Әм Ча Дькарьн Хwә Бехwәйи Тʹәхмин Нәкьн
ТʹÖ КӘС һаqас һʹәwще хwәйкьрьне нинә, чьqас кö зарʹа тʹәзәбуйи. Чахе әм дьне кʹәтьн, хwәйкьрьна мә бь тʹәмами де-баве мәва гьредайи бу. Чахе әм тʹәзә һин дьбун кö рʹе һәрʹьн, у гава әм рʹасти мәрьвед нәнас дьһатьн, әwана мәрʹа тәʹрьки дьһатьнә кʹьфше. Де-баве мә кö бал мә нибуна, әм жь wана дьтьрсийан. Ле чахе дәсте мә дәсте де йан баве мәда бу, мә хwә бехоф у хwәйкьри тʹәхмин дькьр.
Wәʹде зарʹотийе, һʹалхwәшийа мә гьредайи бу ве йәкева, кö де-баве мә әм һʹьз дькьрьн у дьлгәрм дькьрьн. Чахе мә фәʹм кьр кö де-баве мә, мә һʹьз дькьн, мә хwә хwәйкьри тʹәхмин дькьр. У чахе wана пʹайе мә дьдан у мәрʹа ша дьбун кö әм тьштед баш дькьн, әм һе зедә хwәда гöман бун у пешда дьчун.
Чахе әм һьнәки мәзьн бун, мә бь сайа һәвалед хwәйи незик жи, хwә хwәйкьри тʹәхмин дькьр. Мә хwә рʹьһʹәт тʹәхмин дькьр, чахе әwана тʹәви мә бун, у бь сайа wана мәкʹтәбеда мә хwә бепьшт тʹәхмин нәдькьр.
Бәле, зарʹотийа öса хwәш ә у ләзәт ә. Ле йазьх, иро гәләк щаһьл нькарьн хwәрʹа һәвалед незик бьвиньн, у һьн жи әwана жь де-бава хwәйтийе у һʹьзкьрьне навиньн. Мелисаa дьле хwә вәдькә у дьбежә: «Тʹьме чахе әз шькьлед малбәтед öса дьньһерʹьм, кö йәктийеда ньн у тьшта тʹәвайи дькьн, әз хwәрʹа дьфькьрьм: ‹Хwазьла чахе әз бьчʹук бум, мьн жи әw шабун бьдита›». Дьбәкә һун жи öса тʹәхмин дькьн.
ПРОБЛЕМЕД ЩАҺЬЛА ЖЬ БО КЕМАСИЙА ҺʹЬЗКЬРЬНЕ
Тö чахе щаһьл буйи, дьбәкә тö бь тʹәмами хwәда гöман нибуйи. Чьмки дьбәкә тә һʹьзкьрьн у дьлгәрми кем дьстанд. Дьбәкә те бира тә, кö ча де-баве тә тʹьме шәрʹ-дәʹw дькьрьн, у ахьрийеда жь һәв qәтийан, у тә ве йәкеда хwә жи нәһәq дькьр. Йан жи һе хьраб, дьбәкә де йан баве тә бь гьлийа йан бь ледане тö дешандьн.
Дәрәщед öса ча сәр һьнә зарʹа һʹöкöм дьбә? Һьнәк жь wан wәʹде щаһьлтийе наркотикайе дьдьнә хәбате, йан пәй ичʹке дьчьн. Һьнәк жи пәй мәрьвед хьраб дьчьн, чьмки дьфькьрьн кö әw мәрьв дькарьн хwәйитийе wан бькьн. Һьнәк жи һәләqәтийа романтик дәстпедькьн, чьмки һʹьзкьрьне у дьлгәрмкьрьне дьгәрʹьн. Ле жь wан һәләqәтийа һʹәчʹи зәʹф гәләк wәхт накʹьшиньн у әwана һәвдö дьqәтьн. У жь бо ве йәке әwана һе зедә хwә бехwәйи тʹәхмин дькьн.
Һьнәк щаһьлед кö хwә бехwәйи тʹәхмин дькьн, дьбәкә шашийед öса нәкьн, ле әwана хwә бекер һʹәсаб дькьн. Ана гьли дькә: «Әз баwәр бум кö әз керһати ниньм, чьмки дийа мьн әw йәк тʹьме у тʹьме мьнрʹа дьгот. Qә найе бира мьн, wәки дийа мьн пʹайе мьн дайә йан жи һʹьзкьрьн мьнрʹа дайә кʹьфше».
Тʹәне wәʹде щаһьлтийе нинә кö мәрьв дькарә хwә бехwәйи тʹәхмин кә. Гәләк хwә бехwәйи тʹәхмин дькьн чахе һәв дьqәтьн, чәтьнайа дьвиньн wәʹде кал-пир дьбьн, йан жи кö хwә рʹува бәгәм накьн. Фьрqи тʹöнә мәʹни чь йә кö мәрьв хwә бехwәйи тʹәхмин дькә, йәкә әw һәст наһелә кö мәрьв бәхтәwар бә у һәләqәтийа мәрьва тʹәви йед дьн хьраб дькә. Ле гәло әм чь дькарьн бькьн сәва кö хwә öса тʹәхмин нәкьн?
ХWӘДЕ ХWӘЙИТИЙЕ МӘ ДЬКӘ
Әм гәрәке бьзаньбьн кö аликʹари һәйә. Һәйә кәс, кö дькарә у һьн жи дьхwазә али мә һʹәмушка бькә. Әw кәс һәйә хwәха Хwәде.
Хwәде бь Ишайа пʹехәмбәр әwан гьлийа дьбежә мә: «Тö нәтьрсә, жь бәр кö әз бь тәрʹа мә; ль дора хwә нәньһерʹә, жь бәр кö Хwәдайе тә әз ьм; әзе тә зәхм бькьм; бәле, әзе али тә бькьм; бәле, әзе бь дәсте рʹасте дадийа хwә жь тәрʹа бьбьм аликʹар!» (Ишайа 41:10, 13). Чьqас мә дьлгәрьм дькьн әw гьли, кö Хwәде бь симболик дәсте мә дьгьрә! Мәрʹа qә нә лазьм ә кö хәмгин бьн!
Кʹьтеба Пирозда дәрһәqа хьзмәткʹаред Хwәде те гьликьрьне, йед кö хәмгин бун у дьлтәнг бун, ле әwана һин бун кö хwә ль Хwәде бьгьрьн. Һанна, дийа Самуйел, дьлтәнг дьбу, чьмки зарʹ жерʹа нәдьбун. Гәләк щар qәрф wе дькьрьн жь бо кемасийа wе. Ләма, мәʹде Һаннайе тʹöнә бу кö хwарьне бьхwә у гәләк щар дьгьрийа (1 Самуйел 1:6, 8). Ле паши ве йәке чахе Һаннайе дьле хwә Хwәдерʹа вәкьр, әw ида бәрхwә нәдькʹәт у дьлтәнг нибу (1 Самуйел 1:18).
Даwьде зәбурбеж жи щара гәләк хәмгин дьбу. Бь сала, Шаwул Пʹадша пәй wи дькʹәт. Даwьд чәнд щара жь мьрьне хьлаз бу, у щара әwи тʹәхмин дькьр кö жь проблемед хwә хьлаз набә (Зәбур 55:3-5; 69:1). Ле йәкә Даwьд ньвиси: «Әзе бь ашти хwә вәзәлиньм у ракʹәвьм, чьмки тʹәне тö, йа Хöдан, дь әwләһийеда мьн дьди рʹуньштьн» (Зәбур 4:8, ИМ).
Һаннайе у Даwьд баре хwә данә Йаһоwа, у әwана избат бун кö Хwәде али wан кьр (Зәбур 55:22). Ле иро әм ча дькарьн баре хwә бьдьнә Хwәде?
СЕ ТЬШТ КÖ ДЬКАРЬН АЛИ МӘ БЬКЬН WӘКИ ХWӘ БЕХWӘЙИ ТʹӘХМИН НӘКЬН
1. Итʹбарийа хwә Йаһоwа биньн, чаwа Бав.
Иса мә һелан дькә кö әм Баве wи, демәк «Хwәдейе рʹасти» нас кьн (Йуһʹәнна 17:3). Паwлосе шанди мә дьдә баwәркьрьне кö «Хwәде жь мә һәр кәси нә дур ә» (Кʹаред Шандийа 17:27). Аqуб ньвиси кö «незики Хwәде бьбьн, әw жи wе незики wә бьбә» (Аqуб 4:8, ИМ).
Сәва кö хәмгин нәбьн, тʹьме гәрәке бира мәда бә, кö Баве мәйи әʹзмана һәйә, кʹижан кö мә һʹьз дькә у дәрһәqа мә хәм дькә. Һьлбәт wәʹдә лазьм ә кö мәрьв итʹбарийа хwә Хwәде бинә. Ле гәләк мәрьв избат бунә, кö һежа йә итʹбарийа хwә Хwәде биньн, чьмки öса мәрьв ида хәмгин набә. Каролин дьбежә: «Чахе мьн Баве хwә Йаһоwа нас кьр, мьн qазанщ кьр әw кәс, кʹижанирʹа әз дькарьм дьле хwә вәкьм. У әw йәк мьнрʹа рʹьһʹәти ани!»
Рейчал гьли дькә: «Чахе әз тʹәне бе де-бав мам, Йаһоwа али мьн кьр кö әз хwә архайин тʹәхмин кьм. Мьн карьбу тʹәви wи хәбәрдьм у аликʹарийе жь wи бьхwазьм wәʹде проблема. У әwи али мьн дькьр».b
2. Бьбьнә әндәмед малбәта рʹöһʹани.
Иса шагьртед хwә һин дькьр кö бьфькьрьн дәрһәqа һәвдö чаwа хушк у бьра. Әwи готә wан: «Һун һʹәму жи бьра нә» (Мәтта 23:8). Иса дьхwаст кö шагьртед wийи рʹаст һәвдö һʹьз бькьн у бьбьнә чаwа малбәта мәзьнә рʹöһʹани (Мәтта 12:48-50; Йуһʹәнна 13:35).
Сәр щьватед Шәʹдед Йаһоwа гьшк бь дьл у щан дьхәбьтьн, кö малбәта рʹöһʹанида дьлбини у дьлгәрмийе һәвдöрʹа бьдьнә кʹьфше (Ибрани 10:24, 25). Гәләк избат бунә, кö щьват һәйә чаwа дәрман, кʹижан кö бьринед емосйали qәнщ дькә.
Ева гьли дькә: «Дь щьватеда һәваләкә мьнә незик һәбу. Әwе дәрде мьн фәʹм дькьр. Әwе гöһ дьда мьн, рʹезед жь Кʹьтеба Пироз мьнрʹа дьхwәнд у бона мьн дöа дькьр. Әwе әз дамә баwәркьрьне кö әз тʹәне ниньм. Әwе али мьн кьр, кö мьн дьле хwә жерʹа вәкьр у барәки гьран ль сәр мьн һатә һьлдане. Әз гәләк рʹази мә бона аликʹарийа wе, чьмки әз ньһа хwә һе хwәйкьри тʹәхмин дькьм». Рейчал дьбежә: «Дь щьватеда мьн хwәрʹа де жи дит у бав жи. Wана али мьн кьр кö мьн хwә һʹьзкьри тʹәхмин дькьр у әз архайин бум».
3. Һʹьзкьрьне у qәнщийе бьдьнә кʹьфше.
Һәрге әм һʹьзкьрьн у qәнщийе бьдьнә кʹьфше, һәвалтийа мә wе дьреж бә. Иса гот: «Хwәзи ль дайийа, нә кö ль стандийа» (Кʹаред Шандийа 20:35). Бешьк, әм дьвиньн кö әм чьqас зедә һʹьзкьрьне бьдьнә кʹьфше, һаqас зедә әме һʹьзкьрьне бьвиньн. Иса шагьртед хwәрʹа гот: «Бьдьн, wәрʹа wе бе дайине» (Луqа 6:38).
Чахе әм һʹьзкьрьне дьдьн у дьстиньн, әм хwә дьлрʹьһʹәт у хwәйкьри тʹәхмин дькьн. Чаwа кö Кʹьтеба Пироз дьбежә: «Һʹьзкьрьн тʹö щар кʹöта набә» (1 Корьнтʹи 13:8). Мариа дьбежә: «Әз дәрһәqа хwә хьраб дьфькьрьм, ле әз заньм кö әw йәк нәрʹаст ә. Әз жь wан фькьра хьлаз дьбьм бь wе йәке, кö әз али мәрьвед дьн дькьм у дәрһәqа wан дьфькьрьм, у ләма дәрһәqа хwә кем хәмгин дьбьм. Әз тʹьме хwә дьлрʹьһʹәт тʹәхмин дькьм, чахе али мәрьвед дьн дькьм».
ЧʹАРӘ БОНА ҺʹӘМУШКА
Әw се тьшт кö жоре һатьнә готьне, дәрберʹа рʹьһʹәтийе мәрʹа найньн, ле йәкә әw гöһастьнед мәзьн дькьн. Каролин дьбежә: «Әз һәла һе хwә нәрʹьһʹәт тʹәхмин дькьм. Ле ньһа әз qәдьре хwә заньм. Әз заньм wәки хwәде бона мьн хәм дькә, у гәләк һәвалед мьнә незик һәнә кö али мьн дькьн, у әз хwә рʹьһʹәт тʹәхмин дькьм». Рейчал жи сәр хwә öса тʹәхмин дькә. Әw дьбежә: «Щар-щара әз гәләк мәʹдәкьри мә. Ле щьватеда хушк у бьре мьнә рʹöһʹани һәнә, жь кʹижана әз дькарьм ширәта һьлдьм у аликʹарийе бьстиньм, кö бь позитив сәр тьшта бьньһерʹьм. У йа лапә фәрз, Баве мьни әʹзмана һәйә, тʹәви кʹижани кö әз дькарьм һәр рʹож хәбәрдьм. Әw йәк һʹәму тьшт дьгöһезә».
Кʹьтеба Пироз дьбежә кö дьнйа тʹәзә wе бе, кʹидәре кö һәр кәс жь мә wә бехоф у рʹьһʹәт бьжи
Диса чʹарәк әw ә кö wе хьлазийа хофийе у нәрʹьһʹәтийе бе. Кʹьтеба Пироз дьбежә кö дьнйа тʹәзә wе бе, кʹидәре кö һәр кәс жь мә wә бехоф у рʹьһʹәт бьжи. Хәбәра Хwәде соз дьдә мә: «Ле бәле дә һәр кәс дь бьн меwа хwәда у дь бьн даре хwәйи һежиреда рʹунен у йе кö wан бьтьрсинә тʹöнә бә» (Миха 4:4). Һьнге тʹö кәс wе öса нәкә кö әм хwә бехwәйи тʹәхмин кьн у wе тʹö кәс зийане нәдә мә. Һәла һе дәрдед гьран жи, wе нәкʹәвьнә бира мә (Ишайа 65:17, 25). Хwәде у Кöрʹе wи Иса Мәсиһ, wе «рʹастийе» биньн сәр әʹрде. Ахьрийеда, һʹәта-һʹәтайе wе рʹьһʹәти у бехофи һәбә (Ишайа 32:17).
a Һʹәму нав һатьнә гöһастьне.
b Шәʹдед Йаһоwа wан мәрьва тʹәглиф дькьн сәр һинбуна Кʹьтеба Пироз бепʹәрә, йед кö дьхwазьн незики Хwәде бьн.