Чахе Һун Рʹасти Кӧл-Дәрда Тен

Рʹаст ә һун жь алийе хԝәда һʹәму тьшти дькьн, сәва кӧ зәԝащ у малбәта ԝә бәхтәԝар бә, ле йәкә дькарьн ньшкева тьштед ӧса бьԛәԝьмьн, жь бо чь жи ԝе ԝәрʹа чәтьн бә шабуне хԝәй кьн (Ԝаиз 9:11). Ле Хԝәде бь һʹьзкьрьне аликʹарийе дьдә мә, чахе әм дькʹәвьнә нав кӧл-дәрда. Һәрге һун бьԛәдиньн әван принсипед жь Кʹьтеба Пироз кӧ жере тенә дайине, һун у малбәта ԝә, бькарьбьн тәйах кьн һәла һе һьнге жи, гава дәрәща ԝә гәләк хьраб бә.

1 ГӦМАНА ХԜӘ ХԜӘДЕ БИНЬН

КʹЬТЕБА ПИРОЗ ЧЬ ДЬБЕЖӘ: «Һʹәму хәмед хԝә бавежьнә сәр ԝи, чьмки әԝ бона ԝә хәм дькә» (1 Пәтрус 5:7). Һәртʹьм бира хԝәда хԝәй кьн, кӧ Хԝәде нәһәԛ нинә сәва ван һʹәму чәтьнайа у щерʹьбандьна кӧ рʹасти мә тен (Аԛуб 1:13). Һәрге һун незики Хԝәде дьбьн, әԝе али ԝә бькә (Ишайа 41:10). «Һәрдәм ... дьле хԝә ль бәр ԝи вәкьн» (Зәбур 62:8).

Хенщи ве йәке, чахе һун һәр рʹож Кʹьтеба Пироз дьхуньн у һин дьбьн, һун бәрдьли у дьлбинийе дьвиньн. Бь ве йәке, һуне ль сәр хԝә тʹәхмин кьн кӧ ча Йаһоԝа «нава һʹәму тәʹли-тәнгийада дьл дьдә бәр мә» (2 Корьнтʹи 1:3, 4; Рʹомайи 15:4). Әԝ соз дьдә, ԝәки ԝәрʹа бьдә «әʹдьлайийа Хԝәде кӧ жь һәр һʹьш-аԛьли дәрбазтьр ә» (Филипи 4:6, 7, 13).

ЧЬ ҺУН ДЬКАРЬН БЬКЬН:

• Дӧа бькьн, ԝәки Йаһоԝа аликʹарийе бьдә ԝә кӧ архайин бьн у рʹаст дьшьрмиш бьн

• Сәва кӧ бькарьбьн чәтьнайа дәрбаз кьн, рʹийа рʹаст бьжберьн

2 ДӘРҺӘԚА ХԜӘ У МАЛБӘТА ХԜӘ ХӘМ БЬКЬН

КʹЬТЕБА ПИРОЗ ЧЬ ДЬБЕЖӘ: «Дьле кәсе аԛьл занине дьстинә у гӧһе занийар жи ль пей занине йә» (Мәтʹәлок 18:15). Дәрһәԛа һʹәму тьшти дьшьрмиш бьн. Демәк чь һәр нәфәре малбәта ԝәрʹа лазьм ә. Тʹәви ԝан хәбәр дьн. Гӧһ бьдьнә ԝан (Мәтʹәлок 20:5).

Ле һәрге кәсәк жь мәрьве мәйи незик дьмьрә? Нәтьрсьн у шәрм нәкьн бьгьрин. Бькьнә бира хԝә кӧ һәла һе Иса жи «гьрийа» (Йуһʹәнна 11:35; Ԝаиз 3:4). Хәԝ у һесабун жи гәләк фәрз ьн (Ԝаиз 4:6). Чьмки әв йәк жи ԝе али ԝә бькә кӧ бькарьбьн дәрәща хьраб һьнәки һеса дәрбаз кьн у тәйах кьн.

ЧЬ ҺУН ДЬКАРЬН БЬКЬН:

• Пешийа кӧ һун рʹасти кӧл-дәрда бен, хԝәрʹа бькьнә хәйсәт кӧ тʹәви нәфәред малбәта хԝә һәләԛәтийа баш чекьн. Чахе проблем пешда бен, ԝанарʹа ԝе һеса бә тʹәви ԝә хәбәр дьн

• Тʹәви ԝан мәрийа жи хәбәр дьн, йед кӧ рʹасти ви щурʹәйи дәрәща һатьн

3 БЬСТИНЬН АЛИКʹАРИЙА КӦ ԜӘРʹА ЛАЗЬМ Ә

КʹЬТЕБА ПИРОЗ ЧЬ ДЬБЕЖӘ: «Һәвал һәр тʹьм һʹәз дькә у бьра дь рʹожа тәнгда хӧйа дьбә» (Мәтʹәлок 17:17). Һәвалед ԝә дьхԝазьн али ԝә бькьн, ле дьбәкә әԝана ньзаньн кӧ чь бькьн. Хԝә жь ԝана дур нәгьрьн у бежьн, кӧ бь рʹастийе чь ԝәрʹа лазьм ә (Мәтʹәлок 12:25). Ӧса жи бьхԝазьн аликʹарийа рʹӧһʹани жь ԝан мәрийа, йед кӧ Кʹьтеба Пироз фәʹм дькьн. Әԝ рʹебәрийа кӧ әԝана дькарьн жь Кʹьтеба Пироз бьдьнә ԝә, ԝе али ԝә бькә (Аԛуб 5:14).

Һуне бькарьбьн бьстиньн аликʹарийа кӧ ԝәрʹа лазьм ә, һәрге һәр рʹож һәләԛәтийа хԝә тʹәви ԝан мәрийа чедькьн, йед кӧ Хԝәде баԝәр дькьн у итʹбарийа хԝә созед ԝи тиньн. Һун ӧса жи дьлбиникә мәзьн бькарьбьн бьвиньн, һәрге хԝәха жи али мәрьвед дьн дькьн кʹижанарʹа кӧ һеланкьрьн лазьм ә. Ԝан мәрийарʹа дәрһәԛа баԝәрийа хԝә һьндава Йаһоԝа у созед ԝи, бежьн. Чахе мәри һʹәԝще аликʹарийе нә, һазьр бьн кӧ али ԝан бькьн. У хԝә дур нәгьрьн жь ԝан мәрийа, йед кӧ ԝә һʹьз дькьн у дәрһәԛа ԝә хәм дькьн (Мәтʹәлок 18:1; 1 Корьнтʹи 15:58).

ЧЬ ҺУН ДЬКАРЬН БЬКЬН:

• Тʹәви һәвале хԝәйи незик хәбәр дьн, у бьһельн кӧ әԝ али ԝә бькә

• Һәвале хԝәрʹа бь һʹәлали у конкрет бежьн, ԝәки һун һʹәԝще чь нә