрьнә ле жь гӧнед хwә пʹошман бунә у тʹобә кьрьнә. Бьхунә Ишайа 1:15; 55:7.

Видео: Гәло Хwәде Һʹәму Дöа Дьбьһе?

2. Ча әм гәрәке дӧа бькьн?

Әм гәрәке тʹәне Йаһоwарʹа дӧа бькьн, чьмки әw ә әʹфьрандаре мә у Хwәдайе рʹаст (Мәтта 4:10; 6:9). Әм мәрийед гӧнәкʹар ьн у гәрәке бь наве Иса Мәсиһ дӧа бькьн, чьмки әwи сәва гӧнед мә әʹмьре хwә да (Йуһʹәнна 14:6). Йаһоwа Хwәде нахwазә, wәки дӧайед мә пʹьрʹ хәбәр бьн, йан жи бь әзбәри бьн. Ле әw дьхwазә, wәки әм бь дьл у щан wирʹа дӧа бькьн. Бьхунә Мәтта 6:7; Филипи 4:6, 7.

Әʹфьрандаре мә ӧса жи wан дӧа дьбьһе, йед кӧ әм дь дьле хwәда дьбежьн (1 Самуйел 1:12, 13). Йаһоwа Хwәде мә тʹәглиф дькә тʹьме wирʹа дӧа бькьн. Мәсәлә сьбәһе зу чахе рʹадьбьн, йан жи еваре пешийа рʹазане. Ӧса жи әм дькарьн дӧа бькьн пешийа нан-хwарьне, у чахе рʹасти чәтьнайа тен. Бьхунә Зәбур 55:22; Мәтта 15:36.

3. Чьрʹа мәсиһи тʹәвайи дьщьвьн?

Һеса нинә незики Хwәде бьн, чьмки дор-бәре мә мәрьвед ӧса дьжин, йед кӧ баwәрийа хwә Хwәде найньн у qәрфе хwә созе Хwәде дькьн, кӧ ль сәр әʹрде wе әʹдьлайи һәбә (2 Тимотʹейо 3:1, 4; 2 Пәтрус 3:3, 13). Ләма жи әм һʹәwщә нә, кӧ һелана бьдьнә һәв у һәв qәwи кьн. Бьхунә Ибрани 10:24, 25.

Чахе әм тʹәви wан мәрьва дьщьвьн, кʹи кӧ Хwәде һʹәз дькьн, әв йәк али мә дькә, wәки һе незики Хwәде бьн. Щьватед Шәʹдед Йаһоwа мәщаләкә баш дьдә мә, wәки әм жь баwәрийа хушк-бьра qәwи бьн. Бьхунә Рʹомайи 1:11, 12.

4. Ча тӧ дькари незики Хwәде би?

Тӧ дькари һе незики Хwәде би, һәгәр дьшьрмиш би ль сәр wе йәке, чь кӧ жь Хәбәра Хwәде һин дьби. Чахе Кʹьтеба Пироз дьхуни, у педьһʹәси дәрһәqа кьред, ширәтед у созед Йаһоwа Хwәде, һәр гав дьшьрмиш бә тӧ жь ван тьшта чь һин дьби дәрһәqа Хwәде. Дьшьрмишбун у дӧакьрьн али мә дькьн фәʹм бькьн, кӧ чьqас мәзьн ә һʹәзкьрьн у биланийа Йаһоwа Хwәде. Бьхунә Йешуа 1:8; Зәбур 1:1-3.

Һәгәр тӧ дьхwази незики Хwәде би, тӧ гәрәке баwәрийа хwә wи бини у гӧмана хwә бьди сәр wи. Баwәрбун әм дькарьн бәрамбәри кӧлирке бькьн. Мәсәлә ча кӧлиркерʹа тʹьме лазьм ә ав, ӧса жи мәрʹа тʹьме лазьм ә дьшьрмишбун дәрһәqа һинкьрьнед Кʹьтеба Пироз, wәки баwәрбуна мә qәwи бә. Бьхунә Мәтта 4:4; Ибрани 11:1, 6.

5. Һәгәр тӧ незики Хwәде би, тӧйе чь кʹаре бьстини?

Йаһоwа Хwәде хәм дькә бона wан мәрийа кʹи кӧ wи һʹәз дькьн. Әw ӧса жи жь wан һʹәму тьшта мә хwәй дькә, йе кӧ дькарә баwәрбун у гӧмана мәйә әʹмьре һʹәта-һʹәтайе бьдә ӧндакьрьне (Зәбур 91:1, 2, 7-10). Йаһоwа ӧса жи пешда әʹлами мә дькә дәрһәqа wан тьшта, чь кӧ дькарә зийане бьдә сьһʹәт-qәwат у бәхтәwарбуна мә. Бь рʹастийе жи тʹәне Йаһоwа дькарә рʹийа лапә баш мә һин кә, рʹийа кӧ бәр бь жийине дьбә. Бьхунә Зәбур 73:27, 28; Аqуб 4:4, 8.