Хәԝн-Хәйалед Йуһʹәнна

Чахе Йуһʹәнна гьртьн, ԝи шандьн сәр гьрава Патмосе. Ԝедәре Иса дәрһәԛа ахьрийе 16 хәԝн-хәйал ԝирʹа әʹйан кьр. Ԝан хәԝн-хәйалада Йуһʹәнна дит, ԝәки ԝе ча наве Йаһоԝа бе рʹумәткьрьне, Пʹадшатийа ԝи бе, ԛьрарʹа ԝи бе сери сәр әʹзмана у сәр әʹрде.

Хәԝн-хәйаләкеда Йуһʹәнна дит ча Йаһоԝайе Һьмзор сәр тʹәхте хԝә рʹуньштьбу. У дор-бәре ԝи 24 рʹуспи пе кʹьнщед сьпи рʹуньштьбун у сәр сәре ԝан кʹофийед зерʹин бун. Жь тʹәхт бьруск у дәнге гӧрʹинийа әʹрд-әʹзмана дәрдькʹәт. Әԝ 24 рʹуспи бәр Йаһоԝа чок дан у сәре хԝә дахьстьн. Хәԝн-хәйалед дьнда Йуһʹәнна дьвинә әʹлаләта мәзьн жь һәр мьләта, бәрәка у зьмана, йе кӧ сәре хԝә бәр Йаһоԝа датанин. Бәрх, демәк Иса, шьвантийе дькә у ԝана бәрбь ава жийине дьбә. Паши әԝи дит, ԝәки Иса сәр әʹзман бу Пʹадша, у дәстпекьр тәʹви 24 рʹуспийа сәрԝертийе бькә. Паше ԝе йәке, Йуһʹәнна дит ча Иса тʹәви зийа, демәк Шәйтʹан, у щьнед ԝи шәрʹ дькьр у ԝан жорда авитьнә сәр әʹрде.

Паше Йуһʹәнна дьвинә, ча Иса тʹәви 144 000 кʹьфшкьрийа сәр Чʹийайе Сийоне сәкьни йә. Ӧса жи әԝи дит чаԝа мәләк әʹзменда дьфьрʹи у дьготә мәрьва: «Жь Хԝәде бьтьрсьн у шькьрийе бьдьнә ԝи».

Хәԝн-хәйалед дьнда әԝи шәрʹе Һармәгәдоне дит. Ԝи шәрʹида Иса у ордийа ԝи, Шәйтʹан у сәрԝертийа ԝи алт дькьн. Хәԝн-хәйалед пашьнда, Йуһʹәнна дьвинә, ԝәки сәр әʹрде у сәр әʹзмана дьбә әʹдьлайи. Шәйтʹан у пәйчуйед ԝи һатьнә кʹӧтакьрьне. Һʹәму әʹфьрина, ча сәр әʹрде ӧса жи сәр әʹзман дәстпекьрьн наве Йаһоԝа рʹумәт кьн, у тʹәне ԝирʹа хьзмәт кьн.