Бьра «Пʹадшатийа Тә Бе»

Йаһоԝа соз да: «Еш, гьри, нәхԝәши у мьрьн ԝе тʹӧнә бьн. Әзе жь чʹәʹвед мәрьва һесьред ԝан тʹәмьз кьм. Һәр тьштед хьраб ԝе бенә биркьрьне».

Йаһоԝа, Адәм у Һеԝа бахче Еденеда щиԝар кьр у дьхԝәст, ԝәки әԝана бәхтәԝар бьн. Ԝана гәрәке Йаһоԝа бьһʹәбанда. Йаһоԝа тʹәми да ԝан, ԝәки зарʹа биньн у әʹрде тʹьжә кьн. Рʹаст ә Адәм у Һеԝа мьԛабьли Йаһоԝа дәркʹәтьн, ле йәкә нетед Хԝәде дәрһәԛа әʹрде нәһатьнә гӧһастьне. Жь ԝе кʹьтебе әм пеһʹәсийан, ԝәки һʹәму созед Хԝәде тенә сери. Йаһоԝа бь сайа Пʹадшатийа хԝә ԝе ԝан созе хԝә бинә сери, кʹижан әԝи Бьраһимрʹа соз дабу.

Зутьрәке, Шәйтʹан, щьнед ԝи у һʹәму мәрьвед хьраб ԝе бенә кʹӧтакьрьне. У ида һәр кәс ԝе тʹәне Йаһоԝарʹа хьзмәт кә. Тʹӧ кәс ԝе нәхԝәш нәкʹәвә у нәмьрә. Һәр рʹож әме сьһʹәт-ԛәԝат һʹьшйар бьн у әʹмьре хԝәрʹа ша бьн. Әʹрд ԝе бьбә щьнәт. Бал һәр кәса ԝе хԝәрьн һәбә у әԝана ԝе малед хԝәда, бехофийеда бьжин. Мәрьвед зӧлм ԝе ида тʹӧнә бьн, ле тʹәне мәрьвед һʹәйф ԝе сәр әʹрде бьжин. Әме һʹәйԝанед бәйани нәтьрсьн у нә жи әԝана ԝе мә бьтьрсьн.

Бьдә бәр чʹәʹве хԝә ԝе чьԛас һʹәԝас бә, чахе Йаһоԝа мьрийа жь мьрьне рʹакә. Әме бькарьбьн Һабил, Нӧһ, Бьраһим, Сәрайе, Муса, Рʹутʹ, Әстәре, у Даԝьд бьвиньн. Әме тʹәвайи әʹрде бькьнә щьнәт. У һәр гав шьхӧлед һʹәԝасва мьжул бьн.

Йаһоԝа дьхԝазә, ԝәки тӧ жи ԝедәре би. Ньһа тӧ һәла һе жи нькари бьди бәр чʹәʹве хԝә, ԝәки тӧйе чьԛас незик Йаһоԝа нас ки. Ԝәрен әм бәрдәԝам кьн, һәр рʹож һәләԛәтийа хԝә тʹәви Йаһоԝа ԛәԝи кьн. У бьра әԝ достийа мә һʹәта-һʹәтайе бькʹьшинә!